Amǝ Kolosi 4 - Maləmce Məfele mala Ɓakuli: Kurcau Məbəshe

Akwarkiru

¹ Wun amǝtala-ɓala, wu bwal aguro ma'wun nǝ mǝsǝcau, wu kǝ pakkia wia mǝɓoarne. Wu ɗenyi ama wun gbal ka wu ndanǝ mǝtala-ɓala akano a kuli.

² Wu pa ɓamur rǝ wun arǝ pak hiwi, sǝ aɓa pe ka wu dum nǝ parkiru andǝ ɓabum mala pak yàwá aban Ɓakuli.

³ Wu pakka sǝm hiwi gbal ama ɓǝ̀ Ɓakuli pa sǝm dǝmbǝu mala bang cau male, ɓǝ̀ sǝm hamnǝ cau-ɓa-sǝmbǝrǝa male mǝnana amur Kǝrǝsti ka. Àkǝ̀ ce mǝnia yì cau ka, sǝ mǝ nda a ndàkurban ado.

⁴ Wu pak hiwi ama, mǝ hamnǝ mǝnia yì cau ka puret-puret, kǝla mǝnana ɓoaro mǝ hamnǝi ka.

⁵ Wu dum nǝ kwaro a do ma'wun aɓalǝ aɓwana mǝnana à ak Cau Amsǝban raka, sǝ koya dǝmbǝu mǝnana wu kum ngga, wu kǝa kiɗiki ce ɓà ɗang.

⁶ Cau mǝnana nǝ̀ puro a kun wun ngga, ɓǝ̀ pa aɓa ɓuɓɓuka mala ɗenyi nǝ ɓwa, sǝ ɓǝ̀ ɓoari ɓwapǝndǝa o, ace mǝnana anggo sǝ wu nǝ̀ surǝ lang sǝ wu nǝ̀ pǝlǝi koyan ngga cau, mana ɓǝa ɗi wun ngga.

Masǝlǝata akwarkiru andǝ amakkun mala Bulǝs

⁷ Gyajam mǝɓoarne ma'sǝm Tikikus nǝ̀ bǝla wun ce gir mǝnana mǝ nda a ɓalǝi ka kat. Yì ka, mǝ'eamrǝarǝu mǝɓafoe na aɓa turo, ɓwa na mǝnana à nǝ̀ guli a rǝì ka, sǝ ɓi'sǝm guro na aɓa turo mala Mǝtalabangŋo.

⁸ Ən tasǝi aban wun, ace mǝnana ɓǝ̀ na wun gir mǝnana sǝm nggǝ pak kani ka, sǝ ɓǝ̀ ɓak ɓabum wun.

⁹ Ndya ɗǝm ǝn nggǝ tasǝ Onisǝmu ka. Yì gbal ka, mǝ'eamrǝarǝu mǝɓafoe na mǝnana à nǝ̀ guli a rǝì ka, nggearǝ yì ka, kǝ ɓwa ma'wun na. Yì andǝ Tikikus ka à nǝ̀ bangga wun gir mǝnana kat kǝ kumban kani ka.

¹⁰ Aristakus mǝnana nda kani atam a ndàkurban ngga, kǝ makka wun kun, anggo gbal sǝ Markus mǝnana kèa mwashat andǝ Barnabas ka, kǝ makka wun kun. Kǝla mǝnana à bangŋǝna wun cau amuri yì Markus ka, ɓǝ̀ yina ka wu gingsǝi caca.

¹¹ Yesu mǝnana à tunǝki ama Yustus ka, kǝ makka wun kun gbal. Kǝ amǝnia yì aburana ka, à nda ka amǝ Yahudi aɓalǝ aɓeam amǝturo ace Domurǝm mala Ɓakuli. À ɓak ɓabumam nǝ rǝcandǝa.

¹² Abafǝras, mǝnana ɓi'wun na aɓa dotarǝu mala amǝ'eamrǝarǝu akana aban wun, sǝ ɗǝm ngga guro mala Kǝrǝsti Yesu na ka, kǝ makka wun kun. Ko aya pwari ka kǝ pak hiwi ace wun nǝ mǝsǝcau, kǝ zǝmbǝi Ɓakuli ɓǝ̀ pa wun rǝcandǝa, sǝ ɓǝ̀ wu lumsǝ nǝ mǝsǝ'kang'kangŋa, mǝnana wu nǝ̀ nggǝ kpata kani mala Ɓakuli kat ka.

¹³ Mǝ nǝ gandǝ na kuni ama kǝ pak turo kǝrkǝr ace wun, sǝ ace amǝkwaɗi mǝnana a Lawodisi andǝ Herapoli ka.

¹⁴ Luka, mǝsonzǝo mǝnana sǝm earkiyi ace raka, andǝ Dimas, à kǝ makka wun kun.

¹⁵ Wu pa makkun mem aban amǝ'eamrǝarǝu mǝnana a Lawodisi ka, nggeamurǝmi ka mǝ'nggaula sǝm Nimfa, andǝ amǝkpata Yesu mǝnana à kǝ dapi a ɓala male ka.

¹⁶ Anzǝm mǝnana wu ɓalna mǝnia yì cautera ka, wu tasǝia amǝkpata Yesu mǝnana a Lawodisi ka ɓǝa ɓalli gbal. Sǝ wun gbal ka wu ɓal malea mǝnana ǝn gilǝia wia ka.

¹⁷ Sǝ wu banggi Arkipus mǝnia yì cau ka: “Tsǝkiro arǝ turo mǝnana Mǝtalabangŋo po ka, masǝlǝte.”

¹⁸ Mim Bulǝs, mǝ nda ǝn gilǝ mǝnia yì makkun ngga nǝ buam. Wu ɗenyi ama mǝ nda a ndàkurban. Ɓwamuru mala Ɓakuli ɓǝ̀ do ata wun.