Matiu 8 - Maləmce Məfele mala Ɓakuli: Kurcau Məbəshe

Yesu twali ɓeɓwa ban rǝkwana male

¹ Lang Yesu sulǝni mur nkono ka, ɓwabunda pas kana ate.

² Ɓe mǝdakali yiu abani yi ɓun a ɓadǝmbǝi sǝ na ama, “Ɓwamǝgule, ɓǝ̀ a nǝ ear ka, a nǝ twalam ban rǝkwana man ɓǝ̀ rǝam ɓoarnsari.”

³ Sǝ Yesu lǝmndǝ bui je ɓwabure sǝ na ama, “Ən earǝna, ɓǝ̀ rǝo ɓoarnsari.” Àkǝ̀ banì kara kwano dakali nying rǝì.

⁴ Sǝ Yesu ne wi ama, “Kǝa ne kǝɓwa ɗang. We ka, kyane kya lǝmndǝ rǝo aban pǝris, sǝ wu pa ɓoro mǝnana Musa bangŋa ama ɓǝa pa ka, mǝnana nǝ̀ lǝmndǝ twalban rǝkwana mo abania ka.”

Guliarǝu mala ɓe Ɓwamǝgule Soje

⁵ Kutio mala Yesu aɓa nggeala Kapanahum ka, ɓe ɓwamǝgule mala asoje yiu abani kǝ zǝmbǝi wi

⁶ ama, “Ɓwamǝgule, muna-ɓala mem na ban nongŋo a ɓala nǝ kwano rǝwuna, nda aɓa tanni kǝrkǝr.”

⁷ Yesu ne wi ama, “Mǝ nǝ ká mǝ nǝ twali wi ban rǝkwane.”

⁸ Ɓwamǝgule soje pǝlǝa eari wi ama, “Ɓwamǝgule, ǝn kārǝa wu yiu a ɓala mem ɗang. Ne kwane cau, sǝ muna-ɓala mem ngga rǝì nǝ̀ mala.

⁹ Nggearǝ mim ngga mǝ nda aɓata ɓeɓwa sǝ mǝ ndanǝ asoje a ɓatam. Kani ɓǝ̀ ǝn ne mǝnia ama, ‘Kyane’ ka, nǝ̀ ká; sǝ ɓǝ̀ ǝn ne mǝno ama, ‘Yiu’ ka, nǝ̀ yiu. Ɓǝ̀ ǝn ne guro mem ama, ‘Pak ani’ ka, nǝ̀ pa.”

¹⁰ Lang Yesu ok cau mǝnia ka, ce nî pe wi ndali. Sǝ pǝlǝa ne amǝkpate ama, “Ən nggǝ na wun mǝsǝcau, ǝn malaká kum kǝɓwa aɓa nzali Isǝrayila nǝ guliarǝu mǝgule kǝla man ɗang.

¹¹ Mǝ ndarǝ bangga wun, a ɓwana pas nǝ̀ purkio arǝ aban ɗàngɗáng a bum ɓanza à nǝ̀ yia do a Domurǝm mala kuli, à nǝ̀ lili andǝa Ibǝrayim, andǝ Ishaku, andǝ Yakupu.

¹² Sǝ aɓwana mana ɓǝ́ à nda à nǝ̀ duk amǝ'ɓala-murǝm ngga à nǝ̀ ramtea a nza aɓa pǝndǝa. À nǝ̀ ɓua à nǝ̀ nǝmnggi munabuia.”

¹³ Yesu pǝlǝa ne ɓwamǝgule soje ama, “O a ɓala. Kǝla mǝnana a pa ɓabumo a rǝì ka, anggo sǝ nǝ̀ pa.” Akǝ̀ ɓa nacau mǝno ka rǝ mune mala.

Yesu twali aɓwana pas ban rǝkwana

¹⁴ Yesu wario a ɓala mala Bitǝrus. Yi kum nkil Bitǝrus mǝɓwame aban nongŋo nǝ kwano ɓauwa.

¹⁵ Sǝ Yesu je a garabui, kara ɓauwa mali rǝì. Pǝlǝa lo pe Yesu girlina.

¹⁶ Nǝ pwarikpǝra mǝno ka à yinǝ aɓwana pas abani, amǝnana nǝ akukwar a rǝia ka. Pusǝ akukwar mǝno nǝ cau. Sǝ amǝkwano ka twalia wia ban arǝkwana malea kat.

