Sǝna 11 - Maləmce Məfele mala Ɓakuli: Kurcau Məbəshe

Amǝnakun ɓari mala Ɓakuli nǝ hamnǝ cau male

¹ Sǝ Ɓakuli pam munagara karǝki sauwa mala gir, sǝ nam ama, “Kyane kya karǝki ɓa Ndàmǝgule mala Ɓakuli andǝ gyangŋan paɓoro, sǝ wu ɓal aɓwana mǝnana à kǝ peri aɓa Nda ka.

² Sǝa ma banfana mǝnana a nza nǝ Ndàmǝgule, à kàrǝì nǝ sheran ngga, ce a karǝki ɗang, acemǝnana ban nì ka à panì aɓwana mǝnana à surǝ Ɓakuli raka. Yia ka, Urǝshalima, nggeala mǝfele nǝ̀ kpa aɓa rǝcandǝa malea, à nǝ̀ parki, arǝ azongŋo lumi-ine-nong-ɓari.

³ Sǝ mǝ nǝ pè amǝnakun mem ɓari rǝcandǝa, à nǝ̀ twal anonggeo mǝno á-mwashat nǝ gbǝman-ɓari nǝ́ lumi-tongno-nong-mwashat ka, à nǝ̀ nggǝ hamnǝ cau mala Ɓakuli, nǝ́ anggurbyau gwado a rǝia.”

⁴ Yia mǝnia ka, à ndaka anggun olif ɓari andǝ agir tamsǝ pitǝla ɓari mǝnana à cam a ɓadǝm Mǝtala ɓanza ka.

⁵ Ɓǝ̀ kǝ ɓwa earce ama nǝ̀ pakkia wia gir mǝɓane ka, bǝsa kǝ pur aɓa kunia kǝ kiɗiki aɓiamǝbura. Anggo sǝ ɓwa mǝnana kat earce nǝ̀ pakkia wia kǝgir mǝɓane ka, she nǝ̀ wu.

⁶ À ndanǝ rǝcandǝa amur bumkuli, à nǝ̀ tamsǝ mbulo pà nǝ̀ nya ɗang. Sǝ à ndanǝ rǝcandǝa mala tsǝk amúr arǝ aban kat ɓǝa pǝlǝ nkila. Ɗǝm ngga à ndanǝ rǝcandǝa mala kwak ɓanza nǝ koya ulang agir murmwana, sǝ à nǝ̀ gandǝ ɓǝsǝlǝki pe kǝla mǝnana à earkiyice ka.

⁷ Anzǝm mǝnana ɓǝa malǝna nakun malea ka, nyamɓikea mǝnana nǝ̀ pur aɓa tuli-tàtǝkǝtè ka, nǝ̀ yiu nǝ lwa a rǝia, nǝ̀ gandǝia sǝ nǝ̀ wal-luia.

⁸ Luia nǝ̀ nong amur njargula aɓa nggeala mǝnana a kun-ndunocau ka à tunǝi ama Sodom andǝ Masar, sǝ akàm gbal sǝ à gballì Mǝtalea amur nggun-gangndi.

⁹ Nǝ̀ twal nongŋo tārú nǝ cili, aɓwana arǝ a koya la, andǝ koya tau, andǝ koya kun, andǝ koya ɓwapǝndǝa ka, à nǝ̀ nggǝ sǝn luia aban nongŋo, acemǝnana à eari kǝɓwa ɓǝ̀ tsǝia a ɓembe raka.

¹⁰ Aɓwana a ɓanza ka, ban nǝ ɓoaria wia ace gir mǝnana kum amǝ'nakun mǝnia ɓari ka. À nǝ̀ pakiɗire sǝ à nǝ̀ turia rǝia ban nǝ́ aɓoro acemǝnana yia amǝ'nakun mǝnia ɓari ka, à nda à yinǝia aɓwana a ɓanza tanni mǝɓike kǝrkǝr ka.

¹¹ Sǝ anzǝm anongŋo mǝno tārú nǝ cili ka, Ɓakuli pyaupia wia lin'ueo mǝ'pa yilǝmui a rǝia. À lo à cam amur akusǝia; sǝ aɓwana mǝnana kat à kǝ sǝnia ka, nggea ǝn'o bwalia kǝrkǝr.

¹² Pǝlǝa giu mǝcande pur nǝ kuli tunǝ amǝ'nakun mǝnia ɓari ka ama, “Wu yiu kani a kuli.” Sǝ à lo aban eauwe a kuli aɓa pǝrɓang. Aɓiamǝbura soapia wia mǝsǝu à kǝ sǝnia.

¹³ Aɓa kǝ bu-pwari mǝno ka, nggea dǝurǝo mala nzali mǝkǝrkǝr nì kumban, mǝnana kiɗiki banì mwashat aɓa gauwe lum mala nggeala, sǝ wal ɓwapǝndǝa á-tongno-nong-ɓari ka. Cili ɓwapǝndǝa ka, ɓangciu pakkia wia kǝrkǝr sǝ à ɓwangsǝ gulo mala Ɓakuli mǝnana a kuli ka.

¹⁴ Ɓaria gir murmwana kutina, sǝ tārùia gir murmwana na kǝ yiu ate tu ka!

Tongno-nong-ɓaria twang njawe yiu nǝ tāruia gir murmwana

¹⁵ Pǝlǝa tongno-nong-ɓaria mǝturonjar twang njawe male, kara agiu lo kǝrkǝr a kuli à kǝ na ama, “Agara-murǝm mala ɓanza man ngga à nyarǝna aɓa bu Mǝtala sǝm andǝ ɓa bu Kǝrǝsti male. Sǝ domurǝm male ka masǝlǝate pà kàm ɗang!”

¹⁶ Sǝ aɓwana-mǝgule lumi-ɓari-nong-ine, mǝnana à ndaban do amur abuno-murǝm a ɓadǝm Ɓakuli ka, à kpa a nzali, sǝ à peri aban Ɓakuli.

¹⁷ À na ama, “We Ɓakuli Mǝtalabangŋo mana a Karmur Gulo kat, we mǝnana a nda kam ado, andǝ mǝnana nda kam ɗiɗyal ka, sǝm nggǝ pakko yàwá, acemǝnana a angŋǝna rǝcandǝa mo mǝgule, sǝ a tinata mo yì yalban amur agir.

¹⁸ Aɓwana arǝ anzali pak bumlulla, sǝ ado gbal ka, pwari mala bumlulla mo yina. Pwari pangŋǝna mǝnana a wu nǝ pakki alú ɓashi nǝi ka. Sǝ aguro mo, amǝ'ɓangna ka, a wu nǝ pea wia tangnakusǝia. Yia andǝ aɓwana mo amǝfele, andǝ aɓwana kat, ɓwa mǝkyauwe andǝ ɓwa mǝgule, amǝnana à kǝ ɓanggo aɓa pagulo ka. Pwari yina mǝnana a wu nǝ kiɗiki aɓwana mǝnana à kǝ kiɗiki ɓanza ka.”

¹⁹ Pǝlǝa à mǝn kun Ndàmǝgule mala Ɓakuli mana a kuli ka, sǝ Akwati Kurcau male ka à sǝni kam aɓa Ndàmǝgule. Kara tǎlaban liki'nzama, ban gǝggǝlikya, mgbarangce sàkkya, nzali dǝurǝkio, sǝ mǝsǝtali-mbulo mǝgulke ra.