Amǝ Ibǝru 9 - Maləmce Məfele mala Ɓakuli: Kurcau MəbəshePeri aɓata kurcau mǝ'e 1 Mǝno yì kurcau mǝdǝmbe, mǝnana nda anre Ɓakuli andǝ amǝ Isǝrayila ka, ndanǝ angguracau male mala peri, andǝ ban mǝfele male gbal kani a ɓanza. 2 À loasǝ Taragula nǝ a ɓalǝi ɓari. A ɓālǝi mǝdǝmbe ka, gir tamsǝ pitǝla na kam andǝ tebǝl, sǝ agbatali bǝredi mǝnana à tària ace Ɓakuli ka. Mǝnia yì ɓālǝi ka, nda mǝnana à tunǝki ama Ban Mǝfele ka. 3 Anzǝm lagir mǝnana gau nre ban ngga, ɓaria ɓālǝi na kam mǝnana à tunǝki ama Ban Nggea Mǝfele. 4 Aɓa mǝnia yì ɓālǝi ka, gyangŋan zǝnariya ace pisǝ muru mǝ'rǝmɓoarne na kam, sǝ akwati mǝnana à tunǝi ama Akwati mala Kurcau Mǝ'e ka. Yì akwati ka à tasǝ ɓālǝi andǝ nzǝmi kat nǝ zǝnariya mǝɓoarne. Aɓa mǝnia yì akwati ka, manna na kam aɓa muna bàng-zǝnariya, sǝ gara mala Haruna mǝnana tò mbui ka. Aɓa yì akwati ɗǝm ngga akpamgbǝlang tali na kam ɓari mǝnana Ɓakuli gilǝ Anzongcau Lum male amuria ka. 5 Amur Akwati ka, à tsǝk aɓǝ̀nzál mala acerup, mǝnana à nda à lǝmndǝ ɓoarɓwa mala Ɓakuli ka. Acerup mǝn ankpamtaria amur Akwati, à kùmsǝ mur ban-do mala ɓwamuru. Sǝa ma amǝnia yì agir ka pa sǝm nǝ̀ gandǝ bǝlki ɓalǝia mwashat-mwashat ado ɗang. 6 Ɓǝ̀ à tsǝngŋǝna amǝnia yì agir kat anggo ka, apǝris kǝ kutio aɓa ɓālǝi mǝdǝmbe mala Taragula pwari-pwari ace pakki aturo malea. 7 Sǝ ɓaria ɓālǝi, yì Ban Nggea Mǝfele kat ka, kǝ Pǝris Mǝgule na nǝmurǝì kutikiyi kam ngga. Sǝ mǝno yì kutio mala Pǝris Mǝgule ka, nda kusǝ mwashat ɓǝrɓǝr aɓa pǝlǝa mwashat. Ɗǝm ngga, she nǝ̀ ká nǝ nkila a bui nǝ̀ ngga pā aban Ɓakuli ace acauɓikea male sǝ ace acauɓikea mala acili aɓwana, mǝnana à pak aɓa ɗwanyi sǝlǝe ka. 8 Bangŋo Mǝfele na ban pak turo nǝ́ amǝnia yì agir ka, ace lǝmndǝa sǝm ama njar kutio aɓa Ban Nggea Mǝfele ka, à malaká mǝnni peatu ɗang, à pà mǝnana Taragula mǝdǝmbe na kam piu aban came ka. 9 Amǝnia yì agir kat ka à nda ban lǝmndǝa sǝm gir arǝ nza mǝnia dyan ngga. Ɓālǝi ka nda mǝnana ama aɓoro andǝ agir-nkila mǝnana apǝris pākiyi ka, à gandǝ panzǝ aɓwana mǝnana à kǝ yiu a peri ka, arǝ múr-halǝkya malea ɗang. 10 Mǝnia ka nda acemǝnana yì njar mǝ'e ka nda àkǝ̀ ce akunacau mala agir mana nggurcau eari aɓwana ɓǝ̀a li ko