Markus 9 - Maləmce Məfele mala Ɓakuli: Kurcau Məbəshe

¹ Yesu lidǝmbǝa ne na cau ama: Ɓafo, ǝn nggǝ bangga wun, aɓalǝ wun mǝnia wu cam ngga, aɓea aɓwana nakam mǝnana à pà nǝ̀ wu raka, she ɓǝa sǝna Domurǝm mala Ɓakuli yina nǝ rǝcandǝa ka.

Nggurǝ Yesu nggaɗi

² Anzǝm nongŋo tongno-nong-mwashat ka, Yesu tunǝ Bitǝrus, sǝ Jemis, sǝ Yohana. Pǝlǝa um nǝia amur nkono mǝdāre, nǝmurǝia. Akano ka rǝ Yesu twalo nggaɗi àkǝ̀ ɓamǝsǝia.

³ Anggurbyau rǝì pwasǝ tyal-tyal mǝnana kǝɓwa pà kàm a ɓanza mǝnia ka nǝ̀ gandǝ lak gir nǝ̀ fa anggo raka.

⁴ Kara Iliya, andǝ Musa, à pusǝrǝia à kǝ na cau nǝ Yesu.

⁵ Bitǝrus ne Yesu ama, “Malǝm, yàwá, mǝnana ado sǝm ndakani ka. Sǝm nǝ̀ kar gumli tārú, mwashat ka nda aceo, mwashat ka nda ace Musa, sǝ man mwashat ka nda ace Iliya.”

⁶ Yì andǝ aɓi ka ɓangciu bwalia kǝrkǝr, yale surǝ gir mǝnana nakiyi cau amuri ka ɗang.

⁷ Pǝlǝa pǝrɓang puro yi gir muria. Gi Ɓakuli pur nǝ ɓa pǝrɓang ama, “Mǝnia ka nda Munem mǝnana ǝn earkiyi ace raka. Wu oki wi.”

⁸ À nǝ̀ loasǝ mǝsǝia ka, ko à sǝn kǝɓwa ɗang, kǝ Yesu na nǝmurǝì.

⁹ À nda aban sulǝi mur nkono ka, Yesu nunkiria nea wia ama, “Wu kǝa ne kǝɓwa ce gir mǝnana wu sǝn ngga ɗang, she ɓǝ̀ Muna mala Ɓwa longŋǝni ɓembe ka.”

¹⁰ Pǝlǝa à bwal ce gbal àkǝ̀ rǝarǝia, à kutio amur naki acau amur, “Loapi ɓembe ka ɓālǝi nda mana?”

¹¹ Pǝlǝa à ɗi Yesu ama, “Palang sǝ amalǝm Nggurcau mala Musa bangŋa ama, Iliya nǝ̀ aki Kǝrǝsti dǝmbǝa yiu?”

¹² Yesu earia wia ama, “E, Iliya nǝ̀ yiu a dǝmbǝa, nǝ̀ yia gilǝki agir kat ɓǝa duk pepe. Sǝ Malǝmce ka, na gbal mbo ama, Muna mala Ɓwa ka nǝ̀ tanni kǝrkǝr sǝ à nǝ̀ ginǝi?

¹³ Sǝa ma ǝn nggǝ bangga wun, Iliya angŋǝna dǝmbǝa yina, sǝ à pangŋǝni koya gir mǝnana yia ka à earce ka, kǝla mǝnana à gilǝì amuri ka.”

Yesu pusǝ kukwar arǝ muna

¹⁴ Lang à nyarǝna aban acili alaggana ka, à sǝn ɓwapǝndǝa kǝrkǝr rambǝa a rǝia, sǝ aɓea amalǝm Nggurcau mala Musa na aban makgir andǝia.

¹⁵ Lang ɓwabunda nǝ̀ sǝn Yesu ka, à ndali kǝrkǝr, sǝ à swar a mire à yì makki wi kun.

¹⁶ Yesu ɗi ka laggana male ama, “Mana gir ni wu makkiyigir wunǝia amuri?”

¹⁷ Ɓe ɓwa aɓa ɓwabunda kasǝa ama, “Malǝm, ǝn yiu nǝ munem abano ace mǝnana wu twali ban rǝkwana ka. Ndanǝ kukwar a rǝì, mǝnana kǝ eari wi nacau raka.

