Sǝna 10 - Maləmce Məfele mala Ɓakuli: Kurcau Məbəshe

Ɓakuli nǝ masǝlǝ kani male tu

¹ Pǝlǝa ǝn sǝn ɓe kanggǝrangŋa mǝturonjar mala Ɓakuli pur nǝ kuli, kǝ sulǝo aban yiu. Pǝrɓang gumbǝli rǝì sǝ nparing kàrǝì muri. Ɓamǝsǝi tâ kǝla pwari, sǝ agarakusǝi na kǝla atanggea-nggun bǝsa.

² Bwal mǝ'malǝmce mǝnana à mǝnni ka a bui. Yi tamsǝ kusǝì mǝli amur nggeamur sǝ kusǝì mǝnggare ka tamsǝi amur kwarban.

³ Pǝlǝa loasǝ gi ɓua gawan bang-bang kǝla arkwar mala im. Lang mak gawan ngga, agiu mgbarangce tongno-nong-ɓari na cau.

⁴ Lang agiu mgbarangce tongno-nong-ɓari na cau ka, nǝma mǝ nǝ gilǝ ce, sǝ kara ǝn ok giu pur nǝ kuli nam ama, “Cau mǝnana agiu mgbarangce tongno-nong-ɓari bang ngga, ɓǝ̀ cê duk girsǝmbǝrǝa! Cè a gilǝì ɗang.”

⁵ Pǝlǝa mǝturonjar mǝno ǝn sǝni came amúr nggeamur andǝ kwarban ngga, loasǝ bui mǝli a kuli,

⁶ sǝ kángir nǝ lullǝ Ɓakuli. Kángir nǝ lullǝ Ɓakuli mǝnana nǝ yilǝmu mana masǝlǝate pà kàm raka, mǝnana pusǝ kuli, andǝ nzali, andǝ nggeamur, andǝ agir mǝnana aɓalǝia kat ka. Pǝlǝa mǝturonjar na ama, “Pwari pà kàm ɗǝm ɗang!

⁷ Ɓǝ̀ tongno-nong-ɓaria mǝturonjar twang njawe male ka, gir mǝnana Ɓakuli kani nǝ̀ pe sǝ à sǝmbǝrǝ ce ka, nǝ̀ yia lumsǝo. Nǝ̀ yia puro kǝla mǝnana bangŋi a banfana aban aguro, amǝ'ɓangna male ka.”

⁸ Pǝlǝa ɓwa mǝnana ǝn ok gi na cau nǝ kuli ka, nam cau ɗǝm ama, “Kyane kya ak mǝ'malǝmce mǝno à mǝnni a bu mǝturonjar mǝnana came amúr nggeamur andǝ kwarban ngga.”

⁹ Nda ǝn wario aban mǝturonjar sǝ ǝn ne wi nǝma ɓǝ̀ pam mǝ'malǝmce mǝkyauwe ni ka. Pǝlǝa banggam ama, “Ang, twali she. A wu nǝ oe pǝlpǝl a kuno kǝla mur-nyi, sǝ ɓǝa mealǝni ka, nǝ̀ ngga pǝlǝ mǝhangŋe a bumo.”

¹⁰ Pǝlǝa ǝn ak mǝ'malǝmce ni a bu mǝturonjar, sǝ ǝn she. Ən oe ka nda pǝlpǝl a kunam kǝla mur'nyi, sǝ lang ǝn mealǝni ka, bumam twalo hangŋa.

¹¹ Sǝ nam ama, “Dumǝna púp a wu nǝ hamnǝ cau amur aɓwapǝndǝa, andǝ anzali, andǝ akún, andǝ amurǝma pas.”