Markus 12 - Maləmce Məfele mala Ɓakuli: Kurcau Məbəshe

Kanicau arǝ amǝ'rya mǝɓealɓike

¹ Yesu tita kania wia gir nǝ kanicau ama: Ɓe ɓwa tsǝk ɓaban nggun anap. Kàrǝì nǝ nkandan, sǝ tǝm tūli aɓa tali ace kambǝ mur ɓǝlanggun anap. Ɓak ban mǝdāre mǝnana à nǝ̀ nggǝ cam amuri aban yal ɓaban ngga. Pǝlǝa nyesǝ ɓaban nì pana haya nǝi a bu amǝ'rya, sǝ kutio o a bǝri a ɓe nzali.

² Kunɓǝla mala anap karna ka, pǝlǝa tasǝ ɓe mǝturo ɓala male aban amǝ'rya ɓǝa kya aki wi ɓǝla anap a ɓaban.

³ Sǝ amǝ'rya bwal mǝturo ɓala man, à walki, sǝ a tasǝ takwari o nǝ ɓabui.

⁴ Nyare mǝtala ɓaban tasǝ ɓe mǝturo ɓala abania. À yì wali à tsǝki pengye a ɓamuri, à pe kǝsǝkya kǝrkǝr.

⁵ Nyar ɗǝm tu tasǝ ɓe mǝturo ɓala. Mǝnia ka à yì wal-lui. Pǝlǝa tasǝ aɓea amǝturo ɓala pas, aman ngga à kwea, acilia ka à wal-luia.

⁶ Kǝ ɓwa mwashat mǝnana ueo mǝtala ɓaban nǝ̀ tur ka, muna male mana earkiyi ace raka nda. Turi a nggea tankwang kat, ne ɓamuri ama, “À nǝ̀ pe munem gulo.”

⁷ Kara amǝ'rya ne a rǝia ama, “Muna mala mǝtala ɓaban, mǝnana nǝ̀ liɓala ka nda man. Wu ɗeki ɓǝ̀ yiu, sǝm nǝ̀ yia wal-lui, sǝ mǝnia yì ɓaban ngga nǝ̀ duk ma'sǝm!”

⁸ Pǝlǝa à bwali à wali wú, à twali à turi anzǝm ɓaban.

⁹ Sǝ mana ado mǝtala ɓaban nǝ̀ pa? Nǝ̀ yiu nǝ̀ yia wal lú ka amǝ'rya mǝno ka, sǝ nǝ̀ nyesǝ ɓaban nǝ̀ pea aɓea aɓwana.

¹⁰ Wun ngga wu ɓal mǝnia yì ban ngga mbo aɓa Malǝmce, mǝnana ama: “Tali mǝnana amǝɓa ginǝi ka, nda ɗǝm yi bwal kusǝɓa kàngkàng ngga.

¹¹ Mǝnia yì gir ka Mǝtalabangŋo na pe ka, sǝ gir ndali na aban sǝm? ”

¹² Pǝlǝa aɓwana-mǝgule mala amǝ Yahudi alta njargula mǝnana à nǝ̀ bwali nǝi ka, acemǝnana à sǝlǝna ama bang mǝnia yì kanicau ka a rǝia. Sǝa ma acemǝnana àkǝ̀ ɓanggi ɓwabunda ka, à ɗeki à pǝlǝ rǝia, à o.

Mbwe boalo-cemi aban Kaisar

¹³ Anzǝm man ngga, à tasǝî Yesu aɓea amǝ Farisi andǝ aɓwana mala Hirǝdus ace mǝnana ɓǝa bwali aɓa nacau male ka.

¹⁴ À yiu abani à yì na ama, “Malǝm, sǝm sǝlǝna ama we ka a kǝ came amur mǝsǝcau. Kǝɓwa pà kàm nǝ̀ pūrǝo ata bui male ka ɗang, acemǝnana ɓwapǝndǝa kat abano ka à twalia à nda mwashat. A kǝ kani njargula mala Ɓakuli nǝ mǝsǝcau. Sǝm ngge earce wu bangga sǝm; nggurcau eare ama ɓǝ̀ sǝm mbwe boalo-cemi aban Kaisar, yì murǝm mǝgule mala amǝ Roma le, ko pa a njari ɗang?

