Amǝ Mishan 19 - Maləmce Məfele mala Ɓakuli: Kurcau Məbəshe

Bulǝs aɓa Afisu

¹ Mǝnana Apolo na aɓa Korinti ka, Bulǝs twal bǝri gya arǝ abuban, kya puro a Afisu. Abanì sǝ kum aɓea amǝkpata Yesu,

² sǝ ɗia ama, “Mǝnana wu pǝlǝ amǝ kpata Yesu ka, wu angŋǝna Bangŋo Mǝfele le?” À pe wi eare ama, “Awo, yale sǝm malaká ok ama Bangŋo Mǝfele nakam ɗang.”

³ Bulǝs ɗia ama, “Sǝ ya ulang batisǝma nani à pakka wun?” À pe wi eare ama, “Batisǝma mala Yohana.”

⁴ Pǝlǝa Bulǝs banggia wia ama, “Batisǝma mǝnana Yohana pak ka nda ace aɓwana mana à pwanzali, à nying acauɓikea malea ka. Sǝ ne amǝ Isǝrayila ama ɓǝa paɓamuria aban ɓwa mǝnana kǝ yiu a nzǝmi ka, mǝnana à tunǝki ama, Yesu ka.”

⁵ Lang à ongŋǝna anggo ka, pǝlǝa à pakkia wia batisǝma aɓa lullǝ Mǝtalabangŋo Yesu.

⁶ Pǝlǝa Bulǝs tsǝk bui amuria, kara Bangŋo Mǝfele sulǝo amuria, à nacau nǝ akún-takuli, sǝ à hamnǝ cau mala Ɓakuli.

⁷ Laki mala amǝnia yì aɓwana ka nda lum-nong-ɓari.

⁸ Anzǝm mǝno ka, Bulǝs twal zongŋo tārú kǝ wario aɓa ndakpapi, camarǝ ne aɓwana cau nǝ mǝsǝkang-kangŋa. Aɓa nakia cau andǝ aɓwana ka, kǝ ɓariki nǝ̀ nyesǝ ɓabumia arǝ do murǝm mala Ɓakuli amur aɓwana.

⁹ Sǝ aɓea aɓwana ka à candǝkicau à ɓinǝ paɓamuria, à kǝ naki acau mǝɓane amur Njar kpata Mǝtalabangŋo, a ɓadǝmbǝ aɓwana. Pǝlǝa Bulǝs ɗekia, pwan amǝkpata Yesu à o andǝia, sǝ a koya pwari ka kǝ sǝnggi ɓalǝ acau andǝia aɓa ndà-kanigir mala Tiranus.

¹⁰ Bulǝs lidǝmbǝa nǝ kanigir a mǝno yì ndà-kanigir ka, kya bwal pǝlǝa ɓari, sǝ ace mǝno ka aɓwana kat mana nǝ do a bu-nzali mala Asiya ka, amǝ Yahudi andǝ amǝ Gǝrik, à ok cau mala Mǝtalabangŋo.

Amuna-burana mala Sǝkeva

¹¹ Ɓakuli pak agir-ndǝlǝki mǝgule kǝrkǝr nǝ bu Bulǝs.

¹² Ko nggearǝ ahankici andǝ agir-nggurǝu mǝnana à je nggurǝ Bulǝs ka, à twalia à wari nǝia aban amǝ rǝkwana, sǝ akwano malea kara à mala, sǝ akukwar puri rǝia.

¹³ Aɓea amǝ Yahudi na kam mǝnana à kǝ gya arǝ aban, aban pusǝkia kukwar arǝ aɓwana ka. À ɓariki gbal ama à nǝ̀ pak turo nǝ lullǝ Yesu à nǝ̀ pusǝ akukwar pale, nǝ nea wia cau ama, “Ən nggǝ sa arǝ wun aɓa lullǝ Mǝtalabangŋo Yesu mǝnana Bulǝs kǝ hamnǝi ka, wu puro.”

¹⁴ Amuna-burana tongno-nong-ɓari mala Sǝkeva, Pǝris Mǝgule mala amǝ Yahudi, à nda à pakki mǝnia yì gir ka.

¹⁵ Sǝ a ɓe fara à nda aban pa anggo, pǝlǝa kukwar nea wia ama, “Ən surǝ Yesu, sǝ ǝn sǝlǝna ce Bulǝs; sǝ wun ngga, wu ndaka yana?”

