Sǝna 9 - Maləmce Məfele mala Ɓakuli: Kurcau Məbəshe

Tongnia twang njawe yiu nǝ gir murmwana mǝdǝmbe

¹ Lang tongnoia mǝturonjar twang njawe male ka, ǝn sǝn ɓe nlero mǝnana pur nǝ kuli, yi kpa a ɓanza ka. À pe mǝnia yì nlero ka kyî mala mǝn kun tuli-tàtǝkǝtè.

² Lang mǝn kun tuli-tàtǝkǝtè ka, kara yele kǝ purki kam kǝla yele mala bǝsa ɓa nda'nggun. Ɓamǝsǝ pwari andǝ bumkuli pǝlǝ pǝndǝa nǝ yele mǝnana kǝ pur aɓa tuli-tàtǝkǝtè ka.

³ Adoshi purkio aɓa yele nì à ara aɓa ɓanza. À pea amǝnia yì adoshi ka rǝcandǝa mala tākiban kǝla agenye ɓanza.

⁴ À nea wia ama ɓǝa kǝa je bondo ko agirpwala ko anggun mala ɓanza, ama à nǝ̀ tākia ɗang. Kǝ aɓwana mǝnana à pànǝ́ nyoulǝa mala parbu mala Ɓakuli a kundǝmbǝia raka, à nda à nǝ̀ tākia ka.

⁵ Ɓakuli eari adoshi man ɓǝa wal-lú ka aɓwana mǝnia ka ɗang. Kǝ tanni na à nǝ̀ pea wia ka, ba mala malà azongŋo tongno. Sǝ kwanban mala patanni malea na kǝla tāban mala genye.

⁶ Aɓalǝ azongŋo mǝno tongno ka, ɓwapǝndǝa nǝ alta lú, sǝ à pà nǝ̀ kumi ɗang; à nǝ̀ sham ce wu, sǝ lú ka, nǝ̀ upia wia kuko.

⁷ Amǝnia yia adoshi ka, à nda kǝla apǝr mǝnana à gilǝkia ace ká munǝo ka. À ndanǝ agir a ɓamuria kǝla ambulan zǝnariya, sǝ aɓamǝsǝia na kǝla ɓamǝsǝ ɓwapǝndǝa.

⁸ Nyang muria na kǝla nyang mur amamǝna, sǝ aminǝia na kǝla aminǝ im.

⁹ Mǝntongŋo damɓalǝia na kǝla ntongŋo mǝnana à pe nǝ bolo mǝcande; sǝ gǝshi amburia na kǝla gǝshi kusǝ apǝr andǝ akeke-pǝr pas mǝnana à kǝ soamire aban ká kun munǝo ka.

¹⁰ À ndanǝ anggilatau mǝnana à kǝ tākiban kǝla agenye ka. Anggilatea ka, à ndanǝ rǝcandǝa mala jiki aɓwana zongŋo tongno.

¹¹ Murǝm malea ka nda mǝturonjar mala tuli-tàtǝkǝtè. Lullǝi nǝ kun Ibǝru ka nda Abbadon, sǝ nǝ kun Gǝrik ka nda Apoliyon, Mǝkiɗikiban.

¹² Gir murmwana mǝdǝmbe kutina. Aɓea agir murmwana ɓari na à kǝ yiu ka.

Twang njawe mala tongno nong-mwashatia mǝturonjar yiu nǝ́ ɓaria gir murmwana

¹³ Tongno-nong-mwashatia mǝturonjar twang njawe male. Pǝlǝa ǝn ok giu pur nǝ kun anjawe mala gyangŋan zǝnariya mǝnana nda aban came a ɓadǝm Ɓakuli ka.

¹⁴ Kǝ ne tongno-nong-mwashatia mǝturonjar mǝnana nǝ njawe a bui ka ama, “Panzǝ amǝturonjar ine mǝnana à kùria a kun Nggeasala Yiufǝretis mǝgule ka.”

¹⁵ Pǝlǝa à panzǝ amǝturonjar nì ine, mǝnana yia ka à cia nǝ tsǝa aɓa gilǝrǝu ace mǝnia yì bu-pwari mala mǝnia yì pwari, andǝ zongŋo, andǝ pǝlǝa ka. Ado ka à panzǝnia ɓǝa wal-lú banì mwashat aɓalǝ agauwe tārú mala ɓwapǝndǝa kat a ɓanza.

¹⁶ Ən ok ɓeɓwa banggam lakki mala amǝpǝ̀r mǝnana atea anzǝm apǝr aban ká munǝo ka ama à nda milǝyan-gbǝman-ɓari.

¹⁷ Aɓa mǝnia yì sǝngir aɓa bangŋo à lǝmndǝam ngga, ǝn sǝn apǝr nì andǝ amǝpǝ̀r aban do a nzǝmia. Adaura-bolo mǝnana amǝpǝ̀r oasǝ a kikilia ka, aɓea ka amǝbangŋe na, aɓea ka amǝgbǝ̀lwì na, sǝ aɓea ka amǝ'gwalani. Apǝr ka, ɓamuria na kǝla mala im, sǝ bǝsa andǝ yele andǝ tali solfo mǝ'earke nǝ bǝsa ka, à kǝ pur aɓa kunia.

¹⁸ Amǝnia yia agirpatanni tārú ka: bǝsa andǝ yele andǝ tali solfo mǝ'earke nǝ bǝsa, mǝnana à kǝ pur aɓa kun apǝr mǝno ka, à twalta mwashat aɓalǝ agauwe tārú mala ɓwapǝndǝa kat a ɓanza.

¹⁹ Rǝcandǝa mala apǝr mǝnia ka nda aɓa kunia andǝ nggilatea; acemǝnana anggilatea ka à nda kǝla an'yau, à ndanǝ rǝcandǝa mala kwarki aɓwana.

²⁰ Cili ɓwapǝndǝa mǝnana auwa, agirpatanni mǝnia walia raka, à ginǝ pak bumkiɗikea arǝ aɓealɓikea malea, à ginǝ nyare aban Ɓakuli. À lidǝmbǝa nǝ peri a ɓadǝmbǝ akukwar andǝ ankúl mala zǝnariya andǝ azǝrfa, andǝ bolobangŋa, andǝ tali, andǝ nggun; amǝnana à kǝ sǝnban ɗang, à kǝ okban ɗang, sǝ à kǝ ging raka!

²¹ Sǝ ɗǝm ngga à ginǝ pwanzali à nǝ̀ pǝlǝ nzǝmia arǝ pakkiagir malea mala walki-alú, andǝ kpata agirmonzǝo, andǝ kìɗìkì mala nongginǝ rǝarǝu, andǝ iki'an'i.