¹⁸ Ɓǝ̀ loarǝi ka, nǝ̀ me a nzali, ntara nǝ̀ gupi a kuni, nǝ̀ nggǝ go minǝì, sǝ nǝ̀ shiuri kwanggong. Nda ǝn ne alaggana mo nǝma ɓǝa pusǝì sǝ à gandǝi ɗang.”

¹⁹ Yesu nea wia ama, “Wun amǝ ɗwanyi earnǝ Ɓakuli! Banem nǝ̀ sau lang ata wun sǝ wu nǝ̀ kani earnǝ cau? Banem nǝ̀ sau lang aban twal gandǝa nǝ wun? Wu yinǝam nǝ mune!”

²⁰ À pǝlǝa à yiu nǝ muna. Lang kukwar nǝ̀ sǝn Yesu ka, kara kàr muna dǝkǝrǝki kǝ̀rkǝ́r, turi a nzali. Muna camarǝ ɗǝnggǝliki, ntara kǝ gupi a kuni.

²¹ Yesu ɗi tar muna ama, “Aya pwari sǝ mǝnia yì gir ka tiki te?” Pǝlǝa eare ama, “Tiki te a muntulo.

²² A ɓe pwari ka kǝ me a bǝsa ko a mùr, ama nǝ̀ wal-lui. Sǝa ma ɓǝ̀ a nǝ gandǝi ka, sǝn mǝsǝswatǝr ma'sǝm, bwala sǝm nggam!”

²³ Yesu ɗi ama, “Ace mana sǝ a na ama, ‘ɓǝ̀ a nǝ gandǝi ka?’ Ko man ngga nǝ̀ gandǝ pa aban ɓwa mǝnana earnǝ cau mala Ɓakuli nǝ ɓabumi kat ka.”

²⁴ Tar muna ear nǝ rǝɓǝla ama, “Ən earǝna ǝn pana ɓamuram, bwalam nggam ɓǝ̀ ǝn limurǝm amur ɗwanyi paɓamuru mem!”

²⁵ Lang Yesu sǝn ɓwapǝndǝa nǝ̀ nggǝ kana aban yiu ka, kara sà arǝ kukwar ama, “We kukwar mala kir ara andǝ mala talasǝɓunna, ǝn nggǝ banggo nǝma, wu puri rǝi, cea nyare a kuti kam ɗǝm ɗang!”

²⁶ Kukwar mak'zwalo, pūrǝki muna wak, sǝ puri nyami. Muna nong kpoklyak, kǝla wu nǝ wú, gandǝa aɓea aɓwana bangŋa ama, “Wuna!”

²⁷ Yesu bwali a garabui, loasǝi amur akusǝi, pǝlǝa lo came.

²⁸ Anzǝm mana Yesu nyarǝna a ɓala ka, alaggana male ɗi a sǝmbǝrǝa, ama, “Palang sǝ sǝm gandǝ pusǝ mǝno yì kukwar ka ɗang?”

²⁹ Yesu nea wia ama, “Ulang mǝnia yì kukwar ka, kǝ hiwi andǝ gilmur na nǝ̀ pusǝì ka.”

Yesu bangce lú male

³⁰ À ɗeki ban mǝno à ara aɓa bu-nzali Galili. Yesu ear ama ɓǝ̀ kǝɓwa surǝ ban mǝnana à ndakam ngga ɗang,

³¹ acemǝnana nda aban kani alaggana male gir. Nea wia ama, “Muna mala Ɓwa ka, à nǝ̀ kurakuro nǝi aban aɓwana. À nǝ̀ wal-lui, sǝ a tāruia nongŋo ka nǝ̀ lo nǝ yilǝmu.”

³² Sǝ ko à bwalta gir mǝnana banggiyi ka ɗang, sǝ ɓangciu pakkia wia ɓǝa ɗi amuri.

Yana gulo kutiban kat?

³³ Pǝlǝa à yiu a Kapanahum. Yi dumǝna a ɓala ka, Yesu ɗi ka laggana male ama, “Mana wu makkiyigir amuri a tanjar aban yiu?”

³⁴ Pǝlǝa à do kunia ɗǝong, acemǝnana a njargula ka, à makgir amur ko yana aɓalǝia nda ɓwamǝgule kat.

