Luka 20 - Maləmce Məfele mala Ɓakuli: Kurcau Məbəshe

À ɗiban amur Bangŋo mala Yesu

¹ A ɓe kǝ pwari Yesu naban kani aɓwana gir a Ndàmǝgule mala Ɓakuli, sǝ kǝ hamnǝ Cau Amsǝban, agbani pǝris andǝ amalǝm Nggurcau mala Musa andǝ akapana yia kat à yiu abani.

² À yì ne wi ama, “Bangga sǝm, nǝ ya rǝcandǝa sǝ a kǝ pakki amǝnia yì agir, sǝ yana po mǝnia yì gara mala pea ka?”

³ Yesu pǝlǝia wia ama, “Mǝ nǝ ɗi wun gbal. Wu banggam,

⁴ batisǝma mala Yohana ka, pur nǝ kuli le, ko pur nǝ ban ɓwapǝndǝa?”

⁵ Pǝlǝa à pǝlǝki ce a rǝarǝia ama, “Ɓǝ̀ sǝm bangŋa ama ‘Pur nǝ kuli ka,’ nǝ̀ ɗi sǝm ama, ‘Sǝ palang sǝ wu pa ɓamur wun a rǝì ɗang?’

⁶ Sǝ ɓǝ̀ sǝm na ama, ‘Pur nǝ ban ɓwapǝndǝa ka, aɓwana mǝnia kat ka à nǝ̀ ɓukki sǝm, acemǝnana yia ka à earǝna ama Yohana ka mǝɓangna mala Ɓakuli na.’ ”

⁷ Pǝlǝa à eare ama, “Sǝm surǝ ban mǝnana pur kam ngga ɗang.”

⁸ Pǝlǝa Yesu nea wia ama, “Mim gbal ka pa mǝ nǝ bangga wun nǝ koya rǝcandǝa sǝ ǝn nggǝ pakki amǝnia yì agir ka ɗang.”

Kanicau arǝ ɗenyi nǝ ɓaban

⁹ Yesu lidǝmbǝa aban ne aɓwana mǝnia yì kanicau ka ama: Ɓe ɓwa tsǝk ɓaban nggun anap, sǝ nyesǝi pe aɓea amǝturo rya, sǝ kutio o a bǝri banì kya sau kam.

¹⁰ Kun pwan ɓǝlanggun anap karǝna adyan ngga, pǝlǝa tur ɓe mǝturo-ɓala male aban amǝturo ɓǝa kya aki wi ɓǝlanggun. Kara amǝturo yi walki mǝturo-ɓala man, sǝ à pǝrì um nǝ ɓabui.

¹¹ Nyare tur ɓe mǝturo-ɓala, yì gbal ka à walki à lǝmndǝì wi gir kǝsǝkya sǝ à pǝri um nǝ ɓabui.

¹² Nyar ɗǝm tur tāruia, à yì tsǝki wi anpenye à ramte à turi nǝ nza.

¹³ Pǝlǝa mǝtala ɓaban na ama, “Mana ado mǝ nǝ pa? Mǝ nǝ tasǝ munem mǝnana ǝn earkiyi ace raka, yakǝla à nǝ̀ pe wi gulo!”

¹⁴ Lang amǝturo nǝ̀ yia sǝni ka, à kur kunarǝia amuri ama, “Yauwa! Mǝnia ka nda mǝliɓala. Sǝm nǝ̀ wal-lui, sǝ ɓaban ngga nǝ̀ duk ma'sǝm!”

¹⁵ Pǝlǝa à yasǝli à turi nǝ nzǝm nkandan, sǝ à kar ate à kya wali wu. Pǝlǝa Yesu ɗiban ama, “Mana ado wu kǝ sǝni mǝnia yì mǝtala ɓaban ngga nǝ̀ yia pakkia wia?

¹⁶ Nǝ̀ yiu nǝ̀ yia wal-lú amǝturo mǝnia sǝ nǝ̀ nyesǝ ɓaban nǝ̀ pe aɓea aɓwana!” Lang ɓwapǝndǝa nǝ̀ ok mǝnia ka à na ama, “Ɓǝ̀ Ɓakuli twalban mani!”

