Markus 3 - Maləmce Məfele mala Ɓakuli: Kurcau Məbəshe

Yesu twalban rǝkwana a pwari Sabbat

¹ A ɓekǝ pwari ka Yesu nyare kutio a ndakpapi. Ɓe ɓwa nakam bui wu.

² Amǝ Farisi, kúndǝo à nǝ̀ sǝni ko nǝ̀ twalban rǝkwana a pwari Sabbat, pwari usǝlǝo mala amǝ Yahudi. Ace mǝnana à nǝ̀ kum cau mǝnana, à nǝ̀ bwali nǝi ka.

³ Yesu ne ɓwa mǝnana bui wu ka ama, “Lo, yiu yi cam kani a ɓadǝm aɓwana.”

⁴ Yesu pǝlǝa ɗi aɓwana ama, “Mǝ ye na nggurcau eare ɓǝa pe a pwari Sabbat, ɓǝa pak mǝɓoarne le ko ɓǝa pak mǝɓane? Ɓǝa amsǝ yilǝmu le ko ɓǝa kiɗiki?” Kara à duk kunia piu.

⁵ Pǝlǝ rǝì anggo sǝnia nǝ bumlulla, nǝ bumkiɗikea kǝrkǝr arǝ murcandǝa malea, pǝlǝa ne mǝkwano ama, “Sarǝ buo.” Lang mǝrǝkwana sarǝ bui ka, kara rǝì mala, bui nyarǝna pangŋǝna pepe!

⁶ Kara amǝ Farisi puro a nza, à kya kum aɓwana mala Hirǝdus, à kurkun a rǝarǝia andǝia, amur wal-lú Yesu.

Ɓwabunda o ata Yesu

⁷ Yesu lo andǝ alaggana male à nyare a kun nggeamur. Ɓwabunda pas puro o ate. À pur arǝ aban aɓa Galili, andǝ Yahudi,

⁸ andǝ Urǝshalima, andǝ bu-nzali Idumiya, andǝ nkaring Nggeasala Jodan; sǝ aɓea ka à pur kuko nǝ abu-nzali mala amǝ Taya andǝ Sidon, à yiu ate. Cau mala agir-ndali mana kat kǝ pakki ka mǝsǝe akiban, nda ɓwabunda pas puro yiua sǝne ka.

⁹ Ace ɓiki lakki mala ɓwapǝndǝa ka, pǝlǝa ne alaggana male ama ɓǝa alta muna-waru nǝ̀ eau kam, ɓǝ̀ ɓwapǝndǝa ɓǝ̀ kǝa nggiki ɗang.

¹⁰ A mǝno yì pwari ka twalǝni aɓwana pas ban arǝkwana malea, nda aɓea amǝkwano ɗàngɗáng kǝ ramnggiban aban ká dǝmbǝa à nǝ̀ kumsǝ rǝì.

¹¹ Ɓǝ̀ aɓwana mǝnana nǝ akukwar aɓa nyamia sǝni nǝ sǝna ani ka, à yì sukki nǝ sukkio a ɓadǝmbǝi nǝ zwalo a kunia, à kǝ na ama, “A nda Muna mala Ɓakuli!”

¹² Sǝ yì ka, nunkir akukwar nì kǝrkǝr ama ɓǝa kǝa na yan nda yì ɗang.

Yesu tarki amǝ Mishan lum nong-ɓari

¹³ Yesu eauwe amur nkono, sǝ tunǝ aɓwana mǝnana earki cea ka, pǝlǝa à eauwe ate.

¹⁴ Kya tarki aɓwana lum nong-ɓari sǝ pea wia lullǝu ama amǝ'mishan. Yia ka à nǝ̀ do ate, sǝ nǝ̀ nggǝ tasǝia ɓǝa kya hamnǝ Cau Amsǝban,

¹⁵ sǝ pea wia rǝcandǝa mala pǝr akukwar ɓǝa purki rǝ aɓwana.

¹⁶ Ata aɓwana lum nong-ɓari mǝnana tarkia ka Shiman na kam (yi mǝnana tsǝki wi lullǝu ama Bitǝrus ka).

