Luka 7 - Maləmce Məfele mala Ɓakuli: Kurcau Məbəshe

Guliarǝu mala ɓwamǝgule soje

¹ Lang Yesu malǝna banggi aɓwana amǝnia yì acau ka, pǝlǝa kutio o a Kapanahum.

² Aɓa mǝnia yì la ka guro mala ɓe ɓwamǝgule soje mala amǝ Roma, mǝnana earkiyi ace raka, nong kwano yi bwal kun-lú.

³ Sǝ lang ɓwamǝgule soje man ok ce Yesu, tur aɓwana-mǝgule mala amǝ Yahudi abani, ɓǝa zǝmbǝi wi ɓǝ̀ yiu ɓǝ̀ yi twali guro male ban rǝkwana.

⁴ À yiu aban Yesu à yì zǝmbǝi wi nǝ ɓabumia mwashat ama, “Mǝnia yì ɓwa ka ɓoaro wu bwali wi kam!

⁵ Yì ka, kǝ earce nzali ma'sǝm, ɗǝm ngga ɓakka sǝm Ndakpapi.”

⁶ Yesu pǝlǝa bwal njargula aban ká andǝia. Gbashina ban ɓala ka, ɓwamǝgule soje man tur agyajam male ɓǝa ne Yesu ama, “Mǝtalabangŋo, kǝa pe ɓamuro tanni ɗang, acemǝnana ǝn kārǝa wu kutio a ɓala mem ɗang.

⁷ Sǝ ǝn sǝni ka ǝn kārǝa mǝ nǝ ká a bano ɗang. Bangcau àkǝ̀ ban mǝnana a ndakam ngga sǝ guro mem nǝ̀ kum rǝcandǝa.

⁸ Acemǝnana mim nǝ ɓamuram ngga mǝ nda aɓata ɓwa, nǝ asoje a ɓatam. Ɓǝ̀ ǝn ne man ama, ‘O’ ka, nǝ̀ ká, sǝ ɓǝ̀ ǝn ne ɓwa mǝno ama, ‘Yiu’ ka, nǝ̀ yiu gbal. Ɓǝ̀ ǝn ne guro mem ama, ‘Pak mǝnia ka’ nǝ̀ pè.”

⁹ Lang Yesu ok man yì cau ka, ndali kǝrkǝr, pǝlǝ rǝì aban ɓwabunda mǝnana à kǝ yiu ate ka, nea wia ama, “Ən nggǝ na wun, ǝn malaká kum guliarǝu mǝgule ulang man aɓa nzali Isǝrayila ɗang!”

¹⁰ Lang aɓwana mǝnana à turia à nyarǝna a ɓala ka, à kya kum guro man, rǝì bǎng.

Yesu loasǝ lú-muna mala man-lú

¹¹ A nzǝmi bǝti ka, Yesu o a la mǝnana à tunǝki ama Nayi ka. Alaggana male andǝ aɓwabunda kǝrkǝr o ate.

¹² Lang gbashina kun la ka, à je andǝ aɓea ɓwana mǝnana à twalǝna lú-mǝlagga à nǝ̀ nggǝ purni ka. Yì lú ka ndà kǝ̀ muna-ɓwabura mwashat a bu ngge. Sǝ ngge ka man-lú na. Ɓwabunda pas mǝnana a le ka à puro ate.

¹³ Lang Mǝtalabangŋo sǝn mɓwama man ngga, mǝsǝswatǝr male bwali, pǝlǝa ne wi ama, “Ce a ɓua ɗang!”

¹⁴ Pǝlǝa kutio tsǝk bui arǝ kal-lú. Amǝ twal lú pǝlǝa à cam gǝs. Sǝ Yesu na ama, “Lagga, ǝn nggǝ no ama wu lo!”

¹⁵ Lú kara lo dum nǝ do, tita na cau, pǝlǝa Yesu nyesǝi pe ngge.

¹⁶ Ko yan ngga gir nî karmuri, pǝlǝa à ɓwangsǝ Ɓakuli, à kǝ na ama, “Ɓe mǝɓangna mǝgule pusǝna rǝì aban sǝm. Ɓakuli yina ace amsǝ aɓwana male!”

¹⁷ Cau mala gir mǝnia Yesu pe ka, akiban aɓa nzali Yahudi andǝ acili ala mǝnana à kàrǝì banì ka.

Yohana Mǝbatisǝma turban ata Yesu

¹⁸ Alaggana mala Yohana yi banggi wi agir kat mǝnana Yesu pea ka. Pǝlǝa Yohana tunǝ aɓwana ɓari atea,

¹⁹ sǝ tasǝia aban Mǝtalabangŋo ɓǝa kya ɗi ama, “A nda Kǝrǝsti Mǝ'amsǝban, mǝnana sǝm nggǝ kundǝ ka le, ko ɓǝ̀ sǝm kundǝ ɓeɓwa ɗàng?”

