Amǝ Roma 3 - Maləmce Məfele mala Ɓakuli: Kurcau Məbəshe

Ɓakuli ka kǝ nggaɗi ɗang

¹ Nǝ mana sǝ duk ɓwa Yahudi ka kutina ban nǝi le? Ko a na raka, kasǝ-ɓatau ka kǝgir na le?

² E, duk ɓwa Yahudi ka agir mǝɓoarne nakam kpem a ɓalǝi! A tite ka Ɓakuli pea amǝ Yahudi acau male a buia.

³ Mǝsǝcau ka, aɓea ɓwana aɓalǝia ka à kpata cau mala Ɓakuli kǝla mǝnana à bangŋa ama à nǝ̀ pak ka ɗang. Sǝ ɗwanyi kpata cau malea kâ, nggaɗi domǝsǝcau mala Ɓakuli le?

⁴ Ko bǝti! Sǝ ɓǝ̀ koyan ngga mǝ'nyir na ka, Ɓakuli ka mǝ'mǝsǝcau na. Kǝla mǝnana Malǝmce bang ngga: “À nǝ̀ kumo nǝ mǝsǝcau, aɓa cau mana a na ka, sǝ ɓǝa wulio ka, a nǝ li ɓashi.”

⁵ Sǝ ɓǝ̀ ɓealɓikea ma'sǝm kǝ lǝmndǝ cauɓoarna mala Ɓakuli ka, aman sǝ sǝm nǝ̀ na? Sǝm nǝ̀ na ama Ɓakuli pangŋǝna kpak, yì mǝnana ɓǝ̀ so bumlulla male amur sǝm ngga le? (Mǝnia ka nê mala ɓwapǝndǝa na.)

⁶ Ko bǝti! Ɓǝ̀ Ɓakuli ka mǝ'cauɓoarna na raka, palang sǝ nǝ̀ karǝ pakki ɓanza ɓashi?

⁷ Sǝ ɓǝ̀ ɓwa nǝ̀ gandǝ na ɗǝm ama, “Palang sǝ Ɓakuli nǝ̀ ɓasham ama mǝ nda mǝ'cauɓikea, yi mǝnana ɗwanyi na mǝsǝcau mema, lǝmndǝ mǝsǝcau male a banfana, sǝ kárǝì wi ɓoarɓwa mǝgule ka?”

⁸ Pǝlǝa aɓea ɓwana tsǝka sǝm cau, ama sǝm na ama, “Lidǝmbǝa ma'sǝm aɓa cauɓikea ka, nǝ̀ ngga yinǝ gir mǝɓoarne!” Aɓwana mǝnana à na mǝnia yì cau ka, ɓoaro ɓǝa kasǝia wia ɓashi mǝnana karǝ a rǝia ka.

Ɓwapǝndǝa kat ka amǝ cauɓikea na

⁹ Sǝm amǝ Yahudi ado ka, sǝm nǝ̀ ne ɓamur rǝ sǝm ama sǝm kuti acili aɓwana le? Awo, sǝm kutia ɗang ko bǝti! Acemǝnana sǝm angŋǝna dǝmbǝa sǝm lǝmndǝna ama ɓwapǝndǝa kat, amǝ Yahudi andǝ aɓwana mǝnana amǝ Yahudi na raka, à nda aɓata rǝcandǝa mala cauɓikea.

¹⁰ Kǝla mǝnana Malǝmce na ka: “Kǝɓwa pà kàm mana mǝ'cauɓoarna na ka ɗang, ko kǝɓwa mwashat pà kàm ɗang.

¹¹ Kǝɓwa pà kàm nǝ́ sǝlǝe ɗang, kǝɓwa pà kàm mwashat kǝ alta Ɓakuli ɗang.

¹² Yia kat ka à pǝlǝni Ɓakuli nzǝmia; yia kat ka à uena ɓa. Kǝɓwa pà kàm mǝnana kǝ pak gir mǝɓoarne ka ɗang, ko ɓwa mwashat pà kàm ɗang.”

¹³ “Acau malea ka amǝɓike na, kǝla rǝmban mǝnana kǝ puro aɓa ɓembe mana à gìrì raka. Lasǝia ka lumsǝ nǝ nyir.” “Barya mala n'yau kǝ surkio a kunia.”

¹⁴ “Kunia lumsǝ nǝ suban andǝ nggaro-cau.”

¹⁵ “À kǝ̀ kaurǝa aban sukki nkila.

¹⁶ Kiɗiki andǝ bumkpǝmna ka, nda atea a koya ban.

¹⁷ Yia ka à surǝ njar mala dorǝpwala ɗang.”

¹⁸ “À pànǝ ɓangciu mala Ɓakuli ɗang, ko bǝti.”

