Yohana 6 - Maləmce Məfele mala Ɓakuli: Kurcau Məbəshe

Yesu linǝ́ aɓwana á-tongno

¹ A ɓe pwari anzǝm man ngga Yesu eauwe a nkaring Garang Galili, mǝnana à tunǝki gbal ama, Garang Tiberiya ka.

² Ɓwabunda mǝlake o ate, acemǝnana à sǝn agir-ndǝlǝki mǝnana twalban rǝkwana ka.

³ Yesu pǝlǝa eauwe amur nkono sǝ do andǝ alaggana male.

⁴ Anggo ka pwari Lamsan Yalimuru mala amǝ Yahudi gbashina.

⁵ Lang Yesu loasǝ muri sǝn nggea lakki mala ɓwapǝndǝa aban yiu abani ka, pǝlǝa ɗi Filip ama, “Ake sǝ sǝm nǝ̀ kúr girlina mǝnana aɓwabunda man kat nǝ̀ lì ka?”

⁶ Yesu na mǝnia yì cau ka nǝ̀ mwam Filip; aɓa mǝsǝcau ka surǝna rǝ gir mǝnana nǝ̀ pak ka.

⁷ Filip eari wi ama, “Ko ɓǝ̀ dinari na à nǝ̀ walo ace kúr girlina mǝnana ɓǝ̀ ko ya ɓwa nani ka ɓǝ̀ li ka, pà nǝ̀ karǝ ɗang.”

⁸ Sǝ ɓeɓwa mwashat aɓalǝ alaggana male, Andǝru mǝ'eam Shiman Bitǝrus, ne Yesu ama,

⁹ “Ɓe mǝlagga nia a kani nǝ agbatali nɗǝmo muku-bale tongno andǝ anji ɓari, sǝ mǝno ka, nǝ̀ karǝ man aban mǝnia yì lakki mala ɓwabunda ka.”

¹⁰ Yesu ne alaggana male ama, “Wu ne aɓwana ɓǝa dumnǝdo.” Pǝlǝa yia kat à do amur munabondo abanì. (Laki mala aburana nǝmurǝia ka bwal á-tongno.)

¹¹ Yesu pǝlǝa twal akuro-nɗǝmo, pakki Ɓakuli yàwá, sǝ gaki aɓwana mǝno à dumnǝdo ka. Anggo sǝ pang nǝ anji. Yia mǝno kat ka à lili girlina kárǝìa.

¹² Anzǝm mǝnana à ɗǝmnggina kat ka, pǝlǝa Yesu ne alaggana male ama, “Wu ramnggi acili girlina mǝnana à ué ka ace mǝnana kǝgir ɓǝ̀ kǝa kìɗìkì ɗang.”

¹³ Pǝlǝa à ramnggi ɓwanggine girlina mǝnana ɓwapǝndǝa li sǝ à nying cili aɓa kuro-nɗǝmo muku-bale tongno ka, à lumsǝki andakade lum-nong-ɓari nǝia.

¹⁴ Lang aɓwana mǝno nǝ sǝn gir'gyambǝliban mǝnana Yesu pe ka, à na ama, “Mǝsǝcau, mǝnia yì ɓwa ka nda mǝɓangna mala Ɓakuli mǝnana sǝm kundǝkiyi yiu male a ɓanza ka!”

¹⁵ Sǝ lang Yesu yi sǝlǝna ama, à ndo à nǝ̀ yia bwali à nǝ̀ ci ɓǝ̀ dupia wia murǝm púp ka, pǝlǝa nyar zàng amur nkono nǝmurǝì.

Yesu gya amúr mùr

¹⁶ Lang pwari kpana ka, alaggana mala Yesu kuti aban ká a kun garang.

¹⁷ À kya eauwe aɓa waru à nǝ̀ nyare aban o a nkaring garang a Kapanahum. Anggo ka ban bwalǝna sǝ Yesu malaká yiu abania ɗang.

¹⁸ Banì sau ɗang nggea gung mǝcande lo ɓua sǝ nda rǝ eaki nkono amúr mùr.

¹⁹ Anzǝm mǝnana à samsǝna, à bwalǝna kǝla mel tārú ko ine ka, kara à sǝn Yesu aban gya amúr mùr, kǝ yiu nǝ ban waru, sǝ yia ka ɓangciu pakkia wia kǝ̀rkǝ́r.

²⁰ Sǝ Yesu banggia wia ama, “Mǝ nda, ɓǝ̀ ɓangciu ɓǝ̀ kǝa pakka wun ɗang.”

