Amǝ Roma 14 - Maləmce Məfele mala Ɓakuli: Kurcau Məbəshe

Kǝa ɓashì mǝ'eambǝo ɗang

¹ Mǝkwaɗi mǝnana pànǝ rǝcandǝa aɓa paɓamuru male aban Ɓakuli raka, wu é, sǝ wu kǝa kutia makgir andǝi amur agir mǝnana aɓwana kat sǝ à eare amuri raka ɗang.

² Paɓamuru mala ɓeɓwa ka, eari wi ɓǝ̀ li gir mǝnana kat sǝni girlina na ka, sǝ ɓwa mǝnana gatti aɓa paɓamuru male ka, kǝ mbúgir na likiyi ka.

³ Ɓwa mǝnana kǝ li koya gir ka, ɓǝ̀ kǝa ɓǝsǝki ɓwa mǝnana kǝ li raka ɗang. Sǝ ɓwa mǝnana gbal kǝ li koya gir raka, ɓǝ̀ kǝa ɓǝsǝki ɓwa mǝnana kǝ li ka ɗang; acemǝnana Ɓakuli ka, angŋǝnia yia kǝm.

⁴ Sǝ a nda yan, mǝnana a nǝ ɓashì mǝturo-ɓala mala ɓeɓwa ka? Mǝturo-ɓala ka mǝtala-ɓala male na nǝ̀ kasǝi ɓashi mǝnana nǝ̀ lǝmndǝ kpa ko came male ka. Sǝ yì ka, nǝ̀ kum kusǝu-came, acemǝnana Mǝtalabangŋo nǝ̀ gandǝ ci ɓǝ̀ came.

⁵ Ɗǝm ngga, ɓeɓwa kǝ twal ɓe pwari nǝ gulo amur acilia apwari, sǝ ɓeɓwa ka kǝ twal apwari kat ka à nda mwashat. Koyan ngga ɓǝ̀ sǝlǝ ama ko ɓǝ̀ mǝye na twalo a sǝne male ka, ɓǝ̀ kpate anggo.

⁶ Aɓwana mǝnana à gusǝlǝ ɓe pwari ace peri aban Mǝtalabangŋo ka, à pa anggo ace pe Mǝtalabangŋo gulo. Aɓwana mǝnana à nǝ̀ gandǝ li ko ya ulang girlina nani ka, à pè ace gusǝlǝ Mǝtalabangŋo, acemǝnana à kǝ pakki Ɓakuli yàwá ace girline. Sǝ aɓwana mǝnana à ɓinǝ li ka aɓea girlina ka, à pa anggo gbal, ace pe Mǝtalabangŋo gulo, andǝ pak yàwá aban Ɓakuli.

⁷ Kǝɓwa pà aɓalǝ sǝm mǝnana dupi ɓamuri, ko a na raka, nǝ̀ wuki ɓamuri ka ɗang.

⁸ Ɓǝ̀ sǝm ndanǝ yilǝmu ka, nda ace gusǝlǝ Mǝtalabangŋo, sǝ ɓǝ̀ sǝm wu gbal ka, nda ace gusǝlǝ Mǝtalabangŋo. Lǝmndǝ ama, ko sǝm ndanǝ yilǝmu, sǝ ko sǝm wu ka, sǝm nda ka mala Mǝtalabangŋo.

⁹ Nda àkǝ̀ ce mǝnia sǝ Kǝrǝsti wú, sǝ lo nǝ yilǝmu, acemǝnana ɓǝ̀ duk Mǝtalabangŋo amur aɓwana mǝnana à wuna ka, andǝ aɓwana mǝnana à ndanǝ yilǝmu ka.

¹⁰ Sǝ we ado ka, palang sǝ a kǝ ɓashì mǝ'eambǝo? Palang sǝ a kǝ nyesǝ mǝ'eambǝo ɓà? Sǝm kat ka, sǝm nǝ̀ ngga came a ɓadǝm buno ɓashi mala Ɓakuli.

