Markus 7 - Maləmce Məfele mala Ɓakuli: Kurcau Məbəshe

Kanigir amur kpata akuncau mala akáu

¹ A ɓe pwari ka aɓea amǝ Farisi andǝ aɓea malǝm Nggurcau mala Musa mǝnana à pur nǝ Urǝshalima ka, à yì ram rǝia aban Yesu.

² À sǝn aɓea alaggana mala Yesu ka, à kǝ lili nǝ abu mǝ pǝndǝke. Lǝmndǝ ama à lak abuia ɗang.

³ (Amǝ Farisi andǝ acili amǝ Yahudi kat ɓǝa nǝ̀ lili ka, she à nǝ̀ lakki abuia kǝla mǝnana kuncau kànì ka, à bwal kuncau mana à kumo a bu akea ka.

⁴ Ɓǝa nyari limo ka, à pà nǝ̀ li kǝgir ɗang, she ɓǝa lakina a rǝia nǝ mur ka. À kǝ kpata aɓea akuncau kam pas, kǝla pakkiagir mala laki akwar, andǝ ankwaring, andǝ ankenye bolo, andǝ abuno-banli.)

⁵ Nda amǝ Farisi andǝ amalǝm Nggurcau mala Musa ɗi Yesu ama, “Palang sǝ alaggana mo ka à kǝ kpata kuncau mana aká sǝm nyingga sǝm ngga ɗang? A kǝ lili nǝ abu mǝpǝndǝke.”

⁶ Pǝlǝa Yesu earia wia ama: Wun amǝ'kunɓarina, ɓangna mala Ishaya amur wun ngga, mǝsǝcau na yi mǝnana gilǝa ama: “Amǝnia yì aɓwana ka à kǝ pam gulo nǝ mburkunia, sǝ ɓabumia ka, nda kuko nǝ mim.

⁷ À kǝ peri abanam aɓa nyir, akanigir malea ka, anggurcau mala ɓwapǝndǝa na!”

⁸ Wu fa ka anzongcau mala Ɓakuli wu sukkia, sǝ wu karǝ akuncau mala ɓwapǝndǝa wu bwalia kàngkàng.

⁹ Nyare nea wia ama: Wu twali ama wu ndanǝ kutan mǝnana wu ginǝki anzongcau mala Ɓakuli, ace mǝnana wu nǝ̀ bwal a ma'wun akuncau ka!

¹⁰ Musa ka bangga wun mbo ama, “Pe tarró andǝ nggo gulo,” sǝ ɗǝm ngga bangŋa ama, “Ɓǝ̀ ɓwa sanggi tarrí ko sanggi ngge ka, ɓǝa wal-lui” re?

¹¹ Sǝ wun ngga, wu na ama ɓǝ̀ ɓwa na nǝ ɓe kǝgir mǝnana nǝ̀ pe tarrí ko ngge ace bwalia wia kam, sǝ ginǝ pea wia, na ama, “Mǝnia ka ǝn pani Ɓakuli” ka, ɓiki ɗang.

¹² Mǝno ka wu ndarǝ ne ɓwe ɓǝ̀ kǝa ɗenyi nǝ tarrí ko ngge nǝ gir mǝnana à ɗwanyi ka ɗang.

¹³ Anggo sǝ kanigir mǝnana wu ak a bu aká wun sǝ wu kǝ pea aɓwana ka, kǝ twal bancame mala cau mala Ɓakuli, kǝ nyesǝi ɓa. Aɓea gir na kam pas kǝla amǝno mǝnana wu kǝ pea ka.

Gir mǝnana kǝ pǝndǝki ɓwa aban Ɓakuli ka

¹⁴ Yesu nyare tunǝ ɓwabunda abani tu ɓǝa okcau. Nea wia ama, “Wu kwaki kir wun kat wu o, sǝ wu ɓariki wu bwalta tǝr mǝnia yì cau ka.

¹⁵ Gir mǝnana nǝ nza sǝ kǝ kutio a bum ɓwa ka, nda mǝnana kǝ pǝndǝki ɓwe a ɓadǝm Ɓakuli ka ɗang; gir mǝnana kǝ puro a ɓabum ɓwa ka, nda mǝnana nǝ̀ pǝndǝki ɓwa ka.

¹⁶ (Ɓwa mǝnana ndanǝ kiru okban ngga, ɓǝ̀ o.”)

¹⁷ Anzǝm mana Yesu nyingŋǝna ɓwapǝndǝa sǝ kutina a ɓala ka, alaggana male yiu abani à yì ɗi ɓa mǝnia yì kanicau ka.

¹⁸ Pǝlǝa Yesu ɗia ama, “Wun gbal ka ɓamur wun dǝmbǝri le? Wu sǝlǝ mbo ama girlina mǝnana nǝ nza sǝ ɓwa li sǝ kutio a rǝì ka, pà nǝ̀ gandǝ tsǝi nǝ̀ pǝndǝki ɗang?