²¹ Pǝlǝa à eare à twali atea aɓa waru, sǝ zuku ka waru yi kpashina a kún múr aban mǝnana à tsǝk muria kam ngga.

Aɓwana alta Yesu

²² Ban fana ka, ɓwabunda mǝnana ueo a nkaring mur mǝnana Yesu nyi ka, à yì sǝlǝ ama, kǝ waru na mwashat abanì, sǝ à sǝlǝna ama Yesu eauwe ata alaggana male ɗang, sǝ o malea ka pà atea ɗang.

²³ Aɓea waru mǝnana à pùr a Tiberiya ka à yiu à kya kpashi tu nǝ́ ban mǝnana Mǝtalabangŋo pak yàwá amur girlina sǝ pè ɓwapǝndǝa à li kam ngga.

²⁴ Lang ɓwabunda sǝni ka Yesu andǝ alaggana male pà abanì raka, à kutiki aɓalǝ awaru mǝno sǝ à o a Kapanahum, aban alta Yesu.

Yesu nda girlina mala yilǝmu

²⁵ Lang à yì kumǝni a ɓe nkaring garang ngga, à ɗi ama, “Rabbi, a ya pwari sǝ a yiu kani?”

²⁶ Yesu earia wia ama, “Mǝ nda ban na wun mǝsǝcau, wu pà aban altam acemǝnana wu sǝn agir-ndǝlǝki ka ɗang, nda ace girlina mǝnana wu li wu ɗǝmnggi ka.

²⁷ Sǝ wu kǝa wu pak turo ace girlina mǝnana kǝ kiɗiki ka ɗang; wu pak turo ace girlina mǝnana nǝ̀ pà wun yilǝmu mǝnana málá male pà kàm raka. Mǝnia ka nda girlina mǝnana Muna mala Ɓwa nǝ̀ pà wun ngga, acemǝnana Tarrû, yì Ɓakuli ka, tsǝngŋǝna bui ama earǝna nǝi.”

²⁸ Pǝlǝa à ɗi Yesu ama, “Mana sǝm nǝ̀ pa ace mǝnana ɓǝ̀ sǝm pak gir mana Ɓakuli earce ama ɓǝ̀ sǝm pak ka?”

²⁹ Yesu earia wia ama, “Gir mǝnana Ɓakuli earkiyice ama ɓǝ̀ wu pak ka, nda mǝnana ama, wu pa ɓamur wun aban ɓwa mǝnana turi ka.”

³⁰ À ɗi Yesu ama, “Sǝ, ya ulang gir pa-ndǝlǝki na a nǝ pa ace mǝnana ɓǝ̀ sǝm sǝni sǝ ɓǝ̀ sǝm earnǝ we ka? Mana a wu nǝ pa?

³¹ Aká sǝm li girlina mǝnana à tunǝki ama ‘Manna’ ka aɓa gya malea a ɓabondo. Malǝmce na ama, ‘Musa pea wia girlina mǝnana pur nǝ kuli ka ɓǝa li.’ ”

³² Yesu nea wia ama, “Mǝ nda ban bangga wun mǝsǝcau, Musa nǝ̀ pa wun girlina mǝnana pur a kuli ka ɗang, Tárram na pà wun ngga. Sǝ adyan ngga ndya kǝ pà wun girlina mǝ'mǝsǝcau nì mǝnana pur a kuli ka.

³³ Girlina mǝ'mǝsǝcau nì mǝnana Ɓakuli pākiyi ka nda Ɓwa mǝnana sulǝ nǝ kuli sǝ kǝ pe ɓanza yilǝmu ka.”

³⁴ À ne Yesu ama, “Ɓwamǝgule, wú kǝ̀ pa sǝm mǝnia yì girlina ka pwari-pwari.”

³⁵ Pǝlǝa Yesu bangŋa ama: “Mǝ nda girlina mala yilǝmu. Ɓwa mǝnana kat yiu abanam ngga pà nǝ̀ ok nzala ɗǝm ɗang, sǝ ɓwa mǝnana kat pàɓamuri abanam ngga pà nǝ̀ ok mǝsamur ɗang ko bǝti.

³⁶ Sǝ ado ka ǝn bangga wun ama wu sǝnǝ nam nǝ amǝsǝ wun sǝ kat andǝ amani ka wu earnǝ mim ɗang.