¹⁵ Ɓǝ̀ sǝm mbwe le ko ɓǝ̀ sǝm ngga mbwe ɗang?” Yesu ka sǝlǝna kutan malea, pǝlǝa ɗia ama, “Palang sǝ wu kǝ earce tambam? Wu yinǝam nǝ mǝsǝboalo ma'wun mǝ sǝni!”

¹⁶ À pǝlǝa à yinǝi wi nǝ mǝsǝboalo, sǝ ɗia ama, “Foto ɓamǝsǝ yana mǝnia, sǝ parbu mala yana mana amuri ka?” À eari wi ama, “Mala Kaisar na.”

¹⁷ Pǝlǝa Yesu nea wia ama, “Wu pe Kaisar gir mǝnana mala Kaisar na ka, sǝ wu pe Ɓakuli gir mǝnana mala Ɓakuli na ka.” Kara yia ka à ndali kǝrkǝr nǝ nyesǝcau male.

Ɗiban amur doɓala andǝ loapi ɓembe nǝ yilǝmu

¹⁸ Pǝlǝa amǝ Saduki, mǝnana à bangŋa ama loapi ɓembe pa kàm raka, à yiu abani nǝ ɗiban.

¹⁹ À na ama, “Malǝm, Musa gilǝa sǝm ama ɓǝ̀ mǝ'eam ɓwa wu sǝ ɗeki mami amuna pa abui raka, ɓwa mǝno ka dupi wi púp ɓǝ̀ twal mala lú, ɓǝ̀ ɓǝli mǝ'eambǝi amuna.

²⁰ Aɓea amǝ'eambu nakam tongno-nong-ɓari. Mǝdǝmbe al mɓwama, sǝ wu, ɗeki kǝ muna ɗang.

²¹ Ɓwa mǝnana kpa nzǝmi ka twal mala lú, a do andǝ yi. Yì gbal ka yi wú, ɗeki kǝ muna ɗang. Anggo gbal nǝ tāruia.

²² Yi mal muria kat, yia mǝnia tongno-nong-ɓari ka, ko kǝɓwa kum muna ɗang. A masǝlǝate ka mɓwame yi wu gbal.

²³ Ado ka, à pwari mǝnana aɓwana nǝ̀ loapi ɓembe nǝi ka, mɓwame ka nǝ̀ duk mala yana aɓalǝia, yi mǝnana yia kat à dum nǝi ka?”

²⁴ Yesu earia wia ama: Ɓwarkio ma'wun ngga nda mǝnana ama wu surǝ Malǝmce andǝ rǝcandǝa mala Ɓakuli ɗang.

²⁵ A pwari lo mala alú a ɓembe ka, alban pà kàm ɗang. Aɓwana nǝ̀ do kǝla amǝturonjar a kuli.

²⁶ Sǝ amur cau mala lo mala alú ka, wu ɓal mbo aɓa malǝmce mala Musa, amur mǝ'ndanggun mǝnana kǝ earki bǝsa ka? Nda anzǝm mǝnana a Ibǝrayim andǝ Ishaku andǝ Yakupu wukina, sǝ apǝlǝkia pas yi kutikina ka, sǝ Ɓakuli yi bangcau nǝ Musa ama, “Mǝ nda Ɓakuli mala Ibǝrayim, andǝ Ɓakuli mala Ishaku, andǝ Ɓakuli mala Yakupu.”

²⁷ Mǝnia ka lǝmndǝ ama yì ka, Ɓakuli mala alú na ɗang; mala aɓwana mǝnana nǝ yilǝmu ka nda. Wun ngga, wu ɓwarki kǝrkǝr!

Nzongcau mǝgule kat

²⁸ Ɓe malǝm Nggurcau mala Musa na aban came abani kǝ ok cau mǝno amǝ Saduki kǝ makgir amuri andǝ Yesu ka. Lang sǝni Yesu nyesǝnia wia cau pepe ka, pǝlǝa ɗi Yesu ama, “Aɓalǝ anzongcau kat ka, mǝyani na kuti aɓea kat?”

²⁹ Yesu eare ama, “Mǝgule mǝnana kutiban kat ka nda mǝnia ka: ‘Wu kwaki kir wun, wun amǝ Isǝrayila, Mǝtalabangŋo Ɓakuli ma'sǝm ngga, nda mwashat.

