Matiu 5 - Maləmce Məfele mala Ɓakuli: Kurcau Məbəshe

Yesu eau amur nkono sǝ kanigir

¹ Lang Yesu sǝn lakki mala ɓwabunda ka, kya eauwe do a bum nkono. Alaggana male yiu abani,

² sǝ tita kania wia gir ama:

³ Aɓwana mǝnana à sǝlǝ ama yia ka amǝtǝr na aɓa bangŋo ka, à ndanǝ tsǝkbu mala Ɓakuli, acemana Domurǝm mala kuli ka malea na.

⁴ Amǝ bumkiɗikea ka à ndanǝ tsǝkbu mala Ɓakuli, acemǝnana à nǝ̀ kum girikiban.

⁵ Amǝ nongsǝmuru ka à ndanǝ tsǝkbu mala Ɓakuli, acemǝnana à nǝ̀ li ɓanza.

⁶ Aɓwana mǝnana à dum nǝ nzala andǝ mǝsamur mala cauɓoarna a bumia ka, à ndanǝ tsǝkbu mala Ɓakuli, acemǝnana à nǝ̀ kum ɗǝmsǝban.

⁷ Amǝ sǝn mǝsǝswatǝr ka à ndanǝ tsǝkbu mala Ɓakuli, acemǝnana à nǝ̀ sǝn mǝsǝswatǝr malea.

⁸ Amǝ ɓabum mǝɓoarnsari ka à ndanǝ tsǝkbu mala Ɓakuli, acemǝnana à nǝ̀ sǝn Ɓakuli.

⁹ Amǝ gilǝki dotarǝu ka à ndanǝ tsǝkbu mala Ɓakuli, acemǝnana à nǝ̀ duk amuna mala Ɓakuli.

¹⁰ Aɓwana mǝnana à kǝ pea wia tanni ace cauɓoarna ka, à ndanǝ tsǝkbu mala Ɓakuli, acemǝnana Domurǝm mala kuli ka malea na.

¹¹ Wu ndanǝ tsǝkbu mala Ɓakuli yi mǝnana aɓwana kǝ sang wun, à kǝ pa wun tanni, à kǝ tsǝka wun acau ɗàngɗáng aɓa nyir, acemǝnana wu ndaka amǝkpatam ngga.

¹² Wu pak bumpwasǝa, ban ɓǝ ɓoara wun, acemǝnana tangnakusǝ wun ngga mǝgule na a kuli. Anggo sǝ à pe amǝ'ɓangna mala Ɓakuli mǝnana à aka wun dǝmbǝa ka tanni.

Tuɓamur andǝ tǎlaban mala ɓanza

¹³ Wu ndaka tuɓamur mala ɓanza. Sǝ ɓǝ̀ tuɓamur ɗwanyi cyauwe male ka mana gir ni nǝ̀ tsǝi sǝ nǝ̀ cyau ɗǝm? Panǝ ɓoaro ɗǝm ɗang, à nǝ̀ sukki aɓwana nǝ̀ parki a ɓakusǝia.

¹⁴ Wu ndaka tǎlaban mala ɓanza. Nggeala mǝnana à ɓe amur tali ka pà nǝ̀ sǝmbǝrǝ ɗang.

¹⁵ À pà nǝ̀ tsǝk bǝsa a pitǝla sǝ à nǝ̀ kumsǝi wi nkenye amuri ɗang. A kun mani ka à nǝ̀ tamsǝi amur gir tamsǝ pitǝla, aban mǝnana nǝ̀ pa tǎlaban aban aɓwana kat a ɓala ka.

¹⁶ Anggo sǝ wu nǝ̀ nying tǎlaban ma'wun ɓǝ ta a ɓadǝmbǝ aɓwana ace mǝnana ɓǝa sǝn aturo ɓoarna ma'wun, sǝ ɓǝa gusǝlǝ Tar wun mana a kuli ka.

Nggurcau mala Musa

¹⁷ Wu kǝa twali ama ǝn yiu ace tamsǝ Nggurcau mala Musa andǝ kanigir mala amǝ'ɓangna mala Ɓakuli ɗang; ǝn yiu ace tamsǝia ɗang. Nda ace lumsǝia.

¹⁸ Ən nggǝ na wun mǝsǝcau, kǝ muna-cau pà kàm, sǝ ɓe kǝgir bǝti pà kàm aɓa Nggurcau mala Musa mǝnana à nǝ̀ pusǝì ka ɗang, she ɓǝ̀ kuli andǝ nzali ka tea malǝna ka.

