Titus 3 - Maləmce Məfele mala Ɓakuli: Kurcau MəbəsheDo mǝnana karǝ arǝ amǝkwaɗi ka 1 Kasǝ ɓalǝ amǝkwaɗi ɓǝa kǝ oki nggwamnati andǝ amǝ-gara, ɓǝa kǝa mgbikia wia kiru ɗang. Ɓǝa do aɓa gilǝrǝu ace pak gir mǝnana kat mǝɓoarne na ka. 2 Banggia wia, ɓǝa kǝa na kǝ cau mǝɓane amur kǝɓwa ɗang. Yia ka, ɓǝa dukdo ɓukɓuka, ɓǝa ɗeki munǝki amunǝo, ɓǝa kǝ ak aɓwana a rǝia, sǝ ɓǝa kǝ lǝmndǝ nongsǝmuru mǝɓafoe aban ko ya ɓwa. 3 Sǝm ɗiɗyal gbal ka, sǝm ndaka aɓwana anggo sǝm kwar ɗang, amǝ'ɗwanyi okiru, à swarki sǝm, sǝm duk aguro mala gyata asuno andǝ anpel ɗàngɗáng mala nggūrǝu. Sǝm do aɓa bumkpǝmna andǝ mɓali. Aɓwana ɓinǝmǝsǝ sǝm, sǝ sǝm ɓinǝmǝsǝ arǝ sǝm. 4 Sǝ lang Ɓakuli Mǝ'amsǝ sǝm yì lǝmndǝna ɓwamuru andǝ earcearǝu male ka, 5 yi amsǝ sǝm. Sǝa ma pa ace kǝgir mǝɓoarne mǝnana sǝm pak ka ɗang, nda àkǝ̀ ce mǝsǝswatǝr male sǝ amsǝ sǝm. Lak sǝm, sǝ pà sǝm bǝsa ɓǝlban andǝ bǝsa do, nǝ rǝcandǝa mala Bangŋo Mǝfele; 6 Bangŋo Mǝfele male mǝnana soapa sǝmi aɓa paɓoro male, nǝ bu Yesu Kǝrǝsti Mǝ'amsǝ sǝm ngga. 7 Sǝ acemǝnana nǝ ɓwamuru male ka, sukkina acauɓikea ma'sǝm mǝnana à rambǝa amur sǝm, sǝ nyesǝna sǝm, sǝm pǝlǝna amǝ'cauɓoarna ka, sǝm yina aɓa tsǝkɓalǝu mala kum yilǝmu mǝnana masǝlǝate pà kàm raka ɓǝ̀ duk ma'sǝm. 8 Mǝnia yì cau ka, cau na à nǝ̀ guli a rǝì. Ən nggǝ earce nǝma wu cam nǝ rǝcandǝa amur amǝnia yì akanigir ka, acemǝnana aɓwana mana à nyingŋǝna ɓabumia aban Ɓakuli kat ka, ɓǝa pà ɓamuria arǝ pakki agir mǝɓoarne. Amǝnia yì akanigir ka nggea mǝɓoarne na, sǝ à ndanǝ mbweban mala bwali ko yana ka kam. 9 Kǝa kutio aɓa makgir mǝɓane amur bǝlkikusǝ atau mala akáu mǝnana a pwaryan ngga, andǝ nunggirǝu, andǝ munǝki amunǝo amur Nggurcau mala amǝ Yahudi ɗang. Amǝno yì amakgir ka à nda ɓà, kǝgir mǝɓoarne pà aɓalǝia ɗang. 10 Ɓwa mǝnana kǝ yinǝ gakia ka, kanì a nunkiri kusǝ mwashat, andǝ ɓaria, sǝ nggaɗi raka, nying buo arǝ ɓwe. 11 We ka, a sǝlǝna ama mǝno yì ɓwa ka, sharna aɓa cauɓikea, sǝ yì nǝ nggearǝì ka, ɓabumi mangŋǝni ama gir mǝnana pàkkì ka cauɓikea na. Masǝlǝata makkun mala Bulǝs 12 Ən nggǝ earce nǝma mǝ nǝ tasǝ Atimas ko Tikikus aban wun. Ɓǝ̀ yana atea sǝ bingŋǝna ka, ɓariki yiu abanam a Nikapolis, acemǝnana ǝn twalni a bumam mǝ nǝ ngga duk kano a kunɗwal. 13 Ɓǝ̀ lauya Zenas andǝ Apolo longŋa à nǝ̀ twal bǝri ka, ɓariki wu alia wia ta gir mǝnana à nǝ̀ bwalo a buia a njar ka, ace mǝnana ɓǝa kǝa ɗwanyi kǝgir raka. 14 Aɓwana ma'sǝm ngga, ɓoaro ɓǝa kǝ pakkia aturo mǝɓoarne ace kum girbu, ɓǝa ɗeki do mǝɓane. 15 Aɓwana mǝnana sǝm nda sǝnǝia kat ka, à kǝ makko kun. Makki amǝ'eamrǝarǝu kun, yia mǝnana sǝm nda sǝnǝia aɓa do kwaɗi ka. Ɓǝ̀ ɓwamuru mala Ɓakuli do ata wun. |
© Wycliffe Bible Translators, Inc. and © The Nigeria Bible Translation Trust 2016
Nigeria Bible Translation Trust