Amǝ Mishan 12 - Maləmce Məfele mala Ɓakuli: Kurcau Məbəshe

À wal lú Jemis sǝ a oasǝ Bitǝrus a ndàkurban

¹ A baku mǝno ka Murǝm Hirǝdus mǝnana à tunǝki ama Agǝripa ka tita pea aɓea amǝkwaɗi aɓa ikǝlisiya tanni.

² Bwal Jemis, mǝ'eam Yohana, kasǝ meali nǝ nggeabyau.

³ Lang sǝn mǝnia yì gir pe ka pwasǝ bum aɓwana-mǝgule mala amǝ Yahudi ka, nyartu bwal Bitǝrus gbal. (Mǝnia ka pe a pwari Lamsan mala Bǝredi mǝnana yis pa'ari raka.)

⁴ Lang bwalǝna Bitǝrus ka pǝlǝa tsǝa à kya oasǝi a ndàkurban. Tamsǝ asoje arǝ abanì ine ɓǝa yallí, sǝ koya banì ka ndanǝ asoje ine. Kànì mala Hirǝdus ka nda mǝnana ama nǝ̀ pakki Bitǝrus ɓashi lú a ɓamǝsǝ ɓwapǝndǝa anzǝm Lamsan Yalimuru.

⁵ Anggo ka, Bitǝrus na a ndàkurban, sǝ amǝkwaɗi ka à came arǝ pak hiwi nǝ ɓabumia kat aban Ɓakuli ata cau male.

Gir'ndǝlǝki nǝ́ puro mala Bitǝrus a ndàkurban

⁶ Àkǝ̀ bu du mǝnana ɓǝ̀ ban fana ka Hirǝdus nǝ̀ pakki Bitǝrus ɓashi ka, Bitǝrus na ntulo, abuí andǝ akusǝi ka à tākia nǝ ansolo, sǝ nda a nre ka asoje ɓari. Aɓea asoje came à kǝ yal kun ndàkurban.

⁷ Ɓalǝu ama nǝ̀ kasǝ ka, nggea tǎlaban karara yi angŋǝna ɓa ndàkurban, sǝ mǝturonjar mala Mǝtalabangŋo puro yi came a ɓadǝm Bitǝrus. Pǝlǝa dǝurǝki Bitǝrus a mkpamtari, loasǝi a ntulo, sǝ ne wi ama, “Lo a kaurǝa!” Kara ansolo puri bu Bitǝrus à sukkio a nzali.

⁸ Pǝlǝa mǝturonjar ne wi ama, “Oasǝ agir a rǝo, sǝ wu oasǝ ankura.” Bitǝrus pakki anggo kat. Mǝturonjar ne wi ama, “Ado ka, mak nggea-daura murɓe mo sǝ yiu atam.”

⁹ Bitǝrus lo puri ɓa ndàkurban aban ká ata mǝturonjar. Amǝno anggo kat ka, kǝ twali kǝla lorǝo na, ko panǝ sǝlǝe ama mǝsǝcau na ɗang.

¹⁰ À kya kuti ban amǝyal kun nda mǝdǝmbe, à kya kuti ɓaria. À nǝ̀ ngga bwal nggea kunɓala-bolo mǝnana soa nggeala ka, kara kunɓala-bolo man mǝnbia wia nǝ ɓamuri. Pǝlǝa à puro aban o amur njarmǝgule, ɓālǝi ama nǝ̀ kasǝ ka, mǝturonjar ndǝrmina.

¹¹ Anzǝm man ngga Bitǝrus nyare aɓa sǝlǝe male, sǝ na ama, “She ado sǝ kǝ kpakam ama mǝsǝcau na! Mǝtalabangŋo tasǝ mǝturonjar male ɓǝ̀ amsǝam a bu Hirǝdus sǝ aɓalǝ agir mǝnana kat aɓwana-mǝgule mala amǝ Yahudi kuro a muram ngga!”