²⁰ Lang aɓwana man yina aban Yesu ka, à yì na ama, “Yohana Mǝbatisǝma tur sǝm abano, ɓǝ̀ sǝm yì ɗio ama, ‘A nda Kǝrǝsti Mǝ'amsǝban mǝnana sǝm nggǝ kundǝ ka le, ko ɓǝ̀ sǝm kundǝ ɓeɓwa ɗang?’ ”

²¹ Àkǝ̀ banì Yesu twalia aɓwana pas ban akwano andǝ arǝpangŋa malea, pusǝki akukwar arǝ aɓwana, sǝ mǝn mǝsǝ ante.

²² Pǝlǝa ne aɓwana mǝnana Yohana turia ka ama, “Wu nyare wu kya banggi Yohana agir mǝnana wu sǝn andǝ mǝnana wu ok ka. Ante kǝ sǝnban, aman à gbakǝri a kusǝia ka à lo à kǝ gya, amǝkwano-dakali ka à kǝ twalia wia ban dakali malea, amǝkir'ara kǝ okban, à kǝ loasǝ alú, sǝ Cau Amsǝban ngga à kǝ hamnǝi aban amǝtǝr.

²³ Ɓwa mǝnana makgir cau mem raka ndanǝ tsǝkbu mala Ɓakuli!”

²⁴ Anzǝm o mala aɓwana mǝnana Yohana turia ka, Yesu tita nea ɓwapǝndǝa acau amur Yohana ama, “Lang wu puro wu wario aban Yohana a ɓabondo ka, mana gir nì na wu waria sǝne? Ndǝrdangŋa mǝnana gung kǝ dǝurǝki ka nda le? Awo!

²⁵ Sǝ ɓǝ̀ nda raka, mana wu waria sǝne? Ɓe ɓwa na mǝnana makki adaura mǝɓoarne a rǝì ka le? Awo! Aɓwana mǝnana à makkiyi adaura mǝɓoarne sǝ à nda aɓa banɓoarna mala kume ka, à nda malea a palta.

²⁶ Sǝ mana wu waria sǝne? Mǝɓangna mala Ɓakuli na le? E, ǝn nggǝ na wun, yì ka, kuti mǝɓangna mala Ɓakuli.

²⁷ Yohana nda ɓwa mǝnana Malǝmce bangŋa amuri ama: “ ‘Mǝ nǝ tasǝ mǝturonjar mem ɓǝ̀ ako dǝmbǝa, mǝnana nǝ̀ gilǝkio njargula sǝ a nǝ yiu ka.’

²⁸ Ən nggǝ na wun, aɓalǝ aɓwana mǝnana kat à ɓǝlia a ɓanza man ngga, kǝɓwa pà kàm kuti Yohana nǝ gulo ɗang. Sǝa ma ɓwa mǝnana nda mǝkyauwe kat aɓata Domurǝm mala Ɓakuli ka ndanǝ gulo kuti.”

²⁹ Ɓwapǝndǝa kat, ko nggearǝ amǝ'ak boalo-cemi, lang à oangŋa cau mala Yesu ka, à ear kat ama, njargula mala Ɓakuli ka mǝɓoarne na, acemǝnana Yohana nǝ̀ pakkia wia batisǝma.

³⁰ Sǝ amǝ Farisi andǝ amalǝm nggurcau ka à ginǝ kane mala Ɓakuli mǝnana acea ka, acemǝnana à ɓinǝ ama ɓǝ̀ Yohana ɓǝ̀ kǝa pakkia wia batisǝma ɗang.

³¹ Yesu lidǝmbǝa nǝ cau ama: Arǝ man sǝ mǝ nǝ kànì aɓwana mǝnana a nza man ngga? À nda kǝla mana?

³² À nda kǝla amuna mǝnana à do a kun limo, à kǝ akia rǝia cau ama: “Sǝm twangga wun ntetu, sǝ wu tanggwam ɗang; sǝm tuka wun nggyal ɓua-lú, sǝ wu ɓua ɗang!”

³³ Yohana Mǝbatisǝma ka yiu kǝ li nɗǝmo ɗang, kǝ nu mùr-anap ɗang. Sǝ wu na ama, “Ndanǝ kukwar ate.”

