Génesis 14 - Sharanahua: Diospan Tsain

Abram Lot numani

¹ Nantia nan nocofunu Amrafel mai Sinar anoafoan aton niaifo ini. Nocofunu futsan ahuun anu Quedorlaomer mai Elam anoafoan aton niaifo ini. Nocofunu futsan ahuun anu Tidal nan mai Goim anoafoan aton niaifo ini. Nocofunu futsan ahuun anu Arioc nan mai Elasar anoafoan aton niaifo ini.

² Nan rafu non rafuri niaifofo aton ranushumuafoya mucu fustiti niaifo futsafori aton ranushumuafoyari rutui fonifo. Nan mucu fustiti niaifofo Bera nan mai Sodoma anoafoan aton niaifo yafi Birsa nan Gomorra mai anoafoan aton niaifo non Sinab nan mai Adma anoafoan aton niaifo non Semeber mai Zeboim anoafoan aton niaifo yafi mai Bela anoafoan aton niaifo ini. Nan mai Bela ahuun anu futsa Zoar.

³ Ascan nan mucu fustiti niaifofoan aton ranushumuafo Sidim mai mispa ano ato ichanan huanifo anoshon ato rutushcaquin. Ascan nan Sidim ahuun anu futsa Unuhuan Saocoin ini.

⁴ Ascano doce farin nantifi niaifofo Quedorlaomer aton niaifocoin ipaoni. Nanton ato yonopaiyai cuscan nantifi ato yonopaoni. Ascan nan doce fari finontan nan mucu fustiti niaifofoan Quedorlaomer potapainifo afanan aton niaifocoin inonma.

^5-6 Ascan potapainifo cachori fari fusti finontan Quedorlaomer yafi a fu niaifo futsafo ahuun mai chaima icafo ato yoini niaifo futsafo rutushquin. Iquisi nan mai Astarot Karnaim ano noconifo. Nannoshon futsafo rutuqui finonnifo. Nanno Refaítafo non Zuzitafo nan mai Ham anoafoan non Emitafo nan mai Save-quiriataim mai mispa anoafo non Horeofo Machi Seir ano atirifi rutuaifono atirifi ichonifo Parán mai ano noconifo.

⁷ Ascasho Quedorlaomer yafi niaifo futsafo aton ranushumuafoya nasonifo En-mispat mai ano noconifo. Nan mai En-mispat ahuun anu futsa Cades ini. Nanno nantifi atoqui nocoashu rutunannifo. Nan Amalacitafo rutufain Amorreofori rutunifo. Nan Amorreofo Haseson-tamar mai ano ipaoni.

^8-9 Ascano Sodoma anoafo yafi Gomorra anoafo non Adma anoafo non Zeboim anoafo non Bela anoafori aton niaifofoan ahuun ranushumuafo yononi Sidim mai mispa ano fononfo. Nannoashu nan mucu fustiti niaifofoan ahuun ranushumuafoya futsafo fu rutunanni. Nan Quedorlaomer yafi Tidal non Amrafel non Arioc aton ranushumuafoya rutunannifo. Nan rafu non rafuri aton mai Elam yafi Goim non Sinar non Elasar ini.

¹⁰ Nan Sidim mai mispa ano tsoan quini huanima nanscara Dios oni huani quini muran shuni cuscara fisopa ofu chacacoin ini. Ascano nan Sodoma futan Gomorra anoafoan aton niaifofoan ranushumuafo ichoaino atirifi nan quini muran pacui futsunifo. Atirifi machi ano ichoaifoanno.

¹¹ Ascano nan rafu non rafuri niaifofoan aton ranushumuafo yononi nantifi Sodoma anoafo yafi Gomorra anoafoan aton mafofo yafi aton tushufo ato fianonfo.

¹² Nantiari Lot Sodoma ano ica ipaoni. Ascashon nan Lot yafi ahuun yorafori iyonifo. Ahuun mafo fianfain.