¹⁷ Jemis muna mala Zabadi, andǝ mǝ'eambǝi Yohana (mana tsǝkia wia lullǝu ama Boanajis: ɓālǝi ama, Amuna mala Mgbarangce) ka, à ndakam atea.

¹⁸ Andǝru, andǝ Filip, andǝ Batalomi, andǝ Matiu, andǝ Toma, sǝ Jemis muna mala Alfiyus, sǝ Tadawus ka, à ndakam gbal atea. Acilia ka à nda ka Shiman yì ɓwa mana earkiyi ace la male raka,

¹⁹ sǝ Yahuda Iskariyoti mǝnana me ka.

Yesu kuti murǝm mala akukwar

²⁰ Yesu kutio aɓe ɓala. Ɓwabunda yiu yi ram ɗǝm, mǝnana tsǝa yì andǝ alaggana male à gandǝ li girlina raka.

²¹ Lang amǝ ɓala male nǝ̀ ok ce ka, à puro à wario ama à nǝ̀ ngga bwali, à nǝ̀ um nǝi, acemǝnana a ne malea ka, “Muri pǝlǝna.”

²² Sǝ amalǝm Nggurcau mala Musa mana à pur nǝ Urǝshalima ka, à kǝ na ama, “Baalzabul, murǝm mala akukwar kutio a rǝì. Nda gir mǝnana tsǝa sǝ ndanǝ rǝcandǝa mala pǝr akukwar ɓǝa pur ka.”

²³ Pǝlǝa Yesu tunǝia sǝ nea wia cau nǝ kanicau ama, “Palang sǝ Shetan nǝ̀ pǝr Shetan?

²⁴ Nzali murǝm mǝnana aɓwana male gakia à kǝ munǝo a rǝarǝia ka, pa nǝ̀ cam ɗang.

²⁵ Sǝ ɓǝ̀ ɓala sǝ gau rǝì aban munǝo a rǝarǝia ka, mǝno yì ɓalae gbal ka, pa nǝ̀ cam ɗang.

²⁶ Anggo gbal, ɓǝ̀ Shetan lo arǝ ɓamuri sǝ gau ka, pa nǝ̀ cam ɗang, male malǝna.

²⁷ Mǝsǝcau ka, ɓwa pa nǝ̀ gandǝ kutio a ɓala mala candǝna ɓwa nǝ̀ pwan girkuma male ɗang, she ɓǝ̀ angŋǝna dǝmbǝa tana abui andǝ akusǝi ka, sǝ nǝ̀ gandǝ pwan girɓala male.

²⁸ “Ən nggǝ na wun mǝsǝcau, koya cauɓikea ka à nǝ̀ twali muna ɓwapǝndǝa banì andǝ koya cau kyauwikiban mǝnana pur a kunia ka.

²⁹ Sǝa ma cauɓikea nacau kyauwikiban arǝ Bangŋo Mǝfele ka, à pà nǝ̀ twalbani ɗang, cauɓikea na mǝnana nǝ̀ um nǝ ɓwa a lú mǝnana málá male pà kàm raka.”

³⁰ Yesu nea wia mǝnia yì cau ka, acemǝnana à kǝ na ama, “Yì ka, ndanǝ kukwar ate.”

Nggea Yesu andǝ amǝ'eambǝi

³¹ Anggo ka nggea Yesu andǝ amǝ'eambǝi à yina à yì cam a nza, sǝ à turban ama ɓǝa tunǝi.

³² Ɓwabunda nia rambǝa kàrǝì aɓalǝu ka, pǝlǝa ɓeɓwa ne wi ama, “Nggo andǝ amǝ'eambǝo à nda a nza à kǝ ɗiceo ka.”

³³ Yesu nǝ̀ ear ka nea wia ama, “Yana nda nggem sǝ ayana à ndaka amǝ'eambǝam?”

³⁴ Pǝlǝ mǝsǝì arǝ aɓwana mana à rambǝa à kàrǝì aɓalǝu ka, sǝ na ama, “Anggem andǝ amǝ'eambǝam nia ka!

³⁵ Ɓwa mǝnana kat kǝ pak kàne mala Ɓakuli ka, nda mǝ'eambǝam, sǝ nggem.”