Amǝ Kolosi 2 - Maləmce Məfele mala Ɓakuli: Kurcau Məbəshe

¹ Ən nggǝ earce ɓǝ̀ wu surǝ ulang tanni mǝnana ǝn nggǝ tanni ace wun, andǝ amǝkpata Yesu mǝnana a Lawodisi, andǝ amǝkpata Yesu kat mǝnana à malaká sǝnam à surǝam raka.

² Ən nggǝ pak mǝnia ace mǝnana ɓǝa kum ɓak ɓabum, sǝ ɓǝa duk mwashat aɓa earcearǝu. Ən nggǝ earce nǝma ɓǝa kum lumsǝo mala ɓabumcandǝa ama à bwalǝna ta kane mala Ɓakuli mana sǝmbǝrǝ ce ɗiɗyal ka, yì Kǝrǝsti nǝ ɓamuri.

³ Aɓa Kǝrǝsti sǝ gǝna mala sǝlǝe andǝ surǝe mala Ɓakuli kat sǝmbǝrǝa.

⁴ Ən nggǝ na wun mǝnia yì cau ka ace mǝnana ɓǝ̀ kǝɓwa ɓǝ̀ kǝa swarki wun nǝ kunɓoarna ɗang.

⁵ Ko ɓǝ̀ do ama ǝn pa ata wun aɓa nggūrǝu raka, mǝ nda ata wun aɓa bangŋo. Sǝ ban kǝ ɓoaram arǝ gya a tarǝu ma'wun, andǝ came mala paɓamuru ma'wun nǝ rǝcandǝa aban Kǝrǝsti.

Kum-ɓamuru andǝ bǝsa yilǝmu aɓa Kǝrǝsti

⁶ Sǝ adyan ngga, kǝla mǝnana wu angŋǝna Kǝrǝsti Yesu, dumǝna mǝtala wun ngga, wu lidǝmbǝa nǝ kpate.

⁷ Ɓǝ̀ nlerǝ wun ɓǝ̀ ko aɓa Kǝrǝsti, sǝ ɓǝ̀ duk kusǝɓa mala do ma'wun. Ɓǝ̀ paɓamuru ma'wun kum rǝcandǝa kǝla mǝnana à kania wun ngga, sǝ wu lumsǝ nǝ pak yàwá.

⁸ Wu kǝa eari kǝɓwa ɓǝ̀ swarki wun nǝ makgir amur surǝe male mǝlime mana ɓe kǝ mǝɓoarne pà kàm a ɓalǝi raka. Ulang mǝno yì amakgir ka à kǝ pur aɓa kanigir mana à kumi a bu ɓwapǝndǝa, andǝ abangŋo mala ɓanza man, mǝnana mala Kǝrǝsti na raka.

⁹ Acemǝnana lumsǝo mala Ɓakuli kat aɓa nggūrǝu ka, aɓa Kǝrǝsti sǝ pa.

¹⁰ Sǝ wun gbal ka, wu lumsǝna ace dotarǝu ma'wun wunǝa Kǝrǝsti, yì ɓwa mǝnana nda amur amǝ'yalmuru andǝ amǝ-gara kat ka.

¹¹ Kǝrǝsti gbal ka twalǝna wun ɓealǝu mala cauɓikea, kǝla mǝnana kasǝ-ɓatau pusǝ nggū arǝ nggūrǝu ka.

¹² Wun ngga, à oasǝna wun a ɓembe wunǝa Kǝrǝsti nǝ batisǝma mǝnana à pakka wun ngga, sǝ aɓa batisǝma ɗǝm ngga à loasǝna wun aɓa bǝsa yilǝmu, nǝ guli ma'wun arǝ rǝcandǝa mala Ɓakuli mǝnana loasǝ Kǝrǝsti a ɓembe ka.

