1 Samuel 19 - Sharanahua: Diospan Tsain

Saúl David rutupaipaoni

^1-2 Ascano chipo Saúl ahuun facu Jonatán yafi ahuun oinmatifo yoini isca huaquin, —David rutuhuun, —ishon ato yoini. Ascafiaino Jonatán fasi David noicoinquin a rututamarocon apan yoini cuscan David tapimani. —Uhuun upan mia rutupai. Oinfain funamari onutahuun.

³ Ascan min onuano un fasi funununnoashu uhuun upan fu un tsainquin mihuunoa. Asca nan ua yoiai cuscan un mia tapimanon, —ishon yoini.

⁴ Nan iyoconaino Jonatán apa fu tsainquin Davidhuunoa yoisharani isca huaquin, —Upashtan, minfin niaifoquin. David chaca huayamahuu. Aafin min oinmatiquin. Mia chaca huatamarocon mia shara huashomisi.

⁵ ¿Man min ointiaquimanamun Filisteo cuyamasocoian David rutuyamacun aatofin Goliat David rutu cuanaquin? Ascafia David Filisteo rutuaino nonfin Israelifo Diosinhuunshon fasi Filisteo ichapafo rutua nococai ahuusca huafoma. Ascaiton oin min fasi unima. ¿Ascan ahuuscai min David rutupaimun? Aatocai ahua chaca huamisima. ¿Min ipaitsi David rutupairan? —ishon Jonatán apa yoini.

⁶ Ascaiton nicaquin Saúl furu cumani isca huaquin, —Diosin ua nicaino un mia icon yoi. Uncai David ato rutumanimaran, —ishon yoini.

⁷ Ascan Jonatán apa yoia cuscan nicashon David cunani nantifi tapimashquin. Jonatán apa ano David iyoni. Nan iyopaoni cuscan David Saúl fu afanan ini.

⁸ Ascan chipo afanan Filisteofo funifo Israelifo fu rutunanshcaquin. David arifi ranushumuafo fu cani Filisteofo fu rutunanshquin. Ato rutuqui finacoiyainfoan oin Davidqui ratucani ichonifo.

⁹ Ascatan David afanan Saúl pushu ano nasoni a manushoshquin ahuun no muran unimanon. Asca huafiaino Saúl pushu muran tsaoshon ashi tsomani nocon Ifo Diosin Saulqui yoshin chaca nichinni nan fucashcoin huanon.

¹⁰ Ascan ahuun ashin David tsacapaiquin curushcain tsacani. Asca canufainnicai David ichoacuncahuanaino ashi cunuhuu nitani. Ascaino nan yamu David ichoni Saúl rutunonma.

¹¹ Ascashon Saúl ahuun ranushumuafo David pushu ano nichini cushunonfo. Ato yoiquin isca huani, —Funamarishta David pushu murannoashu cainyaiton rutucahuun, —ishon Saúl ato yononi. Ascaiton David ahuinin Mical tapishon funu yoini isca huaquin, —Min na yamu nunoashu cayamaiton funamarishta mia rutucaniran, —ishon ahuinin yoini.

¹² Ascatan Mical ahuun funu David cunu shoi caincaiti anoshon funu nichini. Nan yamu ichotanon.

¹³ Funu nichitan Mical ahuara yora ointsa rami huashon aton oshati muran racoshon ratani. Ahuun mapoquiri cabra ahuun ranin maraconi.

¹⁴ Ascan funamarishta David rutushquin achipaiyaifoan ahuin Mical ato yoini, —Uhuun funu isininqui racaran, —ishon ato yoiaino.

¹⁵ Saulqui chaniaifoan afanan ato yononi isca huaquin, —Ascan ahuun oshati muran racafiacun ua ihuushotacahuun un rutunon, —ishon ato yononi.

¹⁶ Ascaino David pushu muran iquifaitan oianfo ahuun oshati camaqui ahuara yora ointsa rami hua raca ini. Cabra ahuun ranin maracoshon rata ini.

¹⁷ Ascan Saúl ahuun facu Mical cunashon yoini isca huaquin, —¿Ahuuscai mian paranmun? Natian nan David un noicasmai min nichia un achinonma, —ishon yoini. —Upashtan, ua yoia cuscan un ayamaiton ua rutushquin ua huaaran, —ishon Mical cumani.

¹⁸ Ascan David Ramá pushu rasi ano ichoni. Ichoashu Samuel pushu ano noconi. Ascashon Saúl chaca hua cuscan nantifi David Samuelqui chanini. Aqui chaniaiton nicaquin Samuel nan mai Naiot ano David iyoni.

^19-20 Ascan David Naiot mai ano cacun futsan Saúl tapimani. Ascashon Saúl ranushumuafo nichini David achinonfo. Ascafiano nococashon oianfo Diosin tsain yoimisifo non aton niaifo Samuelri Diospan Yoshin Sharahuunshon Diosihuunoa yoiaifo. Nicacashon Saúl ranushumuafori Diosin ahuun Yoshin Sharapan ato shinanmasharaino arifi Diosihuunoa yoinifo.

²¹ Saúl atohuunoa nicaquin ranushumua futsafori atoqui nichini. Ascanori nanfoanri Diosin Yoshin Sharapan ato shinanmasharaino ahuun tsain yoinifo. Ascaino Saúl afanan futsafo nichini. Nanscari huaquin nanfoanri Diosin Yoshin Sharahuunshon yoinifo.

²² Ascano ipaitama Saúl arifi Ramá ano cani. Pozo ahuun anu Secú ano nocoshon futsafo yocani, —¿Ranimun Samuel yafi David? —ishon yocaiton. —Naiot Ramá ano icaforan, —ishon cumanifo.

²³ Nan nicatan Saúl ari cani. Nanscarifiaquin Diosin Yoshin Sharapan arifi iquinai cuscan nan cahuanaitishon Diospan tsain yoini Naiot mai ano nocoai chain.

²⁴ Ascan nocoshon Saúl ahuun sahuutifo pucashu racani. Samuel ointaifi chitoriashon shafatishon non yamutishon Diospan tsain yoiaiton oinquin futsafoan yoinifo isca huaquin, —¿Saúl arifi Diospan tsain yoimisimun? —ishon yoinifo.