³⁵ Lang Yesu dumǝna nǝ do ka, pǝlǝa tunǝ alaggana male lum nong-ɓari nea wia ama, “Ɓǝ̀ ɓwa earce duk mǝdǝmbǝa ka, dumǝna púp ɓwe nǝ̀ duk mǝ'nzǝmo, sǝ nǝ̀ duk guro mala aɓi kat.”

³⁶ Pǝlǝa loasǝ muna mǝkyauwe tamsǝi a ɓadǝmbǝia. Núnní a nkanggari rǝi, sǝ nea wia ama,

³⁷ “Ɓwa mǝnana ak muna kǝla mǝnia aɓa lullǝam ngga, Mǝ nda akiyiam ngga. Sǝ ɓwa mǝnana em ngga, Mǝ nda akiyiam nǝmurǝam ngga ɗang, nda ban ak Tárram mǝnana tasǝam ngga.”

Ɓwa mǝnana ɓinǝ sǝm raka nda ata sǝm

³⁸ Yohana ne wi ama, “Malǝm, sǝm sǝn ɓe ɓwabura aban pusǝki akukwar aɓa lullǝo, sǝ sǝm pǝrki, acemǝnana yì ka, pa aɓalǝ sǝm ɗang.”

³⁹ Yesu ne wi ama: Ce wu pǝrki ɗang. Kǝɓwa pà kàm nǝ̀ pak gir'ndali aɓa lullǝam, sǝ nyar tu nǝ̀ bang mǝɓane a muram ɗang.

⁴⁰ Ɓwa mǝnana kat ɓinǝ ce sǝm raka, nda ata sǝm.

⁴¹ Ɓafo ǝn nggǝ bangga wun, ɓǝ̀ koyana sǝ pà wun murnuna aɓa lullǝam, acemǝnana wu ndaka mala Kǝrǝsti ka, pà nǝ̀ ɗwanyi tangnakusǝi ɗang.

Tsǝk ɓwa ɓǝ̀ pak cauɓikea

⁴² Ɓǝ̀ koyana sǝ tsǝk mwashat aɓalǝ amuna mǝnana à earnǝ mim, sǝ pak cauɓikea ka, nǝ̀ ɓoari ɓǝa ɗurri wi nggea taligo a meali, sǝ ɓǝa turi aɓa nggeamur.

^43-44 Ace mani ka, ɓǝ̀ buo kǝ cio a kǝ pak cauɓikea ka, kasǝi kpat. Nǝ̀ ɓoaribani wu kutio a yilǝmu mana málá male pà kàm raka nǝ bu mwashat, amur mana a nǝ dum nǝ abuo ɓari sǝ à nǝ̀ turo aɓa lu-bǝsa, aban mǝnana bǝsa male kǝ linggi raka.

^45-46 Ɓǝ̀ kusǝo na kǝ cio a kǝ pak cauɓikea ka, kasǝi kpat. Nǝ̀ ɓoaribani wu kutio a yilǝmu mana málá male pà kàm raka nǝ kusǝu-kasǝa, amur mana a nǝ dum nǝ akusǝu ɓari sǝ à nǝ̀ turo aɓa lu-bǝsa ka.

⁴⁷ Sǝ ɓǝ̀ mǝsǝo na kǝ cio a kǝ pak cauɓikea, pusǝì turi! Nǝ̀ ɓoaribani wu kutio a domurǝm mala Ɓakuli nǝ mǝsǝu mwashat, amur mana a nǝ dum nǝ amǝsǝu ɓari sǝ à nǝ̀ turo aɓa lú-bǝsa ka.

⁴⁸ Akano ka “nggwaso mana nǝ̀ nggǝ lia ka, pà nǝ̀ wu ɗang, sǝ bǝsa mana nǝ̀ nggǝ pisǝkia ka, pà nǝ̀ linggi ɗang.”

⁴⁹ Koyan ngga nǝ bǝsa sǝ à nǝ̀ ci nǝ̀ ɓoarnsari.

⁵⁰ Tuɓamur ka ɓoaro, sǝ ɓǝ̀ cyauwe male purini wi ka, nǝ mana sǝ à nǝ̀ ci nǝ̀ cyau ɗǝm? Wu dum nǝ ɓealǝu kǝla tuɓamur arǝarǝ wun, wu dum nǝ dorǝpwala arǝarǝ wun.