Matiu 10 - Maləmce Məfele mala Ɓakuli: Kurcau Məbəshe

Yesu tur Alaggana male lum-nong-ɓari

¹ Yesu tunǝ alaggana male lum-nong-ɓari sǝ pea wia rǝcandǝa ɓǝa pusǝ abangŋo mǝɓane sǝ ɓǝa twalban koya kwano andǝ rǝpangŋa.

² Amǝnia ka à ndaka lullǝ amǝ'mishan lum-nong-ɓari: A dǝmbǝa ka nda Shiman (mǝnana à tunǝki ama Bitǝrus ka) andǝ mǝ'eambǝi Andǝru; Jemis andǝ mǝ'eambǝi Yohana (amuna mala Zabadi);

³ Filip andǝ Batalomi; Toma, andǝ Matiu (mǝ'ak boalo-cemi); Jemis (muna mala Alfiyus), andǝ Tadawus;

⁴ Shiman (mǝ'earce came ace la male), sǝ Yahuda Iskariyoti (mǝnana mak Yesu ka).

⁵ Yia mǝnia lum-nong-ɓari ka Yesu tasǝia sǝ nea wia ama: Wu kǝa ká aban aɓwana mǝnana amǝ Yahudi na raka ɗang. Wu kǝa kar a ɓe kǝ la mala amǝ Samariya ɗang.

⁶ Wu dǝshi anzur mala amǝ Isǝrayila mǝnana à ɓwarki ka.

⁷ Ká ma'wun ngga, kǝ cau mǝnia ka nda wu nǝ̀ hamnǝi ka: “Domurǝm mala kuli gbashina.”

⁸ Wu twalban rǝkwana, wu loasǝ alú, wu sonzǝ amǝdakali, wu pusǝki akukwar. Ɓah sǝ à pa wun. Wu pe aɓwana gbal ɓah.

⁹ Wu kǝa twal kǝ boalo a bu wun ko a lǝpan ɗang, ko ya ulangyi nani ka.

¹⁰ Wu kǝa twal kǝ luru ko daura andǝ nkura nggaɗia, ko gara-gya a bu wun ɗang. Mǝturo ka ɓǝa pe wi gir mǝnana ɓoaro ɓǝ̀ kum ngga.

¹¹ Ɓǝ̀ ya nggeala ko muna-la wu kuti kam ngga, wu alta ɓwa mǝɓoarne mǝnana nǝ̀ ak wun ngga wu sulǝo abani ba pwari mǝnana wu nǝ̀ nyingŋǝna le nǝi ka.

¹² Ɓala mǝnana wu nǝ̀ kuti kam ngga, wu nea wia ama ɓǝ̀ rǝ wun pwalo.

¹³ Ɓǝ̀ amǝɓalae ak wun ngga, ɓǝ̀ dorǝpwala ma'wun do atea, sǝ ɓǝa ak wun raka, ɓǝ̀ dorǝpwala ma'wun nyare ata wun.

¹⁴ Ɓǝ̀ ya ɓala ko la mǝnana gingsǝ wun ko kwaki kiri arǝ cau ma'wun raka, ɓǝ̀ wu nǝ̀ nying banì ka wu kǝtǝrǝki tu la malea mǝnana a kusǝ wun ngga.

¹⁵ Ən nggǝ na wun mǝsǝcau, a pwari ɓashi ka, amǝ Sodom andǝ amǝ Gomora ka, ɓashi malea nǝ̀ ɓoari mala amǝla mǝno.

Tanni mana kǝ yiu amur amǝkpata Yesu ka

¹⁶ Mǝ ndya ǝn nggǝ tur wun kǝla anzur aɓalǝ anvwa bondo. Ace mani ka wu dum nǝ sǝlǝe kǝla an'yau, sǝ wu pak ɓukɓuk kǝla akutu.

¹⁷ Wu par kir wun nǝ aɓwana. À nǝ̀ ká nǝ wun aban amǝɓashi. À nǝ̀ kok wun aɓalǝ andakpapi malea.

¹⁸ À nǝ̀ ká nǝ wun a ɓadǝmbǝ amurǝma andǝ amǝtala nzali ace cau mem, ace mǝnana ɓǝ̀ wu bang Cau Amsǝban mem abania sǝ aban aɓwana mǝnana amǝ Yahudi na raka.

¹⁹ Sǝ ɓǝ̀ à yì bwalkina wun ngga, ɓalǝ wun ɓǝ̀ kǝa kasǝkia arǝ cau mǝnana wu nǝ̀ na ko lang sǝ wu nǝ̀ na ce ka ɗang. Àkǝ̀ pwari mǝno Bangŋo mala Ɓakuli nǝ̀ pa wun cau mǝnana wu nǝ̀ na ka.

²⁰ Acemǝnana wu nda wu nǝ̀ na cau ka ɗang, Bangŋo mala Tár wun na nǝ̀ na cau nǝ kun wun ngga.

²¹ Mǝ'eambǝu nǝ̀ mak mǝ'eambǝi ɓǝa wali. Tarrû nǝ̀ mak muni ɓǝa wali. Amuna nǝ̀ pǝlǝa arǝ atárria andǝ anggea sǝ à nǝ̀ tsǝa ɓǝa walia.

²² Aɓwana kat à nǝ̀ ɓinǝmǝsǝ wun acem; sǝ ɓwa mǝnana cam kàngkàng aban ká masǝlǝate ka nǝ̀ auwa.

