Matiu 27 - Maləmce Məfele mala Ɓakuli: Kurcau Məbəshe

À umnǝ Yesu a ɓadǝm Bilatus

¹ Lang ban kwarna adyan ngga, agbani pǝris kat andǝ aɓwana-mǝgule à yì dapi à kurkunarǝia amur Yesu à nǝ̀ wal-lui.

² À taka bui sǝ à um nǝi aban Bilatus ɓwa Roma, nggwamna mala bu-nzali Yahudi.

Yahuda gyar ɓamuri

³ Lang Yahuda mana mak Yesu sǝni à kasǝna ɓashi à nǝ̀ wal Yesu ka, pak bumkiɗikea, pǝlǝa nyesǝi agbani pǝris andǝ aɓwana-mǝgule mǝsǝboalo zǝnariya lumi-tārú mana ak a buia ka.

⁴ Nea wia ama, “Ən pangŋǝna cauɓikea, mana ǝn mak ɓwa mǝnana pak ɓe kǝ cauɓikea raka.” À pǝlǝa à ne wi ama, “Man oasǝ sǝm aɓa mǝno ka? Mana ka mona nǝmurǝo.”

⁵ Pǝlǝa Yahuda twal boale ka sukki a nzali aɓa Ndàmǝgule mala Ɓakuli, sǝ puro o kya ɗur nggur a myali gyar ɓamur rǝì.

⁶ Agbani pǝris pwan boale sǝ à na ama, “Nggurcau bangŋa ama ɓoaro ɓǝa tsǝk ulang mǝnia yì boalo ka aɓa ndaboalo mala Ndàmǝgule mala Ɓakuli ɗang, acemǝnana boalo nkila na.”

⁷ À naki acau amur boale, sǝ à masǝlǝate ka à na ama à nǝ̀ kurǝ́na nzali mala mǝɓaki-ankwaring nǝi ɓǝ̀ duk ɓembe tsǝk abǝri.

⁸ Nda gir mǝnana tsǝa sǝ à kǝ tunǝ banì yalung ama, “Nzali Nkila” ka.

⁹ Mǝnia ka nda lumsǝ ɓangna mala Irmya mǝnana ama, À twal boalo zǝnariya mǝsǝì lumi-tārú, boalo mǝnana amǝ Isǝrayila kasǝa à nǝ̀ pa amuri ka,

¹⁰ nda à kurǝ́na nzali mala mǝɓaki-ankwaring nǝi ka, kǝla mǝnana Mǝtalabangŋo bang ngga.

Bilatus ɗiki Yesu acau

¹¹ Yesu yi came a ɓadǝm Bilatus ɓwa Roma, nggwamna amur bu-nzali Yahudi. Nggwamna ɗi ama, “A nda murǝm mala amǝ Yahudi le?” Yesu eari wi ama, “E, nda kǝla mǝnana a bang ngga.”

¹² Lang agbani pǝris andǝ aɓwana-mǝgule yi banggi acau à tsǝki Yesu a rǝì ka, duk kuni piu.

¹³ Bilatus pǝlǝa ɗi ama, “A ok acau mana aɓwana man kǝ na a muro ama a pak ka re?”

¹⁴ Sǝ Yesu loasǝ kuni amur ko kǝ cau mwashat ɗang. Gir nî pakki nggwamna gir'ndali.

À kasǝi Yesu ɓashi lú

¹⁵ Ko a ya pwari Lamsan Yalimuru ka pak ka nggwamna kǝ panzǝ mwashat ata apursǝna mana aɓwabunda earce ka.

¹⁶ A baku mǝno ka ɓe pursǝna nakam lullǝi ama Barabbas. Aɓwana surǝì pepe nggea kanggǝrang mǝyàl-nzongcau na.

¹⁷ Lang ɓwabunda yi ramǝna ka, Bilatus ɗia ama, “Yana mwashat wu earce ɓǝ̀ ǝn panzǝa wuni: Barabbas na le ko Yesu mana à tunǝki ama Kǝrǝsti ka?”

¹⁸ Yì ka, sǝlǝna ama mɓali na tsǝk aɓwana-mǝgule sǝ à yiu nǝ Yesu abani ɓǝ̀ pakki wi ɓashi ka.

¹⁹ Lang Bilatus na ban do amur buno ɓashi ka, mami turi ban nǝ cau ama, “Pusǝki abuo, nying ɓwa mǝno andǝa kunpwasǝa male, acemǝnana ǝn tanni a lorǝo kǝrkǝr yalung ata cau male.”

²⁰ Agbani pǝris andǝ aɓwana-mǝgule ka à ɓorikitakun aɓwabunda ama ɓǝa ear ama Barabbas na ɓǝa nyi, sǝ Yesu ka ɓǝa wali.

²¹ Bilatus nyare ɗi ɓwabunda ɗǝm ama, “Ata aɓwana man ɓari ka yana mǝ nyi ɓǝ̀ o le?” À ear ama, “Barabbas!”

