Sǝna 14 - Maləmce Məfele mala Ɓakuli: Kurcau Məbəshe

Mǝgam andǝ amǝte 144,000 tu-nggyal a ɓadǝm bunomurǝm

¹ Lang ǝn soa mǝsǝam ngga, ǝn sǝn Mǝgam aban came amur Nkono Siyona andǝ aɓwana á-gbǝman mwashat nǝ á-lumi-ine bwamdǝ ine [144,000] ate, aɓwana mǝnana à gilǝnia wia lullǝi andǝ lullǝ Tarrí a kundǝmbǝia ka.

² Pǝlǝa ǝn ok giu pur nǝ kuli, pakkam kǝla gǝshi gǝggǝli mala nggeamur aɓa songnǝo male, ko kǝla ime mala mbulo. Ən ok giu nî ka, nda kǝla amǝ walki azangŋan aban walki azangŋan malea.

³ Aɓwana mǝno á-gbǝman mwashat nǝ á-lumi-ine bwamdǝ ine ka, à ndarǝ tu bǝsa nggyal a ɓadǝm bunomurǝm, andǝ ɓadǝm agiryilǝmu ine andǝ aɓwana-mǝgule. Kǝ ɓwa pà kàm gandǝ kani mǝno yì nggyal ka ɗang, she kǝ yia mǝno á-gbǝman mwashat nǝ á-lumi-ine bwamdǝ ine, mǝnana à akmuria aɓa ɓanza ka.

⁴ À nda ka aɓwana mǝnana à pǝndǝki ɓamuria nǝ nongginǝ amamǝna raka. À bwal ɓamuria aɓa doɓoarnsari, kǝla ansarina mǝnana à surǝ kǝ ɓwabura raka. À kǝ kpata Mǝgam arǝ aban mǝnana kat kǝ wari kam ngga. Ɓakuli akmuria aɓalǝ acili ɓwapǝndǝa a ɓanza ɓǝa do à nda ka ɓǝla-ɓaban mǝdǝmbe mǝnana à nǝ̀ pànà ɓoro nǝia aban Ɓakuli andǝ Mǝgam ngga.

⁵ À surǝia nǝ kǝ nyir a kunia ɗang. Amǝ ɗwanyi cau a rǝǔ na.

Amǝturonjar tārú yiu nǝ acau hama mala Ɓakuli

⁶ Pǝlǝa ǝn sǝn ɓe mǝturonjar mala Ɓakuli aban yale ɓong-ɓong a bumkuli. Ndarǝ yiu nǝ Cau Amsǝban mǝnana masǝlǝate pà kàm raka, ace mǝnana nǝ̀ yia hamnǝi aban aɓwana a ɓanza, aban koya nzali, andǝ tau, andǝ kun, andǝ ɓwapǝndǝa ka.

⁷ Pǝlǝa loasǝ gi kpǝm hama ama, “Wu ɓanggi Ɓakuli, sǝ wu pe wi gulo! Acemǝnana pwari ɓashi male yina. Wu peri abaní, yì mǝnana pusǝ kuli, andǝ nzali, andǝ nggeamur, andǝ amgbeaɗe-mur ka.”

⁸ Pǝlǝa ɓaria mǝturonjar kpata mǝno sǝ kǝ na ama, “Nggeala mǝgule Babila ka kpana, yì mɓwama mǝnana tsǝk aɓwana arǝ anzali ɓanza à nu mùr-anap mala npel mala kìɗìkì nongginǝ rǝarǝu male ka.”

⁹ Pǝlǝa tāruia mǝturonjar kpatea, aban hama nǝ giu bangbang. Kǝ na ama: “Ɓwa mǝnana kat peri aban nyamɓikea andǝ ɓǝ̀nzál male, sǝ ak nyoulǝa male a kundǝmbǝi ko a nzǝmbui ka,

¹⁰ ɓwe gbal ka nǝ̀ nu mùr-anap mala bumlulla mala Ɓakuli. Yì bumlulla mala Ɓakuli mǝnana à solǝi andǝa lullo male mǝcande aɓa kwar bum-ukkia male ka. Sǝ ɓwe nǝ̀ nu nggea tanni kǝrkǝr aɓa bǝsa andǝ atalibǝsa, a ɓadǝmbǝ amǝturonjar mǝfele andǝ ɓadǝm Mǝgam.

