Matiu 28 - Maləmce Məfele mala Ɓakuli: Kurcau Məbəshe

Ɓakuli loasǝ Yesu nǝ yilǝmu

¹ A nzǝm pwari Sabbat, nǝ dǝmbari ɗiɗyal a pwari Ladi ka, Maryamu Ɓwa Magdala andǝ ɓe Maryamu waria sǝn ɓembe.

² Lang ngga, kara nzali dǝurǝo kǝrkǝr. Mǝturonjar mala Mǝtalabangŋo pur a kuli yi sulǝo, ramta tali mana à girna kun ɓembe nǝi ka, pǝlǝa do amuri.

³ Rǝi kǝ ta gbǝang kǝla linzama mala mbulo; anggurbyau male pwasǝ pwapwat kǝla buke.

⁴ Amǝyal ɓembe sǝni ka, rǝia ɓǝla nǝ nggea ɓangciu, sǝ à kya kpa nzali kǝla aɓwana mana à wuna ka.

⁵ Mǝturonjar ne amamǝne ama, “Ɓangciu ɓǝ̀ kǝa pakka wun ɗang. Ən sǝlǝna ama wu nda ban alta Yesu mana à gballì a nggun ka.

⁶ Pa akani ɗang; Ɓakuli loasǝni nǝ yilǝmu, kǝla mǝnana bangga wun ngga. Wu yiu wu yi sǝn ban mana nong kam ngga.

⁷ Sǝ wu nyare a kaurǝa wu kya ne alaggana male ama, ‘Longŋǝna nǝ yilǝmu, ɗǝm ngga nda aka wun dǝmbǝa kǝ ká a Galili ka. Wu nǝ̀ ngga sǝni akano.’ Ɓalǝ wun ɓǝ̀ kasǝa ama ǝn bangŋǝna wun ngga.”

⁸ Amamǝna man nying ɓembe tsuk-tsuk. Ɓangciu pakkia wia sǝ bumia pwasǝ kǝrkǝr. À ɓangŋa à nǝ̀ ngga banggi alaggana male ce.

⁹ À nda njar aban ká ka, kara Yesu yi kasǝa a dǝmbǝia, nea wia ama, “Ən nggǝ makka wun kun.” À pǝlǝa à yiu abani tu, à yì kurrì zǝp arǝ akusǝi, sǝ à peri.

¹⁰ Yesu pǝlǝa nea wia ama, “Ɓangciu ɓǝ̀ kǝa pakka wun ɗang. Wu kyane wu kya ne amǝ'eambǝam ɓǝa o a Galili, à nǝ̀ ngga sǝnam nggam.”

Cau mana amǝyal ɓembe bang ngga

¹¹ Lang amamǝna man na ban o ka, aɓea amǝyalban mǝnana à tsǝia yal ɓembe ka, à o aɓa nggeala à kya banggi agbani pǝris ce gir man pak kat ka.

¹² Agbani pǝris andǝ aɓwana-mǝgule rambǝa à kurkunarǝia. À twal nggea boalo mǝgule à pea soje.

¹³ À nea wia ama, “Wu bangŋa ama wu nda ntulo nǝ du sǝ alaggana male yiu à yì iuwi à um nǝi.

¹⁴ Ko ɓǝ̀ nggwamna ok ce ka, sǝm nǝ̀ ngga oasǝkì cau a rǝì pà nǝ̀ pakka wun kǝgir ɗang.”

¹⁵ Pǝlǝa asoje ak boalo sǝ à kpata cau man gbal à banggia wia ka. Mǝnia yì cau ka aki kun amǝ Yahudi yi pur a yalung.

Turo mǝgule mana Yesu pe alaggana male ka

¹⁶ Alaggana man lum-nong-mwashat ka à kutio à o a Galili, amur nkono mana Yesu banggia wia ama ɓǝa kyan kam ngga.

¹⁷ Lang à sǝni ka, à ɓun a ɓadǝmbǝi à peri; sǝa ma aɓea aɓwana atea ka à ear ama Yesu na ɗang.

¹⁸ Yesu pǝlǝa yiu abania sǝ na ama: “Rǝcandǝa mǝnana a kuli andǝ mana a ɓanza kat ka Ɓakuli panami!

¹⁹ Ace mǝno ka, wu kyane aban ɓwapǝndǝa arǝ anzali kat, wu yinǝia ɓǝa pǝlǝ amǝkpatam. Wu pakkia wia batisǝma aɓa lullǝ Ɓakuli Tarrû, andǝ mala Muni, andǝ mala Bangŋo Mǝfele.

²⁰ Wu kania wia ɓǝa kpata agir mana kat ǝn bangga wun ngga. Mǝ nda ata wun kàngkàng a ko ya pwari ka, ba masǝlǝata ɓanza.”