Matiu 14 - Maləmce Məfele mala Ɓakuli: Kurcau Məbəshe

Lú mala Yohana Mǝbatisǝma

¹ Aɓalǝ anonggeo mǝno ka Hirǝdus murǝm mala bu-nzali Galili ok cau amur Yesu.

² Ne amǝte ama, “Mǝnia ka Yohana Mǝbatisǝma na loapi ɓembe ka! Nda gir mana tsǝa sǝ ndanǝ bangŋo mala pakki agir-ndali ka.”

³ Hirǝdus angŋǝna dǝmbǝa bwalǝna Yohana kùrni sǝ oasǝni a ndàkurban. Kùrri ace Hirǝdiya mala Filip mǝ'eambǝi yì Hirǝdus.

⁴ Nda ace mana Yohana camarǝ banggi wi ɗiɗyal ama: “Ɓoaro wu do wunǝ mɓwame ɗang.”

⁵ Eare male yì Hirǝdus ka nǝ̀ wal lú Yohana, sǝ ɓangciu pakki wi ama aɓwana nǝ̀ loasǝ munǝo, acemǝnana koyan ngga twal Yohana mǝɓangna mala Ɓakuli na.

⁶ A pwari pakiɗire ɓǝlban mala Hirǝdus ka, nsari mala Hirǝdiya tánggwam mǝnana tsǝk Hirǝdus banɓoari wi kǝrkǝr,

⁷ gandǝa kánmbi wi gir ama nǝ̀ pe wi ko mana zǝm ngga.

⁸ Yì muna ka ngge soakite ɓǝ̀ na ama, “Ɓǝa pam ɓamur Yohana Mǝbatisǝma aɓa tasau akani adyan.”

⁹ Murǝm ngga bumi kìɗìkì, sǝ ace kángir andǝ abǝri mana ate aban li ka, gandǝa tsǝa ɓǝa pe muna-ɓwame gir mǝnana zǝm ngga;

¹⁰ pǝlǝa tur aɓwana à kya kasǝ ɓamur Yohana a ndàkurban.

¹¹ À yiu nǝ ɓamur Yohana aɓa tasau, sǝ à pe muna-ɓwame; pǝlǝa twali kya pe ngge.

¹² Alaggana mala Yohana yiu à yì twal lui à tsǝkbani, sǝ à kutio à kya banggi Yesu.

Yesu linǝ aɓwana á-tongno

¹³ Lang Yesu yi ok mǝnia yì cau ka, pǝlǝa eauwe a waru à samsǝa à o aban mǝnana kǝɓwa pà kàm raka. Aɓwana nǝ̀ yia ok ama Yesu eauna a waru umna ka, à purkio arǝ ala malea à o ate nǝ kusǝia.

¹⁴ Yesu yi kpashi, nǝ̀ eapi waru ka sǝn ɓwabunda kǝrkǝr aban rambǝa. Mǝsǝswatǝr malea pakki wi pǝlǝa twalia amǝkwano mana aɓalǝia ka ban arǝkwana malea.

¹⁵ Pwari nǝ̀ yia kpa ka, alaggana male yiu abani à yì ne wi ama, “Ban mǝnia ka ɓabondo na, sǝ pwari kpana, nying ɓwabunda ɓǝa o arǝ amuna-là ɓǝa kya kuri ɓamuria girlina.”

¹⁶ Yesu nea wia ama, “Ɓǝa ka o anggo ɗang, wu pea wia girlina ɓǝa li.”

¹⁷ Sǝ à ne wi ama, “Kǝ bǝredi tongno nǝ amǝnji ɓari nda mǝnana sǝm ndanǝi a bu sǝm ngga.”

¹⁸ Sǝ na ama, “Wu yinǝam nǝia akani.”

¹⁹ Pǝlǝa tsǝk aɓwana ɓǝa do amur munabondo. Sǝ twal abǝredi mǝnia tongno andǝ anji ɓari ka, loasǝ mǝsǝì a kuli pakki Ɓakuli yàwá, sǝ ɓwanggia, pǝlǝa pe alaggana male, sǝ yia gbal ka à gakia aɓwana.

²⁰ Yia kat à li à ɗǝmbǝo. Sǝ alaggana male ramnggi aɓwanggine mana ue ka, à lumsǝ azace lum-nong-ɓari.

²¹ Laki mala aɓwana mana à lili ka, aburana á-tongno na. Amamǝna andǝ amuna ka à ɓallia ɗang.

Yesu gya amur mùr

²² Tu anzǝm man ngga Yesu ne alaggana male ɓǝa eauwe a waru ɓǝa aki dǝmbǝa aban o a nkaring, sǝ yì ka, ueo ace nea aɓwana ɓǝa o a la.

²³ Lang Yesu mesǝna ɓwapǝndǝa ka, pǝlǝa eauwe amur nkono nǝmurǝì ace pak hiwi. Ban yi bwalo nda akano nǝmurǝì.

²⁴ Anggo ka waru nyingŋǝna kun gwangyi umna ɗār aɓa mur, sǝ nggea gung longŋǝna nǝ̀ nggǝ pea wia tanni.

²⁵ Nǝ tadǝmbari mbul-mbul ka Yesu puro kǝ gya amur mùr aban yiu abania.

²⁶ Lang alaggana male nǝ̀ sǝni aban gya amur mùr ka, ɓangciu pakkia wia. À mak zwalo, à na ama, “Kukwar na!”

²⁷ Anggo ka kara Yesu nea wia cau ama, “Wu cam kàngkàng! Mǝ nda. Wu kǝa ɓang ɗang.”

²⁸ Pǝlǝa Bitǝrus ne wi ama, “Mǝtalabangŋo, ɓǝ̀ a nda ka, banggam ɓǝn gya amur mùr ɓǝn kyane abano.”

²⁹ Yesu ne wi ama, “Yiu.” Bitǝrus pǝlǝa sulǝi ɓa waru sǝ gya amur mùr aban ká aban Yesu.

³⁰ Lang sǝn eaki-nkono mala mùr ka, ɓangciu pakki wi, kara tita ko a mùr. Mak zwalo ama, “Mǝtalabangŋo, amsǝam!”

³¹ Kara Yesu lǝmndǝ bui bwali sǝ ne wi ama, “We ka, guliarǝu mo kyau fat, palang sǝ a tuti a ɓabumo?”

³² Lang à eauna aɓa waru ka kara gung kuro.

³³ Aɓwana mǝnana aɓa waru ka à peri abani, à na ama, “Ɓafo, à nda Muna mala Ɓakuli.”

Yesu twali aɓwana pas ban rǝkwana

³⁴ À samsǝa à yì kpashi a nkaring mala amǝ Jenasaret.

³⁵ Lang amǝ-le nǝ̀ yia sǝlǝ ama Yesu na ka, à turkiban arǝ aɓwana aɓalǝ amuna-là mana aban mǝno ka. Aɓwana yiu nǝ amǝkwano malea kat abani.

³⁶ À zǝmbǝi wi ace mǝnana ɓǝ̀ amǝ rǝkwana ɓǝa je kun daura male ka. Sǝ aɓwana mana à je kat ka rǝkwana malea mala.