Sǝna 19 - Maləmce Məfele mala Ɓakuli: Kurcau Məbəshe

Ɓwabunda tu-nggyal limurǝm a kuli

¹ Anzǝm mǝnia ka, ǝn ok giu kǝla loasǝban mala ɓwabunda mǝlake kǝrkǝr a kuli, à kǝ na ama, “Haliluya! Amsǝban andǝ ɓoarɓwa andǝ rǝcandǝa ka, amala Ɓakuli ma'sǝm na.

² Aɓashi male ka, kǝ pea aɓa mǝsǝcau andǝ kpate a nzongŋi. Pangŋǝ́nì man'gyatarǝu mǝgule ɓashi; yì man'gyatarǝu ka nda kiɗiki ɓanza nǝ ɓealǝu mǝɓane male mala gyatarǝu aban nonggi nǝ aburana ka. Ɓakuli pangŋǝ́nì wi mǝɓane a kunì walo mǝnana wal-lú aguro male ka.”

³ À nyare à loasǝ gia ɗǝm kpǝm ama: “Haliluya! Yele mǝnana kǝ lo aɓa pi mala man'gyatarǝu mǝgule ka, nǝ̀ nggǝ o a kuli málá male pà kàm ɗang!”

⁴ Aɓwana mǝgule lumi-ɓari-nong-ine andǝ agiryilǝmu ka, à sarǝa a nzali aban peri a ɓadǝm Ɓakuli mǝnana do amur bunomurǝm ngga. À loasǝ gia à bangŋa ama: “Amin, Haliluya!”

⁵ Pǝlǝa ɓe giu pur nǝ ban bunomurǝm, na ama: “Wu ɓwangsǝ Ɓakuli ma'sǝm, wun aguro male kat, wun mana wu kǝ ɓanggi wi ka, twal aban ɓwa mǝkyauwe aban ká aban ɓwamǝgule!”

Li girlina isǝ mɓwama mala Mǝgam

⁶ Sǝ ǝn ok ɓe giu ɗǝm, kǝla gi ɓwabunda mǝkǝrkǝr nì aban mak gawan, kǝla gi songnǝo mala nggeamur, sǝ kǝla sàkkya mala mgbarangce mǝkǝrkǝr nì, à kǝ na ama: “Haliluya! Mǝtalabangŋo Ɓakuli ma'sǝm mana Karban kat ka, nda Murǝm ado, sǝ gir kat ka, nda aɓata yalban male.

⁷ Ɓǝ̀ sǝm pak banɓoarnado andǝ pakiɗire, sǝ ɓǝ̀ sǝm pe wi gulo. Pwari isǝban mala Mǝgam yina, sǝ Manfela male ka, gilǝkina rǝì.

⁸ À pani wi nggurbyau linen mǝɓoarne, mǝpwasǝe pwapwat, ɓǝ̀ oasǝ a rǝì.” Nggurbyau linen mǝɓoarne ka, nda cam a kúnì aturo mǝɓoarne mala aɓwana mala Ɓakuli ka.

⁹ Pǝlǝa mǝturonjar banggam ama, “Gilǝ cau mǝnia ka: ‘Tsǝkbu mala Ɓakuli na amur aɓwana mǝnana à tunǝia aban ká aban li girlina isǝban mala Mǝgam ngga!’ ” Sǝ na ɗǝm ama, “Amǝnia ka, à ndaka cau mǝ'mǝsǝcau nì mala Ɓakuli.”

¹⁰ Lang ǝn ok cau mǝno ka, kara ǝn kpa a nzali a ɓadǝm mǝturonjar nǝma mǝ nǝ peri abani. Sǝ yì ka, banggam ama, “Awo, kǝa peri abanam ɗang! Mim ngga mǝ nda ɓeo guro andǝ ɓi guro ata amǝ'eambǝo amǝkwaɗi, mǝnana à kǝ banggi aɓwana cau amur Yesu ka. Peri aban Ɓakuli nǝmurǝì ɓǝrɓǝr, acemǝnana bangŋo mala ɓangna nda cau mala Yesu.”