¹³ Ɗiɗyal ka, wu wú ata cau mala acauɓikea ma'wun, andǝ aɓealǝu mala cauɓikea ma'wun mǝnana à gau wun wunǝia raka. Sǝ adyan ngga Ɓakuli pana wun yilǝmu aɓa Kǝrǝsti, lang yi twala sǝm ban cauɓikea ma'sǝm kat ka.

¹⁴ Yi panzǝki ɓashi mǝnana à gilǝì amur sǝm ngga, yi kasǝki kat andǝ anzongcau mala nggurcau mǝnana à bwal sǝm nǝi ka; twalia umia kya gballia a nggun-gangndi.

¹⁵ Yi ak agirbura mala amurǝma andǝ arǝcandǝa mala abangŋo. Pea wia kǝsǝkya a banfana bwāng, nǝ limurǝm male amuria amur nggun-gangndi.

¹⁶ Ace mani ka, wu kǝa eari kǝɓwa ɓǝ̀ tsǝka wun nzongcau amur agir mǝnana wu nǝ̀ li ko wu nǝ̀ nu ka, ko amur cau mala pakki alamsan mala aɓea kunacau, ko mala came mala bǝsa zongŋo, ko mala Pwari Sabbat ɗang.

¹⁷ Amǝnia yì agir ka, ayilǝmi agir mǝɓafoe mǝnana à nda rǝ yiu ka nda. Sǝ Kǝrǝsti nǝ ɓamuri ka nda kǝ ɓafoe.

¹⁸ Wu kǝa eare ɓǝ̀ kǝ ɓwa mǝ'earce pakkiagir nyesǝmuru mǝ'nyirì andǝ mǝperi aban amǝturonjar nyesǝ ce wun ɓà nǝ na cau gula ama sǝna na sǝn amur amǝnia yì agir ka ɗang. Acau mala ɓwa kǝla mǝno ka amǝɓane na, acemǝnana yì ka, lumsǝ nǝ twalɓamuru, sǝ ɗenyicau male ka, mala earce gir mala ɓamuri na.

¹⁹ Mǝnia yì ɓwa ka pa ɗǝm aɓa kpapi andǝ Kǝrǝsti, mǝnana nda mur nggūrǝu kat, yia amǝkpata Yesu ka ɗang. Acemǝnana Kǝrǝsti ka nda kùr múr amǝkpate abanɓwáná, kǝla mǝnana mazo kpakǝri amú ka. Kǝ linǝia, à kǝ gulo aɓa rǝcandǝa mala Ɓakuli.

²⁰ Wun ngga, wu wuna wunǝa Kǝrǝsti sǝ à panzǝna wun a bu rǝcandǝa mala abangŋo mala mǝnia yì ɓanza ka. Sǝ ace mana sǝ wu kǝ dukdo kǝla weama wu ndaka mala ɓanza ka? Man tsǝa sǝ wu kǝ kpata anzongcau mala amǝɓanza mǝnana ama:

²¹ “Kǝa bwal man ɗang. Kǝa ok mǝno a lasǝo ɗang. Kǝa je amǝnia ka ɗang?”

²² A'ulang amǝnia yì anggurcau ka, kǝ akanigir mala ɓwapǝndǝa na amur agir mǝnana, aɓa pakturo nǝia ka, à pà nǝ̀ sau ɗang à nǝ̀ kiɗiki ka.

²³ A'ulang anggurcau man ngga à lǝmndǝa kǝla sǝlǝe na aɓalǝia, acemǝnana à kǝ earce ama ɓǝ̀ ɓwa ɓǝ̀ oasǝ ɓamuri aɓalǝia ɓǝ̀ peri aban amǝturonjar, ɓǝ̀ ɓinǝì ɓamuri do aɓa ɓǝlkya andǝ banɓoarnado, sǝ ɓǝ̀ pe nggūrǝi tanni. Sǝa ma amǝno ka à pà nǝ̀ tsǝk ɓwa nǝ̀ limurǝm amur asuno mǝɓane mala nggūrǝi ɗang.