Filimon 1 - Maləmce Məfele mala Ɓakuli: Kurcau Məbəshe

Makkun nǝ ban Bulǝs

¹ Cautera mǝnia ka pur nǝban Bulǝs, ɓwa mǝnana ndǎ a ndàkurban ace hamnǝ Cau Amsǝban mala Kǝrǝsti Yesu ka, andǝ mǝ'eam sǝm Timoti. Mǝ nda ban gilǝì Filimon, gyajam ma'sǝm andǝ ɓi sǝm mǝturo,

² andǝ mǝ'nggaula sǝm Afiya, andǝ Arkipus ɓi sǝm soje, andǝ ikǝlisiya mǝnana kǝ kpapi a ɓala mo ka.

³ Ɓǝ̀ Ɓakuli Tar sǝm andǝ Mǝtalabangŋo Yesu Kǝrǝsti pa wun ɓwamuru andǝ dorǝpwala.

Yàwá andǝ hiwi mala Bulǝs

⁴ Ɓǝ̀ aya pwari mǝ nǝ pak hiwi ka, ǝn nggǝ pakki Ɓakuli mem yàwá aceo.

⁵ Acemǝnana ǝn nggǝ ok ce paɓamuru mo arǝ Mǝtalabangŋo Yesu andǝ earcearǝu mo arǝ aɓwana mala Ɓakuli kat.

⁶ Hiwi mem ngga nda mǝnana ama dotarǝu ma'sǝm sǝnǝ we kǝla amǝkwaɗi ka nǝ̀ yinǝ bwaltagir mǝlime mala koya gir mǝɓoarne mǝnana sǝm ndanǝi a do ma'sǝm aɓa kpapi ma'sǝm sǝnǝa Kǝrǝsti ka.

⁷ Earcearǝu mo panam banɓoarnado kǝrkǝr andǝ girikiban, mǝ'eambǝam, acemǝnana pe mǝɓoarne mo yina nǝ bumpwasǝa aban aɓwana mala Ɓakuli kat.

Bulǝs zǝmbǝa amur Onisǝmu

⁸ Nda gir mǝnana tsǝa sǝ mǝ ndanǝ ɓabumcandǝa, kǝla mǝ'eambǝo aɓa Kǝrǝsti, mǝnana mǝ nǝ cio wu pak gir mǝnana ɓoaro wu pe ka.

⁹ Kat andǝ amani ka, mǝ nda rǝ zǝmbǝo ace earcearǝu, mim Bulǝs, mǝnana ǝn ena, sǝ ɗǝm adyan ngga mǝ nda kuro ace Kǝrǝsti Yesu ka.

¹⁰ Mǝ ndarǝ zǝmbǝo, wu sǝn mǝsǝswatǝr mala munem Onisǝmu. Ən duk tarrí aɓa bangŋo akani aɓa ndàkurban.

¹¹ Ɗiɗyal ka, ɓwa mǝɓane na abano, sǝ adyan ngga, dumǝna ɓwa mǝɓoarne aban sǝm kǝm.

¹² Mǝ nda aban tasǝ te, ɓǝ̀ nyare abano adyan. Ká male ka, ɓabumam na ate.

¹³ A eare mem ngga, mǝ nǝ bwali akani abanam ɓǝ̀ dupam gbasha a kunio, aɓa kùrban mǝnia mǝ ndakam ace hamnǝ Cau Amsǝban ngga.

¹⁴ Sǝ ǝn earce pak kǝgir mǝnana pa a tarǝia andǝ eare mo raka ɗang, ace mǝnana pe mǝɓoarne mo, ɓǝ̀ pur nǝ ɓabumo, ɓǝ̀ kǝa do ama à cio pup ɗang.

¹⁵ Pa kǝla Onisǝmu ka, a ɗwanyibanì aɓalǝ anonggeo bǝti, ace mǝnana a nǝ ngga kumi ɗǝm gauwa pa kàm raka.

¹⁶ A dyan ngga, yì ka, pa kǝla guro ɗǝm ɗang. Kutini bancame mala guro. Abanam ngga, mǝ'eamrǝarǝu na mǝnana ǝn earkiyi ace raka, sǝ abano ado ka nǝ̀ kuti mǝno, dumǝna kǝla ɓwa sǝ kǝla mǝ'eamrǝarǝu aɓa dotarǝu sǝnǝa Mǝtalabangŋo.

¹⁷ Ace mani ka, ɓǝ̀ a twalam kǝla ɓio mǝturo ka, e, kǝla mǝnana a nǝ em ngga.

¹⁸ Ɓǝ̀ pangŋǝno mǝɓane aɓa kǝ njar, ko a kǝ kpate tangna ka, ɗi ce a buam.

¹⁹ Mim Bulǝs ka, mǝ nǝ̀ gilǝkiyi mǝnia yì cau ka nǝ buam. Mǝ nǝ mbweo, yale ɓǝa kǝa bang cau mala yilǝmio mǝnana ǝn nggǝ kpato tangne ka ɗang.

²⁰ E, mǝ'eambǝam, ǝn nggǝ zǝmbǝo, lǝmndǝam mǝnia yì earmuru ka, ace Mǝtalabangŋo; kǝla mǝ'eambǝu aɓa Kǝrǝsti ka, ciem ɓabumam ɓǝ̀ nongŋo.

²¹ Acemǝnana ǝn earǝna nǝ okiru mo ka, ǝn nggǝ gilǝo, nǝ sǝlǝe ama gir mǝnana ǝn ɗikiyice abano ka, a nǝ pak mǝnana kuti ka.

²² Cau mwashat ɗǝm ngga, ida, gilǝki ban-sulǝo acem, acemǝnana mǝ ndanǝ tsǝkɓalǝu ama Ɓakuli nǝ̀ ak ahiwi ma'wun, sǝ à nǝ̀ panzǝam mǝ nyare aban wun, banì pà nǝ̀ sau ɗang.

Masǝlǝata makkun mala Bulǝs

²³ Abafǝras, ɓiam pursǝna aɓa Kǝrǝsti Yesu, kǝ turban nǝ makkun male.

²⁴ Sǝ anggo gbal, sǝ Markus, andǝ Aristakus, andǝ Dimas andǝ Luka, aɓeam amǝturo.

²⁵ Ɓǝ̀ ɓwamuru mala Mǝtalabangŋo Yesu Kǝrǝsti do ata wun kat.