Sǝna 13 - Maləmce Məfele mala Ɓakuli: Kurcau Məbəshe

Nyamɓikea mǝnana puro aɓa nggeamur ka

¹ Sǝ ǝn sǝn ɓe kǝ nyamɓikea aban puro aɓa nggeamur. Ndanǝ aɓamuru tongno-nong-ɓari andǝ anjawe lum. Amur koya njawe male ka sukuru-murǝm na kam, sǝ arǝ koya ɓamuri ka lullǝu na kam à gilǝì, sǝ koya lullǝu ka cau ɓǝsǝkiban na arǝ Ɓakuli.

² Mǝnia yì nyamɓikea ǝn sǝni ka, nda kǝla mǝmburi. Akusǝi na kǝla akusǝ nyamɓabondo mǝnana à tunǝki ama biya, sǝ kuni na kǝla kun im. Dǝragon nyesǝ rǝcandǝa male, andǝ bunomurǝm male, andǝ garamurǝm male pe wi.

³ Mwashat ata aɓamur nyamɓikea man ngga pa kǝla à tsǝki wi mpenye mǝnana ɓǝ́ nǝ̀ wal-lui, sǝ mpenyeni yì sonzǝ ka. Ɓanza kat pu aban ká ate nǝ ndali.

⁴ Ɓwapǝndǝa peri aban Dǝragon, acemǝnana nyesǝ garamurǝm male pe nyamɓikea ka; nyare à peri aban nyamɓikea, sǝ à kǝ na ama, “Yana ɓwe na kǝla yì nyamɓikea? Yana ɓwe na nǝ̀ gandǝ ká nǝ lwa a rǝì?”

⁵ Yì nyamɓikea ka à eari wi kutia banggi acau twalɓamuru andǝ ɓǝsǝki Ɓakuli, sǝ ɓǝ̀ pakkia agir mala lǝmndǝ rǝcandǝa mǝnana à pe wi ka, ba zongŋo lumi-ine-nong-ɓari.

⁶ Mǝn kuni aban kyauwiki Ɓakuli andǝ na mǝɓane arǝ lullǝi, andǝ ban-do mala Ɓakuli, andǝ aɓwana mǝnana à ndanǝ do a kuli ka.

⁷ À nyinggi wi njar ɓǝ̀ lwa'lwa arǝ aɓwana mǝfele mala Ɓakuli, sǝ ɓǝ̀ limurǝm amuria. Sǝ à pe wi rǝcandǝa amur koya tau, andǝ kun, andǝ aɓwapǝndǝa, andǝ nzali.

⁸ Aɓwana kat mǝnana à ndanǝ do a ɓanza ka, à nǝ̀ peri aban nyamɓikea, yì aɓwana mǝnana tite a share ɓanza ka, lullǝia pà kàm a gilǝe aɓa Malǝmce raka, yì Malǝmce Yilǝmu mala Mǝgam mǝnana à pwan meali ka.

⁹ Ɓwa mǝnana kat ndanǝ kir okban ngga ɓǝ̀ o.

¹⁰ “Ɓwa mǝnana kat à kasǝi wi bwalban a guro ka, à nǝ̀ bwali nǝ̀ o a guro. Ɓwa mǝnana kat à kasǝi wi wal-lui nǝ nggeabyau ka, nǝ nggeabyau sǝ à nǝ̀ wali.” Mǝnia ka kwarkiru na ace aɓwana amǝ'mǝsǝcau nì mala Ɓakuli, ɓǝa cam kàngkàng sǝ ɓǝa dum nǝ paɓamuru abani aɓa koya tanni ka.

Ɓe Nyamɓikea mǝnana pur a nzali ka

¹¹ Pǝlǝa ǝn sǝn ɓe nyamɓikea aban puro nǝ ɓa nzali. Ndanǝ anjawe ɓari kǝla mala gam, sǝ kǝ na cau kǝla dǝragon.

¹² Kǝ lǝmndǝ rǝcandǝa mala nyamɓikea mǝdǝmbe. Tsǝk ɓanza andǝ aɓwana mǝnana nǝ do a ɓalǝi ka púp ɓǝa peri aban nyamɓikea mǝdǝmbe mǝno mpenye mǝɓike male sonzǝ ka.

¹³ Mǝnia yì nyamɓikea ka, pakki agir-ndali mǝgulke; kǝ tsǝa bǝsa nǝ̀ pur a kuli aban yiu a nzali a mǝsǝ aɓwana kat.

¹⁴ Nǝ agir-ndǝlǝki mǝnana à eari wi ɓǝ̀ pea a ɓadǝm nyamɓikea mǝdǝmbe ka, twalo swarki aɓwana kat mǝnana à nda ka amǝkpata ɓanza man ngga. Cia ɓǝa ɓak ɓǝ̀nzál mala nyamɓikea mǝdǝmbe mǝnana à tsǝki wi mpenye nǝ nggeabyau ɓǝ́ nǝ̀ wal-lui sǝ yi au ka.

¹⁵ Mǝnia yì ɓaria nyamɓikea ka kum rǝcandǝa mala pe ɓǝ̀nzál mala nyamɓikea mǝdǝmbe yilǝmu ace mǝnana ɓǝ̀ gandǝ na cau ka. Pǝlǝa ɓǝ̀nzál mala nyamɓikea tsǝa ama ɓwa mǝnana kat ɓine ama pà nǝ̀ peri abaní raka, ɓǝa wal-luí.

¹⁶ Tsǝk koyana le ka, ɓwa mǝkyauwe andǝ ɓwa mǝgule, amǝkume andǝ amǝtǝr, aguro andǝ aɓwana mǝnana à ndanǝ do ɓamuria ka, ɓǝa canbia wia nyoulǝa anzǝm buia mǝli ko a kundǝmbǝia.

¹⁷ Ɓwa mǝnana kat panǝ mǝnia yì nyoulǝa raka à eari wi ɓǝ̀ kúr kǝgir ko ɓǝ̀ mak kǝgir ɗang. Mǝnia yì nyoulǝa ka, lullǝu mala nyamɓikea na, ko lámbà mala lullǝi na.

¹⁸ Aɓa mǝnia ka, sǝlǝe na à kǝ̀ earce ɓwa ɓǝ̀ dum nǝi ka. Ɓwa mǝnana kwarô sǝ nǝ̀ pak ɗenyicau mǝlime ka, ɓǝ̀ kwam ɓa mǝnia yì lámbà mala nyamɓikea ka, ɓǝ̀ bwalte, acemǝnana lambe ka, lámbà mala ɓwapǝndǝa na. Lámbà male ka nda gbǝman tongno-nong-mwashat, nǝ lumi-tongno-nong-mwashat, nǝ mǝsǝì tongno-nong-mwashat [666].