Luka 18 - Maləmce Məfele mala Ɓakuli: Kurcau Məbəshe

Kanicau arǝ hiwi

¹ Yesu ne alaggana male ɓe kǝ kanicau mǝnana nǝ̀ lǝmndǝ ama yia ka ɓǝa kǝ pak hiwi cala rǝia wuki ɗang.

² Na ama: Aɓe kǝ la, ɓe murǝm-ɓashi nakam mǝnana kǝ ɓanggi Ɓakuli ɗang, sǝ kǝgir oasǝi arǝ kǝɓwa raka.

³ Sǝ ɓe man-lú nakam àkǝ̀ le, mǝnana camarǝ nyarke aban mǝɓashi nǝ ɓua ama, “Kutio anre sǝm sǝnǝ mǝɓinǝ muram.”

⁴ Ata dǝmbe ka gine. Nǝ nzǝmo ka ne ɓamuri ama, “Ko kat andǝ amani ama ǝn nggǝ ɓanggi Ɓakuli ɗang, sǝ kǝgir oasǝkiam arǝ kǝɓwa raka,

⁵ mǝ nǝ pak ɓashi mǝ'mǝsǝcau nì ace mǝnia yì man-lú mǝnana kùrram mwacang ngga. Acemǝnana ɓǝn pak raka, nǝ̀ yauwam nǝ nyarke male tutu abanam!”

⁶ Pǝlǝa Yesu Mǝtalabangŋo na ama: Wu ok cau mǝnana murǝm-ɓashi mǝ'ɗwanyi mǝsǝcau man na ka!

⁷ Wu kǝ sǝni kǝla Ɓakuli ka pà nǝ̀ pak ɓashi mǝ'mǝsǝcau nì ace aɓwana male mǝnana tària, mǝnana à kǝ ɓua a ɓadǝmbǝi, du andǝ pwari ka re? Nǝ̀ dǝndi arǝ bwalia wia kam le?

⁸ Ən nggǝ na wun ama, nǝ̀ pea wia gir mǝnana malea na ka a kaurǝa. Sǝa ma ɓǝ̀ Muna Mala Ɓwa yiu ka, nǝ̀ yia kum paɓamuru a ɓanza le?

Kanicau arǝ ɓwa Farisi andǝ mǝcemi

⁹ Yesu na mǝnia yì kanicau ka arǝ aɓwana mǝnana à twali ɓamuria ama yia ka à ndaka amǝ'cauɓoarna, sǝ à ɓǝsǝki acili aɓwana à nyesǝia amǝ'cauɓikea na ka, ama:

¹⁰ Aɓwana ɓari à wario a Ndàmǝgule mala Ɓakuli ace pak hiwi. Mwashat ka ɓwa Farisi na, sǝ ɓe ka mǝcemi na.

¹¹ Pǝlǝa ɓwa Farisi lo came pak hiwi amur ɓamuri. Na ama, “Ɓakuli, ǝn pakko yàwá, acemǝnana mǝ nda mǝ'cauɓikea kǝla acili aɓwana ɗang. Ən pa kǝla amǝ'ɓǝmbǝriban, amǝ ɗwanyi do amur mǝsǝcau, amǝ'nongginǝban a nza mala doɓala, ko kǝla mǝnia yì mǝcemi ka ɗang.

¹² Ən nggǝ gilmur kusǝ ɓari a nre-limo mwashat, sǝ ǝn nggǝ pe Ɓakuli kāmbe mwashat aɓa lum mala koya girkuma mem.”

¹³ Sǝ mala mǝcemi ka cam kuko. Eare ama nǝ̀ loasǝ muri a kuli ɗang, wal kikili na ama, “Ɓakuli, sǝn mǝsǝswatǝr mem, mim ngga mǝ nda mǝ'cauɓikea!”

¹⁴ Ən nggǝ na wun ama, mǝnia yì ɓwa ka, nyare aban o ɓala male ka, mǝ'cauɓoarna na a ɓadǝm Ɓakuli, pa kǝla mala ɓwa Farisi ɗang. Acemǝnana koyana sǝ kǝ twalɓamuri ka, à nǝ̀ kyauwiki, sǝ ɓwa mǝnana kǝ nongsǝ ɓamuri ka, à nǝ̀ gusǝlǝi.

Yesu tsǝkbu amur amuna

¹⁵ Ɓwapǝndǝa na arǝ yiu nǝ amuna aban Yesu ama ɓǝ̀ yi tsǝkia wia bu. Alaggana male sǝni anggo ka, à lo à sà a rǝia.

¹⁶ Sǝ Yesu ka tunǝ amuna abani oaso na ama, “Wu ɗeki amuna ɓǝa yiu abanam, wu kǝa pǝrkia ɗang, acemǝnana Domurǝm mala Ɓakuli ka nda ace a ulang amǝnia ka.

¹⁷ Ən nggǝ na wun mǝsǝcau ama koyana sǝ pà nǝ̀ ak Domurǝm mala Ɓakuli kǝla muna mǝkyauwe raka, pà nǝ̀ gandǝ kuti kam ɗang.”

Ɓe ɓwamǝgule mala amǝ Yahudi mǝkume

¹⁸ Ɓe ɓwamǝgule mala amǝ Yahudi mǝkume ɗi ama, “Malǝm mǝɓoarne, mana gir ni na mǝ nǝ pa sǝ mǝ nǝ kum yilǝmu mǝnana málá male pà kàm raka?”

