Sǝna 3 - Maləmce Məfele mala Ɓakuli: Kurcau Məbəshe

Cautera aban ikǝlisiya mǝnana a Sardis ka

¹ Gilǝî mǝturonjar mala ikǝlisiya mǝnana a Sardis ka ama: Mǝnia ka nda cautera mǝnana pur nǝban Yì ɓwa mǝnana bwal abangŋo tongno-nong-ɓari mala Ɓakuli andǝ anlero tongno-nong-ɓari a bui ka. Ən surǝ aturo mo. Aɓwana kǝ twalo ama a ndanǝ yilǝmu, sǝ mǝsǝcau ka, a nda lú.

² Lo, sangsǝ amǝsǝo! Agir mǝnana à ueoko sǝ à malanǝ wu ka, loasǝia ɓǝa dum nǝ rǝcandǝa. Ən kum aturo mo a ɓadǝm Ɓakuli mem ngga, à gatti.

³ Nyesǝ ɓalǝo nǝ nzǝmo, ɗenyi nǝ agir mǝnana a ok atadǝmbe, sǝ a pa ɓabumo a rǝia ka; bwalia kàngkàng, sǝ wu pǝlǝ nzǝmo arǝ acauɓikea mo. Ɓǝ̀ mǝsǝo sa sǝ a lo raka, mǝ nǝ yipo a bu-pwari mǝnana a tsǝk ɓalǝo raka, kǝla yiu mala mǝn'i.

⁴ Akana a Sardis she ka aɓwana nakam bǝti mǝnana à pǝndǝki adaura malea nǝ cauɓikea raka. Mǝ nǝ ging sǝnǝia aɓalǝ adaura pwasǝa, acemǝnana yia ka à karǝna.

⁵ Ɓwa mǝnana limurǝm ngga mǝ nǝ oasǝi wi daura pwasǝa a rǝì kǝla mǝno, sǝ pà mǝ nǝ kasǝ lullǝi ɗang aɓa Malǝmce Yilǝmu. Mǝ nǝ bang ce a ɓadǝm Tárram andǝ amǝturonjar male ama yì ka, mem na.

⁶ Ɓwa mǝnana ndanǝ kir okban ngga, ɓǝ̀ ok cau mǝnana Bangŋo kǝ banggi a'ikǝlisiya ka!

Cautera aban ikǝlisiya mana a Filadefiya ka

⁷ Gilǝî mǝturonjar mala ikǝlisiya mǝnana a Filadefiya ka ama: Mǝnia ka nda cautera mǝnana pur nǝban Yì ɓwa mana nda Mǝfele sǝ nda Mǝ'mǝsǝcau ka, yì ɓwa mana bwal kyî mala Dauda a bui ka. Gir mǝnana mǝnǝni ka, kǝɓwa kārǝa nǝ̀ gìrì ɗang, sǝ gir mǝnana gìrnì ka, kǝɓwa kārǝa nǝ̀ mǝnni ɗang.

⁸ Ən surǝ aturo mo. Sǝni ǝn mǝnbǝno kunkurǝm a ɓadǝmbǝo mǝnana kǝɓwa kārǝa nǝ̀ gìrì raka. Ən sǝlǝna ama rǝcandǝa mo na bǝti, sǝ kat andǝ amǝno ka, a bwal cau mem, a kpate, sǝ a ginǝce lullǝam ɗang.

⁹ Ado ka a nǝ sǝn gir mǝnana mǝ nǝ pakki amǝno yì aɓwana mana à ndaka amǝ ndakpapi mala Shetan ngga. À bangŋa ama yia ka amǝ Yahudi, aɓwana mala Ɓakuli na, sǝ nyir na à nakiyi ka. Ən nggǝ banggo, mǝ nǝ cia à nǝ̀ yiu abano, à nǝ̀ yia ɓun a nzali a ɓadǝmbǝo, sǝ à nǝ̀ eare ama wu nda ka kǝ aɓwana mǝnana ǝn nggǝ earcea ka.

¹⁰ Acemǝnana a kpana ta nzongcau mem mala do gandǝrǝu aɓa mǝkwane nǝ munyi ka, mǝ nǝ yallo, a nǝ api pwari mala nggea tanni mǝnana kǝ yiu amur ɓwapǝndǝa kat a ɓanza, ace mwam aɓwana mǝnana a mala ɓanza na ka.

