Amǝ Roma 6 - Maləmce Məfele mala Ɓakuli: Kurcau Məbəshe

Wuki cauɓikea andǝ do nǝ yilǝmu aɓa Yesu Kǝrǝsti

¹ Mana ɗǝm sǝm nǝ̀ na? Sǝm nǝ̀ lidǝmbǝa aɓa cauɓikea, ace mǝnana ɓǝ̀ ɓwamuru ɓǝ̀ gul ka le?

² Awo! Ɓakuli twalbani! Lang sǝ sǝm mǝnana sǝm angŋa dǝmbǝa sǝm wunî cauɓikea ka, sǝm nǝ̀ lidǝmbǝa nǝ do ɗǝm a ɓalǝi le?

³ Wu sǝlǝ mbak ama batisǝma mǝnana à pakka sǝm aɓa Yesu Kǝrǝsti ka, lǝmndǝ ama sǝm dumǝna mwashat sǝnǝia, aɓa lú male?

⁴ Sǝm ngga, sǝm wú, sǝ à tsǝk sǝm a ɓembe sǝnǝa Kǝrǝsti nǝ batisǝma mǝnana à pakka sǝm ngga. Kǝla mǝnana Kǝrǝsti loapi ɓembe nǝ yilǝmu aɓa rǝcandǝa mala Ɓakuli Tárru ka, sǝm gbal ka, sǝm nǝ̀ dukdo bǝsa yilǝmu.

⁵ Sǝ acemǝnana sǝm dumǝna mwashat sǝnǝa Kǝrǝsti aɓa lú male ka, sǝm gbal ka, sǝm nǝ̀ loapi ɓembe nǝ yilǝmu kǝla yì.

⁶ Sǝm sǝlǝna ama, ɓeal sǝm mǝ'e ka, à gballìni amur nggun-gangndi andǝa Kǝrǝsti, ace mǝnana ɓǝ̀ rǝcandǝa mala kpata ɓamur rǝ sǝm mǝ'cauɓike ka ɓǝ̀ kiɗikea, sǝ anggo ka ɓǝ̀ sǝm ngga duk aguro aɓata cauɓikea ɗǝm ɗang.

⁷ Sǝ ɓwa mǝnana wuna andǝa Kǝrǝsti ka, à panzǝni, cauɓikea pa nǝ rǝcandǝa amuri ɗǝm ɗang.

⁸ Sǝ ɓǝ̀ sǝm wuna sǝnǝa Kǝrǝsti ka, sǝm pana eare ama sǝm nǝ̀ dum nǝ yilǝmu sǝnǝia.

⁹ Sǝm sǝlǝna ama acemǝnana Kǝrǝsti ka à loasǝi a ɓembe ka, pa nǝ sǝn lú ɗǝm ɗang; lú panǝ rǝcandǝa amuri ɗǝm ɗang.

¹⁰ Lú male mǝnana wu ka, wuki cauɓikea kusǝ mwashat ɓǝrɓǝr, sǝ do male ka, dupi Ɓakuli.

¹¹ Anggo gbal, wu sǝn ɓamur rǝ wun ado, wu nda ka alú aban cauɓikea, sǝ aban Ɓakuli ka, wu ndanǝ yilǝmu aɓa Kǝrǝsti Yesu.

¹² Wu kǝa eari cauɓikea ɓǝ̀ do amur nggurǝ wun mǝnana kǝ̀ ká nǝ ká a lú ka, ɓǝ̀ tsǝk wun a kpata anpel male ɗang.

¹³ Wu kǝa pà abare nggurǝ wun aban cauɓikea ɓǝa duk agirturo mala ɓealɓikea ɗang. A kun mani ka, wu pe Ɓakuli rǝwun, kǝla aɓwana mǝnana à loasǝnia a lú à kumǝna yilǝmu ka; sǝ wu pà abare wun aban Ɓakuli ɓǝa duk agirturo ace turo cauɓoarna.

¹⁴ Cauɓikea ka pà nǝ̀ duk gbani amur wun ɗang, acemǝnana wu pa ɗǝm aɓata Nggurcau ɗang, wu nda aɓata ɓwamuru mala Ɓakuli.

Aguro mala cauɓoarna

¹⁵ Lang sǝ wu sǝni ado ɗe? Sǝm nǝ̀ lidǝmbǝa nǝ pak cauɓikea, acemǝnana sǝm pa aɓata Nggurcau ɗang, sǝm nda aɓata ɓwamuru mala Ɓakuli ka le? Awo, pà nǝ̀ pak ɗang!

¹⁶ Wu sǝlǝ mbak ama, ɓwa mǝnana wu pa ɓamur rǝ wun, wu kǝ oki wi kǝla aguro ka, wu dumǝna aguro male, ko mala cauɓikea na, mǝnana nǝ̀ kánǝ wun a lú, ko mala okiru mǝnana nǝ̀ kánǝ wun a docauɓoarna ka?

¹⁷ Ɓǝ̀ sǝm pakki Ɓakuli yàwá ama, wun mǝnana ɗiɗyal, wu nda ka aguro mala cauɓikea ka, adyan ngga, wu kpana ata mǝsǝcau mǝnana wu kumi aɓa kanigir ka, nǝ ɓabum wun kat.

¹⁸ Adyan ngga, à panzǝna wun a bu cauɓikea, ado ka, wu dumǝna aguro mala cauɓoarna.

¹⁹ Ən bangga wun cau nǝ kanicau arǝ duk guro aɓa nggūrǝu ata cau mala gattya mala ɗenyicau ma'wun arǝ bwalta agir mala bangŋo. Kǝla mǝnana ɗiɗyal, wu pà ɓamur rǝ wun kǝla aguro, wu lidǝmba nǝ lime aɓa pakki agirɓana andǝ aturo ɓealɓikea ka, anggo gbal ado ka, wu nǝ̀ pà ɓamur rǝ wun kat, wu duk aguro mala cauɓoarna aban ká do mǝfele.

²⁰ Mǝnana ɗiɗyal wu nda ka aguro mala cauɓikea ka, kǝgir oasǝ wun arǝ do cauɓoarna ɗang.

²¹ Sǝ ya gir mǝɓoarne na wu kumo aɓa pakki amǝno yì agir ɗiɗyal, mǝnana adyan ngga à dupa wun agir kǝsǝkya ka? Masǝlǝata mǝno yì agir ka, nda lú!

²² Sǝ ado ka, à panzǝkina wun a bu cauɓikea, wu dumǝna aguro mala Ɓakuli, gir mǝnana wu nǝ̀ kum a ɓalǝi ka nda do mǝfele, sǝ masǝlǝate ka nda yilǝmu mǝnana málá male pà kàm raka.

²³ Tangnakusǝ cauɓikea ka, lú na, sǝ ɓoro mala Ɓakuli ka, nda yilǝmu mǝnana málá male pà kàm raka, nǝ bu Kǝrǝsti Yesu Mǝtala sǝm.