²² Bilatus pǝlǝa ɗia ama, “Sǝ Yesu mana à tunǝki ama Kǝrǝsti ka, mana ɓǝ̀ ǝn pang nǝi?” À loasǝ gia kat ama, “Ɓǝa gballì a nggun!”

²³ Bilatus ɗia ama, “Ace mana? Ya cauɓikea nani pa?” Sǝ ɓwabunda loasǝ gia kǝrkǝr ama, “Ɓǝa gballì a nggun!”

²⁴ Lang Bilatus sǝni pà nǝ̀ gandǝ pak kǝgir raka, sǝ ɗǝm ngga aɓwana no à nǝ̀ loasǝ munǝo a kusǝ ce ka, twal mur laki abui a ɓamǝsǝ aɓwabunda. Na ama, “Buam pa ɓa nkila mala mǝnia yì ɓwa ka ɗang. Mana ka ma'wun na!”

²⁵ Ɓwabunda kat ear ama, “Ɓǝ̀ nkile do amur sǝm sǝnǝ amuna ma'sǝm!”

²⁶ Bilatus pǝlǝa panzǝia wia Barabbas, sǝ Yesu ka tsǝa ɓǝa kwe, pǝlǝa tasǝi a buia ɓǝa kya gballì a nggun.

Asoje ɓangginǝ Yesu

²⁷ Asoje mala nggwamna twal Yesu a um nǝi a banturo mǝgule malea sǝ à kya rambǝ acili asoje a kàrǝì a ɓalǝu.

²⁸ À swarki wi adaura rǝì sǝ à turi wi daura-murǝm mǝbangŋe.

²⁹ À alta zwe à tana jeko nǝi sǝ à oasǝi wi a ɓamuri. À pe wi gara a bui mǝli sǝ à ɓun a ɓadǝmbǝi à kǝ ɓanggini ama, “Ɓǝ̀ rǝo pwalo, Murǝm mala amǝ Yahudi!”

³⁰ À takki ntāra a rǝì, pǝlǝa à ak gara mana a bui ka à walki nǝi a ɓamuri.

³¹ Lang à ɓanggina nǝi ka pǝlǝa à swari wi daura-murǝm mana à turi wi ka, sǝ à nyesǝ amale à turi wi a rǝì. À kuti nǝi aban ká gballe.

À gballì Yesu a nggun-gangndi

³² Lang à purni ɓa nggeala ka, à kya je andǝ ɓeɓwa mala nggeala Sayirin, lullǝi ama Shiman. À tsǝi púp ɓǝ̀ aki Yesu twal nggun-gangndi.

³³ À yì bik ban mǝnana à tunǝki ama Golgota ka (ban mala nkpoula ɓamuru).

³⁴ Akano à pe Yesu mùr-anap mana à zurǝì andǝ ɓe mùrgìr mǝlulle ama ɓǝ̀ nui. Lang oe a kuni ka, ginǝi.

³⁵ Asoje pǝlǝa à gballì Yesu a nggun-gangndi sǝ à kocàca amur adaura male, à gakia rǝia.

³⁶ Pǝlǝa à kya dum nǝ do abanì a yale.

³⁷ À gilǝ cau mana à ɓashi wi nǝi ka sǝ à gballì arǝ nggun amuri, ama: ƁWA MƏNIA KA NDA YESU, MURƏM MALA AMƏ YAHUDI.

³⁸ À gballì Yesu andǝ aɓea aɓwana ɓari amǝ-akiagir mala aɓwana nǝ mazo, arǝ anggun-gangndi malea, mwashat a bui mǝli sǝ ɓe a bui mǝnggare.

³⁹ Aɓwana mana à kǝ kuti a njargula ka à sanggì, à piki muria a mala oalban

⁴⁰ à kǝ na ama, “We ɓwan a nǝ arki Ndàmǝgule mala Ɓakuli sǝ a nǝ ɓè aɓa nongŋo-tārú ka, amsǝ ɓamuro wuni ra. Ɓǝ̀ a nda Muna mala Ɓakuli ka, sulǝî mur nggun-gangndi mana ka.”

⁴¹ Agbani pǝris andǝ amalǝm nggurcau andǝ aɓwana-mǝgule gbal ka à ɓanggini anggo.

⁴² A na ama, “Yì ka, amsǝ aɓea ɓwana sǝ gandǝ amsǝ ɓamuri ɗang! Ɓǝ̀ yì nda Murǝm mala amǝ Isǝrayila ka, ɓǝ̀ sulǝî mur nggun-gangndi man ado, sǝ sǝm nǝ̀ earnǝi.

⁴³ Yì ka, guli arǝ Ɓakuli, sǝ na ama yì ka, Muna mala Ɓakuli na. Ɓǝ̀ Ɓakuli earce nǝ̀ amsǝi ka, ɓǝ̀ amsǝi ado sǝm nǝ̀ sǝni.”

⁴⁴ Amǝ-akiagir mala aɓwana nǝ mazo man à gballia andǝi ka à ne wi acau mǝɓane gbal.

Lú mala Yesu

⁴⁵ Nǝ bu-pwari lum-nong-ɓari mala pwari ka kara pǝndǝa yi gir ban, yi pur a bu-pwari tārú.