¹² Lang mǝnia ka kpani wi ka, kara soa ɓala mala Maryamu, nggea Yohana Markus. Akàm sǝ amǝkwaɗi pas rambǝa aban pak hiwi.

¹³ Pǝlǝa Bitǝrus wal kunɓala, sǝ muna-ɓala mǝnana à tunǝki ama Roda ka, yiu aban loasǝi wi kun ɓala.

¹⁴ Lang ongŋǝna gi Bitǝrus na ka, kara nying mǝn kun ɓala, nyar nǝ mire, nǝ banɓoarnado, kya ne ko ya ɓwa ka ama Bitǝrus na aban came a nza a kunɓala.

¹⁵ À banggi wi ama, “Ɓamuro pǝlǝ nǝ pǝlǝa!” Sǝ lang muna ɓine, cam kingging ama Bitǝrus na ka, nda à na ama, “Ɓǝ̀ nda na ka, mǝturonjar mala Ɓakuli mǝnana yálkiyi ka nda.”

¹⁶ Sǝ Bitǝrus camarǝ walki kunɓala. Lang à yì mǝnǝni wi kunɓala sǝ à sǝni ka, à pak ndali.

¹⁷ Bitǝrus pǝlǝa nea wia nǝ bui ama ɓǝa duk kunia piu, pǝlǝa bǝlia wia ɓālǝi lang sǝ Mǝtalabangŋo pusǝì, pur nǝi a ndàkurban ngga. Nea wia ama, ɓǝa banggi Jemis andǝ amǝ'eamrǝarǝu amǝnia yì agir ka, pǝlǝa nyia kutio o a ɓe ban.

¹⁸ Nǝ dǝmbari ka, asoje amǝ yalban ngga ban twalo zurǝì a rǝia, à pǝlǝ ɓalǝia ɓà amur mana kumban sǝ Bitǝrus ka à sǝni raka.

¹⁹ Hirǝdus tsǝa ɓǝa alte, sǝ a kumi ɗang. Mgbi ka asoje amǝyalban nǝ ɗikiban, pǝlǝa tsǝa ama ɓǝa wal-luia. Anzǝm man ngga, Hirǝdus nying nzali Yahudi kutio o kya do a Kaisariya zuku.

Lú mala Hirǝdus

²⁰ Hirǝdus ka bumi lullo arǝ amǝ Taya andǝ amǝ Sidon, nda sǝ à wario a tarǝia aban yi à nǝ̀ ngga gilǝki cau, acemǝnana kǝ girlina mana a nzali mala Hirǝdus ka nda à akiyi kam ngga. Lang à kumǝna gbasha aban Bǝlastus, muna ɓala mǝnana murǝm earnǝi ka, pǝlǝa à zǝm cau mala dotarǝu aɓa dorǝpwala.

²¹ A pwari mǝnana Hirǝdus kasǝi à nǝ̀ dum nǝi ka, oasǝ adaura murǝm-ɓwa male, pǝlǝa eauwe do a bunomurǝm sǝ na cau nǝ aɓwana mǝnana à ram ngga.

²² Aɓwana loasǝ gia à kǝ noki ama, “Man ngga gi ɓe kǝ ɓakuli na, gi ɓwapǝndǝa na ɗang!”

²³ Àkǝ̀ banì, mǝturonjar mala Ɓakuli kwak Hirǝdus turi a nzali, acemǝnana twal gulo Ɓakuli ka. Anggwaso li, kara wu.

²⁴ Sǝ cau mala Ɓakuli ka came arǝ lidǝmbǝa, ɓwapǝndǝa pas pǝlǝ amǝkwaɗi.

²⁵ Lang Barnabas andǝ Sawul malǝna turo mishan malea a Urǝshalima ka, pǝlǝa à nyare a tarǝia andǝ Yohana, mana ɓe lullǝi ama Markus ka.