¹⁹ Ɓǝ̀ yana kat sǝ yàllî nzong mǝkyauwe mwashat aɓalǝ amǝnia yì anzongcau, sǝ kǝ kani aɓwana ama ɓǝa pa kǝla yì ka, nǝ̀ ngga duk rítǎu aɓa Domurǝm mala kuli. Sǝ ɓwa mǝnana kǝ kpata amǝnia yì anzongcau sǝ kǝ kani aɓwana ama ɓǝa pa kǝla yì ka, nǝ̀ ngga duk ɓwamǝgule a Domurǝm mala kuli.

²⁰ Ən nggǝ na wun ama ɓǝ̀ ɓealɓoarna ma'wun kuti mala amǝ Farisi andǝ amǝkani Nggurcau mala Musa raka, wu pa wu nǝ̀ kum kutio aɓa Domurǝm mala kuli ɗang ko bǝti.

Yesu kanigir amur bumlulla

²¹ Wu ongŋǝna à banggi aɓwana mǝnana a pwaryan ngga ama, “A pà wu nǝ́ wal lú ɗang; ɓwa mǝnana wal lú ka à nǝ̀ pakki wi ɓashi.”

²² Sǝ mim ngga ǝn nggǝ na wun ama ɓwa mǝnana bumi lullo arǝ ɓi ka à nǝ̀ pakki wi ɓashi. Sǝ ɗǝm ngga à bangŋa ama ɓwa mǝnana tunǝî ɓì ɓwaɓana ka à nǝ̀ ká nǝi aban amǝɓashi. Sǝ mim ngga ǝn nggǝ na wun ama ɓǝ̀ a ne ɓwa ama “We ɓwazalǝa” ka, a nda ɓa ká tanni mala ɓashi lu-bǝsa.

²³ Ɓǝ̀ a ndarǝ pa ɓoro mo aban gyangŋan-peri sǝ ɓalǝo kasǝa ama ɓe kǝɓwa na kam ndanǝ cau a bumi a rǝo ka,

²⁴ nying ɓoro mo a ɓadǝm gyangŋan, nyare kya gilǝki ce wunǝ ɓwe peatu, sǝ wu yi pa ɓoro mo.

²⁵ Ɓǝ̀ kǝɓwa wulio ka gbara gilǝki nre wun wunǝi peatu sǝ wu kya ndaɓashi. Ɓǝ̀ a na raka nǝ̀ ngga kpapio wunǝ mǝɓashi, sǝ mǝɓashi ka nǝ̀ tasǝo a bu amǝ'munagara, sǝ à nǝ̀ ngga oasǝo a ndàkurban.

²⁶ Ən nggǝ no mǝsǝcau a pa nǝ́ purî nggur ɗang she ɓǝ̀ a mbwena gir mǝnana kat à kasǝo ka.

Kanigir mala Yesu amur cauɓikea nongnǝban mǝnana pa aɓa doɓala raka

²⁷ Wu ongŋǝna à bangŋa ama “A pà nǝ́ nongnǝ ɓwa mǝnana à kpapia wun doɓala wunǝi raka ɗang.”

²⁸ Sǝ mim ngga ǝn nggǝ na wun ama ɓwa mana kat sǝn mɓwama nǝ sǝnban nshawari ka, angŋǝna dǝmbǝa nongŋǝna nǝi a ɓabumi.

²⁹ Ɓǝ̀ mǝsǝo mǝli kǝ tsǝo a kǝ pak cauɓikea ka, pusǝì turi. Kǝpǝna wu ɗwanyi ɓe kǝ bareo mwashat amur mǝnana ɓǝa tur nggūrǝo kat aɓa tuli-bǝsa ka.

³⁰ Sǝ ɓǝ̀ buo mǝli kǝ tsǝo a kǝ pak cauɓikea ka, kasǝi turi. Kǝpǝna wu ɗwanyi ɓe kǝ bareo mwashat amur mǝnana ɓǝa tur nggūrǝo kat aɓa tuli-bǝsa ka.

Yesu kanigir amur gau doɓala

³¹ Ɗǝm ngga à bangŋa ama, “Ɓǝ̀ ɓwa nǝ̀ gau andǝ mami ka, dumǝna púp nǝ̀ pe wi takada gauwa.”

