Amǝ Roma 15 - Maləmce Məfele mala Ɓakuli: Kurcau Məbəshe

Wu pwasǝbum aɓwana

¹ Sǝm mǝnana sǝm ndanǝ rǝcandǝa ka, ɓoaro ɓǝ̀ sǝm bwali aɓwana mǝnana à gatti ka, ce sǝm lǝmndǝ earce ɓamuru ɗang.

² Koyan aɓalǝ sǝm ngga ɓǝ̀ kǝ̀ ɗenyi nǝ ɓi mǝ'murkala, sǝ ɓǝ̀ kǝ̀ pakki wi mǝɓoarne mǝnana nǝ̀ loasǝi aɓa paɓamuru ka.

³ Ko nggearǝ Kǝrǝsti ka dukdo pwasǝbum ɓamuri ɗang. Kǝla mǝnana Malǝmce bang ngga, “Asangban mala aɓwana mǝnana à sangŋo ka, We Ɓakuli, à sulǝna a muram.”

⁴ Agir mǝnana à gilǝia kat aɓa Malǝmce ɗiɗyal ka, à gilǝia ace kwarkir sǝm, ace mǝnana nǝ ɓakɓabum andǝ munyi mǝnana sǝm nǝ̀ kumo aɓa cau mala Malǝmce ka, sǝm nǝ̀ dum nǝ tsǝkɓalǝu.

⁵ Sǝ Ɓakuli mǝnana pākiyi gandǝrǝu andǝ girikiban ngga, ɓǝ̀ pa wun ɓabum dotarǝu arǝarǝ wun, wu kǝ kpata ulang pe mala Kǝrǝsti Yesu.

⁶ Sǝ anggo ka, wun a tarǝ wun kat ka, wu nǝ̀ ɓwangsǝ Ɓakuli, yì Tar Mǝtala sǝm Kǝrǝsti Yesu, nǝ giu mwashat.

Cau Amsǝban ace aɓwana mala anzali kat

⁷ Ace mani ka, wu ak rǝarǝ wun, kǝla mǝnana Kǝrǝsti ak wun ngga, ace mǝnana mǝnia ka, nǝ̀ yinǝì Ɓakuli gulo.

⁸ Mǝ nda aban bangga wun ama, turo mala Kǝrǝsti mǝnana yi pak ka, pè ace amǝ Yahudi ace lǝmndǝ ama Ɓakuli ka mǝ'mǝsǝcau na arǝ apacau male mǝnana pa aban akea ka.

⁹ Ɗǝm ngga Kǝrǝsti pak ture ace mǝnana aɓwana mala acili anzali ka, à nǝ̀ ɓwangsǝ Ɓakuli ace ɓwamuru male. Malǝmce ka bangŋǝna ama, “Ace mǝnia ka mǝ nǝ ɓwangsǝo aɓalǝ aɓwana mala acili anzali. Mǝ nǝ tukia anggyal ɓwangsǝ lullǝo.”

¹⁰ Malǝmce ɗǝm ngga bangŋa ama, “Wun aɓwana mala acili anzali, wu pak banɓoarnado a tarǝ wun, wunǝ aɓwana mala Ɓakuli.”

¹¹ Nyar ɗǝm ngga bangŋa ama, “Wun aɓwana mala acili anzali kat, wu ɓwangsǝki Mǝtalabangŋo. Wun aɓwapǝndǝa kat, wu ɓwangsǝkì!”

¹² Ɗǝm ngga, Ishaya bangŋa ama, “Mǝkà Jeshi nǝ̀ yiu; nǝ̀ yia duk murǝm, amur aɓwana mala acili anzali. Aɓwana mǝnana amǝ Isǝrayila na raka, à nǝ̀ tsǝk ɓalǝia a rǝì.”

¹³ Ɓǝ̀ Ɓakuli mǝpà tsǝkɓalǝu lumsǝ wun nǝ banɓoarnado, andǝ dorǝpwala, aɓa paɓamuru ma'wun abani, ace mǝnana ɓǝ̀ wu lumsǝ nǝ tsǝkɓalǝu nǝ bu rǝcandǝa mala Bangŋo Mǝfele.

Turo Mishan mala Bulǝs aban aɓwana arǝ anzali

¹⁴ Wun amǝ'eambǝam, mim nǝ ɓamuram ngga ǝn sǝlǝna nǝma wu lumsǝna nǝ pe mǝɓoarne, wu ndanǝ sǝlǝ kat, wu nǝ̀ gandǝ kania rǝwun.

¹⁵ Mim ngga aɓa cautera mǝnia ka, ǝn bangga wun cau bwāng amur aɓea gir, ɓangciu pa a rǝam ɗang, ace kasǝɓalǝ wun. Ən gilǝ mǝnia ka ace ɓwamuru mala Ɓakuli mǝnana lǝmndǝam sǝ twalam

¹⁶ mǝ duk mǝturo mala Kǝrǝsti Yesu aban aɓwana mala acili anzali ka. Ɓakuli twalam ace mǝnana mǝ pak turo kǝla pǝris, aban hamnǝ bǝsa Cau Mǝɓoarne male. Sǝ aɓa mǝno anggo ka aɓwana mala acilia nzali ka ɓǝa duk ɓoro mǝnana gir-á na aban Ɓakuli, yia aɓwana mǝnana Bangŋo Mǝfele tarnia ace Ɓakuli ɓǝa duk amale ka.