¹⁹ Yesu eari wi ama, “A bangŋa ama mǝ nda ɓwa mǝɓoarne? Kǝ ɓwapǝndǝa pà kàm mǝɓoarne na ɗang, she Ɓakuli nǝmurǝì.

²⁰ We ka, à surǝna rǝ anzongcau mala Ɓakuli mǝnana ama: ‘Kǝa kuti aɓa cauɓikea nongnǝban a nza nǝ doɓala ɗang, kǝa wal-lú ɗang, kǝa iun'i ɗang, kǝa ɓun-nyir amur ɓwa ɗang, pe tárro andǝ nggo gulo.’ ”

²¹ Pǝlǝa ɓwe na ama, “Amǝnia ka, yale mǝ nda muntulo sǝ ǝn bwalia.”

²² Lang Yesu ok mǝnia ka, ne wi ama, “Ɓe gir mwashat na a ɗwanyi ka. Maki agir mǝnana kat a ndanǝia ka, gaki amǝtǝr, a wu nǝ kum gǝna a kuli, sǝ wu yiu, wu yi kpatam.”

²³ Lang nǝ̀ o ana ka bumi kiɗiki, acemǝnana yì ka, mǝkume na kǝrkǝr.

²⁴ Yesu sǝni kyap-kyap, sǝ na ama, “Nǝ̀ kwano sǝ mǝgǝna nǝ̀ kutio a Domurǝm mala Ɓakuli!

²⁵ Ɓafo ka, kutio mala mǝgǝna a Domurǝm mala Ɓakuli ka kwano kuti kutio mala kalakadambi a tǝta nlerǝman.”

²⁶ Aɓwana mǝnana à ok mǝnia ka à ɗiban ama, “Sǝ yana ado nǝ̀ auwa?”

²⁷ Yesu eare ama, “Gir mǝnana pà nǝ̀ gandǝ pa aban ɓwapǝndǝa raka, nǝ̀ gandǝ pa aban Ɓakuli.”

²⁸ Pǝlǝa Bitǝrus ne wi ama, “Sǝni, sǝm nyingŋǝna agirkuma ma'sǝm kat sǝm yiu a kpato!”

²⁹ Yesu nea wia ama, “Ən nggǝ na wun mǝsǝcau, kǝɓwa pà kàm mǝnana ɗeki ɓala, ko mɓwama, ko amǝ'eambu, ko tarrû andǝ nggeau, ko amuna ace Domurǝm mala Ɓakuli,

³⁰ sǝ nǝ̀ ɗwanyi kum agir kǝrkǝr a nza mǝnia ka. Sǝ ɗǝm ngga a nza mǝno kǝ yiu ka, nǝ̀ kum yilǝmu mǝnana málá male pà kàm raka.”

Yesu nyare na cau amur lú male

³¹ Yesu tunǝ alaggana male, aman lum-nong-ɓari ka a giriban, sǝ nea wia ama: Wu sǝni sǝm ndo sǝm nǝ̀ ká a Urǝshalima, sǝ agir mǝnana kat amǝ'ɓangna mala Ɓakuli gilǝì amur Muna Mala Ɓwa ka à nǝ̀ lumsǝo.

³² À nǝ̀ nyesǝi à nǝ̀ pea aɓwana mǝnana amǝ Yahudi na raka, à nǝ̀ oali, oalban zalǝkiban, à nǝ̀ sanggì, à nǝ̀ tapi wi ntara, à nǝ̀ kwe, sǝ à nǝ̀ wali nǝ̀ wu,

³³ sǝ a tāruia nongŋo ka, nǝ̀ loapi ɓembe.

³⁴ Sǝ ko alaggana male bwalta kǝgir aɓa mǝnia yì acau ka ɗang. À sǝmbǝrǝia wia ɓālǝi, ko à surǝ gir mǝnana kǝ na cau amuri ka ɗang.

Yesu mǝn mǝsǝ nte mǝzǝmnggi agir nì

³⁵ Yesu gbashina Jeriko ka, ɓe nte nakam aban do a girǝi njargula aban zǝmnggi agir.

³⁶ Lang nǝ̀ ok gǝshi ɓwabunda mǝnana kǝ kuti ka, ɗiban ama, mana kumban le?

³⁷ À pǝlǝa à ne wi ama, “Yesu ɓwa Nazarat na kǝ kuti ka.”

³⁸ Pǝlǝa tunǝban bang-bang ama, “Yesu! Muna mala Dauda! Sǝn mǝsǝswatǝr mem!”

³⁹ Aɓwana mǝnana à ak dǝmbǝa ka à sà a rǝì ɓwam, ama ɓǝ̀ duk kuni ɗǝong. Sǝ yì ka, kara loasǝ gi kpǝm ama, “Muna Mala Dauda, sǝn mǝsǝswatǝr mem!”

⁴⁰ Yesu go kusǝì came, sǝ na ama, ɓǝa yinǝi abani. Lang yina abani tu ka, Yesu ɗi ama,

⁴¹ “Mana a earce mǝ pakko?” Pǝlǝa nte man eare ama, “Mǝtalabangŋo, ǝn nggǝ earce sǝnban.”

⁴² Yesu ne wi ama, “Kum sǝnban! Paɓamuru mo amsǝno.”

⁴³ Àkǝ̀ banì gbal kara kum sǝnban, sǝ kpa ata Yesu aban o, kǝ ɓwangsǝki Ɓakuli. Lang ɓwapǝndǝa mǝnana kat sǝni ka, yia gbal ka à ɓwangsǝ Ɓakuli.