Sǝna 17 - Maləmce Məfele mala Ɓakuli: Kurcau Məbəshe

Ɓashi mala Ɓakuli amur man'gyatarǝu mǝgule

¹ Mwashat ata amǝturonjar tongno-nong-ɓari mǝnana nǝ atasau tongno-nong-ɓari ka, yiu abanam. Nam cau ama, “Yiu atam, mǝ nǝ lǝmndǝo ɓashi mala Ɓakuli mǝnana nǝ̀ yiu amur man'gyatarǝu mǝgule, yì nggeala mǝnana à ɓè aban anggeasala pas ka.

² Amurǝma mala ɓanza pak cauɓikea nongginǝban andǝi, sǝ aɓwana mǝnana à nda ka amǝɓanza man ngga, à ɓosǝkinia à nuna mùr-anap mala cauɓikea male mala nongginǝ-rǝarǝu kǝrkǝr, gandǝa à wal-wale.”

³ Pǝlǝa mǝturonjar twalam aɓa bangŋo um nǝ mim a njarnza. Akano ka ǝn sǝn mɓwama aban do anzǝm nyamɓikea mǝbangŋe mǝnana ndanǝ aɓamuru tongno-nong-ɓari andǝ anjawe lum, andǝ alullǝu sangban arǝ Ɓakuli, mǝnana à gilǝia a rǝì kat ka.

⁴ Mɓwame oasǝ agir-nggurǝu mana kurea cande ka, andǝ agir gilǝkirǝu mǝnana à pea nǝ zǝnariya, andǝ amǝsǝ-nlang, andǝ amǝsǝtali-gǝna mǝtanzame. Bwal kwap zǝnariya a bui, mǝnana lumsǝna nǝ agir ɓeakǝno andǝ agir pǝndǝkea mala nonggi nǝ aburana male ka.

⁵ Lullǝu na kam à gilǝì a kundǝmbǝi mǝnana ɓālǝi ka girsǝmbǝrǝa na. Lullǝui ama: BABILA, NGGEALA MƏGULE, NGGEAU MALA KOYA KÌƊÌKÌ MALA NONGGINƏ-RƏARƏU ANDƏ KOYA GIR ƁEAMI A ƁANZA.

⁶ Ən sǝni ka, mɓwame na aɓa wal-wale nǝ nkila mala aɓwana mala Ɓakuli, andǝ nkila mala aɓwana mǝnana à dum nǝ mǝsǝcau arǝ nakun Yesu ka. Lang ǝn sǝni ka, gir nî pam ndali kǝrkǝr.

⁷ Pǝlǝa mǝturonjar nam ama, “Palang sǝ a pak ndali? Mǝ nǝ banggo gir ɓa-sǝmbǝrǝa amur mǝnia yì mɓwama, andǝ mala yì nyamɓikea mǝno nǝ aɓamuru tongno-nong-ɓari andǝ anjawe lum, mǝnana mɓwame dukiyi a nzǝmi ka.

⁸ Mǝno yì nyamɓikea a sǝni ka, ndakam ɗiɗyal nǝ yilǝmu, ado ka pà kàm ɗang, sǝ banì pà nǝ̀ sau ɗang ndo nǝ ngga puro aɓa tuli-tàtǝkǝtè, sǝ nǝ̀ kutio nǝ̀ ká lú mǝnana málá male pà kàm raka. Aɓwana mǝnana à ndanǝ do a ɓanza, amǝnana pur a share ɓanza ka, à gilǝ lullǝia aɓa Malǝmce Yilǝmu raka, à nǝ̀ ndali nǝ nyare-yiu mala man yì nyamɓikea mǝnana wú ɗiɗyal ka.

⁹ “Mǝnia ka, à kǝ earce ama ɓwa ɓǝ̀ dum nǝ sǝlǝe andǝ bwalta gir. Aɓamuru tongno-nong-ɓari mala nyamɓikea ka, à ndaka nkono tongno-nong-ɓari mǝnana mɓwame dukiyi amuria ka. Sǝ yia gbal ka, amurǝma na, yia mǝnia tongno-nong-ɓari ka.

¹⁰ Tongno atea ka à wukina. Mwashat ka nda kam piu amur bunomurǝm. Sǝ ɓe man mwashat ka, malaká yiu ɗang peatu. Ɓǝ̀ yina ka, do yalban male pà nǝ̀ sau ɗang.

¹¹ Yì nyamɓikea mǝnana ndakam ɗiɗyal nǝ yilǝmu, sǝ ado ka pà kàm raka, nda tongno-nong-tāruia murǝm. Sǝ yì ka, ndá mwashat ata amǝno yì amurǝma tongno-nong-ɓari ka, sǝ kǝ ká nǝ ká a lú male.

¹² “Anjawe lum mala nyamɓikea mǝnana a sǝnia ka, amurǝma na lum, mǝnana à malaká ak garamurǝm raka peatu, sǝa ma à nǝ̀ yia pea wia garamurǝm. À nǝ̀ duk amurǝma aɓa pwari bǝti ata nyamɓikea.

¹³ Yia kat mǝnia lum ngga, kunia mwashat. À nǝ̀ yia nyesǝ rǝcandǝa andǝ garamurǝm malea à nǝ̀ pe nyamɓikea.

¹⁴ Yia kat ka, à nǝ̀ ká nǝ lwa arǝ Mǝgam, sǝ Mǝgam andǝ amǝte, yia aɓwana male mǝnana tunǝia, sǝ tarkia, andǝ amǝ kpate aɓa mǝsǝcau ka, à nǝ̀ limurǝm amuria. À limurǝm amuria acemǝnana yì Mǝgam ngga, nda Gbani amur amǝtala anzali kat, sǝ nda Murǝm mala amurǝma kat.”

¹⁵ Pǝlǝa mǝturonjar banggam ama, “Amúr mǝnana a sǝnia aban mǝnana yì man'gyatarǝu dukiyi kam ngga, à ndaka ɓwana amǝlake pas mala anzali, andǝ akun, andǝ atau, andǝ aɓwapǝndǝa.

¹⁶ Yì nyamɓikea andǝ anjawe lum mǝnana a sǝnia ka, à nǝ̀ ɓinǝmǝsǝ man'gyatarǝu man. À nǝ̀ swari wi agir-nggurǝi, à nǝ̀ nyi nǝ ɓate, à nǝ̀ shak nyami, sǝ acili abare ka, à nǝ̀ pisǝia a bǝsa.

¹⁷ À nǝ̀ pa anggo, acemǝnana Ɓakuli tsǝngŋǝna kani male a ɓabumia, kani male mǝnana à nǝ̀ pak nggearǝ gir mǝnana ɓabumi earkiyi ce ka. À nǝ̀ kpapi muria, à nǝ̀ pe nyamɓikea garamurǝm malea. Aɓa pe mǝno anggo ka, cau mǝnana Ɓakuli bang ngga nǝ̀ yia lumsǝo.

¹⁸ Man yì mɓwama a sǝni ka, nda mǝno yì nggeala mǝgule mǝnana nda murǝm amur amurǝma mala ɓanza ka.”