Amǝ Roma 2 - Maləmce Məfele mala Ɓakuli: Kurcau Məbəshe

Ɓashi mǝɓafoe mala Ɓakuli amur cauɓikea

¹ We ka, a kǝ twali ama a nǝ́ pakki amǝno yì aɓwana ka ɓashi, sǝ a nda kǝla yia nǝ ɓealɓikea, a panǝ kun nacau ɗang! Ɓǝ̀ we ka a na ama yia ka amǝ'ɓealɓikea na ɓǝa pea wia tanni ka, a ndaban pakki ɓamuro ɓashi, acemǝnana we mana a kǝ ɓashi aɓea ɓwana ka, kǝ àkǝ̀ gir nì na gbal a pakkiyi ka.

² Sǝm sǝlǝna ama Ɓakuli aɓa pe male mala kpata mǝsǝcau ka, nǝ̀ ɓashi koyana mǝnana pakkiyi a'ulang agir mǝnana ani ka.

³ Mǝnana a kǝ ɓashi aɓwana ace pakki amǝnia yì agir ka, a kǝ sǝni kǝla a nǝ api ɓashi mala Ɓakuli le, yi mana kǝ àkǝ̀ gir nì na a pakkiyi gbal ka?

⁴ We ka, a sǝn nggea ɓwamuru, andǝ twal gandǝa, andǝ munyi mala Ɓakuli mǝnana ndanǝi a rǝo raka re? Mǝnia ka kǝgir na abano re? A sǝlǝ ado ama ɓwamuru male ka nda ace mǝnana nǝ̀ nyesǝo wu pwanzali abani, wu nying buo arǝ cauɓikea ka re?

⁵ Sǝ acemǝnana we ka a ndanǝ murcandǝa, a ɓinǝ nying buo arǝ cauɓikea ka, a nda rǝ rambǝi ɓamuro candǝna tanni. Acemǝnana pwari mala bumlulla na kǝ yiu ka, mǝnana ɓashi mǝɓafoe mala Ɓakuli nǝ̀ lǝmndǝ rǝì ka.

⁶ Ɓakuli nǝ̀ ɓashi koyana le ka amur gir mǝnana pak ka.

⁷ Aɓwana mǝnana à lidǝmbǝa nǝ pe mǝɓoarne sǝ à kǝ alta ɓoarɓwa, andǝ gulo, andǝ do api-lú nǝban Ɓakuli ka, Ɓakuli nǝ̀ pea wia yilǝmu mǝnana málá male pà kàm raka.

⁸ Sǝ bumlulla andǝ bumpina male ka nǝ̀ sulǝo amur amǝ'earce ɓamuria, andǝ amǝɓinǝ kpata mǝsǝcau ace gya ata ɓealɓikea.

⁹ Nggea tanni nakam andǝ rǝpina amur aɓwana mǝnana à lidǝmbǝa nǝ gya aɓa ɓealɓikea ka. Nǝ̀ tite nǝ ɓwa Yahudi sǝ ɓwa mǝnana ɓwa Yahudi na raka.

¹⁰ Sǝ aɓwana mǝnana à kǝ pak mǝɓoarne ka, ɓoarɓwa andǝ gulo andǝ dorǝpwala mala Ɓakuli nǝ̀ sulǝo amuria. Tite nǝ ɓwa Yahudi sǝ ɓwa mǝnana ɓwa Yahudi na raka.

¹¹ Mǝnia ka nda acemǝnana Ɓakuli ka, kǝ tàrban ɗang.

¹² Aɓwana mǝnana amǝ Yahudi na ɗang sǝ à surǝ Nggurcau mala Ɓakuli mǝnana pe Musa raka, ɓǝa pak cauɓikea ka à nǝ̀ kiɗikea. Ɓashi malea ka, pà nǝ̀ pang nǝ Nggurcau mala Ɓakuli mǝnana à gilǝì nǝ gilǝe ka ɗang. Sǝ aɓwana mǝnana à surǝ Nggurcau ka, à nǝ̀ ɓashia wia nǝ gir mǝnana Nggurcau na ka.

¹³ Sǝ pa ace ok Nggurcau nǝmurǝì sǝ ɓwa nǝ̀ duk mǝɓoarne aban Ɓakuli ɗang, nda a tarǝia andǝ pak agir mǝnana Nggurcau bang ngga.

¹⁴ Ko nggearǝ aɓwana mǝnana amǝ Yahudi na ɗang, mǝnana à pà nǝ́ Nggurcau mala Ɓakuli raka, à kǝ̀ lǝmndǝa ama Nggurcau mala Ɓakuli nakam a ɓabumia. Acemǝnana ɓǝ̀ ɗenyicau malea lǝmndǝia wia gir sǝ à pe, sǝ karǝ nǝ cau mǝnana Nggurcau bang ngga, yia ka à dumǝna nggurcau mala ɓamuria, kat andǝ amani ama à pànǝ Nggurcau raka.