¹⁶ Sǝ ɓwa mǝnana nǝ kukwar a rǝì ka, yàlle kpa kwaria, walkia nǝ walo ana, nǝ rǝcandǝa mana kuti malea ka. Kara à tur kusǝia a mire à nying ɓala male, nǝ anpenye a rǝia, nǝ ɓārǝia.

¹⁷ Aɓwana kat mǝnana à ndanǝ do a Afisu ka, amǝ Yahudi andǝ amǝ Gǝrik, à ok ce mǝnia yì gir ka, kara ɓangciu bwalia kat, sǝ lullǝ Mǝtalabangŋo Yesu kum gulo kǝrkǝr.

¹⁸ Pas aɓalǝ aɓwana mana à paɓamuria, à pǝlǝ amǝkpata Yesu ka, à yiu à yì bang ce pakkia gir ɓealɓikea malea kwas.

¹⁹ Aɓwana pas mǝnana ɗiɗyal ka à kǝ pakki agir swarkiban nǝ aɓuri ka, à yiu nǝ amalǝmce mala agir monzǝo malea, à yì pisǝia a bǝsa a ɓadǝmbǝ aɓwana kat. Lang aɓwana yi kpapiki aboalo agir mǝno à pisǝia kat ka, boale lumsǝ mǝsǝboalo azǝrfa á-lumi-tongno.

²⁰ Anggo nǝ rǝcandǝa sǝ cau mala Mǝtalabangŋo gulo, akiban kǝrkǝr.

Loasǝban aɓa Afisu

²¹ Anzǝm amǝno yì agir ka, Bulǝs kum ɗenyicau a ɓabumi ama ɓǝ̀ kar aɓalǝ abu-nzali Masǝdoniya andǝ Akaya sǝ ɓǝ̀ kutio ɓǝ̀ kyane a Urǝshalima. Na ama, “Anzǝm mana ɓǝ̀ ǝn warina a Urǝshalima ka, dumǝnam púp mǝ nǝ kutio, mǝ ká gbal a Roma.”

²² Nda gir mana tsǝa sǝ tasǝ Timoti andǝ Arasǝtus a Masǝdoniya, yia ɓari aɓalǝ aɓwana mana à kǝ bwali wi turo ka. Sǝ yì ka, do a bu-nzali Asiya banì ɓine sau zuku.

²³ Àkǝ̀ ɓalǝ anonggeo mǝno ka, nggea loasǝban lo kǝrkǝr aɓa Afisu amur cau mala kpata Njar mala Mǝtalabangŋo.

²⁴ Mǝnia yì loasǝban ngga tite nǝ ɓe mǝntul mana lullǝi ama Demitǝrǝyus, mǝ tulki amuna kurǝm mana à nda kǝla ndàperi mala ma-ɓǝ̀nzál Atimis, nǝ bolo-ntul azǝrfa ka. Mǝnia yì nggali ka kǝ yinǝia amǝturoe boalo kǝrkǝr.

²⁵ Pǝlǝa Demitǝrǝyus tunǝ kpapi mala aɓwana kat mǝnana à nda aɓa ulang mǝno yì turobu malea ka, sǝ nea wia ama: Wun aburana, wu sǝlǝ ama kume ma'sǝm ngga àkǝ̀ ban mǝnia yì turo sǝ sǝm nggǝ kumi.

²⁶ A dyan ngga, wu nda wu kǝ sǝni sǝ wu kǝ oe nǝ akir wun, gir mǝnana mǝnia yì ɓwa à tunǝki ama Bulǝs kǝ pe ka. Nda ban na ama agir mǝnana aɓwapǝndǝa pe nǝ buia sǝ à kǝ peri abania ka, agir na à nǝ̀ peri abania ɗang ko bǝti, sǝ nda kǝ̀ pwan ɓabum ɓwapǝndǝa ka. Tsǝngŋǝnia à ɓwarkini tanjar akani aɓa Afisu andǝ bu-nzali Asiya kat.

²⁷ Ɓangciu ma'sǝm ngga nda mǝnana ama, limo ma'sǝm no nǝ̀ kum lullǝu mǝɓane. Sǝ nggearǝ mǝno na nǝmurǝì ɗang, ndàperi mala ma-ɓǝ̀nzál mǝgulo mǝnana à kǝ peri abani, yì Atimis gbal ka, nǝ̀ duk gir mǝɓane; sǝ Atimis, yì ma-ɓǝ̀nzál mǝnana ko yan a Asiya andǝ ɓanza kat kǝ peri abani ka, gulo male nǝ̀ kpa!

²⁸ Lang à ongŋǝna cau man ngga, kara bumia lul kǝrkǝr, à loasǝ gia a kuli à kǝ na ama, “Atimis mala amǝ Afisu ka, mǝgulo na!”

