Luka 2 - Maləmce Məfele mala Ɓakuli: Kurcau Məbəshe

Ɓǝlban mala Yesu

¹ Aɓalǝ amǝno yì anonggeo ka, Kaisar Agusta pa nzongcau ama, ɓǝa ɓal aɓwana mǝnana aɓa nzali Roma ka kat ɓǝa gilǝ lullǝia.

² Mǝnia ka nda tita ɓalban arǝ abaku mǝnana Karniyus nda nggwamna mala bu-nzali Suriya ka.

³ Sǝ koyan ngga o a la male, ace mǝnana ɓǝa kya gilǝ lullǝi ka.

⁴ Yisǝfu ka, lo a Nazarat ɓe la a bu-nzali Galili, aban ká a bu-nzali Yahudi, a la mala Dauda mana à tunǝki ama Betalami ka, acemǝnana yì Yisǝfu ka muna lá na, a tau mala Dauda.

⁵ O kano andǝ Maryamu mansari male mǝnana gongŋǝna ka, ace mǝnana ɓǝa kya gilǝ lullǝia.

⁶ À nda kano piu a Betalami ka, pwari gbashi male yi kārǝa.

⁷ Pǝlǝa gbashi muna dǝmbǝa male, muna-ɓwabura. Mbúɓɓǝkì aɓa nggurbyau sǝ nongsǝi aɓa kpamgbang-girlina mala agirkusǝu, acemǝnana à pànǝ ban nongŋo aɓa nda a ban-sulǝo ɗang.

Ayalgir andǝ mǝturonjar

⁸ Tu nǝ bania aɓa mǝnia yì bu-nzali ka, aɓea yalgir do a takuri aban ɗenyi nǝ agirkusǝu malea nǝ du.

⁹ Pǝlǝa ɓe mǝturonjar mala Mǝtalabangŋo pusǝrǝi abania, ɓoarɓwa mala Mǝtalabangŋo ta gumbǝlia. Ɓangciu bwalia kǝrkǝr.

¹⁰ Mǝturonjar banggia wia ama, “Ɓangciu ɓǝ̀ kǝa pakka wun ɗang. Wu sǝni, ǝn ndya yina wun nǝ bǝsa Cau Mǝɓoarne mǝ'pwasǝ ɓabumì kǝrkǝr mǝnana nda ace ɓwapǝndǝa kat ka.

¹¹ Yalung aɓa nggeala mala Dauda ka, à ɓǝlǝ́na wun Mǝ'amsǝban; yì nda Kǝrǝsti Mǝtalabangŋo.

¹² Gir mǝnana nǝ̀ lǝmndǝ ama mǝnia yì cau ka mǝsǝcau na ka ndya ka. Wu nǝ̀ ngga kum bangna-muna à mbuɓɓǝ́kini aɓa nggurbyau sǝ à nongsǝi aɓa kpamgbang-girlina mala agirkusǝu.”

¹³ Anggo ka kara aɓea amǝturonjar pas sulǝ nǝ kuli aban mǝturonjar mana yiu a dǝmbe ka. À kǝ ɓwangsǝ Ɓakuli à kǝ na ama:

¹⁴ “Nokiban aban Ɓakuli akano a kuli, sǝ a ɓanza ka dorǝpwala aban aɓwana mǝnana à kǝ pwasǝ ɓabumi ka!”

¹⁵ Lang amǝturonjar nyingŋǝnia à nyarǝna à umna kuli ka, ayalgir mǝno nea rǝia ama, “Wu fani sǝm nǝ̀ ká a Betalami, sǝm nǝ̀ ngga sǝn mǝnia yì gir mana kumban, mǝnana Mǝtalabangŋo na sǝm ce ka.”

¹⁶ Pǝlǝa à lo a kaurǝa à kya kum Maryamu andǝ Yisǝfu sǝ bangna-muna aban nongŋo aɓa kpamgbang-girlina mala agirkusǝu.

¹⁷ Lang à sǝnǝni ka, pǝlǝa à mesǝ cau mǝnana mǝturonjar banggia wia amur mǝnia yì muna ka.

