Matiu 24 - Maləmce Məfele mala Ɓakuli: Kurcau Məbəshe

Yesu na cau amur masǝlǝata ɓanza

¹ Lang Yesu nyingŋǝna ɓa Ndàmǝgule mala Ɓakuli sǝ nda ban o ka, alaggana male yiu abani sǝ à ne wi ama ɓǝ̀ sǝn a'ulang aɓah mala Ndàmǝgule mala Ɓakuli.

² Pǝlǝa nea wia ama, “Wu sǝn aɓah mǝnia ka re? Ən nggǝ na wun mǝsǝcau à nǝ̀ yia arkia à nǝ̀ sukkia a nzali, kǝ tali pa nǝ̀ ueo aban came amur ɓi ɗang.”

³ Nǝ nzǝmo ka Yesu yì do amur Nkono mala anggun Olif. Alaggana male yiu abani nǝmurǝì sǝ à ne wi ama, “Sǝm ama wu bangga sǝm, a ya pwari sǝ agir mǝnia ka nǝ̀ yia pa, sǝ mana nda gir mǝnana nǝ̀ lǝmndǝ yiu mo andǝ masǝlǝata ɓanza ka?”

⁴ Yesu pǝlǝia wia ama: Wu tsǝk kir wun, wu kǝa eare ɓǝ̀ ɓwa ɓosǝki wun ɗang.

⁵ Acemǝnana aɓwana pas nǝ̀ ngga yiu aɓa lullǝam à nǝ̀ na ama à ndaka Kǝrǝsti, sǝ à nǝ̀ ɓosǝki aɓwana pas.

⁶ Wu nǝ̀ ok ce a'lwa andǝ gǝshi a'lwa, cala ɓangciu pakka wun ɗang. Amǝnia yì agir ka à nǝ̀ yia pa púp, sǝ masǝlǝata ɓanza ka nda piu.

⁷ Nzali nǝ ká lwa arǝ ɓe nzali. Murǝm nǝ̀ ká lwa arǝ ɓe murǝm. Nzala andǝ dǝurǝo mala nzali nǝ pa arǝ aban ɗàngɗáng aɓa ɓanza.

⁸ Amǝnia yì agir kat ka à ndaka tita tanni mǝnana kǝ yiu ka.

⁹ À nǝ̀ yia bwalki wun, à nǝ̀ ká nǝ wun aban aɓwana mǝnana à nǝ̀ pa wun tanni sǝ à nǝ̀ wal lú wun ngga. Aɓwana arǝ anzali kat à nǝ̀ ɓinǝ mǝsǝ wun acemǝnana wu ndaka amǝ kpatam ngga.

¹⁰ Aɓalǝ amǝno yì apwari ka aɓwana pas nǝ̀ nying paɓamuru malea a rǝam, à nǝ̀ oasǝkimúr rǝarǝia sǝ à nǝ̀ ɓinǝmǝsǝ rǝarǝia.

¹¹ Amǝ'ɓangna mǝ'nyirì pas nǝ̀ yia puro à nǝ̀ ɓosǝki aɓwana pas.

¹² Sǝ acemǝnana ɓealɓikea nǝ̀ yia lakki ka, earcearǝu mala bangula aɓwana a rǝarǝia ka nǝ̀ amsǝa,

¹³ sǝa ma ɓwa mǝnana cam kàngkàng aɓa paɓamuru aban ká masǝlǝate ka, nǝ̀ auwa.

¹⁴ À nǝ̀ hamnǝ Cau Amsǝban mala Domurǝm mala kuli, ace mǝnana aɓwana kat a ɓanza ka ɓǝa o. A nzǝm mǝno ka sǝ masǝlǝata ɓanza nǝ̀ yiu.

¹⁵ Wu nǝ̀ yia sǝn yì “Gir ɓeami mǝnana kǝ tsǝa Ɓakuli nǝ̀ nying ban-do male aɓalǝ aɓwana,” mana Daniyel mǝɓangna mala Ɓakuli bang ce, camǝna aban mǝfele aɓa Ndàmǝgule mala Ɓakuli. Sǝ ɓǝ̀ wu sǝnǝni ka, ɓwa mǝnana kǝ ɓal mǝnia yì cau ka ɓǝ̀ surǝ ɓālǝi.

¹⁶ Sǝ aɓwana mǝnana a nzali Yahudi ka ɓǝa ɓangŋa ɓǝa o aɓalǝ ankono.

