Yohana 11 - Maləmce Məfele mala Ɓakuli: Kurcau Məbəshe

Lo mala Liazaro a ɓembe

¹ Ɓǝ̀ ɓwabura na kam lullǝi ama Liazaro. Rǝi pakki wi. Yì andǝ amǝ'eambǝi amuna-mamǝna ɓari, Maryamu andǝ Marta ka, à ndanǝ do a Betani.

² Mǝnia yì Maryamu mǝ'eambǝi Liazaro nong nǝ rǝkwana ka, nda kǝ mɓwama mǝnana nǝ nzǝmo yiu soapi Mǝtalabangŋo Yesu muru mǝ'rǝmɓoarne arǝ akusǝi, sǝ esǝki wi nǝ nyang-múrí ka.

³ Amǝ'eambu amamǝna mǝnia ɓari ka, à turban ata Mǝtalabangŋo Yesu ɓǝa ne wi ama, gyajam male, mǝnana earkiyi ace raka, rǝì eari wi ɗang.

⁴ Lang Yesu yi ok ce ka, na ama, “Rǝkwana mala Liazaro ka pà nǝ̀ ká nǝi a lú ɗang, nda ace lǝmndǝ gulo mala Ɓakuli, sǝ àkǝ̀ ce gbal sǝ Muna mala Ɓakuli nǝ̀ kum gulo.”

⁵ Yesu ka earce Marta andǝ amǝ'eambǝi Maryamu andǝ Liazaro.

⁶ Kat andǝ a mani ka, lang ok ce rǝkwana mala Liazaro ka, akrǝi pak aɓea nongŋo ɓari aban mǝnana ndakam ngga.

⁷ Anzǝm mani ka pǝlǝa banggi alaggana male ama, “Wu fa sǝm nǝ̀ nyare a Yahudi.”

⁸ Sǝ alaggana male ne wi ama, “Malǝm, àkǝ̀ dyan tu, sǝ amǝ Yahudi lo ama à nǝ̀ ɓukkio nǝ atali, sǝ a kǝ na ama a nǝ nyar kano ɗǝm le?”

⁹ Pǝlǝa Yesu earia wia ama, “Abúpwari mala tǎlaban aɓa pwari mwashat ka à nda lum-nong-ɓari. Nǝ pwari ka ɓwa nǝ̀ gandǝ gya pà nǝ̀ anndǝ ɗang, acemǝnana kǝ sǝn tǎlaban mala ɓanza man.

¹⁰ Sǝ nǝ dú ka, à nǝ̀ gandǝ annda, acemǝnana à pànǝ tǎlaban ɗang.”

¹¹ Pǝlǝa nea wia ama, “Gyajam ma'sǝm yi Liazaro ka kongŋǝna a ntulo, sǝ ado ka mǝ nǝ ká kam mǝ nǝ ngga loasǝi.”

¹² Sǝ alaggana male na ama, “Mǝtalabangŋo, ɓǝ̀ nda a ntulo ka, lǝmndǝ ama rǝì nǝ̀ malâ.”

¹³ Yia ka à twali ama mǝsǝrǝ ntulo na Yesu nakiyi ce ama Liazaro nonggi ka, sǝ Yesu ka nda arǝ na ama Liazaro wuna.

¹⁴ Pǝlǝa Yesu puria wia kwas, banggia wia ama, “Liazaro ka wuna.

¹⁵ Sǝ ace wun ngga, ban kǝ ɓoaram mǝnana ǝn pa abanì raka, acemǝnana ado wuni sǝ wun nǝ̀ pà ɓamur wun a banam pepe. Wu lo, sǝm nǝ̀ o abani.”

¹⁶ Toma (mǝnana à tunǝki ama Pasa ka) ne aɓi alaggana ama, “Wu longŋi kat sǝm nǝ̀ o ata Malǝm, ace mǝnana ɓǝ̀ sǝm kya wu ate!”

Yesu nda lo mala lú andǝ yilǝmu

¹⁷ Lang Yesu bwalǝna Betani ka, à banggi wi ama, Liazaro pangŋǝna nongŋo ine a ɓembe.

¹⁸ Betani ka sapi Urǝshalima ɗang, nda abani tu, yale bwal mel ɓari ɗang,

¹⁹ sǝ amǝ Yahudi pas yiu aban Marta andǝ Maryamu, à yiua girikia ace lú mala mǝ'eambǝia.

²⁰ Lang Marta ongŋǝna ama Yesu na kǝ yiu ka, puro nǝ̀ ngga kuli. Sǝ Maryamu ka ueo a ɓala.