⁴⁶ Lang ndarǝ gbashi bu-pwari tārú mǝno ka, Yesu loasǝ gi kpǝm na ama, “Eli, Eli, lama sabatani?” Ɓālǝi ama, “Ɓakuli mem, Ɓakuli mem, palang sǝ a pǝlǝam nzǝmo?”

⁴⁷ Lang aɓea ɓwana mana à came abanì à ok Yesu ka, à na ama, “Ndarǝ tunǝ Iliya.”

⁴⁸ Ɓe ɓwa aɓalǝia ɓang tsuk-tsuk kya twal soso, parri aɓa mur anap mǝhangŋe pǝlǝa oasǝi a kun gara lǝmndǝì wi ama ɓǝ̀ nu.

⁴⁹ Acili aɓwana mǝno ka a na ama, “Came sǝm nǝ̀ sǝni ko yakǝla Iliya nǝ̀ yiu nǝ̀ yia amsǝi.”

⁵⁰ Yesu nyar ɗǝm loasǝ gi ɓua nǝ rǝcandǝa, pǝlǝa yilǝmi puri rǝì.

⁵¹ Aɓa mǝno anggo ka kara lagir mǝnana à kasǝna ban mǝfele nǝi aɓa Ndàmǝgule mala Ɓakuli ka san a kuli kya bwal nzali, gau a ɓalǝu ɓari. Nzali dǝurǝo, atali arkia.

⁵² Aɓembe mǝnggia, sǝ aɓwana mala Ɓakuli mǝnana à wu ɗiɗyal ka, à lo nǝ yilǝmu.

⁵³ À purki ɓalǝ aɓembe. Anzǝm lo mala Yesu a ɓembe ka, à yì kuti aɓa nggeala mǝfele, à lǝmndǝ rǝia aban aɓwana pas.

⁵⁴ Lang ɓwamǝgule mala asoje andǝ asoje mǝno à tamsǝia yal Yesu sǝn dǝurǝo mala nzali andǝ agir mana à pak kat ka, ɓangciu pakkia wia, sǝ à na ama, “Ɓafo, ɓwa man ngga Muna mala Ɓakuli na.”

⁵⁵ Amamǝna na abanì pas mana à pur a Galili sǝ à yiu ata Yesu ace ɗenyi nǝi ka. À cam zak à kǝ sǝn gir mǝnana kǝ pak kat ka.

⁵⁶ Maryamu Ɓwa Magdala, sǝ Maryamu nggea ka Jemis andǝ Yisǝfu, andǝ nggea ka amuna mala Zabadi, à ndakam aɓalǝ amamǝne.

Tsǝkban Yesu

⁵⁷ Lang pwari kpana ka, ɓe mǝkume, ɓwa Arimatiya yiu. Lullǝi ama Yisǝfu. Yì gbal ka mǝkpata Yesu na.

⁵⁸ Kutio o aban Bilatus kya zǝmbǝa ɓǝa pe wi lú Yesu. Bilatus pǝlǝa bangŋa ama ɓǝa pe wi.

⁵⁹ Yisǝfu ka twal lú Yesu sǝ marǝki aɓa lagir mǝpwasǝe mǝɓoarnsari

⁶⁰ pǝlǝa tsǝi a ɓembe male mǝbǝshe mana tǝmi a nsoro tali ka. Ramnggita nggea tali mǝtangŋe girna kun ɓembe nǝi pǝlǝa kutio o.

⁶¹ Maryamu Ɓwa Magdala andǝ ɓe Maryamu à yì do akano a ɓadǝm ɓembe.

À tsǝk asoje à yál ɓembe mala Yesu

⁶² Lang ban fa ka, nda pwari Sabbat, agbani pǝris andǝ amǝ Farisi yi rambǝa a ɓadǝm Bilatus.

⁶³ À ne wi ama, “Ɓwamǝgule, ɓalǝ sǝm kasǝa ama mana mǝno yì mǝswarki aɓwana ndanǝ yilǝmu ka, bangŋa ama a nzǝm nongŋo tārú ka nǝ̀ loapi ɓembe.

⁶⁴ Nda sǝm ama wu tsǝa ɓǝà kǝ̀ yal ɓembe she ɓǝ̀ anongŋo tārú lumsǝna ka. Ɓǝ̀ ana raka yakǝla alaggana male nǝ̀ yia iu lui sǝ à nǝ̀ banggi aɓwana ama long nǝ lo a ɓembe. Sǝ mǝnia yì swarkiban nǝ nzǝmo ka nǝ̀ kuti mǝdǝmbe nǝ ɓike.”

⁶⁵ Bilatus banggia wia ama, “Wu kya tsǝk asoje ɓǝa yál ɓembe pepe aɓa njar mǝnana kat wu nǝ̀ gandǝ pe ka.”

⁶⁶ Pǝlǝa à o à kya tsǝk parbu mala murǝm amur ɓembe ace mǝnana ɓǝ̀ ɓwa je ka à nǝ̀ sǝlǝa, sǝ à tamsǝ asoje ɓǝa yál banì.