Matiu 12 - Maləmce Məfele mala Ɓakuli: Kurcau Məbəshe

Mǝtala Sabbat

¹ A nzǝm amǝno yì acau ka, a ɓe pwari Sabbat Yesu andǝ alaggana male na aban gya nǝ ban aɓaban mǝssa. Alaggana male ka nzala walia sǝ à kutia harki kir mǝssa, à kǝ she.

² Amǝ Farisi nǝ̀ yia sǝnia ka à banggi Yesu ama, “Sǝni, gir mǝnia alaggana mo kǝ pe a pwari Sabbat ka yàl Nggurcau ma'sǝm na.”

³ Sǝ pǝlǝia wia ama: Wu ɓal gir mǝnana Dauda pa a pwari mana yì andǝ ɓwana male ka nzala walia ka re?

⁴ Yi kutio a Nda mala Ɓakuli sǝ yì andǝ aɓwana mana ate ka à kya shak bǝredi mǝnana à tàri ɓǝ̀ duk mǝfele ka, mana ɓoaro ɓǝa li ka ɗang, ace mǝnana bǝredi ní ka nda ace apǝris nǝmurǝia.

⁵ Ko wu ɓal mbo aɓa Nggurcau mala Musa ama, ko ya pwari Sabbat a Ndàmǝgule mala Ɓakuli ka apǝris kǝ yâl nzongcau mala Sabbat sǝ à sǝnia nǝ cauɓikea raka?

⁶ Ən nggǝ na wun ama, ɓwa mǝnana kuti Ndàmǝgule mala Ɓakuli nǝ gulo ka nda kani.

⁷ Ɓǝ̀ wu surǝna rǝ ɓa mǝnia yì cau mǝnana ama, “Mǝsǝswatǝr na ǝn earkiyice ka, pà gir'nkila na raka,” ɓǝ́ pa wu nǝ̀ ɓǝsǝki aɓwana mana à panǝ cau a rǝia raka.

⁸ Mim, Muna mala Ɓwa ka Mǝ nda Mǝtala Sabbat.

⁹ Yesu nying ban mǝno ka, yi kutio aɓa ndakpapi malea.

¹⁰ Ɓe ɓwabura mǝnana ɓe bui wu ka ndakam abanì. Amǝ Farisi ka, à ndarǝ alta njar à nǝ̀ kum mǝɓane mǝnana à nǝ̀ na arǝ Yesu ka. Pǝlǝa à ɗi ama, “Nggearǝì ka, Nggurcau ma'sǝm eare ama ɓǝa twalban rǝkwana a pwari Sabbat le?”

¹¹ Pǝlǝa earia wia ama, “Ɓǝ̀ ɓe kǝɓwa ata wun ndanǝ nzur male, sǝ nzur nì yi kpa a tūli a pwari Sabbat ka, ɓwe pà nǝ̀ ngga bwali nǝ̀ eamsǝi re?

¹² Ɓwapǝndǝa ka kuti nzur. Ace mani ka Nggurcau eare ama ɓǝa amsǝ ɓwa mana nda aɓa tanni ka a pwari Sabbat.”

¹³ Pǝlǝa banggi ɓwabure ama, “Sarǝ buo.” Ɓwabure pǝlǝa sarǝ bui, sǝ bui nyare pak pepe kǝla ɓi.

¹⁴ Amǝ Farisi pǝlǝa à puro a nza à kya kurkunarǝia amur njar mǝnana à nǝ̀ kumo à nǝ̀ wal Yesu ka.

Yesu nda Guro mala Ɓakuli mana tarì ka

¹⁵ Yesu yi sǝlǝia wia ka, pǝlǝa nying banì. Aɓwana pas o ate. Amǝkwano mǝnana aɓalǝia ka, Yesu yi twalia wia ban arǝkwana malea kat.

¹⁶ Yi nunkiria ɓǝa kǝa ne kǝɓwa yan nda yì ɗang.

¹⁷ Mǝnia ka nda lumsǝ cau mala Ishaya mǝɓangna mala Ɓakuli ka. Na ama:

¹⁸ “Guro mem mǝnana ǝn tarì ka ndya ka, mǝnana ǝn nggǝ earce sǝ bumam kǝ pwasǝa rǝì ka. Mǝ nǝ tsǝki wi Bangŋo mem amuri, sǝ yì ka nǝ̀ hamnǝ ɓashi mem mǝ'mǝsǝcau nì aban aɓwana a ɓanza ama à nǝ̀ kum amsǝban a buam.