¹⁹ Sǝm sǝlǝna ama gir mǝnana kat Nggurcau na ka, nda aban ne aɓwana mǝnana à nda aɓata Nggurcau ka, ace mǝnana ɓǝ̀ ɓwa ɓǝ̀ kǝa kum kún nacau ɗang, sǝ ɓanza kat ka à nǝ̀ yinǝi a ɓadǝm ɓashi mala Ɓakuli.

²⁰ Kǝ ɓwa pà kàm nǝ̀ duk mǝ'cauɓoarna a ɓadǝm Ɓakuli acemǝnana bwal Nggurcau ka ɗang. Gir mǝnana Nggurcau pakki ka, nda lǝmndǝa sǝm ulang do cauɓikea ma'sǝm.

Kǝrǝsti twalǝna atanni ma'sǝm

²¹ Sǝ a dyan ngga Ɓakuli lǝmndǝna njargula mǝnana aɓwana nǝ̀ duk amǝɓoarne abani nǝi ka, pa a tarǝia andǝ pak gir mǝnana Nggurcau bang ngga ɗang, kǝla mǝnana Nggurcau mala Musa andǝ amǝ'ɓangna mala Ɓakuli nakun amuri ɗiɗyal ka.

²² À nǝ̀ pǝlǝ sǝm, sǝm nǝ̀ duk amǝ'cauɓoarna aban Ɓakuli ace paɓamur sǝm aban Yesu Kǝrǝsti. Mǝnia ka anggo sǝ pa nǝ koyana mǝnana paɓamuri aban Kǝrǝsti ka, tàrban pa kàm ɗang.

²³ Acemǝnana koyan ngga pangŋǝna cauɓikea, sǝm kat ka sǝm gattì doɓoarɓwa mala Ɓakuli.

²⁴ Kat andǝ amani ka, Ɓakuli nǝ ɓwamuru male, nyesǝ sǝm, sǝm duk amǝ'cauɓoarna. Yì ka, pak mǝnia ka nǝ bu Kǝrǝsti Yesu, mǝnana akmúr sǝm ngga.

²⁵ Ɓakuli pa Yesu ɓǝ̀ sukki nkile ace mǝnana nǝ mǝno ka, aɓwana nǝ̀ kum twalban cauɓikea. Aɓwana mǝnana à paɓamuria aban Yesu ama pa yilǝmi, sukki nkile acea ka, Ɓakuli nyesǝnia amǝ'cauɓoarna na abani. Mǝnia yì nkila à sukki ka, lǝmndǝ ama Ɓakuli ka mǝ'cauɓoarna na, acemǝnana arǝ anza mǝnana ɗiɗyal ka, pak munyi nǝ aɓwana, tsǝk kir ce acauɓikea malea ɗang.

²⁶ Pak mǝnia ka ace lǝmndǝ do mǝsǝcau male a nza mǝnia adyan ngga, ace mǝnana yì nǝ ɓamuri ka, ɓǝ̀ duk mǝ mǝsǝcau, sǝ nǝ̀ tsǝk amǝ'cauɓikea kat mǝnana à pà ɓamuria aban Yesu ka, ɓǝa duk amǝ'cauɓoarna abani.

²⁷ Sǝm nǝ̀ nggori ado ama sǝm pangŋǝna kǝgir mǝnana tsǝa sǝ Ɓakuli ak sǝm ngga le? Awo, nggori pà kàm ɗang! Sǝ́ nda ace mana sǝ Ɓakuli ak sǝm? Nda acemǝnana sǝm kpata Nggurcau male ka le? Awo! Ɓakuli ak sǝm acemǝnana sǝm earnǝi, sǝm pa ɓamur sǝm aban Kǝrǝsti ka.

²⁸ Ace mani ka, sǝm duk amǝ'cauɓoarna aban Ɓakuli acemǝnana sǝm pa ɓamur sǝm ngga, pa ace bwal Nggurcau ɗang.

²⁹ Sǝ ana raka, Ɓakuli ka, mala amǝ Yahudi na nǝmurǝia le? Yì ka, Ɓakuli mala acili anzali na kat gbal re? E, nda acea.

³⁰ Sǝ acemǝnana Ɓakuli na mwashat amur aɓwana kat ka, kǝ tsǝk aɓwana ɓǝa pǝlǝ amǝ'cauɓoarna, yi mana ɓǝa pà ɓamuria aban Kǝrǝsti ka, ko amǝ Yahudi, ko aɓwana mǝnana amǝ Yahudi na raka.

³¹ Sǝ acemǝnana sǝm darrina arǝ pa ɓamuru aban Kǝrǝsti ka, lǝmndǝ ama Nggurcau ka sǝm turni le? Awo, ko bǝti! Aɓa mǝsǝcau ka, sǝm puna anzǝm Nggurcau.