Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Sǝna 8 - Maləmce Məfele mala Ɓakuli: Kurcau Məbəshe


Mǝgam fasǝ tongno-nong ɓaria gbatali myang

1 Lang Mǝgam fasǝ tongno-nong-ɓaria gbatali myang ngga, ban nyare pwal ɗǝong a kuli, yi pur a gauwa ɓalǝu mala bu-pwari mwashat.

2 Pǝlǝa ǝn sǝn amǝturonjar tongno-nong-ɓari mǝnana à camnggiyi a ɓadǝm Ɓakuli ka, à pea wia anjawe tongno-nong-ɓari.

3 Sǝ ɓe mǝturonjar mala Ɓakuli yiu yi came a ɓadǝm gyangŋan mala pisǝ mukugir ace loasǝ yele mǝ'rǝmɓoarne, nǝ tasau zǝnariya a bui, ace loasǝ yele. À pe wi mukugir mala loasǝ yele mǝ'rǝmɓoarne kpǝm ace mǝnana ɓǝ̀ kpapi andǝ ahiwi mala aɓwana mala Ɓakuli kat, sǝ ɓǝ̀ pisǝì, amur gyangŋan zǝnariya mǝnana cam a ɓadǝm bunomurǝm ngga.

4 Yele mala mukugir mǝ'rǝmɓoarne mǝnana kǝ lo a bu mǝturonjar ka, kpapya andǝ ahiwi mala aɓwana mala Ɓakuli, sǝ à eauwe aban ká aban Ɓakuli.

5 Pǝlǝa mǝturonjar twal tasau mala mukugir mǝ'rǝmɓoarne, lumsǝì nǝ nkalang-bǝsa mǝnana pwan aɓa bǝsa mǝnana amur gyangŋan ngga, sǝ nyesǝi turí, mesǝke aban yiu a nzali a ɓanza. Kara mgbarangce sàkkya, tǎlaban liki'nzama, sǝ nzali dǝurǝkio.


Twanggi anjawe yiu nǝ kiɗiki mala agir

6 Pǝlǝa amǝturonjar mǝno tongno-nong-ɓari nǝ́ anjawe a buia ka, à gilǝ rǝia à nǝ̀ twang njawe.

7 Lang mǝturonjar mǝdǝmbe twang njawe male ka, kara bǝsa andǝ mǝsǝtali-mbulo, mǝnana kpapi andǝ nkila ka puro, kǝ solo aban yiu a nzali amur ɓanza. Banì mwashat aɓalǝ agauwe tārú mala nzali ka bwal bǝsa; banì mwashat aɓalǝ agauwe tārú mala anggun pi kǝring, sǝ abondo mǝpwale kat ka, à pi kǝring.

8 Ɓaria mǝturonjar twang njawe male. Kara à tur ɓe kǝgir kǝla nggea nkono mǝgule mǝnana kǝ earki nǝ bǝsa ka, yi kpa aɓa nggeamur. Banì mwashat aɓalǝ agauwe tārú mala nggeamur ka, pǝlǝ nkila.

9 Banì mwashat aɓalǝ agauwe tārú mala agiryilǝmu mǝnana aɓa nggeamur ka, à wukio. Sǝ banì mwashat aɓalǝ agauwe tārú mala awarubǝsa a nggeamur ka, à kiɗikea.

10 Lang tāruia mǝturonjar twang njawe male ka, ɓe nggea nlero mǝgule kasǝa a kuli aban yiu a nzali. Kǝ earki nǝ bǝsa kǝla ɓukan, yi kpa amur banì mwashat aɓalǝ agauwe tārú mala amúr mǝnana aɓalǝ anggeasala andǝ amgbeaɗe ka.

11 À tunǝki nlero nî ama Mǝlulle. Yi tsǝk banì mwashat aɓalǝ agauwe tārú mala amúr nggeasala à pǝlǝ mǝlulle. Sǝ aɓwana pas mǝnana à nu mur nî ka à wukio, ace lullo male.

12 Anzǝm twang njawe mala inea mǝturonjar ka, Ɓakuli tulkia pwari andǝ zongŋo andǝ anlero, sǝ ace mǝno ka à ɗwanyi banì mwashat aɓalǝ agauwe tārú mala tǎ malea. Sǝ anggo ka banì mwashat aɓalǝ agauwe tārú mala tǎlaban nǝ pwari andǝ du ka à lǝmndǝ ɗang.

13 Lang ǝn soa mǝsǝam aban sǝnban ngga, ǝn ok gi nkwang mana nda ban yale, kǝ kuti nǝ bumkuli ka, kǝ hamnǝ cau nǝ giu bang-bang ama: “Gir murmwana! Gir murmwana! Gir murmwana amur aɓwana mǝnana à do a ɓanza ka, ace agir mǝnana à nǝ̀ yia kumban anzǝm twang njawe mala acili amǝturonjar tārú mǝnana à ueo, sǝ à mala nǝ̀ twang ngga!”

© Wycliffe Bible Translators, Inc. and © The Nigeria Bible Translation Trust 2016

Nigeria Bible Translation Trust
ကြှနျုပျတို့နောကျလိုကျပါ:



ကြော်ငြာတွေ