¹⁷ Pǝlǝa Yesu sǝnia kyap-kyap sǝ na ama, “Sǝ mana ɗe nda tǝrcau mǝnana malǝmce bangŋi ama: “ ‘Tali mǝnana amǝɓa ginǝi ka, nda à nyesǝi yi bwal ɓǎ kàngkàng ngga.’

¹⁸ Ɓwa mǝnana kat sǝ kpa amur mǝno yì tali ka nǝ̀ arkya nǝ̀ mesǝke mwashat-mwashat, sǝ ɓwa mǝnana tali man kpa amuri ka, nǝ̀ betǝki.”

¹⁹ Amalǝm Nggurcau mala Musa andǝ agbani Pǝris alta njargula mǝnana à nǝ̀ bwali nǝi tsuk-tsuk ka, acemǝnana à sǝlǝna ama mǝnia yì kanicau ka nda a rǝia. Sǝa ma ɓangciu kǝ pakkia wia arǝ aɓwana.

À ɓariki à nǝ̀ tsǝki Yesu gbǝli

²⁰ Aɓiamǝbura tsǝki wi mǝsǝu, pǝlǝa à tasǝ amǝ'iucau, mǝnana à lǝmndǝa kǝla amǝ'mǝsǝcau na ka. A ɗenyicau malea ka à nǝ̀ bwal Yesu aɓa cau mǝnana pur a kuni ka, sǝ à nǝ̀ ká nǝi a ɓabu mǝtala-nzali, yì nggwamna mala amǝ Roma.

²¹ Pǝlǝa amǝ'iucau ɗi Yesu ama, “Malǝm, sǝm sǝlǝ ama cau mo andǝ kanigir mo ka mǝsǝcau na kat. Aɓwana kat abano ka amǝ'mwashati na. A kǝ kani njargula mala Ɓakuli nǝ mǝsǝcau.

²² Nggearǝì ka ɓoaro ɓǝ̀ sǝm mbwe Kaisar, murǝm mǝgule mala amǝ nzali Roma boalo-cemi le, ko ɓǝ̀ sǝm ká pe wi ɗang?”

²³ Yì ka, surǝna ɓa kutan malea pǝlǝa nea wia ama,

²⁴ “Wu lǝmndǝam mǝsǝboalo dinari. Ɓamǝsǝ ɓwa andǝ gir mǝnana à gilǝa rǝì ka mala yana?” À eari wi ama, “Mala Kaisar na.”

²⁵ Pǝlǝa nea wia ma, “Wu pe Kaisar gir mǝnana mala Kaisar na ka, sǝ Ɓakuli ka wu pe wi gir mǝnana male na ka.”

²⁶ À gandǝ kume nǝ ɓwarkio aɓa cau male a ɓadǝm ɓwapǝndǝa ɗang. À ndali nǝ cau male, kara à do kunia ɗǝong.

Ɗiban amur loapi ɓembe

²⁷ Sǝ aɓea amǝ Saduki, mǝnana à na ama aɓwana pà nǝ̀ lo anzǝm lú raka, à yiu aban Yesu nǝ ɗiban.

²⁸ À na ama: Malǝm, Musa gilǝa sǝm ama, “Ɓǝ̀ mǝ'eam ɓwa wú sǝ ɗeki mami amuna pà kàm raka, ɓwe ka nǝ̀ al man-lú ace mǝnana ɓǝ̀ ɓǝli mǝ'eambǝi amuna.”

²⁹ Sǝ a pwaryan ngga aɓea aɓwana nakam yia tongno-nong-ɓari à nda amǝ'eambu. Mǝdǝmbǝa al mɓwama yi wu à pànǝ muna ɗang.

³⁰ Sǝ ɓaria ka anggo gbal, al ɓwame sǝ yi wu pànǝ muna ɗang.

