Amǝ Roma 13 - Maləmce Məfele mala Ɓakuli: Kurcau Məbəshe

Pagulo aban aɓwana mana a cia amur wun ngga

¹ Ko ya ɓwa ka ɓǝ̀ nyesǝ ɓamuri aɓata aɓwana mǝnana à pea wia gara yalban ngga, acemǝnana ɓe kǝ garamurǝm pà kàm mǝnana pur nǝ ban Ɓakuli raka ɗang; sǝ aɓwana mǝnana à bwalkiyi garamurǝm ado ka, Ɓakuli nǝ̀ cia.

² Ace mani ka, ɓwa mǝnana kat mgbicau a rǝia, ndarǝ mgbicau arǝ gir mǝnana Ɓakuli nǝ̀ kwaki te ka. Sǝ aɓwana mǝnana kat à mgbicau a rǝia ka, à nǝ̀ nunmbi ɓamuria ɓashi.

³ Ayalban ngga à cia ace pa ɓangciu aban aɓwana mǝnana à kǝ pak mǝɓoarne ka ɗang, she aban amǝ'ɓealɓikea. Ɓǝ̀ a kǝ́ earce ama a pà nǝ dum nǝ ɓangciu a rǝia raka, pak gir mǝnana mǝɓoarne na ka, sǝ yia ka à nǝ̀ ɓwangsǝo.

⁴ Amǝ'yalmuru ka, aɓwana na mǝnana Ɓakuli nǝ̀ cia ace pakko gir mǝɓoarne ka. Sǝ ɓǝ̀ a kǝ́ pak mǝɓane ka, dumǝna pup ɓangciu nǝ̀ pakko, acemǝnana à pania wia rǝcandǝa mala pàtanni. Yia ka amǝturo na mǝnana Ɓakuli cia ace pea amǝ pak mǝɓane tanni ka.

⁵ Ace mani ka, wu pa ɓamur rǝ wun aɓatea. Ko ɓǝ̀ pa ace ɓanggi kum pàtanni raka, wu pè ace mǝnana ɓabum wun ɓǝ̀ kǝa mak wun raka.

⁶ Ɗǝm ngga, nda gir mǝnana tsǝa sǝ wu kǝ mbwe boalo-cemi ka, acemǝnana yia ayalban ngga Ɓakuli nǝ̀ cia aɓa turo, sǝ boalo ka nda mǝnana nǝ̀ bwalia kam ɓǝà pa rǝcandǝa andǝ bumia arǝ turo mǝnana à pakkiyi kat ka.

⁷ Wu pea aɓwana kat, agir mǝnana à kǝ kpani ata wun ngga: wu pea wia boalo-cemi mala ɓamur rǝ wun andǝ boalo-cemi mala agirkuma ma'wun. Wu kǝ lǝmndǝia wia gusǝlǝban andǝ pagulo kat.

Lǝmndǝi arǝu earcearǝu

⁸ Wu kǝa eare ɓǝ̀ kǝɓwa kpata wun tangna nǝ kǝgir ɗang. She earcearǝu mǝnana dumǝna pup wu nǝ̀ lǝmndǝia rǝ wun ngga. Ɓwa mǝnana kǝ earce ɓi mǝ'murkala ka, lumsǝna Nggurcau mala Ɓakuli.

⁹ Anzongcau mǝnana ama, “Kǝa nongnǝ ɓwa mana wu pa doɓala wunǝi raka ɗang.” “Kǝa wal-lú ɗang.” “Kǝa iun'i ɗang.” “Kǝa sham gir mala ɓwa ɗang,” andǝ aɓea mǝnana kat à ndakam ngga, à nda à kpapia aɓa nzongcau mwashat ama, “Earce ɓeo mǝ'murkala kǝla mǝnana a earce ɓamuro ka.”

¹⁰ Earcearǝu pa nǝ̀ pakki kǝɓwa mǝɓane ɗang. Ace mani ka, ɓwa mǝnana ndanǝ earcearǝu arǝ aɓwana ka, nda rǝ lumsǝ anzongcau kat mǝnana aɓa Nggurcau mala Ɓakuli ka.

¹¹ Dumǝna pup wu nǝ̀ pa anggo, acemǝnana wu surǝna rǝ nza mǝnia sǝm nda a ɓalǝi ka. Pwari pangŋǝna mǝnana wu nǝ̀ loapi ntulo ka, acemǝnana amsǝban ma'sǝm yina ado tu, amur mǝnana sǝm tita pana ɓamur sǝm nǝi ka.

¹² Du málá nǝ̀ mala; ban málá nǝ̀ kwaro. Ɓǝ̀ sǝm nying pakki agir mala pǝndǝa, ɓǝ̀ sǝm oasǝ agirbura mala tǎlaban.

¹³ Ɓǝ̀ sǝm dukdo ɓealǝu ɓoarnsari kǝla aɓwana mǝnana à nda aɓa tǎlaban mala pwari ka. Pà aɓa nukiagir ko wal wale, andǝ kiɗiki mala nonggi nǝ rǝarǝu ko alta banɓoarnado mala pakki agir kǝsǝkya, andǝ munǝki-amunǝo ko mɓali ka ɗang.

¹⁴ A kun mani ka wu oasǝ Mǝtalabangŋo Yesu Kǝrǝsti arǝ wun, sǝ wu kǝa ká nǝ́ ɗenyicau ma'wun arǝ alita nggūrǝu njar mala loasǝ anpel male ɗang.