³⁷ Ɓwa mǝnana kat Tárram pam ngga nǝ̀ yiu abanam, sǝ ɓwa mǝnana kat yiu abanam ngga pà mǝ nǝ ɓínǝì ɗang.

³⁸ “Ən sulǝ nǝ kuli ace pak gir ɓamuram ɗang, ǝn yiu ace pak turo mala Tárram mǝnana tasǝam ngga.

³⁹ Sǝ mǝnia ka nda kànì mala Tárram mǝnana tasǝam ngga, ama ɓǝn ngga turta kǝɓwa aɓalǝ aɓwana mǝnana pam ngga ɗang, sǝ a kun mani ka ɓǝn loasǝia kat nǝ yilǝmu a masǝlǝata apwari.

⁴⁰ Gir mǝnana Tárram earkiyice ka, nda mǝnana ama ɓwa mana kat sǝn Muni sǝ paɓamuri abani ka, ɓǝ̀ kum yilǝmu mǝnana málá male pà kàm raka, sǝ mim gbal ka mǝ nǝ loasǝi nǝ yilǝmu a masǝlǝata apwari.”

⁴¹ Ace mǝno yì cau ka aɓwana-mǝgule mala amǝ Yahudi tita nggwani acemǝnana Yesu bangŋa ama yì ka, nda girlina mǝnana sulǝ nǝ kuli ka.

⁴² À bangŋa ama, Yesu ka nda muna mala Yisǝfu, mǝnana à surǝ tarrí andǝ ngge ka. Sǝ palang, adyan sǝ nǝ̀ na ama, sulǝ nǝ kuli?

⁴³ Pǝlǝa Yesu earia wia ama: “Wu ɗeki nggwani a rǝarǝ wun.

⁴⁴ Kǝɓwa pà nǝ̀ yiu abanam, mǝnana ɓǝ̀ Tárram mana turam ngga nǝ̀ nunni a rǝam raka. Sǝ mim ngga mǝ nǝ loasǝi nǝ yilǝmu a masǝlǝata apwari.

⁴⁵ Kǝla mǝnana à gilǝì aɓa Malǝmce mala amǝ'ɓangna ka: ‘Yia kat ka, Ɓakuli na nǝ̀ kania wia gir ka.’ Lǝmndǝ ama, ɓwa mǝnana kat kǝ kwaki kiri arǝ Ɓakuli Tarrû sǝ kǝ kànì abani ka, nǝ̀ yiu abanam.

⁴⁶ “Mǝnia ka pa aban lǝmndǝ ama, ɓe kǝ ɓwamǝpǝnde ka sǝnǝna Ɓakuli ɗang; kǝ mim ɓwa mǝnana pur nǝban Ɓakuli ka, nda kǝ mana sǝn Ɓakuli Tarrû ka.

⁴⁷ Mǝ nda ban bangga wun mǝsǝcau, ɓwa mǝnana paɓamuri abanam ngga, ndanǝ yilǝmu mǝnana málá male pà kàm raka.

⁴⁸ “Mǝ nda girlina mala yilǝmu.

⁴⁹ Aká wun li girlina mǝnana à tunǝki ama ‘Manna’ ka a ɓabondo, sǝ kat andǝ amani ka à wu.

⁵⁰ Sǝ girlina mǝnana pur nǝ kuli ka ndya ka. Ɓwa mǝnana kat li mǝnia yì girlina ka pà nǝ̀ wu ɗang.

⁵¹ Mǝ nda girlina mala yilǝmu mǝnana sulǝ nǝ kuli ka. Ɓwa mǝnana kat li mǝnia yì girlina ka nǝ̀ dumnǝ yilǝmu mǝnana málá male pà kàm raka. Sǝ mǝnia yì girlina ka nyam nggūrǝam na, mǝnana mǝ nǝ pa ace mǝnana ɓǝ̀ ɓanza kum yilǝmu ka.”

⁵² Pǝlǝa amǝ Yahudi kutia makgir a rǝarǝia, sǝ à na ama, “Lang sǝ ɓwa man nǝ̀ pà sǝm nyam nggūrǝi ama ɓǝ̀ sǝm li?”

⁵³ Yesu banggia wia ama: “Mǝ nda ban bangga wun mǝsǝcau, ɓǝ̀ wu li nyam nggurǝ Muna mala Ɓwa sǝ wu nu nkile raka, wu pànǝ yilǝmu aɓalǝ wun ɗang.

⁵⁴ Ɓwa mǝnana kat li nyamam sǝ nu nkilem ngga, ndanǝ yilǝmu mǝnana málá male pà kàm raka, sǝ mǝ nǝ loasǝi nǝ yilǝmu a masǝlǝata apwari.

