Amǝ Roma 12 - Maləmce Məfele mala Ɓakuli: Kurcau Məbəshe

Turo mala amǝkwaɗi aban Ɓakuli andǝ aɓwana

¹ Ace mani ka, wun amǝ'eambǝam, ǝn nggǝ ɓuakia rǝ wun, nǝ ɓwamuru mala Ɓakuli, wu pa rǝwun aban Ɓakuli, kǝla aɓoro mǝyilǝmui, mǝnana wu nǝ̀ duk amale, sǝ nǝ̀ pwasǝbumi ka. Mǝnia ka nda peri ma'wun mǝɓafoe abani.

² Wu kǝa kpata ɓealǝu andǝ kuncau mala mǝnia yì ɓanza ka ɗang. Wu ɗeki Ɓakuli ɓǝ̀ nggaɗi wun nǝ tsǝk ɗenyicau ma'wun ɓǝ̀ duk bǝshe. Anggo sǝ wu nǝ̀ gandǝ surǝ nê mala Ɓakuli, mǝnana mǝɓoarne na, andǝ mǝnana nǝ̀ duk gir-á abani, sǝ nda pepè ka.

³ Nǝ ɓwamuru mǝnana à pam ngga, ǝn nggǝ zǝmbǝi koyan ata wun ngga, ɓǝ̀ kǝa twal ɓamuri kǝrkǝr ɓǝ̀ kuti bancame male ɗang. Ɓǝ̀ ɗenyicau mala koya ɓwa ka, ɓǝ̀ karǝ arǝ paɓamuru male mǝnana Ɓakuli pe wi ka.

⁴ Kǝla mǝnana nggunrǝu ka abare na pas, sǝ koya bare ka turo male na ɗàng ngga,

⁵ anggo, aɓa Kǝrǝsti ka, sǝm mǝnana sǝm nda pas ka, sǝm dumǝna nggūrǝu mwashat, sǝ sǝm nda ace rǝarǝ sǝm.

⁶ Sǝm ndanǝ aɓoro ɗàngɗáng aɓa ɓwamuru mǝnana Ɓakuli pa sǝm ngga. Ɓǝ̀ mo yì ɓoro nda na gì Ɓakuli ka, pe anjari mǝnana karǝ arǝ paɓamuru mo ka.

⁷ Ɓǝ̀ pakkia aɓwana turo nda mo yì ɓoro ka, wu kǝ pe aɓa mǝsǝcau. Ɓǝ̀ mo ka kanigir na ka, wu kǝ kania aɓwana gir.

⁸ Ɓǝ̀ mo ka ɓakɓabum aɓwana na ka, wu kǝ pak turo ɓakɓabum. Ɓǝ̀ pabu nda mo yì ɓoro ka, wu kǝ pè nǝ ɓabumo mwashat. Ɓǝ̀ mo ka turo lidǝmbǝa nǝ aɓwana na ka, wu kǝ pe nǝ ɓabumpina. Sǝ ɓǝ̀ lǝmndǝ ɓwamuru nda mo ka, wu kǝ̀ lǝmndǝi nǝ banɓoarnado.

Do mala mǝkpata Ɓakuli aɓa earcearǝu

⁹ Earcearǝu ka, ɓǝà pè nǝ mǝsǝcau. Wu ginǝki ɓealɓikea, sǝ wu bwal gir mǝnana mǝɓoarne na ka kàngkàng.

¹⁰ Wu earce rǝarǝ wun nǝ earceban mǝ'mǝsǝcau nì. Ɓǝ̀ ban ɓoara wun arǝ pe rǝarǝ wun gulo.

¹¹ Ce wu duk amǝnkundǝr, amǝ'ɗwanyi rǝɓǝla arǝ turo ɗang, wu duk amǝ bumpina aɓa pakki Mǝtalabangŋo turo nǝ ɓabum wun kat.

¹² Wu dum nǝ banɓoarnado aɓa tsǝkɓalǝu ma'wun; wu dum nǝ munyi aɓa tanni; wu do aɓa pak hiwi ko ya pwari.

¹³ Wu kǝ gau gir ma'wun ace bwalia aɓwana mala Ɓakuli mǝnana à nda aɓa tǝle ka; wu kànì ak abǝri.

¹⁴ Wu tsǝki aɓwana mǝnana à kǝ pa wun tanni ka bu; wu tsǝkia wia bu, ce wu suia ɗang.

¹⁵ Wu pak banɓoarnado wunǝ aɓwana mǝnana à kǝ pak banɓoarnado ka; wu ɓua wunǝ aɓwana mǝnana à kǝ ɓua ka.

¹⁶ Wu do aɓa dotarǝu mala amǝ'eamrǝarǝu; wu kǝa twal ɓamur wun ɗang; wu dum nǝ earce kpapi ɓamuru wunǝ aɓwana mǝnana acili aɓwana twali à pà kun ɓe kǝgir raka. Wu kǝa twali kǝla wu kuti aɓwana nǝ sǝlǝe ɗang.

¹⁷ Ce wu nyesǝi kǝ ɓwa ɓealɓikea ace ɓealɓikea ɗang. Wu pak gir mǝnana nǝ̀ lǝmndǝì aɓwana kat pemǝɓoarne ma'wun ngga.

¹⁸ Ɓǝ̀ nǝ̀ gandǝ pa ka, wu dukdo aɓa dorǝpwala wunǝ aɓwana kat.

¹⁹ Wun amǝ'eambǝam mǝnana ǝn earkiyicea ka, wu kǝa pak mǝɓane a kun mǝɓane mǝnana à pakka wun ngga ɗang. Wu nyinggi Ɓakuli mbwe tangnakusǝu aɓa ɓashi male. Acemǝnana Mǝtalabangŋo bangŋa aɓa Malǝmce ama, “Mbweban a kuni ka mem na, mǝ nǝ mbwe.”

²⁰ A kun mani, kǝla mana Malǝmce na ka, “Ɓǝ̀ ɓio mǝbura na aɓa nzala ka, pe wi girlina; ɓǝ̀ mǝsamur wali ka, pe wi mur ɓǝ̀ nu. Aɓa pě anggo ka, a nǝ rambǝi wi nkalang bǝsa mǝ earke amuri.”

²¹ Wu kǝa eari ɓealɓikea ɓǝ̀ li murǝm amur wun ɗang, wu li murǝm amur ɓealɓikea nǝ pemǝɓoarne.