³⁴ Muna mala Ɓwa yiu kǝ li, kǝ nu, nyare wu na ama, “Wu sǝn nggea mǝligula, mǝ nukiagir, gyajam mala amǝ'ak boalo-cemi andǝ ‘amǝ'cauɓikea.’ ”

³⁵ Kat andǝ amani ka sǝlǝe mala Ɓakuli ka, yi lǝmndǝ rǝì mǝsǝcau na aɓalǝ aturo mala aɓwana mǝnana à é ka.

Yesu a ɓala mala Shiman ɓwa Farisi

³⁶ Ɓe ɓwa aɓalǝ amǝ Farisi tunǝ Yesu arǝ girlina pwarikpǝra. Pǝlǝa Yesu wario a ɓala mala ɓwa Farisi man kya do aban li.

³⁷ A la mǝno ka ɓe mɓwama na kam mǝnana à surǝì nǝ do aɓa cauɓikea, man-gung na ka. Lang ok ama Yesu na ban li a ɓala mala ɓwa Farisi ka, yiu nǝ muna-du mǝɓoarjami mana à lumsǝì nǝ muru mǝ-rǝmɓoarne, mana kure candǝ ka.

³⁸ Yiu yi kūndǝ nǝ ban akusǝ Yesu a nzǝmi, sǝ kǝ ɓua; liu anzǝm kusǝ Yesu nǝ mǝrǝm, esǝkia nǝ nyang muri, sǝ kùria a rǝì nǝ abui; camarǝ jeki akusǝ Yesu tutu nǝ mburkuni, sǝ kǝ hasǝia nǝ muru mǝ-rǝmɓoarne.

³⁹ Ɓwa Farisi mǝnana tunǝ Yesu arǝ girlina ka sǝn mǝnia ka. Pǝlǝa na nǝ ɓabumi ama, “Ɓǝ̀ ɓwa man ngga mǝɓangna mala Ɓakuli na ka, ɓǝ́ surǝna rǝ ɓwa mǝnana jekiyi rǝì ka, sǝ koya ulang mɓwama na man, acemǝnana mǝ'cauɓikea na.”

⁴⁰ Yesu eari wi ama, “Shiman, mǝ ndanǝ cau mǝnana mǝ nǝ no ka.” Pǝlǝa pe eare ama, “Nam ce, Malǝm.”

⁴¹ Yesu ne wi ama, “Ɓe ɓwa kǝ kpata aɓwana ɓari tangna. Ɓwa mwashat ka ak mǝsǝboalo gbǝman-tongno, sǝ ɓeɓwa ka lumi-tongno na ak ka.

⁴² Yia kǝm ngga à gandǝ mbwe ka tangna man ɗang. Mǝpa-tangna pǝlǝa twalia wia ban mǝno yì atangna ka. Sǝ ado ka yana aɓalǝia nǝ̀ earce nǝ̀ kutibanì?”

⁴³ Shiman eari wi ama, “A sǝne mem ngga ɓwa mǝnana tangna male kpǝm sǝ à twali wi banì ka.” Yesu ne wi ama, “Yàwá! A nani pepe.”

⁴⁴ Pǝlǝa pǝlǝ rǝì aban mɓwama man, sǝ ne Shiman ama, “A sǝn mǝnia yì mɓwama ka? Ən kutio a ɓala mo, a pam mur laki akusǝu ɗang. Sǝ mɓwama man ngga liupam akusǝam nǝ mǝrǝm male. Sǝ kǝ esǝkia nǝ nyang muri.

⁴⁵ A gingsǝam nǝ nu kunam ɗang, sǝ mǝnia yì mɓwama ka, kutio mem mǝni ɗār ka, ko aulǝa tù kuni arǝ nu ka kusǝam ɗang.

⁴⁶ A hasǝam muru a ɓamuram ɗang, sǝ yì ka, hasǝam muru mǝ'rǝmɓoarne arǝ akusǝam.

⁴⁷ Ace mani ka, ǝn nggǝ banggo, earcearǝu male mana gul kpǝm ngga, lǝmndǝ ama, acauɓikea mǝgule male ka à twalǝni wi bania kat. Sǝ ɓwa mǝnana à twali wi banì bǝti ka, earcearǝu male gbal ka nda bǝti.”

⁴⁸ Yesu pǝlǝa ne mɓwama mǝno ka ama, “À twalǝno ban acauɓikea mo.”

⁴⁹ Acili aɓwana mǝnana aban li ka, a tita nea rǝia ama, “Man yì ɓwa ka nda yana, mǝnana kǝ gandǝ twalban cauɓikea ka?”

⁵⁰ Pǝlǝa Yesu ne mɓwama mǝno ama, “Paɓamuru mo amsǝno; o ata dorǝpwala mo.”