¹⁸ Aɓwana kat mǝnana à ok ka à ndali nǝ cau mǝnana ayalgir banggia wia ka.

¹⁹ Sǝ Maryamu ka bwal amǝnia yì acau, kǝ ɗenyi amuria nǝ ɓabumi.

²⁰ Ayalgir nyare à kǝ gusǝlǝ Ɓakuli, à kǝ ɓwangsǝki ace agir mǝnana kat à o sǝ à sǝni, kǝla mǝnana à banggia wia ka.

À tsǝki Yesu lullǝu sǝ à wari nǝi a Ndàmǝgule mala Ɓakuli

²¹ A tongno-nong-tāruia nongŋo, pwari mǝnana à nǝ̀ kasǝi wi ɓate ka, à tsǝki wi lullǝu ama Yesu, lullǝu mǝnana mǝturonjar pe wi sǝ yi kpa a bum ngge ka.

²² Lang apwari mala lak rǝia aɓa ɓoarnsari a ɓadǝm Ɓakuli yi lumsǝna, kǝla mǝnana Nggurcau mala Musa na ka, Yisǝfu andǝ Maryamu twal Yesu à um nǝi a Urǝshalima ace mǝnana ɓǝa kyan nǝi a ɓadǝm Mǝtalabangŋo ka.

²³ Nggurcau mala Mǝtalabangŋo na ama, “Koya muna-dǝmbǝa mǝnana muna-ɓwabura na ka, à nǝ̀ ká nǝi ɓǝ̀ duk mala Mǝtalabangŋo.”

²⁴ À wari gbal ace pàɓoro nǝ gir'nkila kǝla mǝnana Nggurcau mala Mǝtalabangŋo bangŋa ama ɓǝa pà ka: “akutu ɓari, ko amuna-kutumurǝm ɓari.”

²⁵ A baku mǝno ka ɓeɓwa nakam nǝ do a Urǝshalima lullǝi ama Shimiyan. Yì ka, mǝ ɓealɓoarna, mǝ ɓanggi Ɓakuli na. Nda ban kundǝ amsǝban mala amǝ Isǝrayila, sǝ Bangŋo Mǝfele na amuri

²⁶ Bangŋo Mǝfele lǝmndǝni wi ama pà nǝ̀ wu ɗang, she ɓǝ̀ sǝnǝna Kǝrǝsti Mǝ'amsǝban mǝnana Mǝtalabangŋo turi ka.

²⁷ Bangŋo mala Ɓakuli loasǝi wari nǝi a Ndàmǝgule mala Ɓakuli. Maryamu andǝ Yisǝfu yiu nǝ Yesu a Ndàmǝgule mala Ɓakuli, ace mǝnana ɓǝa pakki wi gir mǝnana Nggurcau mala Musa kani ka.

²⁸ Shimiyan yi ak muna a bui sǝ ɓwangsǝ Ɓakuli na ama:

²⁹ “A dyan ngga we Mǝtalabangŋo mǝnana a Karban kat ka, nying guro mo ɓǝ̀ o aɓa rǝpwala, kǝla mana a bang ngga.

³⁰ Acemǝnana amǝsǝam sǝnǝna amsǝban mo,

³¹ mana a gilǝkice a ɓamǝsǝ aɓwana mala anzali kat ka.

³² Tǎlaban na ace mǝn mǝsǝ aɓwana mala acili anzali, sǝ aban aɓwana mo amǝ Isǝrayila ka gulo na.”

³³ Tár muna andǝ ngge ka à ndali nǝ cau mǝnana à bangŋa amuri ka.

³⁴ Pǝlǝa Shimiyan tsǝkia wia bu sǝ ne ngge Maryamu ama, “Kwaki kiro pepe: Mǝnia yì Muna ka Ɓakuli tsǝngŋǝni ama nǝ̀ duk tǝr kpa andǝ lo mala ɓwapǝndǝa pas a Isǝrayila. Yì ka, nǝ̀ duk gir'lǝmndǝa mǝnana pur nǝ ban Ɓakuli, mǝnana aɓwana pas nǝ̀ na mǝɓane amuri ka.