¹³ Ato asca huaifoanno nocofunu fusticoin ichocaini. Abram nan Hebreoqui chanicai. Nantiari Abram Mamre pushu chaima ica ini. Nanno nii uhuapa ichapacoin. Mamre ahuun caifori Amorreofo ini. A fu nanua rafu Escol yafi Aner. Abram ahuara yopai cuscan nan rafu non fustiton samamashta a futan ahuara huamisifo.

¹⁴ Ascano Abram ahuun ushto facu achiafo nicaquin tres cientos dieciocho nocofunufo cunani a futan Lot numanon. Nan nocofunufo nantifi Abram icano cainnifo. Ascashon Abram futan nanfoan ranushumuafo Lot numashcaquin mufainnifo. Ascashon mufaincani Dan mai ano atoqui noconifo.

¹⁵ Ascano nocotan yamunacucahuanaino Abram nan tres cientos dieciocho nocofunufo pashcanan huani ranushumuafo rutunonfo. Atoqui nocoaifoanno nantifi ranushumuafo ichonifo. Pushu rasi Hoba nan Damasco chaimashta ato mufainifo.

¹⁶ Ascashon Lot yafi ahuin numafain ainfo futsafo numafain nocofunu futsafori numanifo. Aton mafofori nantifi afanan finifo.

Niaifo Melquisedec Dioshuunshon Abram tsain shara yoini isharanon

¹⁷ Ascan nan niaifo Quedorlaomer yafi ahuun ranushumuafo non niaifo futsafo aton ranushumuafori Abram ahuun yorafo trescientos dieciocho nocofunufoan ato rutuqui finoncoinni. Ascaino niaifo futsafoan ahuun ranushumuafo ichoaiton Abram ahuun yorafoan mufainifo. Ascashu Abram nasoaino Sodoma anoa niaifocoin mai mispa Save ano aqui noconi. Nan Save mai mispa ahuun anu futsa Niaifoan ahuun mai misparan ishon anunifo.

¹⁸ Nantiari niaifo futsan ahuun anu Melquisedec Abramqui noconi. Nan Melquisedec Salem pushu rasi anoafoan aton niaifo ini. Ascan Diosifin nantifi mai anoafo yafi nai murannoafori finoncoianquin. Nan Melquisedec yorafohuunshon Diosi cufinmisi ipaoni. Nanton misi yafi fimi ahuun anu uva Abram fushoni.

^19-20 Asca huatan Melquisedec Abram yoiquin isca huani, —Nocon Diosin nantifi finoncoian. Nanton nantifi onihuani. Nantifi mai anoa oni huafain nai murannoafori oni huani. Abram, Diosin mia shara huanon. Upa Diosin nantifi finoncoian fasi sharacoin. Ahuunshon nan mia noicasmafo min ato finonfain ato min achiaran, —ishon Melquisedec Abram yoini. Ascaiton Abram nantifi aya cuscan fusti rasi Melquisedec inanpacuni.

²¹ Ascano nan Sodoma anoa niaifoan arifi Abram yoiquin isca huani, —Uhuun yorafo min ato numa. Ascacun nan uhuun yorafo fusti ua inanhuun. Uhuun pushu rasi anoa ahuara fiafo cuscan nantifi mina itiro. Un mia inanon, —ishon Sodoma anoa niaifoan Abram yoiaiton.

^22-23 —Ma. Un min ahuarafo fitiroma. Diosin nantifi mai anoafo oni huafain nai murannoafori oni huani. Ascan mina mian inanshon min yoitiro isca huaquin, “Un Abram inan cuscahuunoashu ahuara fasi ichapayaran,” ishon min yoitiro. Uncai mia ahuashta fiantiroma. Nannorifi un nocon Ifo Diosi yoiaquin. Uncai mina ahuara fipaima.

²⁴ Nan uhuun yorafo tres cientos dieciochofain pii fuaifo fusti un fitiro. Atirifi un fia cuscan un uhuun yorahuanfo Aner yafi Escol non Mamre inain. Nanfoan u futan nocon yorafo numaran, —ishon Abram yoini.