Yohana 2 - Maləmce Məfele mala Ɓakuli: Kurcau Məbəshe

Yesu tsǝk mur pǝlǝ murɓǝla-nggun anap

¹ A tāruia nongŋo ka, à ndanǝ isǝban a Kana a nzali Galili, sǝ nggea Yesu nakam abanì.

² À tunǝ Yesu andǝ alaggana male aban isǝbanì.

³ À nda ɓa pakiɗire ka, mùr ɓǝlanggun anap málá a rǝia. Nggea Yesu yi ne wi ama, “Mùr ɓǝlanggun anap malea malǝna.”

⁴ Pǝlǝa Yesu eari wi ama, “Nnâ, palang sǝ a oasǝam aɓa ce? Bu-pwari mala lǝmndǝrǝu mem malaká karǝ peatu ɗang.”

⁵ Nggea Yesu ne amǝ gau girlina ama, “Wu pak gir mǝnana kat bangga wun ngga.”

⁶ Àkǝ̀ banì ka, aganggǝlang mǝnana à kwária aɓa tali ka à ndakam abanì, yia tongno-nong-mwashat; amǝnana amǝ Yahudi kǝ soak mùr aɓalǝia à kǝ lakina rǝia nǝi andǝ agir ace peri a ɓadǝm Ɓakuli ka. Ko mǝ ye ka kǝ twal amunabang-mùr lumi-ɓari ko lumi-tārú.

⁷ Yesu ne amǝ gau girlina ama, “Wu to mùr wu lumsǝki aganggǝlang.” Sǝ à lumsǝkia kat nǝ mur.

⁸ Sǝ nea wia ama, “Adyan ngga wu ɗarǝa wu kya pe ɓwamǝgule mala pakiɗire isǝban.” Pǝlǝa à ɗarǝa à warini wi nǝi.

⁹ Sǝ ɓwamǝgule mala pakiɗire isǝban o mùr mǝnana à nyesǝi pǝlǝna mùr ɓǝlanggun anap ka. Sǝ yì ka, surǝ ban mǝnana à pusǝ mǝnia yì mùr ɓǝlanggun anap kam ngga ɗang (sǝ amǝ gau girlina mǝnana à ɗarǝ mùr nǝi ka à sǝlǝna). Sǝ pǝlǝa tunǝ bura-manfela a giriban.

¹⁰ Sǝ na ama, “Aɓwana pak ka à kǝ yinǝ mùr ɓǝlanggun anap mǝɓoarne a dǝmbǝa, ɓǝ̀ abǝri nuna karǝnia ka, sǝ à kǝ yiu nǝ mǝnana twal te ka; sǝ mo ka a tsǝk mǝɓoarne a nzǝmo!”

¹¹ Gir'ndǝlǝki mǝnia Yesu pe a Kana, a nzali Galili ka, nda mǝdǝmbe mala agir-ndali male mǝnana lǝmndǝ gulo male ka. Sǝ alaggana male sǝni à pa ɓamuria abani.

¹² Anzǝm man ngga, Yesu andǝ ngge andǝ amǝ'eambǝi andǝ alaggana male o a Kapanahum sǝ à kya nonggi kam zuku.

Yesu pǝr amǝ kurkuro a Ndàmǝgule mala Ɓakuli

¹³ Lang pwari Lamsan Yalimuru mala amǝ Yahudi gbashina ka, Yesu o a Urǝshalima.

¹⁴ Kya kum amǝ makki andá, andǝ anzur andǝ akutu, andǝ aɓwana mǝnana à dumǝna nǝ do aban nggaɗi boalo ka, aɓa Ndàmǝgule mala Ɓakuli.

¹⁵ Pǝlǝa Yesu peau nkamso nǝ nggur sǝ pǝria kat, andǝ anzur, andǝ andá, ɓǝa puri Ndàmǝgule mala Ɓakuli. Sǝ ndǝlǝkí agir, mesǝki amǝsǝ-boalo mala amǝ nggaɗi boalo.

¹⁶ Sǝ ne amǝ makki akutu ama, “Wu pusǝ agir mǝnia ka aban man! Wu kǝa nyesǝ Ɓala mala Tárram ɓǝ̀ duk limo ɗang!”

¹⁷ Sǝ ɓalǝ alaggana male kasǝa arǝ cau mǝnana Malǝmce na ama, “Rǝɓǝla mem arǝ Ɓala mo we Ɓakuli ka, nǝ̀ earke a ɓalǝam kǝla bǝsa.”

¹⁸ Aɓwana-mǝgule mala amǝ Yahudi ɗi Yesu ama, “Ya gir'ndǝlǝki na ado a wu nǝ pa, mǝnana nǝ̀ lǝmndǝa sǝm ama, Ɓakuli pano rǝcandǝa mala pak mǝnia yì gir ka?”

¹⁹ Yesu earia wia ama, “Wu arki man yì Ndàmǝgule mala Ɓakuli ka, sǝ aɓa nongŋo tārú ka mǝ nǝ loasǝi ɗǝm.”

²⁰ Pǝlǝa amǝ Yahudi ne wi ama, “Ndàmǝgule mala Ɓakuli mǝnana twal amǝɓa pǝlǝa lumi-ine-bwamndǝ tongno-nong-mwashat sǝ à ɓè ka, a na ama a wu nǝ ɓè aɓa nongŋo tārú?”

²¹ Sǝ Ndàmǝgule mala Ɓakuli mǝnana Yesu nakiyi ce ka, nda nggūrǝì.

²² Anzǝm mǝnana Yesu longŋǝni ɓembe ka, sǝ ɓalǝ alaggana male kasǝa ama, Yesu nania wia. Pǝlǝa à earnǝ Malǝmce andǝ acau mǝnana Yesu nea wia ka.

Yesu surǝ ɓabum ɓwapǝndǝa

²³ Mǝnana Yesu na a Urǝshalima a pwari Lamsan Yalimuru ka, aɓwana pas à sǝn agir-ndǝlǝki mǝnana pea ka, pǝlǝa à pà ɓamuria abani.

²⁴ Sǝ Yesu ka earnǝia ɗang, acemǝnana surǝna rǝ ɓwapǝndǝa kat.

²⁵ Yesu pà aban alte ɓǝ̀ kǝɓwa ɓǝ̀ ne wi cau amur ɓwapǝndǝa ɗang, acemǝnana yì nǝ ɓamuri ka surǝna rǝ ɓabum ɓwapǝndǝa.