Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Sǝna 5 - Maləmce Məfele mala Ɓakuli: Kurcau Məbəshe


Mǝgam ak malǝmce mana à kǝ̀ karì ka nǝ̀ panzǝi

1 Aɓa bu-mǝli mala Yì ɓwa mǝnana do amur bunomurǝm ngga, ǝn sǝn ɓe malǝmce mana à kǝ̀ karì ka, mǝnana à gilǝ cau kam ɓālǝi andǝ nzǝmi, sǝ à lanzǝ kuni nǝ agbatali myang arǝ abanì tongno-nong-ɓari ka.

2 Sǝ ǝn sǝn ɓe nggea kanggǝrang mǝturonjar mala Ɓakuli came loasǝ gi bang-bang, aban hama ama, “Yana ɓwe kārǝa nǝ fasǝki amyang mǝnia à lanzǝkina kun mǝnia yì malǝmce nǝi ka, sǝ nǝ̀ panzǝi?”

3 Sǝ ko kǝɓwa pà kàm a kuli ko a nzali ko a ta nzali, mǝnana kārǝa nǝ̀ mǝn mǝnia yì malǝmce, ko nǝ̀ sǝn gir mǝnana à gilǝa a ɓalǝi ka ɗang.

4 Pǝlǝa ǝn kpa ɓua kǝrkǝr, acemǝnana à kum kǝɓwa mǝnana kārǝa nǝ̀ mǝn mǝnia yì malǝmce, ko nǝ̀ sǝn ɓālǝi ka ɗang.

5 Pǝlǝa mwashat ata aɓwana-mǝgule mǝno lumi-ɓari-nong-ine ka nam ama, “Pwalo, ce a ɓua ɗang! Sǝni, ɓwa mǝnana à tunǝki ama Im, a tau mala Yahuda, sǝ ɗǝm ngga Mǝkà murǝm Dauda na ka, linamurǝm mǝnana ci karǝna nǝ̀ fasǝki amyang-kun yì malǝmce, mǝnana à lanzǝi nǝia ka, sǝ nǝ̀ mǝnni.”

6 Pǝlǝa ǝn sǝn Mǝgam mǝnana pa kǝla à pwanmeali ka, nda aban came nǝ ɓaɓalǝu aban bunomurǝm, sǝ agiryilǝmu mǝno ine andǝ aɓwana-mǝgule ka, à kàrǝì aɓalǝu. Ndanǝ anjawe tongno-nong-ɓari andǝ amǝsǝu tongno-nong-ɓari, amǝnana à ndaka bangŋo tongno-nong-ɓari mala Ɓakuli mǝnana à tasǝia arǝ aban kat aɓa ɓanza ka.

7 Mǝgam nì pǝlǝa yiu yi ak malǝmce nî a bu-mǝli mala Yì ɓwa mǝnana do amur bunomurǝm ngga.

8 Lang angŋǝna malǝmce nî ka, agiryilǝmu mǝno ine andǝ aɓwana-mǝgule lumi-ɓari-nong-ine ka, à sarǝa a nzali a ɓadǝm Mǝgam. Koyana atea ka ndanǝ zangŋan, sǝ à bwal atasau zǝnariya a buia mǝnana à lumsǝia nǝ mukugir ace loasǝ yele mǝ'rǝmɓoarne ka; yì mukugir mala loasǝ yele mǝ'rǝmɓoarne ka nda ahiwi mala aɓwana mala Ɓakuli.

9 Pǝlǝa agiryilǝmu andǝ aɓwana-mǝgule mǝno tu bǝsa nggyal ama: “A karǝna wu ak malǝmce nî, sǝ wu fasǝki amyang-kuni. Acemǝnana we ka à pwanmealo, sǝ nǝ nkilio sǝ a akmúr aɓwapǝndǝa ace Ɓakuli, aɓa koya kun, andǝ koya lasǝu, andǝ aɓwana arǝ anzali ɗàngɗáng.

10 A nyesǝnia à pǝlǝna aɓwana mǝnana Ɓakuli ma'sǝm nda murǝm amuria, sǝ apǝris ace pakki wi turo, sǝ à nǝ̀ duk agbani a ɓanza.”

11 Lang mǝ ndaban sǝnban ngga, ǝn ok gi amǝturonjar mala Ɓakuli pas. Lakki malea na á-pas andǝ amilǝyan amur amilǝyan! À gumbǝli bunomurǝm andǝ agiryilǝmu andǝ aɓwana-mǝgule aɓalǝu.

12 À loasǝ gia a kuli à tu'nggyal ama: “Mǝgam mǝnana à pwanmeali ka, karǝna ɓǝ̀ ak garamurǝm, andǝ kume, andǝ sǝlǝe, andǝ rǝcandǝa, andǝ gusǝlǝban, andǝ ɓoarɓwa, andǝ ɓwangsǝban!”

13 Pǝlǝa ǝn ok agir kat mǝnana Ɓakuli pusǝia ka, amǝnana a kuli ka, andǝa mǝnana a nzali ka, andǝa mǝnana a tǝta nzali ka, andǝa mǝnana a tamur ka, aban ɓwangsǝki Ɓakuli. À tu'nggyal ama: “Ɓwangsǝban andǝ gulo, andǝ ɓoarɓwa, andǝ rǝcandǝa ka, ɓǝa pe Yì ɓwa mǝnana do amur bunomurǝm ngga sǝ ɓǝa pe Mǝgam, málá male pà kàm ɗang!”

14 Agiryilǝmu mǝno ine ka, à ear ama, “Amin!” Sǝ aɓwana-mǝgule ka, à kpa a nzali aban peri.

© Wycliffe Bible Translators, Inc. and © The Nigeria Bible Translation Trust 2016

Nigeria Bible Translation Trust
ကြှနျုပျတို့နောကျလိုကျပါ:



ကြော်ငြာတွေ