⁵⁵ Acemǝnana nyam nggūrǝam ngga girlina mǝ'mǝsǝcau nì na, sǝ nkilem ngga gir nuna mǝ'mǝsǝcau nì na.

⁵⁶ Ɓwa mǝnana kat li nyam nggūrǝam, sǝ nu nkilem ngga, nda aban do a ɓalǝam, sǝ mim gbal mǝ ndanǝ do a ɓalǝi.

⁵⁷ “Kǝla mǝnana Tárram mana nǝ yilǝmu ka turam, sǝ àtàcau male sǝ ǝn dum nǝ yilǝmu ka, anggo gbal ɓwa mǝnana li nyam nggūrǝam ngga nǝ̀ dum nǝ yilǝmu àtàcau mem.

⁵⁸ Mǝnia ka nda girlina mǝnana sulǝ nǝ kuli ka. Pà kǝla ‘Manna’ mǝnana aká wun li sǝ nǝ nzǝmo ka à yì wuki ka ɗang. Sǝ ɓwa mǝnana li nyam nggūrǝam ngga pà nǝ̀ wu ɗang, nǝ̀ kum yilǝmu mǝnana pà nǝ̀ mal raka.”

⁵⁹ Yesu banggí amǝnia yì acau ka, mǝnana nda aban kanigir aɓa ndakpapi mala amǝ Yahudi aɓa Kapanahum ngga.

Acau Yilǝmu mǝnana málá male pà kàm raka

⁶⁰ Amǝkpate pas ok man yì cau ka sǝ à na ama, “Man yi kanigir ka kwanǝna, yana nǝ̀ gandǝ é?”

⁶¹ Kǝɓwa ne wi ɗang, sǝ Yesu ka sǝlǝna ama alaggana male na aban nggwani amur man yì kanigir ka, pǝlǝa nea wia ama, “Kanigir man tsǝk wun bum wun kiɗiki le?

⁶² Mana nǝ̀ duk ɗenyicau ma'wun yi mǝnana ɓǝ̀ wu sǝn Muna mala Ɓwa aban o a kuli aban mǝnana pur kam ngga?

⁶³ Bangŋo mala Ɓakuli na pākiyi yilǝmu ka; ɓariki mala ɓwapǝndǝa pa nǝ̀ pà yilǝmu ɗang. Acau mǝnana ǝn bangga wun ngga a mala bangŋo na andǝ yilǝmu.

⁶⁴ Sǝ aɓea aɓwana ata wun ngga à earnǝ cau mem ɗang.” Yesu ka angŋǝna dǝmbǝa surǝna rǝ aɓwana mǝnana à earnǝi raka, andǝ ɓwa mǝnana nǝ̀ ngga me ka.

⁶⁵ Pǝlǝa nea wia ama, “Mǝnia ka nda gir mǝnana tsǝa sǝ ǝn na wun ama, kǝɓwa pà nǝ̀ gandǝ yiu abanam ɗang, she ɓǝ̀ Tárram earǝnì wi ka.”

⁶⁶ Ace cau mǝnana Yesu na ka, twal àkǝ̀ pwari mǝno ka, amǝkpate pas nyari te, à o à ɗeki.

⁶⁷ Yesu pǝlǝ rǝi aban alaggana male mana lum-nong-ɓari ka sǝ ɗia ama, “Sǝ wun ngga, wu nǝ̀ o gbal le?”

⁶⁸ Shiman Bitǝrus eari wi ama, “Mǝtala sǝm, aban yan sǝ sǝm nǝ̀ ká le? A nda mǝnana nǝ cau mala pà yilǝmu mǝnana pà nǝ̀ mal raka.

⁶⁹ Sǝ adyan ngga sǝm pànà ɓamur sǝm, sǝ sǝm sǝlǝna ama a nda kǝ Mǝfele mǝnana pur aban Ɓakuli ka.”

⁷⁰ Pǝlǝa Yesu pa eare ama, “Ən tar wun, wun lum-nong-ɓari. Sǝ ɓeɓwa ata wun ngga shetan na!”

⁷¹ Yahuda muna mala Shiman Iskariyoti, nda ɓwa mǝnana Yesu nakiyi cau amuri ka. Kat andǝ amani ama nda aɓalǝ alaggana male mǝnana lum-nong-ɓari ka, yì nda ɓwa mǝnana nǝ̀ ngga me ka.