Markus 8 - Maləmce Məfele mala Ɓakuli: Kurcau Məbəshe

Yesu linǝ́ aɓwana á-ine

¹ Aɓalǝ amǝno yia apwari ka, ɓwabunda yi ram kǝrkǝr. Girlina pa kàm à nǝ̀ li ɗang. Yesu pǝlǝa tunǝ alaggana male sǝ nea wia ama,

² “Mǝsǝswatǝr mala ɓwapǝndǝa man bwalam kǝrkǝr. À ndakani atam nongŋo tārú yalung, sǝ ko kǝgir pà kàm à nǝ̀ li ɗang.

³ Ɓǝ̀ ǝn tasǝtea ama ɓǝa o nǝ nzala ka, mǝsǝpǝndǝa nǝ̀ mea a njargula, acemǝnana aɓea aɓwana atea ka a puro aban sauwa.”

⁴ Alaggana male pǝlǝi wi ama, “A ya ban a ɓabondo man sǝ sǝm nǝ̀ kum girlina mana nǝ̀ linǝ́ ɓwapǝndǝa man ngga?”

⁵ Yesu ɗia ama, “Agbatali bǝredi shen a bu wun ɗe?” À eare ama, “Tongno-nong-ɓari.”

⁶ Nda Yesu ne ɓwabunda ama ɓǝa dum nǝ do a nzali. Sǝ twal agbatali bǝredi mana tongno-nong-ɓari ka, oaso pakki Ɓakuli yàwá, sǝ ɓwanggia. Pea alaggana male ɓǝa gaki aɓwabunda, sǝ à gaki gbal.

⁷ À ndanǝ amǝ nji a buia bǝti. Yesu pǝlǝa pak yàwá amuria gbal, sǝ banggia wia ama ɓǝa gaki aɓwana.

⁸ Ɓwapǝndǝa lili, à ɗǝmbǝo. Anzǝm man ngga, alaggana male tarki cili aɓwanggina girlina mǝnana à ueo ka, à lumsǝ ago mǝgulke tongno-nong-ɓari.

⁹ Aburana kǝla á-ine à nda aɓalǝ aɓwabunda abanì. Pǝlǝa Yesu ne ɓwabunda ama ɓǝa mǝsǝe, ɓǝa o a la.

¹⁰ Lang tsǝngŋǝna aɓwana a ndà ka, yi eauwe a waru andǝ alaggana male, pǝlǝa à nyare a bu-nzali mala ban mǝnana à tunǝki ama Dalmanuta ka.

Amǝ Farisi earce sǝn gir'lǝmndǝa

¹¹ Lang amǝ Farisi ongŋǝna ama Yesu yina ka, à yiu à yì tita makgir andǝi. À nǝ̀ karǝki ka, à ɗi ama ɓǝ̀ lǝmndǝia wia gir'lǝmndǝa nǝ ban Ɓakuli, mǝnana nǝ̀ lǝmndǝ rǝcandǝa male ka.

¹² Pǝlǝa Yesu tusǝ ɓālǝi kpǝm aɓa bangŋo male, sǝ na ama, “Palang sǝ aɓwana mǝnana a nza man kǝ earce sǝn gir'lǝmndǝa mǝ'pa ndali? Ən nggǝ na wun mǝsǝcau, pa mǝ nǝ pe aɓwana mǝnana a nza man kǝ gir'lǝmndǝa ɗang.”

¹³ Pǝlǝa ɗekia, eauwe a waru, nyare a kusǝì o a ɓe nkaring nggeamur.

Yis mala amǝ Farisi andǝ mala Hirǝdus

¹⁴ Alaggana ka ɓalǝia lorǝo à yiu nǝ girlina abuia ɗang, kǝ gbatali bǝredi mwashat na à ndanǝi aɓa waru ka.

¹⁵ Lang à ndarǝ o aɓa waru ka, Yesu nun kiria ama, “Wu par kir wun arǝ yis mala amǝ Farisi andǝ mala Hirǝdus.”

¹⁶ À tita naki ce a rǝarǝia ama bangŋa anggo acemǝnana à yiu nǝ bǝredi a buia raka.

¹⁷ Yesu sǝlǝna rǝ cau mǝnana à nakiyi ka, pǝlǝa ɗia ama, “Palang sǝ wu kǝ naki acau arǝarǝ wun ama wu twal bǝredi a bu wun ɗang? Nggearǝ wun ngga, wu kǝ gandǝ surǝ gir ko wu bwalta gir mbo? Ɓabum wun na piu aɓa cande, kǝ gandǝ twal cau ɗang?

¹⁸ Amǝsǝ wun andǝ akir wun girki le? Ɓalǝ wun kasǝ arǝ kǝ cau re?

¹⁹ Mǝnana ǝn linǝ́ aɓwana á-tongno nǝ agbatali bǝredi tongno ka, cili mǝnana ueo, wu tarki ka, wu pwano arǝ ago shen ɗe?” À ear ama, “Lum nong-ɓari.”

²⁰ Yesu nyare ɗia ama, “Sǝ mǝnana ɗǝm ǝn linǝ́ aɓwana á-ine nǝ agbatali bǝredi tongno-nong-ɓari ka, cili mǝnana ueo, wu tarki ka, wu pwan arǝ ago shen?” À eare ama, “Tongno-nong-ɓari.”