²³ Ɓǝa pà wun tanni a ɓe la ka, wu ɓangŋa wu kya ɓe. Ən nggǝ na wun mǝsǝcau kaniama wu nǝ̀ mal gya arǝ ala mala amǝ Isǝrayila kat ka, Muna mala Ɓwa nyarǝna yina.

²⁴ Mǝ'eaulǝkigir kuti mǝkani wi gir ɗang. Sǝ muna-ɓala kuti mǝtala-ɓala male ɗang.

²⁵ Mǝ'eaulǝkigir ka ɓǝ̀ alte ɓǝ̀ kum do kǝla malǝm male, sǝ muna-ɓala ka ɓǝ̀ alte ɓǝ̀ kum do kǝla mǝtala-ɓala male. Ɓǝ̀ mǝtala-ɓala ka à tunǝi ama Murǝm mala akukwar ka, acili amǝɓala ka lullǝu mana à nǝ̀ tunǝia nǝi ka nǝ̀ ɓike nǝ̀ kutibanì!

Ɓwa mǝnana wu nǝ̀ ɓanggi wi ka

²⁶ Ace mani ka ɓangciu ɓǝ̀ kǝa pakka wun arǝ aɓwana ɗang. Gir mǝnana à mbuɓɓǝ́ki te ado ka te nǝ̀ ngga puro, sǝ kǝgir pà kàm mǝnana sǝmbǝrǝa sǝ à pà nǝ̀ sǝlǝce raka.

²⁷ Acau mǝnia ǝn nggǝ na wun a pǝndǝa ka wu kya nea a banfana. Cau mǝnana ǝn sherǝa wun a kir wun ngga, wu hamnǝ ce amur akurǝm.

²⁸ Wu kǝa ɓanggi aɓwana mǝnana à kǝ wal nggūrǝu ka ɗang; à pà nǝ̀ gandǝ je yilǝmu ɗang. Ɓwa mǝnana wu nǝ̀ ɓanggi wi ka nda kǝ Ɓakuli mwashat, mǝnana nǝ̀ kiɗiki nggūrǝu andǝ yilǝmu a lu-bǝsa ka.

²⁹ Amuna-nyal ɓari ka à kǝ mea kwapo mwashat re? Sǝ anggo ka kǝ ɓe pà kàm mwashat nǝ̀ kpa a nzali nǝ̀ wú sǝ pà nǝ́ sǝlǝe mala Tár wun raka.

³⁰ Nggearǝ anyiaun-ɓamur wun ngga à ɓalnia.

³¹ Ace mani ka ɓangciu ɓǝ̀ kǝa pakka wun ɗang. Wu kuti amuna-nyal kusǝ pas.

Bang Paɓamuru mo a dǝmbǝ aɓwana

³² Ɓwa mǝnana bang paɓamuru male a rǝam a dǝmbǝ aɓwana ka, mǝ nǝ twalce gbal ama yì ka, memna a ɓadǝm Tárram mǝnana a kuli ka.

³³ Sǝ ɓwa mǝnana makgir surǝam a dǝmbǝa ɓwana ka, mim gbal ka mǝ nǝ makgir surǝe a ɓadǝm Tárram mǝnana a kuli ka.

Kpata Yesu nǝ̀ yinǝ gapitarǝu

³⁴ Wu kǝa twali ama ǝn yiua yinǝi ɓanza dotarǝu. Awo, ǝn yiua yinǝ dotarǝu ɗang, ǝn yiua yinǝ nggeabyau.

³⁵ Ən yiua pǝlǝ “Ɓwabura arǝ tarrí, muna-ɓwama arǝ ngge, sǝ mɓwama arǝ nkili-mǝnɓwame;

³⁶ aɓwana mana a ɓala mala ɓwa ka, à nda à nǝ̀ pǝlǝ aɓimǝbura ka.”

³⁷ Ɓwa mǝnana earce tarrí ko ngge kutiam ngga, kārǝa nǝ̀ duk mǝkpatam ɗang. Ɓwa mǝnana earce muni mǝɓwabure ko mǝɓwame kutiam ngga, kārǝa nǝ̀ duk mǝkpatam ɗang.

³⁸ Ɓwa mǝnana twal nggun-gangndi male sǝ yiu atam raka, kārǝa nǝ̀ duk mǝkpatam ɗang.

³⁹ Ɓwa mǝnana kǝ yal yilǝmi ace amsǝe ka nǝ̀ ngga ɗwanyibani, sǝ ɓwa mana turta yilǝmi acem ngga, nǝ̀ ngga kumi.

Atangnakusǝu

⁴⁰ Ɓwa mǝnana ak wun ngga mǝ nda akiyiam ngga. Sǝ ɓwa mana em ngga ndarǝ ak ɓwa mǝnana tasǝam ngga.

⁴¹ Ɓwa mana ak mǝɓangna mala Ɓakuli acemǝnana ama yì ka, ɓwa mala Ɓakuli na ka, nǝ̀ kum tangnakusǝu mala mǝɓangna. Sǝ ɓwa mǝnana ak mǝ'cauɓoarna ace mǝnana ama yì ka, mǝ'cauɓoarna na ka à nǝ̀ pe wi tangnakusǝu mala mǝ'cauɓoarna.

⁴² Ko ɓǝ̀ mùr pwala na a kwap sǝ ko ya ɓwa pe mwashat ata amǝkeke mǝnia, acemǝnana ama mǝkpatam na ka, ɓafo nǝ̀ kum tangnakusǝi.