²¹ Marta ne Yesu ama, “Mǝtalabangŋo, ɓǝ̀ pǝlǝ ama a ndakani ka, ɓǝ́ mǝ'eambǝam pa nǝ̀ wu ɗang!

²² Sǝ ǝn sǝlǝna ama, ko ado ka Ɓakuli nǝ̀ po gir mǝnana kat a zǝm ngga.”

²³ Yesu pǝlǝa banggi wi ama, “Mǝ'eambǝo nǝ̀ lo nǝ yilǝmu ɗǝm.”

²⁴ Marta na ama, “Ən sǝlǝna ama nǝ̀ lo nǝ yilǝmu a lo mala alú a masǝlǝata apwari.”

²⁵ Yesu ne wi ama, “Mǝ nda lo mala alú andǝ yilǝmu. Ɓwa mǝnana kat pà ɓamuri a banam ngga, ko ɓǝ̀ wu ka, nǝ̀ lo nǝ yilǝmu.

²⁶ Sǝ ɓwa mǝnana kat ndanǝ yilǝmu sǝ pà ɓamuri a banam ngga, pà nǝ̀ wu ɗang. A earǝna nǝ cau man le?”

²⁷ Pǝlǝa Marta eari wi ama, “E, Mǝtalabangŋo, ǝn earǝna nǝ we, ama a nda Kǝrǝsti Mǝ'amsǝban, Muna mala Ɓakuli, mǝnana Ɓakuli bangŋa ama nǝ̀ yiu a ɓanza ka.”

²⁸ Marta pǝlǝa nyare kya tunǝ mǝ'eambǝi Maryamu a giriban, sǝ ne wi ama, “Malǝm yina, sǝ kǝ earce sǝno.”

²⁹ Lang Maryamu nǝ̀ ok anggo ka, kara lo a kaurǝa, wario abani.

³⁰ Yesu ka malaká bwal là peatu ɗang, nda àkǝ̀ ban mǝnana Marta kumi kam ngga.

³¹ Lang aɓwana mǝnana ata Maryamu a ɓala, aban girike, sǝni lo pur tsuk-tsuk ka, à lo ate. À twali ama kǝ um nǝ o a ɓembe nǝ̀ ngga ɓua abanì.

³² Maryamu yi bwal ban Yesu. Lang mǝsǝì nǝ̀ kpa arǝ Yesu ka, yi kūndǝ a ɓadǝmbǝi, kǝ na ama, “Mǝtalabangŋo, ɓǝ̀ pǝlǝ ama a nda kani ka, ɓǝ́ mǝ'eambǝam wu ma ɗang!”

³³ Lang Yesu sǝni aban ɓua, sǝ sǝn aɓwana mǝnana à yiu ate ka aban ɓua gbal ka, gir nî je Yesu a ɓabumi kǝrkǝr.

³⁴ Pǝlǝa ɗia ama, “Ake ɗe sǝ wu ci?” Sǝ à ne wi ama, “Mǝtalabangŋo, yiu sǝni.”

³⁵ Yesu sukki mǝrǝm.

³⁶ Aɓwana mǝnana aban came abanì ka à na ama, “Wu sǝn ɓe kǝ earcearǝu mǝnana ndanǝi a rǝì ka!”

³⁷ Sǝ aɓia aɓwana na ama, “Mǝnia yì ɓwa ka gandǝ mǝn mǝsǝ nte, anggo re? Man tsǝa sǝ gandǝ tamsǝ lú mala Liazaro ɗang?”

Yesu loasǝ Liazaro a ɓembe

³⁸ Nǝ́ cê kùlkùl a ɓabumi piu ka, Yesu yi bik ban ɓembe. Ɓembe ka à gwami aɓa tali, sǝ à gir kuni nǝ tali.

³⁹ Yesu na ama, “Wu gǝshi talî!” Sǝ Marta mǝ'eam lú ne Yesu ama, “Mǝtalabangŋo, lú ka à ci pangŋǝna nongŋo ine adyan. Rǝmban mǝɓike nǝ̀ akiban!”

⁴⁰ Yesu banggi wi ama, “Ən no nǝma ɓǝ̀ a earnǝ mim ngga a nǝ sǝn gulo mala Ɓakuli re?”

⁴¹ Pǝlǝa aɓea ɓwana mǝnana abanì ka à gǝshi talî. Yesu loasǝ mǝsǝì a kuli sǝ na ama, “We Dâ, ǝn pakko yàwá mǝnana a ongŋǝnam ngga.

