Sǝna 15 - Maləmce Məfele mala Ɓakuli: Kurcau Məbəshe

Amǝturonjar tongno nong-ɓari yiu nǝ masǝlǝata agir yinǝ tanni twal la

¹ Anzǝm mǝno ka, ǝn sǝn ɓe gir'lǝmndǝa mǝgule andǝ mǝ'pa ndali, puro a kuli. Amǝturonjar na yia tongno-nong-ɓari, mǝnana à ndanǝ masǝlǝata agir yinǝ tanni twal la, mǝnana à nǝ̀ yia lǝmndǝna masǝlǝata bumlulla mǝgule mala Ɓakuli nǝia ka.

² Nyare ǝn sǝn ɓe kǝgir kǝla nggeamur gǝlas mǝnana à zurǝi andǝ bǝsa ka. Sǝ ɗǝm ngga ǝn sǝn aɓwana mǝnana à limurǝm amur nyamɓikea andǝ ɓǝ̀nzál male andǝ lámbà mala lullǝi ka, aban came a kun mǝno yì nggeamur gǝlas ka. Ko yan a tea ka, bwal mǝzangŋan mǝnana Ɓakuli pe wi ka, a bui.

³ À nda rǝ tu nggyal mala Musa, yì guro mala Ɓakuli, andǝ nggyal mala Mǝgam; à kǝ na ama: “We, Mǝtalabangŋo Ɓakuli, mǝnana a Karmur Gulo kat ka, a pakki aturo mǝgulke andǝ agir pa'ndali. Aturo mo kat ka, a kǝ́ pea aɓa mǝsǝcau andǝ kpate a njari, We Murǝm mala anzali!

⁴ Yana ɓwe na pà nǝ̀ ɓanggo raka? Yana ɓwe na nǝ̀ ginǝ pe lullǝo gulo, We Mǝtalabangŋo? We nǝmurǝo ɓǝrɓǝr, a nda Mǝfele. Aɓwana arǝ anzali kat, à nǝ̀ yia peri a ɓadǝmbǝo, acemǝnana aturo ɓealɓoarna mo ka, à pusǝna rǝia.”

⁵ Anzǝm mǝnia ka, ǝn sǝni à mǝn Ndàmǝgule mala Ɓakuli, yì Taragula mǝfele mana akano a kuli ka,

⁶ sǝ amǝturonjar nì tongno-nong-ɓari mǝnana nǝ agir yinǝ tanni twal la ka, à nda ban purî ɓalǝi. À oasǝki anggea-daura pwasǝa mana à tea nǝ nggurbyau linen mǝɓoarnsari ka a rǝia, sǝ à marǝki abugir mǝnana à pea nǝ zǝnariya ka, a kikilia.

⁷ Mwashat ata agiryilǝmu nì ine ka, yiu yi pè ko yan ata amǝturonjar mǝno tongno-nong-ɓari ka, tasau mǝnana a tùlli nǝ zǝnariya ka. Amǝnia yia atasau ka, à lumsǝkia nǝ bumlulla mala Ɓakuli mana ndanǝ yilǝmu, málá male pà kàm raka.

⁸ Kara Ndàmǝgule twalo lumsǝ nǝ yele, mǝnana pur nǝ ɓa ɓoarɓwa andǝ rǝcandǝa mala Ɓakuli ka. Kǝ ɓwa pà nǝ̀ gandǝ kutio aɓa Ndàmǝgule ɗang she ɓǝa amǝno yì agir tongno-nong-ɓari màlà yìnǝ́ tanni twal la, mǝnana a bu amǝturonjar tongno-nong-ɓari, à malǝna ka.