¹⁷ Ɓwa mǝnana nda amur kurǝm ngga ɓǝ̀ kǝa na ama nǝ̀ sulǝo nǝ̀ twal kǝgir a ɓala ɗang.

¹⁸ Ɓwa mǝnana nda a ɓaban ngga ɓǝ̀ kǝa na ama nǝ̀ nyare nǝ̀ ngga twal daura male ɗang.

¹⁹ Aɓalǝ amǝno yì apwari ka nǝ̀ duk gir ɓangciu kǝrkǝr nǝ amǝ'munabum andǝ amǝ'nggeamur!

²⁰ Wu zǝmbǝa ɓǝ̀ ɓangŋa ma'wun ɓǝ̀ kǝa pa a kunɗwal ko a pwari Sabbat ɗang.

²¹ Acemǝnana nggea tanni mǝgule nǝ̀ lo, mǝnana a puro mala ɓanza yi bwal ado ka, à malaká sǝn ulang yì ɗang, sǝ à nzǝmi ka à pà nǝ̀ sǝn ulang yì ɗǝm ɗang.

²² Yale ɓǝ̀ Ɓakuli amsǝ ma anonggeo mala tanni mǝno raka, kǝɓwa pà kàm nǝ̀ au ɗang, sǝa ma ace aɓwana mǝnana Ɓakuli tarkia ka nǝ̀ amsǝ anonggeo mǝno.

²³ Ɓǝ̀ kǝɓwa puro sǝ na wun ama, “Kǝrǝsti nia ka,” ko “Ndako ka,” wu kǝa eare ama mǝsǝcau na ɗang.

²⁴ Acemǝnana akǝrǝsti mǝ'nyirì andǝ amǝ'ɓangna mǝ'nyirì à nǝ̀ puro sǝ à nǝ̀ pakki agir-lǝmndǝa mǝgulke andǝ agir-ndali ace swarki aɓwana, yale ɓǝa nǝ̀ gandǝi ka, nggearǝ aɓwana mǝnana Ɓakuli tarkia ka, à nǝ̀ ɓosǝkia.

²⁵ Wu tsǝk kir wun, ǝn gbara ǝn bangŋǝna wun adyan.

²⁶ Ɓǝ̀ kǝɓwa na wun ama, “Kǝrǝsti na ko a ɓabondo ka,” ce wu kyan ɗang; ko ɓǝa na ama, “Ndya sǝmbǝrǝa a ɓakurǝm ngga,” wu kǝa earnǝi ɗang.

²⁷ Yiu mala Muna mala Ɓwa ka nǝ̀ pa kǝla mǝnana tǎlaban kǝ linzama nǝ takuli sǝ aɓwana a njarnzali kǝ sǝni ka.

²⁸ Ban mǝnana lugir nong kam ngga, abanì sǝ adǝkǝlaki nǝ̀ rambǝa.

Nyare mala Muna mala Ɓwa

²⁹ Tu àkǝ̀ nzǝm tanni mǝnana aɓalǝ amǝno yì anonggeo ka, “Pǝndǝa nǝ̀ gir ɓamǝsǝ pwari, sǝ zongŋo ka pà nǝ̀ ta ɗǝm ɗang; anlero nǝ̀ puri kuli à nǝ̀ kpa, sǝ arǝcandǝa mǝnana a bumkuli ka à nǝ̀ dǝurǝkio.”

³⁰ Sǝ anggo ka, gir mǝnana nǝ̀ lǝmndǝ ama Muna mala Ɓwa na kǝ yiu ka nǝ̀ pusǝrǝi a kuli. Ɓwabunda man kat a ɓanza ka nǝ̀ ɓua. À nǝ̀ sǝn Muna mala Ɓwa aban yiu aɓalǝ apǝrɓang a bumkuli, nǝ rǝcandǝa andǝ ɓoarɓwa mǝgule.

³¹ Sǝ nǝ̀ tasǝ amǝturonjar male nǝ tunǝban gi njawe mǝgule, à nǝ̀ dapikia aɓwana male mǝnana à tarkia ka arǝ aban kat aɓa ɓanza.

Yesu Kanigir nǝ nggun vwari

³² Wu kànì mǝnia yì gir ka arǝ nggun vwari; ɓǝ̀ tinata to sǝ nda ban pusǝ mbui ka, wu sǝlǝ ama mbulo gbashina.