¹¹ Banì pà nǝ̀ sau ɗang, mǝ ndya ǝn nggǝ yiu ka. Bwal gir mǝnana a ndanǝi ka kàngkàng, ace mǝnana kǝɓwa ɓǝ̀ kǝa ako tangnakusǝu mbulan-murǝm mo raka.

¹² Ɓwa mǝnana limurǝm ngga, mǝ nǝ ci nǝ̀ duk tanggea-nggun, aɓa ndàmǝgule mala Ɓakuli mem, sǝ pà nǝ̀ puri ɓālǝi ɗǝm ɗang. Mǝ nǝ nyouli wi a rǝì lullǝ Ɓakuli mem andǝ lullǝ bǝsa Urǝshalima mǝnana kǝ sulǝ nǝ kuli ka, yì nggeala mala Ɓakuli mem; ɗǝm ngga mǝ nǝ nyouli wi bǝsa lullǝam a rǝì.

¹³ Ɓwa mǝnana ndanǝ kir okban ngga, ɓǝ̀ ok cau mǝnana Bangŋo kǝ banggi a'ikǝlisiya ka!

Cautera aban ikǝlisiya mǝnana a Lawodisi ka

¹⁴ Gilǝî mǝturonjar mala ikǝlisiya mǝnana a Lawodisi ka ama: Mǝnia ka nda cautera mǝnana pur nǝ bani, yì ɓwa mǝnana nda Amin, mǝ'nakún mǝ'mǝsǝcau nì sǝ mǝɓafoe, mǝyalban amur agirbunda mǝnana Ɓakuli pusǝia ka.

¹⁵ Ən surǝ aturo mo, ama we ka, a pî ɗang, sǝ a pwal ɗang. Eare mem ngga, ɓǝ́ a nda kùlkùl ko ɗwal!

¹⁶ Sǝ acemǝnana a nda lùlù, a pwal ɗang, sǝ a pî raka, mǝ ndo mǝ nǝ polǝo.

¹⁷ A kǝ ne ɓamuro ama a nda mǝkume, a rambǝna gǝna, sǝ a ɗwanyi kǝgir ɗang! Sǝ a sǝlǝ ɗang ama we ka a nda mǝtapwasǝa, gir-mǝsǝswatǝr, mǝtǝr, nte, sǝ a ndanǝ ɓato.

¹⁸ Ace mǝno ka, ǝn nggǝ kwarkiro wu kúr zǝnariya mǝɓoarne a buam, zǝnariya mǝnana à gilǝkice nǝ bǝsa ka, ace mǝnana wu duk mǝkume. Kúr agir-nggurǝu mǝpwasǝe a buam, mǝnana a nǝ túr a rǝo sǝ a nǝ kumsǝ do-gbǝrangtang mo mǝpà kǝsǝke ka. Sǝ wu kúr mùru-ɓuri mǝsǝu a buam, mǝnana a wu nǝ hasǝ a mǝsǝo ace mǝnana wu sǝnban ngga!

¹⁹ Aɓwana mǝnana kat ǝn earcea ka, ǝn nggǝ sâ rǝia, sǝ ǝn nggǝ kwarkiria. Ace mǝno ka, pak bumkiɗikea, sǝ wu pǝlǝ nzǝmo arǝ aɓealɓikea mo nǝ ɓabumo kat!

²⁰ Sǝni! Mǝ ndya ǝn came a kunkurǝm ǝn nggǝ pak kou ka! Ɓwa mǝnana kat ok giem sǝ mǝn kunkurǝm ngga, mǝ nǝ kutio ate, sǝ sǝm nǝ̀ lili a tarǝ sǝm sǝnǝi, kǝla agyajam.

²¹ Ɓwa mǝnana limurǝm ngga mǝ nǝ yinǝi nǝ̀ yia do atam amur bunomurǝm mem, kǝla mǝnana ǝn limurǝm sǝ ǝn yi do ata Tárram amur bunomurǝm male ka.

²² Ɓwa mǝnana ndanǝ kir okban ngga, ɓǝ̀ ok cau mǝnana Bangŋo kǝ banggi a'ikǝlisiya ka!