¹⁹ Girlina ka kǝ kutio a ɓabum ɓwa ɗang; aɓa munalungye a bumi sǝ kǝ kutio sǝ nǝ̀ ngga pur a nza.” (Mǝnia yì cau Yesu ne ka, lǝmndǝ ama koya girlina ka mǝɓoarnsari na aban Ɓakuli.)

²⁰ Lidǝmbǝa na ama: Gir mǝnana kǝ pur nǝ ɓabum ɓwa ka, nda gir mǝnana pǝndǝkiyi ɓwa ka.

²¹ Acemǝnana nda nǝ ɓalǝu, a ɓabum ɓwa, sǝ aɗenyicau mǝɓane kǝ puro, kìɗìkì mala nongginǝban, ǝn'i, walki alú, panzǝzana,

²² nzumon, bwal ɓwa a bum, swarkiban, shamgir mala ɓwa, twal lullǝu, gusǝlǝ-muru andǝ ɓwaɓana.

²³ Amǝnia yì agir mǝɓane kat ka, à kǝ pur aɓa ɗenyicau mala ɓwa ka; à ndaka gir mǝnana à kǝ pǝndǝki ɓwa ka.

Guliarǝu mala ɓe mɓwama

²⁴ Yesu nying bu-nzali Galili, o a bu-nzali Taya andǝ Sidon. Kutio a ɓe ɓala, sǝ eare ama ɓǝ̀ kǝɓwa ɓǝ̀ sǝlǝ ce ɗang; kat andǝ amani ka, aɓwana sǝlǝa.

²⁵ Sau ɗang, ɓe mɓwama na kam mǝnana muni muna-ɓwama ka ndanǝ kukwar mǝɓike a ɓa'nyami ka, ok ce Yesu, kara yiu yi kpa a ɓadǝmbǝi.

²⁶ Mɓwame ka ɓwa Yahudi na ɗang, ɓwa Gǝrik na, à ɓǝli a bareban Fonishiya aɓa bu-nzali Suriya. Yi zǝmbǝi Yesu ɓǝ̀ pusǝ kukwar mǝnana arǝ muni ka.

²⁷ Yesu ne wi ama, “Ɓǝa amuna, amǝɓala mem, amǝ Yahudi, ɓǝa li ɓǝa ɗǝmbǝo peatu. Acemǝnana ɓoaro ɓǝa twal girlina mala amuna ɓǝa turia anvwa, aɓwana mǝnana amǝ Yahudi na raka ɗang.”

²⁸ Pǝlǝa mɓwame ne Yesu ama, “Mǝna ka mǝsǝcau na, Ɓwamǝgule, sǝa ma ko aban li ka anvwa kǝ kumo à kǝ li ɓwanggine mala girlina mala amuna mǝnana kǝ sukkio a nzali ka.”

²⁹ Yesu ne wi ama, “Ace cau mo mǝno a bangŋi ka, kyane, kukwar purni rǝ munio!”

³⁰ Pǝlǝa mɓwame nyare a ɓala kya kum muni aban nongŋo ɗǝong aɓa kala, kukwar purni ɓa'nyami.

Yesu twali mǝ talasǝɓunna rǝkwana male

³¹ Yesu pǝlǝa nying bu-nzali Taya, ara a Sidon, kya pur a kun nggeamur Galili, aɓa bu-nzali Dekapolis.

³² Aɓea aɓwana yinǝi wi nǝ ɓeɓwa mǝnana mǝkir'ara na sǝ mǝtalasǝ-ɓunna na. À zǝmbǝi wi ɓǝ̀ tsǝk bu amur ɓwe ɓǝ̀ sonzǝi.

³³ Yesu pusǝ ɓwe zak à puri ɓalǝ aɓwabunda, sǝ oasǝ amunabui aɓa kir ɓwabure, pǝlǝa tau ntara arǝ amunabui sǝ tsǝki ɓwe a lasǝi.

³⁴ Yesu pǝlǝa loasǝ mǝsǝì a kuli, tusǝ ɓālǝi nǝ mǝsǝswatǝr, sǝ na ama, “Efata!” Tǝri ama, “Mǝna!”

³⁵ Kara akir ɓwabure mǝna, sǝ tita okban. Talasǝi panzǝa, kǝ na cau pepe.

³⁶ Yesu pǝlǝa ne ɓwabunda ama ɓǝa kǝa ne kǝɓwa ce ɗang. Kǝla à tsǝkta aɓwana nǝ tsǝa, ama ɓǝa ar ce, à kutio aban bang ce.

³⁷ Gir nî pea wia ndali kǝrkǝr, à camarǝ ɓǝsǝlǝki ce ama, “Koya gir mana kǝ pe ka mǝɓoarne na!” À nyare à na ama, “Nggearǝ amǝ kir'ara ka kǝ tsǝia à kǝ okban, sǝ amǝ talasǝɓunna ka, pea wia nacau!”