¹⁷ Yesu pak mǝnia yì gir ka ace mǝnana ɓǝa lumsǝ ɓangna mala Ishaya mǝnana ama: “Yi ak arǝpangŋa ma'sǝm sǝ twal akwano ma'sǝm.”

Gir mǝnana aɓa kpata Yesu ka

¹⁸ Lang Yesu sǝn lakki mala aɓwana mǝnana à yiu abani ka, tsǝk alaggana male ɓǝa yale a ɓe nkaring Garang.

¹⁹ Ɓe mǝkani Nggurcau yiu abani sǝ ne wi ama, “Malǝm, mǝ nǝ ká a to ko a ya ban a nǝ ká kam ngga.”

²⁰ Yesu ne wi ama, “Amǝ'nzǝgban ndanǝ atuli sǝ amuna-nyal mana à kǝ gya kuli ka à ndanǝ andea, sǝ Muna mala Ɓwa ka pànǝ ban mǝnana nǝ̀ nong kam ngga ɗang.”

²¹ Ɓe mǝkpate yi ne wi ama, “Ɓwamǝgule, nyem ɓǝ̀ ǝn kyane mǝ kya tsǝk lú tárram peatu sǝ mǝ nyare mǝ nǝ yia kpato.”

²² Sǝ Yesu ne wi ama, “Nying alú ɓǝa tsǝk alú malea, sǝ we ka kpatam.”

Yesu tamsǝ gung mǝcande

²³ Pǝlǝa Yesu kutio aɓa waru sǝ alaggana male eauwe ate.

²⁴ Puro malea aɓa nggeamur ka, kara nggea gung mǝcande loarǝia, mur kǝ ali aɓa waru. Sǝ Yesu ka nda a ntulo.

²⁵ Alaggana male wario à kya loasǝi sǝ à ne wi ama, “Ɓwamǝgule, amsǝ sǝm, sǝm nda sǝm nǝ̀ lingge!”

²⁶ Sǝ nea wia ama, “Wun ngga, guli ma'wun arǝ Ɓakuli kyau fat. Palang sǝ ɓangciu pakka wun?” Pǝlǝa lo sà arǝ gung andǝ eaki-nkono mala nggeamur. Kara ban pwal atea ɗǝong.

²⁷ Sǝ aɓwana mǝnia ka à ndali sǝ à na ama, “Ya ulang ɓwa na mǝnia, mǝnana gung andǝ eaki-nkono mala nggeamur à kǝ oki wi ka?”

Yesu pusǝ akukwar arǝ aburana ɓari

²⁸ Lang Yesu yi eauna a nkaring garang, a bu-nzali mala amǝ Gadara ka, yi je andǝ aburana ɓari mǝnana à ndanǝ akukwar a rǝia ka. À pur aɓalǝ aɓembe sǝ à kǝ yiu abani. Ɓiki lullo malea tsǝa kǝɓwa kǝ kar a njargula mǝno ɗang.

²⁹ À loasǝ gia arǝ Yesu ama, “Mana a alkiyite a rǝ sǝm, we Muna mala Ɓakuli? A yiua pa sǝm tanni sǝ pwari malaká karǝ ɗang le?”

³⁰ Abania tu ka atǝmbǝrǝm-ɓala nia pas à kǝ lili a domwan malea ka.

³¹ Akukwar nì pǝlǝa à zǝmbǝi Yesu ama, “Ɓǝ̀ a nǝ pusǝ sǝm ngga, tasǝ sǝm aɓa domwan mala atǝmbǝrǝm-ɓala.”

³² Yesu nea wia ama, “Wu kyane!” Sǝ akukwar nì puro, à kya kuti arǝ atǝmbǝrǝm-ɓala. Pǝlǝa domwan mǝnia kat ka tu a tarǝia nǝ mire, à kya ɓunno a kun gwanyi, a sukkio a mur a wukio.

³³ Amǝyal atǝmbǝrǝm-ɓala twal mire aban o a la. À kya bang gir mǝnana kum atǝmbǝrǝm-ɓala ka andǝ cau mala aburana ɓari mǝnana a pusǝ akukwar a rǝia ka.

³⁴ Sǝ amǝla pur kat, à yiu aban Yesu. À nǝ̀ yia sǝn Yesu ka, à ɓuakia rǝì ɓǝ̀ nying bu-nzali malea.