³⁵ Nǝ̀ pusǝta ɗenyicau ɓabum mala aɓwana pas. Sǝ we ka, kpakpak mǝkwanbanì mǝnana aɓwana nǝ̀ pakki wi ka nǝ̀ soa ɓabumo kǝla soaban mala nggeabyau.”

Anna bangcau amur muna

³⁶ Ɓe ɓwagula mǝɓangna mala Ɓakuli nakam gbal lullǝi ama, Anna, muna mala Fanuwel, a tau mala Asha. Anzǝm isǝban ngga, à do andǝ burri pǝlǝa tongno-nong-ɓari sǝ burri wu.

³⁷ Anggo sǝ do man-lú apǝlǝa lumi-tongno-nong-tārú nǝ mǝsǝì ine. Gapiyi tarǝia andǝ Ndàmǝgule mala Ɓakuli ɗang, du andǝ pwari nda aban peri aban Ɓakuli nǝ gilmur andǝ hiwi.

³⁸ Yiu yi karǝ nǝ mǝnia yì gir ka, pǝlǝa kutia pakki Ɓakuli yàwá andǝ bangcau amur muna aban aɓwana mǝnana à kǝ kundǝ akmúrú mala Urǝshalima ka.

Yisǝfu andǝ Maryamu nyare a la malea a Nazarat

³⁹ Lang Yisǝfu andǝ Maryamu malǝna gir mǝnana kat Nggurcau mala Mǝtalabangŋo kani ka, à nyare a nzali Galili, a la malea a Nazarat.

⁴⁰ Muna gulo, kum rǝcandǝa, lumsǝ nǝ sǝlǝe, ɗǝm ngga ɓwamuru mala Ɓakuli na amuri.

Yesu, a muntulo aɓa Ndàmǝgule mala Ɓakuli

⁴¹ Koya pǝlǝa nani ka tar Yesu andǝ ngge kǝ̀ o a Urǝshalima ace Lamsan Yalimuru.

⁴² Lang Yesu lumsǝna apǝlǝa lum-nong-ɓari ka à wario a Lamsan Yalimuru, kǝla mǝnana à pakkiyi ka.

⁴³ Lang Lamsan Yalimuru malǝna sǝ tarrí andǝ ngge na aban nyare à nǝ̀ o a la ka, Muna yì Yesu ka akrǝi a Urǝshalima, sǝ yia ka à sǝlǝ ɗang.

⁴⁴ À twali ama nda aɓalǝ acilia aɓwana mǝnana à twal gya andǝia ka, nda à gya aban o ba pwari kpana. Nǝ nzǝmo ka à tita alte aban aɓǝla malea andǝ agyajam.

⁴⁵ Lang à sǝni raka, à nyare a kusǝia aban ká Urǝshalima à nǝ̀ ngga sǝnbani.

⁴⁶ Anzǝm nongŋo tārú ka à kya kumi a Ndàmǝgule mala Ɓakuli aban do ata amǝkanigir, nda rǝ kwaki kiri aban oea, sǝ kǝ ɗikia acau.

⁴⁷ Ɓwa man kat oe ka, ndali kǝrkǝr nǝ sǝlǝgir male andǝ acau mǝnana kǝ nyesǝia wia aɓa pa eare ka.

⁴⁸ Lang a tarrí andǝ ngge sǝni ka, à ndali. Sǝ ngge ɗi ama, “Munem, palang sǝ a pakka sǝm ani? Mim sǝnǝ tarró sǝm came arǝ alto nǝ rǝɓǝla.”

⁴⁹ Yesu ɗia ama, “Ace mana sǝ wu altam? Wu sǝlǝ mbak ama dumǝnam púp mǝ pa a ɓala mala Tárram a kun turo male?”

⁵⁰ Sǝ yia ka à bwalta mǝnia yì cau nea wia ka ɗang.

⁵¹ Pǝlǝa lo atea à nyare aban o a Nazarat. Kǝ okia wia. Sǝ ngge ka bwal amǝnia yì acau ka a ɓabumi.

⁵² Yesu gulo aɓa sǝlǝe andǝ nggunrǝu, nǝ earmuru aban Ɓakuli, andǝ aɓwana.