³³ Ana gbal, ɓǝ̀ wu sǝna amǝnia yì agir ka, wu sǝlǝ ama pwari gbashina, nda kun ɓala tu.

³⁴ Ɓafo, ǝn nggǝ bangga wun, nza man pa nǝ̀ kuti ɓa ɗang she ɓǝ̀ amǝnia yì agir ka à pangŋǝna ka.

³⁵ Agir mǝnana a bumkuli andǝa mǝnana a nzali ka tea nǝ̀ malâ, sǝ cau mem ngga te pà nǝ̀ mal ɗang.

Kǝ ɓwa surǝ nongŋo andǝ bu-pwari ɗang

³⁶ Kǝ ɓwa surǝ pwari ko bu-pwari mǝnana Muna mala Ɓwa nǝ̀ yiu nǝi ka ɗang. Amǝturonjar mǝnana a kuli ka à surǝì ɗang, ko nggearǝ Muna mala Ɓakuli ka surǝì ɗang, she kǝ Ɓakuli nǝmurǝì.

³⁷ Kǝla mǝnana yi pa a nza mala Nuhu ka, anggo sǝ yiu mala Muna mala Ɓwa nǝ̀ pa.

³⁸ A nza mǝnana mùrgula malaká yiu peatu raka, ɓwapǝndǝa kǝ lili, kǝ nu, sǝ à kǝ al rǝarǝia, yi bwal pwari kutio mala Nuhu aɓa nggea-waru.

³⁹ À sǝlǝ ama ɓe kǝgir nǝ̀ yia kumia ɗang, kara mùrgula yi pwania kat. Anggo sǝ yiu mala Muna mala Ɓwa nǝ̀ pa.

⁴⁰ A pwari mǝno ka, à nǝ̀ kum aburana ɓari a tarǝia a ɓaban; à nǝ̀ twal mwashat, à nǝ̀ ɗeki ɓe.

⁴¹ À nǝ̀ kum amamǝna ɓari amur tali aban gogô, à nǝ̀ twal man mwashat ka, à nǝ̀ nying ɓe.

⁴² Ace mani ka, wu tsǝk kir wun acemǝnana wu surǝ pwari mǝnana Mǝtala wun nǝ̀ yiu nǝi ka ɗang.

⁴³ Sǝ wu sǝlǝ ama, ɓǝ̀ mǝtala-ɓala surǝ bu du mǝnana mǝn'i nǝ̀ yiu nǝi ka, nǝ̀ dum nǝ mǝsǝì, pà nǝ̀ eare ɓǝa yi ɓun kunɓala male ɗang.

⁴⁴ Anggo gbal wu dum nǝ gilǝrǝu, acemǝnana Muna mala Ɓwa nǝ̀ yiu a bu-pwari mǝnana wu pak ɗenyicau mala yiu male raka.

Guro mǝ'mǝsǝcau nì andǝ mana pànǝ mǝsǝcau raka

⁴⁵ Yana ɓwe nda guro mǝ'mǝsǝcau nì andǝ mǝsǝle mǝnana mǝtala-ɓala male twali tsǝi amur acili aguro, ɓǝ̀ kǝ pea wia girlina a bu-pwari mǝnana kasǝ ka?

⁴⁶ Mǝnia yì guro ka ban nǝ ɓoari wi mǝnana ɓǝ̀ mǝtala ɓala male nyare yi kumi nǝ̀ nggǝ pak ture ka.

⁴⁷ Mǝsǝcau ǝn nggǝ bangga wun, nǝ̀ yia tsǝi ɓǝ̀ kǝ ɗenyi nǝ kume male kat.

⁴⁸ Sǝ ɓǝ̀ guro mǝno ka mǝɓealɓikea na, sǝ ne ɓamuri ama, “Mǝtala-ɓala mem pà nǝ̀ yiu tu ɗang.”

⁴⁹ Sǝ tita kwaki aɓi aguro sǝ kutia li andǝ nuki agir ata amǝwalo mba ka,

⁵⁰ mǝtala-ɓala mala mǝno yì guro ka nǝ̀ yiu a pwari mǝnana tsǝk ɓālǝi raka, a bu-pwari mǝnana pànǝ sǝlǝ raka.

⁵¹ Nǝ̀ yia kwe nǝ̀ kasǝki wi anpenye, sǝ nǝ̀ ramte ata amǝ'kunɓarina, abanì sǝ à nǝ̀ nggǝ ɓua à nǝ̀ nggǝ nǝmnggi munabuia.