³² Sǝ mim ngga ǝn nggǝ na wun ama ɓwa mǝnana pǝr mami, sǝ pa ace cauɓikea mala nongnǝban a nza nǝ́ doɓala raka, ndarǝ tsǝie aɓa cauɓikea mala mǝ'nongginǝban nǝ aɓea aburana a nza nǝ́ doɓala. Sǝ ɓwa mǝnana al mǝnia yì ɓwama mǝnana burri pǝri ka, ndarǝ pak cauɓikea mala nongnǝ mālá ɓeɓwa.

Kanigir mala Yesu amur Kángir

³³ Sǝ ɗǝm ngga wu ongŋǝna à banggi aɓwana mǝnana a pwaryan ngga ama, “A pà nǝ́ kángir aɓa nyir ɗang. She a wu nǝ lumsǝ agir mǝnana a kana a ɓadǝm Mǝtalabangŋo ama a nǝ pea ka.”

³⁴ Sǝ mim ngga ǝn nggǝ na wun ama, wu kǝa kángir ɗang. Wu kǝa kángir nǝ kuli ɗang, acemǝnana nda bunomurǝm mala Ɓakuli.

³⁵ Sǝ pa wu nǝ̀ kángir gbal nǝ nzali ɗang, acemǝnana ndà ban usǝlǝ kusǝu male. Sǝ wu kǝa kan gbal nǝ Urǝshalima ɗang, acemǝnana nda nggeala mala Murǝm Mǝgule kat.

³⁶ Sǝ kǝa kan nǝ ɓamuro ɗang, acemǝnana a pà nǝ́ gandǝ pǝlǝ nyang muro mwashat ɓǝ̀ pwasǝo ko ɓǝ̀ pǝndǝ ka ɗang.

³⁷ Ɗeki “E” mo ɓǝ̀ duk “E,” sǝ “Awo” mo ɓǝ̀ duk “Awo”; ɓǝ̀ wori mǝnia ka pur nǝ ban Mǝɓealɓikea.

Yesu kanigir amur pegbal

³⁸ Wu ongŋǝna à bangŋa ama, “Ar mǝsǝu a kun ar mǝsǝu, sǝ ɓun minǝu a kun ɓun minǝu.”

³⁹ Sǝ mim ngga ǝn nggǝ na wun ama, kǝa nyesǝ mǝɓane a kun mǝɓane mǝnana à pakko ka ɗang. Ɓǝ̀ ɓwa kweo a takiro mǝli ka, pǝlǝi wi ɓe takiro.

⁴⁰ Ɓǝ̀ ɓwa na ama nǝ̀ ngga wulio nǝ̀ ako daura mo ka, pe wi andǝ nggea-daura mo gbal.

⁴¹ Ɓǝ̀ ɓwa tsǝo púp ama ɓǝ̀ wu o wunǝi mel mwashat ka, wu kyan wunǝi mel ɓari.

⁴² Ɓǝ̀ ɓwa zǝmbǝo ka, pe wi, sǝ ɓwa mǝnana yiua ak tangna a buo ka, ce a girì nǝi ɗang.

Yesu kanigir amur earce aɓiomǝbura

⁴³ Wu ongŋǝna à bangŋa ama, “Earce ɓio mǝ'murkala,” sǝ wu ɓinǝ ɓiomǝbura.

⁴⁴ Sǝ mim ngga ǝn nggǝ na wun ama: Wu earce aɓi wun amǝbura sǝ wu kǝ pak hiwi ace aɓwana mǝnana à ɓinǝ mǝsǝ wun sǝ à kǝ pa wun tanni ka.

⁴⁵ Ɓǝ̀ wu pa anggo ka wu nǝ̀ duk amuna mala Tar wun mǝnana a kuli ka. Acemǝnana yì ka, kǝ tsǝk pwari male kǝ ta amur aɓwana amǝɓane andǝ amǝɓoarne, sǝ kǝ nya mbulo amur amǝ pak cauɓoarna andǝ amǝ pak ɓealɓikea.

⁴⁶ Ɓǝ̀ earcearǝu ma'wun ngga nda ace amǝ'earce wun nǝmurǝia ka, ya tangnakusǝu na wu ndanǝi? Nggearǝ amǝ'cauɓikea ka anggo sǝ à pakkiyia.

⁴⁷ Sǝ ɓǝ̀ amǝ'eam wun na nǝmurǝia wu makkiyia kun ngga, nǝ man sǝ wu kuti acili aɓwana mǝnana amǝkpatam na raka? Nggearǝ amǝɓanza ka anggo sǝ à pakkiyia.

⁴⁸ Ace mǝno ka wu lumsǝ nǝ cauɓoarna kǝla mǝnana Tar wun mana a kuli ka lumsǝ nǝ cauɓoarna ka.