⁴² Ən sǝlǝna nǝma ko aya pwari ka a kǝ oem, sǝ ado ka ǝn na mǝnia yì cau ka ace aɓwana man kani ka, ace mǝnana ɓǝa ear ama a nǝ̀ turam.”

⁴³ Lang bangŋǝna anggo ka, sǝ tunǝban nǝ giu mǝcande, ama, “Liazaro, puro!”

⁴⁴ Pǝlǝa Liazaro mǝnana lú na ka puro, abuí andǝ akusǝi ka, à marǝkia nǝ bugir, sǝ ɓamǝsǝi ka, à marǝi nǝ nggurbyau. Yesu banggia wia ama, “Wu panzǝi, sǝ wu nyi ɓǝ̀ o!”

Kurkun amur Yesu

⁴⁵ Pas ata aɓwana mǝnana à yiua makki Maryamu kun, sǝ à sǝn gir mǝnia Yesu pe ka, à pà ɓamuria abani.

⁴⁶ Sǝ aɓea atea ka à o aban amǝ Farisi à kya banggia wia gir mǝnana Yesu pe ka.

⁴⁷ Pǝlǝa amǝ Farisi andǝ agbani pǝris tunǝ do mala amǝkurcau. À ɗi rǝia ama, “Mana ado sǝm nǝ̀ pa? Aɓa mǝsǝcau ka, ɓwa mǝnia nà kǝ pakki agir-ndǝlǝki pas ka!

⁴⁸ Ɓǝ̀ sǝm ɗeki sǝ lidǝmbǝa anggo ka, muna-ɓwapǝndǝa kat nǝ̀ earnǝi. Sǝ amǝ lwa mala amǝ Roma nǝ̀ yia kiɗiki Ndàmǝgule mala Ɓakuli ma'sǝm andǝ nzali ma'sǝm!”

⁴⁹ Mwashat aɓalǝia, mǝnana à tunǝki ama Kayafas, mǝnana nda Pǝris Mǝgule a baku mǝno ka, bangŋa ama, “Wu surǝ cau mǝnana wu nakiyi ka ɗang!

⁵⁰ Wu sǝlǝ mbo ama nǝ̀ ɓoaribanì ɓǝ̀ ɓwa mwashat wu ace aɓwana, amur mǝnana amǝ Roma ɓǝa yi twalta aɓwana mala nzali Yahudi ma'sǝm ngga?”

⁵¹ Mǝnia yì cau Kayafas ne ka, bangŋe mala ɓamuri na ɗang. Acemǝnana yì nda Pǝris Mǝgule a mǝno yì pǝlǝa ka, nda ɓangnǝ-ɓangna ama, Yesu nǝ̀ yia wu ace aɓwana mala nzali Yahudi ka.

⁵² Sǝ pà ace amǝ Yahudi nǝmurǝia ɗang, nda gbal ace acilia aɓwana kat arǝ anzali aɓa ɓanza, amǝnana à nǝ̀ yia pà ɓamuria aban Ɓakuli, sǝ nǝ̀ kpapi ɓamuria kat ɓǝa yi duk mwashat ka.

⁵³ Twal amǝno yì pwari ka, aɓwana mǝgule mala amǝ Yahudi kutia alkita anjar mǝnana à nǝ̀ wal-lú Yesu ka.

⁵⁴ Ace mani ka Yesu nyare ging ɗǝm bwāng aɓalǝ amǝ Yahudi ɗang. Nying Urǝshalima sǝ o a muna-la Ifǝrem, mǝnana nda nǝ ɓabondo, tu aban kpawanban ngga. Akano sǝ kya do andǝ alaggana male.

⁵⁵ Lang pwari Lamsan mala Yalimuru gbashina ka, amǝ Yahudi pas purkio arǝ aɓea aban aɓa nzali Yahudi sǝ à o a Urǝshalima, ace mǝnana ɓǝa kya gilǝki rǝia aɓa peri ace man yì Lamsan ngga.

⁵⁶ À camarǝ alta Yesu. À yì came aɓa Ndàmǝgule mala Ɓakuli sǝ à kǝ ɗiki rǝarǝia ama, “Lang sǝ wu sǝni? Nǝ̀ yiu a man yì Lamsan ngga le?”

⁵⁷ Anggo ka agbani Pǝris andǝ amǝ Farisi angŋa dǝmbǝa à hamǝna ama, ɓǝ̀ kǝɓwa surǝna rǝ ban mǝnana Yesu na kam ngga, ɓwe ɓǝ̀ yì na ce, ace mǝnana à nǝ̀ bwali ka.