³¹ Tàruia gbal ka yi twal ɓwame, anggo sǝ yia mǝnia tongno-nong-ɓari ka à yì wú à ɗeki mɓwama, ko kǝ muna pa kàm ɗang.

³² A masǝlǝate ka, mɓwama gbal ka yi wu.

³³ Sǝ ado ka, a pwari loapi ɓembe ka nǝ̀ duk mala yana atea le, acemǝnana yia mǝnia tongno-nong-ɓari ka à dumǝna nǝi?

³⁴ Yesu earia wia ama: Aɓwana mǝnana a ɓanza man ngga à kǝ al rǝia sǝ à kǝ isǝ amunia.

³⁵ Sǝ aɓwana mǝnana à sǝnia à karǝna à nǝ̀ lo a ɓembe sǝ à nǝ̀ kum kutio a ɓanza mǝno kǝ yiu ka, à pà nǝ̀ al rǝia ko à nǝ̀ isǝ amunia ɗang.

³⁶ Sǝ à pà nǝ̀ wu ɗǝm ɗang, acemǝnana à nda kǝla amǝturonjar. Amuna mala Ɓakuli na. Yia ka à ndaka ɓwana mǝnana à loapi ɓembe ka.

³⁷ Sǝ amur cau mala loapi ɓembe ka, nggearǝ Musa ka lǝmndǝ ama alú nǝ̀ loapi ɓembe. Aɓa cau mǝnana à gilǝe amur mǝ'ndanggun mǝnana kǝ earki bǝsa ka, bangŋa ama Mǝtalabangŋo ka nda, “Ɓakuli mala Ibǝrayim, Ɓakuli mala Ishaku, sǝ Ɓakuli mala Yakupu.”

³⁸ Yì ka, Ɓakuli mala alú na ɗang, nda Ɓakuli mala aɓwana mǝnana nǝ yilǝmu ka, acemǝnana sǝlǝna ama yia kat ka à ndanǝ yilǝmu.

³⁹ Aɓea amalǝm Nggurcau mala Musa pǝlǝi wi ama, “Malǝm, cau mo ka mǝsǝcau na!”

⁴⁰ Anggo ka kǝɓwa nyare loasǝ kuni ama nǝ̀ ɗi ɓe kǝ cau ɗǝm ɗang.

Kǝrǝsti, Mǝ'amsǝban ngga muna mala yana na?

⁴¹ Yesu pǝlǝa turia wia ɓe ɗiban ama, “Mana tsǝa sǝ à kǝ na ama Kǝrǝsti ka Muna mala Dauda na?

⁴² Dauda nǝ nggearǝì ka bangŋa aɓa malǝmce mala Anggyal ama, “ ‘Ɓakuli, Mǝtalabangŋo, ne Mǝtalem ama, Do a buam mǝli

⁴³ she ɓǝn nyesǝna aɓeo amǝbura à pǝlǝna muna-buno tsǝk kusǝu a ɓakusǝo ka.’

⁴⁴ Dauda ka tunǝ Kǝrǝsti ama ‘Mǝtalem.’ Sǝ palang ado sǝ Kǝrǝsti duk muni ɗǝm?”

Yesu nunkir amǝte arǝ amalǝm Nggurcau mala Musa

⁴⁵ Lang aɓwana kat na arǝ kwaki kiria à nǝ̀ nggǝ oe ka, Yesu pǝlǝa ne alaggana male ama,

⁴⁶ “Wu tsǝkir wun arǝ amalǝm Nggurcau mala Musa. À earce gya nǝ anggea-daura, sǝ à earce ɓǝa kǝ makkia wia kun aɓalǝ alimo, à earce aban-do mǝɓoarne arǝ andakpapi andǝ abuno mala aɓwana-mǝgule arǝ aban pakiɗire lili.

⁴⁷ À kǝ ɓǝmbǝri aman-lú arǝ agirkuma malea, sǝ à kǝ ɓosǝki aɓwana nǝ pakki ahiwi mǝ'sake. A ulang yia ka à nǝ̀ pakkia wia ɓashi mǝcande.”