¹⁹ Pà nǝ̀ pǝlǝki rǝì andǝ kǝɓwa, ko nǝ̀ loasǝban ɗang; kǝɓwa pà nǝ̀ ok gi aɓalǝ aɓwana ɗang.

²⁰ Yì ka, nda ɓukɓuk aban aɓwana mǝnana à pànǝ rǝcandǝa raka, sǝ nǝ̀ sǝn mǝsǝswatǝr mala aɓwana mǝnana à nda ɓa tanni ka, nǝ̀ bwalia wia kam. Nǝ̀ lidǝmbǝa nǝ pa rǝcandǝa arǝ pe anggo she ɓǝ̀ tsǝngŋǝna kpata mǝsǝcau lina murǝm ngga.

²¹ A rǝì sǝ aɓwana kat a ɓanza nǝ̀ tsǝkɓalǝia.”

Yesu kuti Murǝm mala Akukwar

²² Pǝlǝa aɓea ɓwana yiu nǝ ɓe nte mǝnana kukwar na a rǝì sǝ mǝtalasǝ-ɓunna na ka, aban Yesu. Yesu twali wi ban kwano male, sǝ tita na cau sǝ kǝ sǝnban.

²³ Ɓwabunda kat ndali sǝ à na ama, “Ɓwa mǝnia ka ko nda Muna mala Dauda, Mǝ'amsǝban mǝnana sǝm kundǝkiyi yiu male ka le?”

²⁴ Sǝ amǝ Farisi ka lang à ok mǝnia yì cau ka à bangŋa ama, pa ɓa ɗang, nǝ rǝcandǝa mala Baalzabul Murǝm mala akukwar sǝ kǝ pusǝki akukwar.

²⁵ Yesu surǝ ɗenyicau malea pǝlǝa nea wia ama: Nzali mana kat aɓwana male kǝ munǝo a rǝarǝia ka domurǝm malea nǝ̀ kìɗìkì. Là ko ɓala mǝnana gau ka pà nǝ̀ cam ɗang.

²⁶ Ɓǝ̀ Shetan kǝ pusǝ Shetan ka, ɓala gauna a rǝì. Lang sǝ domurǝm male nǝ̀ came?

²⁷ Ɓǝ̀ ǝn nggǝ pusǝ akukwar nǝ rǝcandǝa mala Baalzabul ka, nǝ mana sǝ aɓwana ma'wun kǝ pusǝia? Yia na à nǝ̀ ɓashia wun ngga.

²⁸ Sǝ ɓǝ̀ nǝ Bangŋo mala Ɓakuli sǝ ǝn nggǝ pusǝ akukwar ka, lǝmndǝ ama Domurǝm mala Ɓakuli yina aɓalǝ wun.

²⁹ Sǝ ɗǝm ngga, lang sǝ ɓwa nǝ̀ kutio a ɓala mala ɓwaburaɓwa nǝ̀ pwan agirkuma male sǝ ak dǝmbǝa taka abui ɗang? Ɓǝ̀ pa anggo raka pà nǝ̀ gandǝ pwan agirkuma male ɗang.

³⁰ Ɓwa mǝnana pa atam raka nda a ɓibura nǝ mim, sǝ ɓwa mǝnana kǝ bwalam ramnggi gir raka, ndarǝ mesǝke.

³¹ Ace mani ka ǝn nggǝ na wun ama, ko ya cauɓikea andǝ na caukyauwikiban mǝnana aɓwana ne amur Ɓakuli ka à nǝ̀ twalbani, sǝ ɓwa mǝnana na cau kyauwikiban amur Bangŋo mala Ɓakuli ka, à pà nǝ̀ twali wi banì ɗang.

³² Ɓwa mǝnana na cau kyauwikiban amur Muna mala Ɓwa ka à nǝ̀ twali wi banì, sǝ ɓwa mǝnana na cau kyauwikiban amur Bangŋo Mǝfele ka à pà nǝ̀ twali wi banì ɗang, a ɓanza mǝnia andǝ ɓanza mǝnana nǝ̀ yiu ka.

Nggun andǝ aɓǝle

³³ Ɓǝ̀ nggun ɓoar ka ɓǝle gbal ka nǝ̀ ɓoaro, sǝ ɓǝ̀ nggun ngga mǝɓane na ka, ɓǝle gbal ka nǝ̀ duk mǝɓane; nggun ka à surǝ́ki arǝ ɓǝle.

³⁴ Wun amuna baffu, lang sǝ cau mǝɓoarne nǝ̀ pur a kun wun, yi mǝnana wu ndaka amǝ'ɓealɓikea ka? Gir mǝnana nda a ɓabum ngga, nda kún banggiyi ka.