¹⁷ Ace mani ka, ǝn nggǝ nggori nǝ Kǝrǝsti Yesu aɓa turo mem aban Ɓakuli.

¹⁸ Amuri ka, ǝn nggori nǝ kǝgir ɗang, she kǝ gir mǝnana Kǝrǝsti pe nǝ buam aban yinǝ aɓwana mala acili anzali, aban oki Ɓakuli nǝ cau mǝnana ǝn hamnǝi andǝ turo mǝnana ǝn pe aɓalǝia ka.

¹⁹ Amur mǝno ka, mǝ nǝ nggori nǝ agir-ndǝlǝki andǝ agir-gyambǝliban mǝnana Kǝrǝsti pea aɓa rǝcandǝa mala Bangŋo mala Ɓakuli ka. Anggo sǝ ǝn hamnǝ Cau Amsǝban mala Kǝrǝsti pupup aɓa gya mem kat, twal a Urǝshalima kya bwal a Ilirikum.

²⁰ Mǝnia ka nda cau mǝnana ǝn twal a ɓabumam ngga, ɓǝ̀ ǝn hamnǝ Cau Amsǝban mala Kǝrǝsti aban mǝnana à malaká oe kam raka, ace mǝnana mǝ ngga ɓakɓa amur kusǝɓǎ mala ɓe kǝ ɓwa ɗang.

²¹ Sǝ, kǝla mǝnana à gìlǝì aɓa Malǝmce ka: “Aɓwana mǝnana à malaká banggia wia cau male raka, à nǝ̀ sǝn mǝsǝcau male, sǝ aɓwana mǝnana à malaká ok raka, à nǝ̀ bwalte.”

²² Ɓafo ka, ǝn gandǝ kum dǝmbǝu ǝn yiu aban wun ɗang, acemǝnana mǝ nda aban hamnǝ cau arǝ amǝnia yia aban ngga.

Bulǝs tsǝa a ɓabumi nǝ̀ ká a Roma

²³ A dyan ngga, ɓe kǝgir uekam mǝnana mǝ nǝ pe a bu ka anzali mǝnia ka ɗang. Sǝa ma mǝ ndanǝ ɗenyi a ɓabumam arǝ apǝlǝa pas nǝma mǝ nǝ yiu aban wun.

²⁴ Ən kanìna mǝ nǝ pǝlǝa aban wun, ɓǝ̀ mǝ nǝ kutio aban ká a Sǝpen ngga. Mǝ nǝ sǝn wun, yale wu nǝ̀ tsǝktam aban ka abanì, anzǝm mǝnana ǝn dumǝna aban wun zuku ka.

²⁵ Sǝ ado ka, mǝ nda amur njar aban ká Urǝshalima nǝ gbasha aban amǝkpata Yesu mǝnana abanì ka.

²⁶ Acemǝnana amǝkpata Ɓakuli mǝnana a Masǝdoniya andǝ Akaya ka, à pa ɓoro nǝ banɓoarnado, ɓǝa kya pea amǝtǝr mǝnana à nda aɓalǝ amǝkpata Ɓakuli a Urǝshalima ka.

²⁷ Ban ɓoaria wia nǝ pâ mǝnia yì ɓoro ka, acemǝnana à sǝlǝna ama dumǝnia wia kǝla tangna mǝnana à nǝ̀ mbwe ka. Sǝ ɓǝa aɓwana mǝnana amǝ Yahudi na raka, à yì kum kāmbe ata amǝ Yahudi aɓalǝ atsǝkbu aɓa bangŋo ka, dumǝnia wia gbal ama ɓǝa pakki amǝ Yahudi turo nǝ agirkuma malea.

²⁸ Ɓǝ̀ ǝn pana mǝnia yì boalo, ǝn lumsǝna turo mǝɓoarne malea, sǝ ɓǝ̀ mǝ nǝ ká a Sǝpen ngga, mǝ nǝ kyangye mǝ nǝ sǝn wun peatu.

²⁹ Ən sǝlǝna nǝma ɓǝ̀ mǝ nǝ yiu aban wun ngga, mǝ nǝ yina wun nǝ tsǝkbu mǝgule mala Kǝrǝsti.

³⁰ Ən nggǝ zǝmbǝa wun, wun amǝ'eambǝam, aɓa lullǝ Mǝtalabangŋo Yesu Kǝrǝsti sǝ nǝ̀ earcearǝu mǝnana Bangŋo kǝ pa ka, wu bwalam nggam aɓa pak hiwi nǝ ɓabum wun kat aban Ɓakuli acem.

³¹ Wu pak hiwi ama, ɓǝ̀ ǝn api turo mǝɓike mala amǝ mgbikiru aɓa nzali Yahudi. Wu pak hiwi ɗǝm ama amǝkpata Ɓakuli mǝnana a Urǝshalima ka, ɓǝa kum ɓabum ak ɓoro mǝnana ǝn nggǝ kánia wia nǝi ka.

³² Anggo, nǝ eare mala Ɓakuli, mǝ nǝ yiu aban wun nǝ banɓoarnado mǝgule, sǝ sǝm nǝ̀ do a tarǝ sǝm kat nǝ bumpwasǝa.

³³ Adyan ngga, yì Ɓakuli, mǝtala dorǝpwala ɓǝ̀ do ata wun. Amin.