Luka 19 - Maləmce Məfele mala Ɓakuli: Kurcau MəbəsheZaka kum sǝn Yesu 1 Yesu ara aɓa nggeala Jeriko, ndaban kuti a ɓalǝi. 2 Ɓe ɓwa nakam lullǝi ama Zaka, ɓwamǝgule mala amǝcemi na sǝ yì ka, mǝkume na. 3 Yì ka, ɓariki nǝ̀ sǝni ko yana nda Yesu. Ɓwabunda na kam pas mǝnana yia gbal ka à kǝ̀ earce sǝn Yesu ka. Sǝ yi Zaka, acemǝnana nkpandal na ka, gandǝ sǝnban aɓa ɓwabunda ɗang. 4 Pǝlǝa ɓangŋa, ak dǝmbǝa, kya eauwe a nggun vwari nǝ̀ sǝni, acemǝnana àkǝ̀ banì sǝ Yesu nǝ̀ pǝlǝa. 5 Lang Yesu yi bwalǝna banì ka, loasǝ mǝsǝì a kuli sǝ ne wi ama, “Zaka, fa rǝo sulǝi nggun! Yalung ngga, she mǝ nǝ sulǝ a ɓala mo.” 6 Pǝlǝa sulǝo a kaurǝa gingsǝ Yesu nǝ bumpwasǝa. 7 Ɓwapǝndǝa mǝnana kat sǝn mǝnia ka, tita nggwani ama, “Ɓwabura man ngga kya sulǝna a ɓala mala mǝ'cauɓikea!” 8 Zaka pǝlǝa lo sǝ ne Mǝtalabangŋo ama, “Mǝtalabangŋo, sǝni, mǝ nǝ gau girkuma mem aɓalǝu, mǝ nǝ pe amǝtǝr kāmbe mwashat, sǝ ɓǝ̀ ǝn mbǝrina kǝɓwa ka, mǝ nǝ nyesǝi ɓwe gir nî kusǝ ine.” 9 Pǝlǝa Yesu ne wi ama, “Yalung ngga amsǝban yina a ɓala mǝnia ka, acemǝnana mǝnia yì ɓwa gbal ka mǝ'kà Ibǝrayim na. 10 Muna mala Ɓwa ka, yiu àkǝ̀ ce alta gir mǝnana ɓwàr ka, nǝ̀ amsǝi.” Kanicau arǝ pak turo nǝ boalo ( Matiu 25:14-30 ) 11 Lang à nǝ̀ nggǝ kwaki kiria arǝ mǝnia yì acau ka, Yesu lidǝmbǝa nǝ nea wia ɓe kanicau, acemǝnana anggo ka à gbashina ban Urǝshalima, sǝ à kǝ sǝni kǝla Domurǝm mala Ɓakuli ka ndo nǝ̀ yiu àkǝ̀ dyadyan mǝno ka. 12 Pǝlǝa na ama: Ɓe mǝtaumurǝm wario a ɓe nzali mǝsauwe nǝ̀ ngga ak garamurǝm, sǝ nǝ̀ nyare. 13 Kaniama nǝ̀ o ka tunǝ ata amǝturo male lum, gakia wia mǝsǝboalo zǝnariya luru lum sǝ nea wia ama, “Boalo mǝnia ka wu kǝ nggaliki nǝi, she ɓǝn nyarǝna ka.” 14 Sǝ aɓwana male ka à ɓinǝi, pǝlǝa à tasǝ aɓea aɓwana ate ɓǝa kya na ama, “Sǝm earce mǝnia yì ɓwa ka ɓǝ̀ duk murǝm ma'sǝm ɗang.” 15 Kat andǝ amani ka, mǝnia yì ɓwa ka à kya pe wi garamurǝm, sǝ nyare a kusǝì yiu. Pǝlǝa turban ata amǝ'turo-ɓala mǝnana pākia wia boalo ka, acemǝnana nǝ̀ surǝ gir mana à kum aɓa nggaliki ka. 16 Mǝdǝmbǝa yiu yi na ama, “Ɓwamǝgule, luru mǝsǝboalo mo ka, ǝn kumǝna luru lum amuri.” 17 Pǝlǝa mǝtala-ɓala male ne wi ama, “Yàwá, mǝturo mem mǝɓoarne! Acemǝnana a lǝmndǝ mǝsǝcau amur mǝnia bǝti ka, a nǝ duk mǝla amur anggea-là lum.” 18 Ɓaria ɓwa yiu yi na ama, “Ɓwamǝgule, luru mǝsǝboalo mo ka, ǝn kumǝna luru tongno amuri.” 19 Mǝtala-ɓala male ne wi ama, “We ka, a nǝ bwal anggea-là tongno.” 20 Pǝlǝa ɓe guro yiu yi na ama, “Ɓwamǝgule, luru mǝsǝboalo mo nia ka, ǝn karrì aɓa bugir ǝn sǝmbǝrǝi pepe. 21 Ɓangciu pakkam a rǝo, acemǝnana cau mo kwano na ɗang. A kǝ twalgir mǝnana a wu nǝ̀ tsǝk raka, a kǝ wal gir mǝnana a wu nǝ̀ ɓeal raka.” 22 Mǝtala-ɓala male eari wi ama, “Mǝ nǝ kùrro nǝ acau mǝnana à pur a kuno ka, we mǝturo-ɓala mǝɓealɓike! A sǝlǝna she ama cau mem kwano na ɗang, ǝn nggǝ twal gir mǝnana mǝ nǝ tsǝk raka, sǝ ǝn nggǝ pwan agir mǝnana mǝ nǝ ɓeal raka? 23 Sǝ palang sǝ a ɓinǝ ká tsǝkam boalo mem a banki, ace mǝnana ɓǝn nyare yiu ka, mǝ nǝ yia é nǝ mur amuri?” 