³⁵ Ɓwa mǝɓoarne kǝ pusǝ aɓa cau mǝɓoarne mǝnana rambǝa a ɓabumi ka, sǝ ɓwa mǝɓane gbal ka kǝ pusǝ aɓa mǝɓane mǝnana rambǝa a ɓabumi ka.

³⁶ Sǝ ǝn nggǝ na wun ama a pwari ɓashi ka aɓwana nǝ̀ bǝlki ɓa ko ya cau mǝɓane na pur a kunia ka.

³⁷ Acau mǝnana à pur a kuno ka à nda à nǝ̀ pakko ɓashi nǝia ka. À nǝ̀ amsǝo ko à nǝ̀ kuro.

Aɓwana alta gir'lǝmndǝa nǝ kuli

³⁸ Aɓea amǝ Farisi andǝ amǝkani Nggurcau ne wi ama, “Malǝm, sǝm nggǝ earce sǝn ɓe kǝgir mǝgule mǝnana nǝ̀ lǝmndǝa sǝm ama rǝcandǝa mo ka pur nǝban Ɓakuli.”

³⁹ Sǝ nyesǝia wia ama: Kǝ nza mala amǝ'ɓealɓikea andǝ amǝ'ɗwanyi surǝ Ɓakuli na à nǝ̀ alta sǝn gir'ndali ka. Sǝ ɓe kǝ gir'ndali pà kàm à nǝ̀ lǝmndǝa wun ɗang she kǝ mala mǝɓangna Yunana.

⁴⁰ Kǝla mǝnana Yunana pak pwari tārú andǝ du tārú a bum nggea nji ka, anggo gbal sǝ Muna mala Ɓwa nǝ̀ pak pwari tārú andǝ du tārú aɓa nzali.

⁴¹ A pwari ɓashi ka amǝ Nineva nǝ̀ lo à nǝ̀ mak wun amǝ nza mǝnia. Acemǝnana à nying acauɓikea malea lang à oangna hama mala Yunana ka, sǝ ɓwa mǝnana kuti Yunana ka ndakani.

⁴² A pwari ɓashi ka Mamurǝm mala amǝ Sheba nǝ̀ lo nǝ̀ mak amǝ nza man; acemǝnana pur a ɓe nzali kuko sǝ yiu ace ok sǝlǝe mala Solomon; sǝ ɓwa mǝnana kuti Solomon ngga ndakani.

Nyare mala bangŋo mǝɓane

⁴³ Ɓǝ̀ bangŋo mǝɓane puri rǝ ɓwa ka, pak ka kǝ gali arǝ aban mǝ'ime ace alta ban usǝlǝo, sǝ ɓǝ̀ kum raka,

⁴⁴ pǝlǝa nǝ̀ na ama, “Mǝ nǝ nyare a ɓala mǝnana ǝn pur kam ngga.” Sǝ ɓǝ̀ nyare yi kum ɓala na atarǝì, à esǝkini sǝ à gilǝkini ka,

⁴⁵ pǝlǝa nǝ̀ o nǝ̀ ngga yinǝ aɓea bangŋo tongno-nong-ɓari mǝnana à kuti nǝ ɓealɓikea ka, sǝ à nǝ̀ yia kutio à nǝ̀ do a ɓalǝi. Masǝlǝata mǝnia yì ɓwa ka nǝ̀ ɓike nǝ̀ kuti mǝdǝmbe. Anggo sǝ nǝ̀ pang nǝ nza mǝɓealɓike mǝnia.

Nggea Yesu andǝ Amǝ'eambǝi

⁴⁶ Yesu na mur banggi ɓwabunda cau sǝ ngge andǝ amǝ'eambǝi yiu à yì came a nza. À kǝ earce ama à nǝ̀ bang cau nǝi.

⁴⁷ Ɓe ɓwa banggi wi ama, “Sǝni, nggo andǝ amǝ'eambǝo nia came a nza ka, ama à nǝ̀ no cau.”

⁴⁸ Pǝlǝa Yesu pǝlǝi wi ama, “Yana nda nggem, sǝ a yana à ndaka amǝ'eambǝam?”

⁴⁹ Pǝlǝa lǝmndǝ bui arǝ alaggana male sǝ bangŋa ama, “Amǝnia ka à ndaka nggem andǝ amǝ'eambǝam.

⁵⁰ Ɓwa mǝnana kat kǝ pak gir mǝnana Tárram mana a kuli ka earkiyice ka nda mǝ'eambǝam, andǝ mǝ'nggaulem, andǝ nggem.”