³⁰ Earce Mǝtalabangŋo Ɓakuli mo nǝ ɓabumo kat, andǝ yilǝmo kat, andǝ ɗenyicau mo kat, andǝ rǝcandǝa mo kat.’

³¹ Ɓaria nda mǝnia: ‘Earce ɓeo mǝ'murkala kǝla mǝnana a earce ɓamuro ka.’ Kǝ ɓe nzongcau pà kàm kuti amǝnia ka ɗang.”

³² Malǝm Nggurcau mala Musa eari Yesu ama, “Kǝ ndo a bangŋi ka, Malǝm! A ɓwarki ɗang, yi mana a na ama, Ɓakuli ka nda mwashat, kǝ ɓe pà kàm ɗang. Kǝ Yì na nǝmurǝì.

³³ Ɓǝ̀ ǝn earce nǝ ɓabumam kat, nǝ sǝlǝe mem kat, nǝ rǝcandǝa mem kat, sǝ ɓǝ̀ ǝn earce ɓiam mǝ'murkala kǝla mǝnana ǝn earce ɓamuram ngga. Mǝnia ka kǝ pwasǝ bum Ɓakuli kuti pāki aɓoro mala pisǝki agir andǝ pa agir nkila.”

³⁴ Lang Yesu sǝni ɓwabure nyesǝna cau aɓa sǝlǝe ka, pǝlǝa ne wi ama, “We ka, a pa kuko nǝ ban domurǝm mala Ɓakuli ɗang.” Anzǝm mǝno ka, kǝɓwa nyare ɗi ɓe kǝ cau ɗang.

Yesu Kǝrǝsti ka muna mala yana?

³⁵ Lang Yesu na aban kanigir a Ndàmǝgule mala Ɓakuli ka, ɗiban ama, “Palang sǝ amalǝm Nggurcau mala Musa kǝ bangŋa ama Kǝrǝsti ka muna mala Dauda na?

³⁶ Dauda nǝ nggearǝì ka, na cau aɓa Bangŋo Mǝfele ama: “Mǝtalabangŋo ne Mǝtalem ama, ‘Do a buno gulo, ata buam mǝli she ɓǝ̀ ǝn nyesǝna aɓeo amǝbura a ɓakusǝo ka.’

³⁷ Yi mǝnana Dauda nǝ ɓamuri tunǝ Kǝrǝsti ama, ‘Mǝtalabangŋo’ ka, lang sǝ Kǝrǝsti nǝ̀ duk muni?” Ɓwabunda kwaki kiria a rǝì nǝ banɓoarnado.

Yesu pusǝta amǝkani Nggurcau mala Musa

³⁸ Yesu aɓa kanigir male ka, nea wia ama: Wu parkir wun arǝ amǝkani Nggurcau mala Musa! Acemǝnana yia ka, à earce gya aɓalǝ anggea daura aban ak makkun aɓa limo.

³⁹ Yia ka, à kǝ earce ban-do mǝɓoarne aɓalǝ andakpapi andǝ aban-pakiɗire.

⁴⁰ Yia na à kǝ ɓǝmbǝri aman-lú arǝ agirkuma malea, sǝ à nǝ̀ ɓosǝki aɓwana nǝ pakki ahiwi mǝsauwe mala lǝmndǝ ɓamuria ama yia ka amǝ fele na. Ace mǝno ka ɓashi malea nǝ̀ gul kǝrkǝr.

Pa ɓoro mala ɓe man-lú

⁴¹ Yesu na aɓa Ndàmǝgule mala Ɓakuli, do nǝ ban mana à kǝ turki boalo kam ngga. Mǝsǝì ueo arǝ ɓwapǝndǝa mǝnana kǝ turki boalo aɓa kwar ak boalo ka. Amǝkume pas turki aboalo kpǝm.

⁴² Ɓe mǝtǝr man-lú yiu yi tsǝk anini ɓari, mǝnana bwalta kwapo mwashat raka.

⁴³ Yesu tunǝ alaggana male abani, sǝ nea wia ama, “Ən nggǝ na wun ɓafo, mǝnia yì man-lú mǝtǝr man ngga, nda tur gir mana kuti ban kat aɓa kwar ak boalo ka.

⁴⁴ Acemǝnana acili aɓwana kat ka, à tù nǝ tú aɓa kume malea, sǝ yì ka, kǝgir mana ueo nǝ̀ linali nǝi ka, nda yi turi kat ka.”