Yesu puro nǝ̀ ká lwa arǝ aɓwana mala Shetan

¹¹ Pǝlǝa ǝn sǝn kuli mǝna, sǝ ǝn sǝn pǝ̀r mǝpwasǝe aban came kam. Ɓwa mǝnana do a nzǝmi kwakiyi ka, lullǝi nda Mǝ'mǝsǝcaunì andǝ Mǝɓafoe. Aɓa ɓashiki aɓashi male andǝ munǝki amunǝo male ka, kǝ kpata agir kat a nzongŋi.

¹² Amǝsǝì na kǝla bǝsa mǝnana kǝ earki ka, sǝ a ɓamuri ka, asukuru-murǝm na kam pas. Ndanǝ lullǝu mǝnana à gilǝì a rǝì, sǝ yì nǝmurǝì na surǝ lullǝuî ka. Kǝ ɓwa pà kàm ɗǝm surǝì ɗang.

¹³ Oasǝ nggea-daura mǝnana à parri aɓa nkila ka, sǝ lullǝu mǝnana à tunǝki nǝi ka, nda “Cau mala Ɓakuli.”

¹⁴ Amǝ'lwa mala kuli, mǝnana à tur adaura pwasǝa mala nggurbyau linen a rǝia ka, à puro anzǝm apǝr mǝpwasǝke, sǝ à kǝ yiu ate.

¹⁵ A ɓakuni ka, nggeabyau mǝceauwe kǝ puro mǝnana nǝ̀ gandǝna aɓwana nǝi arǝ anzali, mǝnana à mgbikiru ka. “Nǝ̀ yal muria nǝ gara-bolo.” Aɓiamǝbura ka nǝ̀ parkia aɓa tūli ɓa nggea tali kamnggi mùr-anap. Nǝ̀ pak mǝnia ka ace lǝmndǝ bumlulla mǝcande mala Ɓakuli mana Karban kat ka amur amǝ'ɓealɓikea.

¹⁶ Arǝ daura male aban byali ka, lullǝu na kam à gilǝì ama: MURƏM MALA AMURƏMA ANDƏ GBANI AMUR AMƏTALA ANZALI.

¹⁷ Pǝlǝa ǝn sǝn ɓe mǝturonjar mala Ɓakuli aban came amur pwari a kuli. Loasǝ gi bang-bang na cau nǝ anyal mǝnana à kǝ yal a bumkuli ka ama: “Wu yiu! Wu yì rambǝa ace lili mǝgule mǝnana Ɓakuli gilǝki ka.

¹⁸ Wu yiu wu yì li nyam amurǝma, andǝ aɓwana amǝcande, andǝ akanggǝrang amǝ'lwa. Wu yiu wu yì li nyam apǝ́r andǝ amǝpǝ̀r, nyam aɓwapǝndǝa kat, aguro andǝ aɓwana à dukdo ɓamuria ka, ɓwa mǝkyauwe andǝ ɓwa mǝgule.”

¹⁹ Pǝlǝa ǝn sǝn nyamɓikea, andǝ amurǝma mala ɓanza, andǝ amǝ'lwa malea, à yì rambǝa abanɓwáná, à nǝ̀ ká nǝ lwa arǝ ɓwa mǝno do anzǝm pǝr kwakiyi ka, sǝ arǝ amǝ'lwa male.

²⁰ Sǝ yì nyamɓikea ka, à bwali atarǝia andǝ mǝɓangna mǝ'nyirì mǝnana pakkiyi agir-ndali ace ka. Nǝ amǝno yì agir-ndali pea ka sǝ ɓosǝki ta aɓwana mǝnana à ak nyoulǝa mala nyamɓikea, sǝ à peri aban ɓǝ̀nzál male ka. Nyamɓikea andǝ mǝɓangna male mǝ'nyirì, yia kǝm, à turia nǝ yilǝmia aɓa garang mala bǝsa mǝnana kǝ li nǝ atali ear-bǝsa ka.

²¹ Amǝ'lwa malea ka, à twaltea kat nǝ nggeabyau mǝceauwe mǝnana kǝ pur a kun ɓwa mǝnana anzǝm pǝr kwakiyi ka. Sǝ adǝkǝlaki yi sulǝo amur aluia, à li gir mǝnana kárǝìa ka.