¹⁵ À lǝmndǝi aɓa pe ama Nggurcau mala Ɓakuli ka à gilǝni a ɓabumia, sǝ ɓabumia andǝ ɗenyicau malea ka, à kǝ lǝmndǝia wia ko à ɓwarkina, ko à nda ban pak mǝɓoarne.

¹⁶ Sǝ mǝnia ka nda Cau Amsǝban mǝnana ǝn nggǝ hamnǝi ka, ama pwari na kǝ yiu ka, mana Ɓakuli nǝ̀ ɓashi aɓwana amur aɗenyicau ɓa-sǝmbǝrǝa malea nǝ bu Yesu Kǝrǝsti.

Amǝ Yahudi andǝ Nggurcau mala Musa

¹⁷ We mǝnana a kǝ tunǝ ɓamuro ama a nda ɓwa Yahudi, a kǝ guli arǝ Nggurcau sǝ a kǝ nggori nǝ Ɓakuli.

¹⁸ A surǝna rǝgir mǝnana Ɓakuli earkiyi ce ama wu pak ka; a surǝna rǝ mǝsǝcau acemǝnana à kanino anggurcau male.

¹⁹ A ndanǝ sǝlǝe kàngkàng ama a nda mǝbwalgara mala ante, sǝ a nda tǎlaban mala aɓwana mǝnana à do aɓa pǝndǝa ka.

²⁰ A kǝ sǝni kǝla a nǝ duk mǝkwarkir amǝ ɗwanyi sǝlǝe andǝ mǝkania amuna gir aɓa njar mala Ɓakuli, acemǝnana surǝgir andǝ mǝsǝcau kat ka ndakam aɓa Nggurcau ka.

²¹ We mǝnana a kǝ kani aɓwana gir ka, palang sǝ a pà nǝ́ kani ɓamuro ɗang? A banggi aɓwana ama ɓǝa kǝa iun'i ɗang, sǝ we nǝ ɓamuro ka, a kǝ iun'i re?

²² A na ama ɓǝa kǝa nongnǝban a nza nǝ doɓala ɗang, sǝ we ka a kǝ pak cauɓikea nongnǝban a nza nǝ doɓala re? A kǝ ɓinǝce peri ata ankúl, sǝa ma a kǝ pakturo nǝ agir mǝnana à iuwia nǝ iuwe a ndà mala alú ka re?

²³ A kǝ nggori ama a surǝna rǝ Nggurcau mala Ɓakuli, sǝa ma à kǝ pe wi gulo ɗang, acemǝnana à kǝ pár Nggurcau male.

²⁴ Pà ɓà sǝ Malǝmce bangŋa ama, “Ace cau ma'wun, wun amǝ Yahudi sǝ aɓwana mǝnana arǝ acili anzali ka à kǝ pak ce Ɓakuli ɓà” ɗang.

²⁵ Kasǝ-ɓatau ka ndanǝ gir mǝɓoarne ate ɓǝ̀ wu kǝ kpata Nggurcau mala Ɓakuli ka. Sǝ ɓǝ̀ wu kǝ pár Nggurcau mala Ɓakuli ka, wu dumǝna kǝla weama à kasǝa wun ɓatau ɗang.

²⁶ Sǝ aɓwana mǝnana amǝ Yahudi na raka, ɓǝa kpata Nggurcau mala Ɓakuli ka, Ɓakuli pa nǝ̀ twalia kǝla weama à kasǝnia wia ɓatau re?

²⁷ Mǝsǝcau ka, nda mǝnana ama aɓwana mǝnana à kasǝ ɓatea raka, mana à bwal Nggurcau mala Ɓakuli ka, à nǝ̀ mak wun nǝ ɓashi, wun amǝ Yahudi mana à kasǝ ɓata wun, wu ndanǝ Nggurcau mala Ɓakuli, sǝ wu kǝ kpate raka.

²⁸ Duk ɓwa Yahudi mǝɓafoe ka, pà acemǝnana ɓwa ka à ɓǝlì a tau mala amǝ Yahudi, ko acemǝnana à kasǝi wi ɓate ka ɗang.

²⁹ Awo pa anggo ɗang, ɓwa Yahudi mǝɓafoe ka, nda ɓwa mǝnana ɓabumi ka à nggaɗini, nrě gilǝkina andǝa Ɓakuli; sǝ mǝno ka turo mala Bangŋo mala Ɓakuli na, kpata Nggurcau na ɗang. Ɓwa kǝla mǝno ka, ɓwangsǝban male kǝ pur aban ɓwapǝndǝa ɗang, kǝ pur nǝban Ɓakuli.