1 Samuel 11 - Sharanahua: Diospan Tsain

Saúl ahuun ranushumuafo futan Amonitafo rutuni

¹ Nantian Amonitafoan aton niaifo ahuun anu Nahas ahuun ranushumuafo yoini isca huaquin, —Itisharacahuun non Jabes nan Galaad anoa Israelifo rutui fonon, —ishon ato yoiaino nantian fonifo. Ascashon Israeli nocofunufo Jabes ano icafoan niaifo Nahas yoinifo isca huaquin, —Man noco rutuyamacunfin non mato oinmati itiroquin, —ishon Israelifoan yoinifo.

² Nannori huaifoan nicaquin nan niaifo Nahas ato yoiquin isca huani, —Non nantifi maton furo ocuma futsa tsucashon manifoti anoa non ismai matohuunoa shinanquin isca huanonfo, “Nan Israelifocai ahuamaran,” ishon mato cashu mutsama huashquicaniran, —ishon niaifo Jabes Israelifo yoini.

³ Nannori huaiton nicacaquin Jabes pushu rasi anoafoan aton niaifofoan cumanifo, —Siete oshatan manayocahuun. Non nocon caifo nan icafoti anoa nocofunufo non atoqui nichinon min noco yoia cuscan ato tapimanonfo. Nan nocon yorafoan noco numayamaino nan min yoia cuscan min noco huatiroran, —ishon cumanifo.

⁴ Ascashu Jabes anoashu Gabaa pushu rasi ano Saúl icano nocoshon ato tapimanaifoanno nantifi fasi uainifo.

⁵ Nantian Saúl ahuun mau anoashu ahuun moifo cachori oni. Nan uaicaifoan nicain. Ascashon futsa yocani, —¿Uhuun yorafomun ahuuscashu fasi uaicaniquin? —ishon ato yocaiton. Ascano Jabes ano icafoan ato yoia cuscan Saúl tapimanifo.

⁶ Nannori nicatapaiyaino Saúl Diospan Yoshin Shara nantian a fu rafutapaiyaino ahuun curushhuunoashu fasi ahuun nomuran sinacoinni.

⁷ Ascashon nantian moi rafu rutushon fusti rasi ato pashcanan huaquin futsani. Ascashon nocofunufo nichini nan Israelifo icanoafoti nami fusti rasi ato inanonfo. Ascano Saúl ato nichia focashon ato yoiquin isca huani, —Noco yorafo yoicahuun “Amonitafo non rutui canon. Ascan nan noco fu ratoran futsa un non Samuel fu foyamaifo nan un moi rutushon ato shatumishti pashcanan hua cuscan aton moifori un nansca huairan,” —ishon Saúl ato yoini. Nannori nicacani nocon Ifo Diosin Israelifo fasi ratumacoinnifo. Ascashu Saulqui nantifi Israelifo ichanannifo.

⁸ Ascano nantian pushu rasi ahuun anu Bezec ano ichanannifo. Ascashon Saúl ato tanan huani. Nan Israel nocofunufo tres cientos mil icaifoanno Judáfo treinta mil inifo.

⁹ Ascashon Saúl afanan nocofunufo nichini Jabes ano icafo ato yoiquin isca huani, —Ato pushu rasi ano nocoshon ato yoicahuun funamari fari masafinin racano non ato numai caicain ishon ato nannori yoitacahuun, —ishon Saúl ato nannori yononi. Ascashu nan nocofunufo Jabes ano nococashon aton yorafoqui chaniaifoan nicacani fasi unimacoinnifo.

¹⁰ Ascashon Jabes anoafoan Amonitafo yoiquin isca huani, —Funamari man noco apaiyai cuscan man noco huatiroran, —ishon Jabesfoan Amonitafo yoini.

¹¹ Ascano iyoconaino Saúl Israelifo ahuun ranushumuafo ato nantifosi pashcanan huapani. Rafu non fusti manifo Amonitafo rutui fononfo. Amonitafoancai tapinifoma Saúl ahuun ranushumuafoya atoqui nocoriscatani. Ascashon nan shafatishon Israelifoan Amonitafo fari masafinin racano ato rutuquin cuyonifo. Nan ato rutuaifono Amonitafo ratucoincani pashcai futsunifo. Fusti rasi pashcai futsunifo.

¹² Asca huacatan Israelifoan Samuel yoinifo isca huaquin, —¿Ranimun nan nocofunufoan yoiafo, “Saulcai noco niaifo itiroma noco iquishquin?” Nocoqui ato ihuucahuun non ato rutunon, —ishon yoinifo.

¹³ Nannori yoifiaifoan Saúl ato yoiquin isca huani, —Nonfin Israelifoquin. Na shafata nocon Ifo Diosin noco numa. Ascan noncai tsoa futsa rututiromaran, —ishon Saúl ato yoini.

¹⁴ Ascano Samuel nantifi Israelifo yoini isca huaquin, —Non Gilgal ano fononfocahuun Saúl nocon niaifocoin ano non afanan nantifi yorafoan ointaifi non yoinon, —ishon Samuel nannori ahuun caifo Israelifo yoini.

¹⁵ Ascashu nantifi Israelifo Gilgal ano fonifo nocon Ifo Diosi ointaifi yoiquin isca huanifo, —Saulfin nocon niaifoquin, —ishon yoinifo. Ascatan nantian inafo rutunifo aton Ifo Diosi ato fu rafucoiaifoanno ismanonfo. Ascashu Saúl fu nantifi Israelifo fasi unimacoinnifo. Ascacatan fusinifo.