²¹ Pǝlǝa ɗia ama, “Ado ka wu surǝ gir mǝnana ǝn banggi cau amuri ka re?”

Yesu mǝnmbi nte mǝsǝì a Beseda

²² À yì bik Beseda. Aɓea aɓwana yiu nǝ ɓe nte. À yì zǝmbǝi Yesu ama ɓǝ̀ tsǝk bui a rǝì, ɓǝ̀ mǝnmbi wi mǝsǝì.

²³ Yesu bwal nte a garabui pusǝì anzǝm la. Pǝlǝa tapi ntara a mǝsǝì sǝ tsǝk bui a muri, sǝ ɗi ama, “A kǝ sǝn kǝgir ado le?”

²⁴ Pǝlǝa nte man loasǝ muri a kuli, na ama, “E, ǝn nggǝ sǝn aɓwana, sǝ ǝn nggǝ sǝnia pepe ɗang. À nda kǝla anggun mǝnana à kǝ ging ngga.”

²⁵ Yesu nyare tsǝk abui a mǝsǝ nte mǝno ɗǝm, kara amǝsǝì mǝn gamama, kǝ sǝnban gǝraɗau.

²⁶ Yesu tasǝ te ama ɓǝ̀ o a la, ne wi ama, “Ce a kar nǝ ɓa mǝnia yì muna-la ka ɗang, ɓǝ̀ a nǝ o ka.”

Cau mana pur a kun Bitǝrus amur Yesu ka

²⁷ Yesu lo andǝ alaggana male à nying bu-nzali Galili, à o arǝ amuna-là tu nǝ ban la Kaisariya Filipi. Amur njar ka, Yesu ɗia ama “Aɓwana kǝ bangŋa ama mǝ nda yana?”

²⁸ À eari wi ama, “Aɓea ɓwana kǝ na ama, a nda Yohana Mǝbatisǝma, aɓea ɓwana ka ama, a nda Iliya, sǝ aɓea ɓwana ka ama a nda ɓe kǝ mǝɓangna mala Ɓakuli.”

²⁹ Pǝlǝa ɗia ama, “Sǝ wun ngga, wu na ama mǝ nda yana?” Bitǝrus eare ama, “A nda Kǝrǝsti, Mǝ'amsǝban.”

³⁰ Yesu nunkiria ama ɓǝa kǝa ne kǝɓwa cau amuri ɗang.

Yesu na cau amur lú male

³¹ Pǝlǝa tita banggia wia gir mǝnana nǝ̀ kumi ka. Na ama, “Muna mala Ɓwa ka nǝ̀ nu tanni ɗàngɗáng. Aɓwana-mǝgule andǝ agbani pǝris, andǝ amalǝm Nggurcau mala Musa nǝ̀ ɓinǝ mǝsǝì, à nǝ̀ wal-lui. Sǝ a tāruia nongŋo ka, nǝ̀ lo nǝ yilǝmu.”

³² Banggia wia mǝnia yì cau ka bwāng. Pǝlǝa Bitǝrus tunǝi a nkanggariban, gimbi arǝ cau mǝnana ne ka.

³³ Yesu pǝlǝ rǝi sǝn alaggana male, pǝlǝa sà arǝ Bitǝrus ama, “Gǝshi banam, we Shetan! Ɗenyicau mo ka mala Ɓakuli na ɗang, mala ɓwapǝndǝa na!”

³⁴ Pǝlǝa tunǝ ɓwabunda, andǝ alaggana male, nea wia ama: Ɓǝ̀ ɓwa twal ama nǝ̀ duk mǝkpatam ngga, dumǝna púp ɓwe nǝ̀ nying kpata agir mala ɓamuri. Ɓwe nǝ̀ twal takusǝam aɓa gandǝrǝu mala nutanni andǝ lú ulang mem amur nggun-gangndi, sǝ nǝ̀ yiu atam arǝ aban kat mǝnana mǝ nǝ ká akàm ngga.

³⁵ Acemǝnana ɓwa mana kǝ earce amsǝ yilǝmi ka, nǝ̀ ɗwanyi banì, sǝ ɓwa mǝnana turta yilǝmi acem andǝ ce Cau Amsǝban ngga, nǝ̀ kumi.

³⁶ Mana nǝ̀ puri ɓwa yì mǝnana ɓǝ̀ kum girbunda mala ɓanza kat, sǝ turta yilǝmi ka?

³⁷ Mana gir nì na ɓwa na nǝi nǝ̀ pe Ɓakuli ace mǝnana ɓǝ̀ kum yilǝmu mǝnana málá male pà kàm raka?

³⁸ Wu kǝa pak kǝsǝkyem andǝ cau mem aɓa mǝnia yì ɓanza mǝ ɗwanyi do nǝ mǝsǝcau aban Ɓakuli, andǝ mǝnana lumsǝ nǝ cauɓikea ka ɗang. Ɓǝ̀ kǝɓwa pak kǝsǝkyem ngga, mim Muna mala Ɓwa ka, mǝ nǝ pak kǝsǝkye gbal a pwari mǝnana mǝ nǝ nyar nǝi aɓa ɓoarɓwa mala Tárram, andǝ amǝturonjar mǝfele male ka.