24 Pǝlǝa nea aɓwana mana à came abanì ka ama, “Wu ak luru mǝsǝboalo mǝnana a bui ka, wu pe ɓwa mǝnana ndanǝ luru lum ngga.” 25 Sǝ à ne wi ama, “Ɓwamǝgule, yì ka, ndanǝ male yì luru lum mala mǝsǝboalo zǝnariya!” 26 Pǝlǝa eare ama, “Ən nggǝ na wun ama, ɓwa mǝnana ndanǝi ka, à nǝ̀ tsǝki ɓi amuri, sǝ ɓwa mǝnana pa nǝi raka, nggearǝ mǝno bǝti a bui ka à nǝ̀ é a rǝì. 27 Sǝ amǝno yì amǝɓinǝ muram mǝnana à ear ama mǝ duk murǝm amuria raka, wu yinǝia kani, wu yi wal-luia a ɓadǝmbǝam!” Aɓwana zǝkice kutio mala Yesu a Urǝshalima ( Matiu 21:1-11 ; Markus 11:1-11 ; Yohana 12:12-19 ) 28 Anzǝm mana Yesu bangŋǝna mǝnia yì acau ka, pǝlǝa dupia wia a dǝmbǝa aban ká a Urǝshalima. 29 Lang gbashina Betafaji andǝ Betani aban nkono Olif ka, pǝlǝa tasǝ aɓea alaggana male ɓari. 30 Nea wia ama, “Wu kya a muna-la mǝnana a dǝm wun ngga. Kutio ma'wun ngga wu nǝ̀ kum mǝndambǝritso à kùrni, mǝnana kǝɓwa malaká eauwe a nzǝmi raka. Wu panzǝi, wu yinǝi. 31 Ɓǝ̀ kǝɓwa ɗi wun ama ace mana sǝ wu kǝ panzǝi le ka, wu nǝ̀ ne wi ama Ɓwamǝgule ma'sǝm kǝ earce.” 32 Yia mǝnana à turia ka à wario à kya kumi kǝla mǝnana Yesu nea wia ka. 33 À ndarǝ panzǝ mǝndambǝritso ka, amǝtale ɗia ama, “Ace mana sǝ wu kǝ panzǝ mǝndambǝritso?” 34 À eare ama, “Mǝtalabangŋo kǝ earce.” 35 À yiu nǝ mǝndambǝritso aban Yesu. À makki agir-koarǝu malea a nzǝmi, pǝlǝa à eamsǝ Yesu amuri. 36 Nda ban o ka, ɓwapǝndǝa sarǝki agir-koarǝu malea amur njargula. 37 Lang yi bwalǝna ban mǝnana njargula dili kam aban ká Nkono Olif ka, bundo mala amǝkpate mǝnia ka, à tita loasǝ gia nǝ bumpwasǝa aban ɓwangsǝki Ɓakuli, ace agir-ndǝlǝki mǝnana à sǝn ngga. 38 À kǝ bangŋa ama, “Ɓwangsǝban ɓǝ pa aban murǝm mǝnana kǝ yiu aɓa lullǝ Mǝtalabangŋo ka!” “Dorǝpwala na kam a kuli sǝ gulo ka aban Ɓakuli!” 39 Aɓea amǝ Farisi mǝnana aɓa ɓwabunda ka à ne Yesu ama, “Malǝm, sà arǝ alaggana mo ɓǝa pwalo!” 40 Yesu nea wia ama, “Ən nggǝ bangga wun, ɓǝà duk ɗǝong ngga, atali nǝ akia wia ɓwangsǝkiban.” Yesu ɓua ace Urǝshalima 41 Lang Yesu yi gbashina Urǝshalima mǝsǝì nǝ̀ kpa a rǝì ka, kara túr kuni a ɓua ace, 42 na ama, “Eare mem ngga, we Urǝshalima, yalung ngga a surǝna rǝ gir mǝnana nǝ̀ yipo nǝ dorǝpwala ka. Sǝ ado ka à sǝmbǝrǝni, mǝsǝo pà nǝ̀ gandǝ sǝne ɗang. 43 Aɓea pwari na à kǝ yiu ka, mǝnana aɓeo amǝbura nǝ̀ yia ɓak nggea zǝ̀kì mǝcande, à nǝ̀ gumbǝlio aɓalǝu, sǝ à nǝ̀ gìr a muro a ko ya bui ka. 44 À nǝ̀ yia arkio, à nǝ̀ sukkio a nzali, we wunǝ aɓwana mǝnana a ɓalǝo ka. À pà nǝ̀ ɗeki kǝ tali aban came amur ɓe ɗang, acemǝnana a surǝ pwari mǝnana Ɓakuli yiu nǝi ace amsǝo ka ɗang.” 45 Pǝlǝa Yesu kutio, pǝr amǝkurkuro a Ndàmǝgule mala Ɓakuli. 46 Nea wia ama, “À gilǝni ama, ‘Ɓala mem ngga nǝ̀ duk ɓala hiwi’; ‘sǝ wun ngga wu nyesǝi duk npu mala amǝ'ɓǝmbǝriban!’ ” 47 Ko aya pwari ka Yesu na aban kanigir aɓa Ndàmǝgule mala Ɓakuli. Agbani Pǝris andǝ amalǝm Nggurcau mala Musa sǝ akapana mǝnana aɓa ɓwapǝndǝa ka, à kǝ alte à nǝ̀ wal-lui. 48 Sǝ à kumbi ban ɗang, acemǝnana acau male pwan ɗenyicau mala ɓwapǝndǝa kat. |
© Wycliffe Bible Translators, Inc. and © The Nigeria Bible Translation Trust 2016
Nigeria Bible Translation Trust