¹¹ Malǝmce bangŋa ama, “ ‘Mǝtalabangŋo kǝ na ama, Kǝla mǝnana kàngkàng mǝ ndakam nǝ yilǝmu ka,’ ‘koya nkūnu ka, nǝ̀ ɓun a ɓadǝmbǝam, sǝ koya lasǝu ka nǝ̀ bangŋa ama Mǝ nda Ɓakuli.’ ”

¹² Mǝno ka lǝmndǝ ama ko yana ata sǝm ngga, nǝ̀ bǝl kuni nǝ ɓamuri aban Ɓakuli.

Kǝa tsǝk mǝ'eambǝo ɓǝ̀ anndǝ ɗang

¹³ Ace mani ka, ɓǝ̀ sǝm nying ɓashì rǝarǝ sǝm. Ɓoaro male ka, ɓǝ̀ sǝm twali a ɓabum sǝm ama pà sǝm nǝ̀ pak ɓe kǝgir mǝnana nǝ̀ tsǝki amǝ'eamrǝarǝu gir annda, ko nǝ̀ tamsǝia aɓa kwaɗi malea ka ɗang.

¹⁴ Tārú mem sǝnǝ Mǝtalabangŋo Yesu ka, ǝn yi sǝlǝa, sǝ ǝn earǝna ama, kǝ girlina pa kàm mǝnana mǝɓane na nǝ ɓamuri ka ɗang; sǝa ma ɓǝ̀ ɓwa sǝni sǝ na ama girlina ka ɓoaro ɓǝ̀ li raka, abani ka dumǝna mǝɓane.

¹⁵ Ɓǝ̀ a tsǝk mǝ'eambǝo sǝ banɓiki wi nǝ girlina mǝnana a li ka, lǝmndǝ ama a kǝ pak gir aɓa earcearǝu ɗang. Kǝa eare girlina mǝnana a kǝ li ka, ɓǝ̀ tsǝk mǝ'eambǝo mǝnana Kǝrǝsti wú ace ka, ɓǝ̀ kiɗiki ɗang!

¹⁶ Kǝa nying gir mǝnana a twali mǝɓoarne na ka, ɓǝa ɓwana na mǝɓane amuri ɗang.

¹⁷ Acemǝnana Domurǝm mala Ɓakuli ka, cau mala li girlina na andǝ nuki agir ɗang. Nda ace do nǝ cauɓoarna, andǝ dorǝpwala, andǝ banɓoarnado aɓa Bangŋo Mǝfele.

¹⁸ Ɓwa mǝnana kat kǝ pakki Kǝrǝsti turo nǝ ulang mǝnia yì ɓealǝu ka, nǝ̀ kum akban mala Ɓakuli, sǝ aɓwana nǝ̀ earnǝi gbal.

¹⁹ Ace mani ka, ɓǝ̀ sǝm ɓariki arǝ pakki agir mǝnana à nǝ̀ yinǝ dorǝpwala andǝ dotarǝu mala ɓak rǝarǝ sǝm ngga.

²⁰ Wu kǝa kiɗiki turo mala Ɓakuli nǝ cau mala girlina ɗang. Agirlina kat ka amǝɓoarne na, sǝ ɓoaro ɓǝ̀ ɓwa li girlina mǝnana nǝ̀ tsǝk ɓeɓwa ɓǝ̀ kpa aɓa cauɓikea ka ɗang.

²¹ Nǝ̀ ɓoaribanì wu nying li nyama andǝ nu mùr ɓǝlanggun anap, andǝ koya gir nani kat mǝnana nǝ̀ tsǝk mǝ'eambǝo nǝ̀ kpa aɓa cauɓikea ka.

²² Ace mani ka, ɓǝ̀ ko mana sǝ nda gir mǝnana a earnǝi amur amǝno yì agir ka, ɓǝ̀ do a nre wun wunǝ Ɓakuli. Tsǝkbu mala Ɓakuli na amur ɓwa mǝnana panǝ múr-halǝkia arǝ pak gir mǝnana sǝlǝna ama nda pepe ka ɗang.

²³ Sǝ ɓwa mǝnana ɗenyicau male kǝ tuti arǝ li gir, sǝ kutia li gir nî ka, pangŋǝna cauɓikea, acemǝnana mǝno yì pě male ka, panǝ ɓabum mǝ'mǝsǝcau nì ɗang, sǝ gir mǝnana kat ɓwa pe, pa aɓa mǝsǝcau raka, cauɓikea na.