²⁹ Zuku ka, loasǝban mǝno akinaban, ɓa nggeala kat lo cam nǝ kusǝì. Ɓwabunda nyāri, à pur nǝ mire aban ká a bankpapi mala nggeala. À bwal aburana ɓari, Gayus andǝ Aristakus, aɓi amǝ gya mala Bulǝs, mǝnana à pur a Masǝdoniya sǝ à yiu ka. À nunggia à um nǝia a bankpapi.

³⁰ Bulǝs nǝ ɓamuri ka earce ama nǝ̀ ká a ɓadǝmbǝ aɓwabunda aban kpapi nǝ̀ bangcau nǝia, sǝ amǝkpata Ɓakuli pǝrki.

³¹ Nggearǝ aɓwana-mǝgule mala la, mana à gyajam mala Bulǝs na ka, à teri wi cau ama, ɓǝ̀ kǝa na ama nǝ̀ kutio aɓa ban-kpapi ɗang.

³² Ɓwabunda mana ram ngga, à twalo à zurǝki nǝ loasǝban: aɓea aɓwana ka à kǝ na cau bang-bang amur ɓe gir, sǝ aɓea aɓwana gbal ka à kǝ na malea ɗang. Yale banggulea ka à surǝ gir mǝnana tsǝa sǝ à yiu à yì ram ngga ɗang.

³³ Aɓea amǝ Yahudi ramta Alizanda a dǝmbǝa a ɓadǝm ɓwabunda ɓǝ̀ bǝlia wia ɓa ceì. Pǝlǝa Alizanda lǝmndǝì ɓwabunda bu ɓǝa duk kunia piu, sǝ ɓariki nǝ̀ na kuni, amur tǝr gir mana kumban ngga.

³⁴ Lang amǝ Gǝrik mǝnana aɓa ɓwabunda yi sǝlǝ ama yì ka, ɓwa Yahudi na ka, kara à loasǝ gia kpǝm kunia mwashat aban na cau mǝ'mwashati ama: “Atimis mala amǝ Afisu ka, mǝgulo na!” Twalia bu-pwari ɓari à ndarǝ na mǝnia yì cau ka.

³⁵ A masǝlǝate ka, mǝgilǝgir mala nggeala ɓariki tsǝk ɓwabunda à do kunia piu. Pǝlǝa na ama: Wun amǝla sǝm amǝ Afisu, ɓanza kat ka sǝlǝ ama nggeala mǝgule Afisu ka nda mǝyal ndàperi mala Atimis mǝgule andǝ tali rǝì mǝnana pur nǝ kuli sǝ yi kpa a nzali ka.

³⁶ Kǝɓwa pà kàm nǝ̀ tǝmce amǝnia yì agir ka ɗang. Ace mani ka, wu nyesǝ ɓabum wun, wu kǝa pak kǝgir amur mire ɗang.

³⁷ Wu yina nǝ amǝnia yì aburana ɓari ka akani, kat andǝ amani ama, à ɓun kun ndàperi ma'sǝm, à iu kǝgir kam ɗang, ko à na mǝɓane amur ma-ɓǝ̀nzál ma'sǝm raka.

³⁸ Ɓǝ̀ Demitǝrǝyus andǝ amǝturo male ndanǝ cau mana à nǝ̀ na amur kǝɓwa ka, sǝm ndanǝ amǝɓashi andǝ apwari do ɓashi; ɓǝa ndanǝ ɓe kǝgir mana kwania arǝ kǝɓwa ka, à nǝ̀ gandǝ yinǝ ce.

³⁹ Sǝ ɓǝ̀ ɓe kǝgir na kam ɗàng mǝnana wu earce wu nǝ̀ yinǝi ka, dumǝna púp à nǝ̀ na ce aban amǝ ɓashi, a ban-kpapi mala amǝla kat.

⁴⁰ Kǝla mǝnana nda kam ado ka, mǝnia yì gir mǝnana kumban yalung ngga, tsǝngŋǝna sǝm aɓa ɓangciu ama, amǝtala nzali nǝ̀ gandǝ tsǝka sǝm cau mala loasǝ munǝo mala ɓwabunda. Acemǝnana sǝm pànǝ kun nacau sǝm nǝ̀ na tǝr gir mana yinǝ mǝnia yì came mala la andǝ zurǝki ka ɗang.

⁴¹ Lang mǝgilǝgir mala nggeala malǝna na cau man ngga, pǝlǝa mesǝ aɓwana mana à ram ngga à o.