¹¹ Yele-bǝsa ɓa tanni malea ka, nǝ̀ nggǝ lo aban ká kuli, pà nǝ̀ mal ɗang. Sǝ à pà nǝ̀ kum usǝlǝo ɗang du andǝ pwari, yia aɓwana mǝnana à peri aban nyamɓikea andǝ ɓǝ̀nzál male, andǝ ɓwa mǝnana kat à ak nyoulǝa mala lullǝi ka.”

¹² Mǝnia ka kwarkiru na ace aɓwana amǝ'mǝsǝcau nì mala Ɓakuli, yia mǝnana à kǝ kpata anzongcau mala Ɓakuli, sǝ à dum nǝ mǝsǝcau aban Yesu ka, ɓǝa cam kàngkàng nǝ gandǝrǝu.

¹³ Pǝlǝa ǝn ok ɓe giu pur nǝ kuli na ama, “Gilǝ cau mǝnia ka: “ ‘Twal ado mǝno ka, tsǝkbu mala Ɓakuli na amur aɓwana mǝnana à wu aɓa dotarǝu malea andǝ Mǝtalabangŋo ka!’ ” Bangŋo mala Ɓakuli kǝ na ama, “E, mǝsǝtacau, à nǝ̀ kum usǝlǝo aɓalǝ aturo malea, acemǝnana aturo mǝɓoarne malea mǝnana à pea ka, à kǝ ongsǝo atea.”

Pwari pwan girɓaban mala ɓanza yina

¹⁴ Mǝ nda rǝ sǝnban ngga, ǝn sǝn pǝrɓang mǝpwasǝe yi puro andǝ ɓeɓwa kǝla Muna mala Ɓwa aban do amuri. Ndanǝ jeko zǝnariya amuri sǝ bwal nshiri mǝceauwe a bui.

¹⁵ Pǝlǝa ɓe mǝturonjar mala Ɓakuli purî ɓa Ndàmǝgule mǝnana a kuli ka yi came. Loasǝ gi kpǝm ne ɓwa mǝno do amur pǝrɓang ngga ama, “Pǝlǝ nshiri mo sǝ wu tita umo, acemǝnana pwari pwan ɓǝla-ɓaban yina. Ɓanza ka ɓǝlǝna a mala pwan ɓǝle!”

¹⁶ Pǝlǝa ɓwa mǝno do amur pǝrɓang ngga wuli nshiri male amur ɓanza, sǝ um girɓaban mala ɓanza rambǝi.

¹⁷ Anzǝm mǝno ka, ɓe mǝturonjar mala Ɓakuli purî ɓa Ndàmǝgule mǝnana a kuli ka, sǝ yì gbal ka ndanǝ nshiri mǝceauwe a bui.

¹⁸ Nyar ɗǝm ngga ɓe mǝturonjar mǝnana nǝ rǝcandǝa amur bǝsa ka, purî ban gyangŋan yi came. Loasǝ gi bang-bang ne mǝturonjar mǝno nǝ nshiri mǝceauwe a bui ka, ama, “Loasǝ nshiri mo, kasǝki adangŋanshi ɓǝla nggun-anap a ɓaban-anap mala ɓanza, acemǝnana aɓǝle ka, à ɓǝlna!”

¹⁹ Pǝlǝa mǝturonjar wuli nshiri male amur ɓanza, kasǝki aɓǝla nggun-anap male, sǝ sukkia aɓa tūli ɓa nggea tali kamnggi mùr-anap, yì tūli bumlulla mǝgule mala Ɓakuli.

²⁰ À parki amǝno yì aɓǝla nggun-anap ka aɓa yì tūli ɓa nggea tali kamnggigir, mǝnana nda anzǝm la ka. Nkila ɓun aɓa tulî aban solǝo, kǝ ɓangŋa kǝla mur nggeasala, o kya bik kilomita gbǝman tārú, sǝ lime male ka nǝ̀ kongsǝ ɓamúr pǝ̀r mǝnana cam nǝ came ka.