ɓǝ̀a nu andǝ amana earia wia raka, andǝ anzongcau ɗàngɗáng mala laki arǝu andǝ agir. Sǝ amǝno ka angguracau mala pakki agir mǝnana mǝsǝu kǝ sǝnia ka nda, ba pwari mǝnana Ɓakuli yi kwakita bǝsa njar ka. Amsǝban aɓa nkila mala Yesu Kǝrǝsti 11 Mǝnia ka lǝmndǝ ama, Kǝrǝsti yina kǝla Pǝris Mǝgule mala agir mǝɓoarne mǝnana à nda kani ado ka. Yì ka, kutina aɓa Taragula mǝno mǝnana kuti mǝdǝmbe nǝ gulo andǝ lumsǝo ka; Taragula mǝnana bu ɓwapǝndǝa nǝ pe raka, sǝ pà gbal aɓa ɓanza mǝnia Ɓakuli pusǝì ka ɗang. 12 Kǝrǝsti kutio aɓa Ban Nggea Mǝfele kat kusǝ mwashat ɓǝrɓǝr. Pà nǝ́ nkila mala ambulpǝndǝa andǝ alo-nda ace pà gir-ɗarǝa sǝ kuti ɗang. Nda nǝ́ nggearǝ nkila male sǝ kutio. Sǝ anggo sǝ yì nǝ́ ɓamuri ka, kumba sǝm panzǝban aɓa cauɓikea andǝ tangnakusǝu male. Panzǝ sǝm nǝ panzǝban mǝnana pà nǝ̀ mal raka. 13 Aɓata njar mǝ'e ka, aɓwana mana à pǝndǝkina a nê mala Nggurcau mala Musa ka, à karǝa à nǝ̀ peri aban Ɓakuli ɗang. Kat andǝ amani ka ɓǝa watsǝkia nǝ nkila mala ambulpǝndǝa andǝ mala ajamnda, andǝ tú mala lo-nda mǝnana à pisǝì kǝring ngga, mǝno ka nǝ̀ lea à nǝ̀ kum ɓoarnsari a nggūrǝu. 14 Sǝ gir mǝnana kuti mǝno kuko ka, nkila mala Kǝrǝsti nǝ̀ pè. Kǝrǝsti mǝnana cauɓikea pa a rǝì raka, pa ɓamuri kǝla gir'nkila aban Ɓakuli, aɓa rǝcandǝa mala Bangŋo mǝnana tè malkiyi raka. Nkila male nǝ̀ lak ɓabum sǝm aɓalǝ aturo mǝpǝndǝke mǝnana à nǝ̀ ká nǝ sǝm a lú ka. Sǝ anggo ka, sǝm nǝ̀ peri aban Ɓakuli mǝyilǝmuì. 15 Nda gir mǝnana tsǝa sǝ Kǝrǝsti duk mǝkutio a nre-rǝarǝu mala bǝsa kurcau a nre Ɓakuli andǝ aɓwapǝndǝa ka. Ado ka kǝ yinǝ aɓwana mana kat à tunǝia ka, ɓǝa ak liɓala mǝnana tè pà nǝ̀ mal raka, a bu Ɓakuli mǝnana angŋa dǝmbǝa náná ama nǝ̀ pea wia ka. Mǝnia ka nǝ̀ gandǝ pa acemǝnana Kǝrǝsti wú ace panzǝia aɓata ɓashi mala acauɓikea mǝnana à pea aɓata kurcau mǝ'e ka. 16 Amur cau mala eare mala ɓwa ace liɓala mǝnana à kǝ gilǝì nǝ gilǝe ka, kaniama à nǝ̀ pangŋǝna turo nǝi ka, she à nǝ̀ lǝmndǝ ama mǝtala-ɓala ka wuna pa andǝa mǝsǝi ɗang. 17 Acemǝnana cau liɓala ka, à kǝ pangŋǝna turo nǝi ɗang, ɓǝ̀ mǝtala-ɓala na kam nǝ yilǝmu ka. 18 Nda gir mǝnana tsǝa sǝ ko nggearǝ kurcau mǝdǝmbe ka, à pangŋa turo nǝi ɗang, she lang à sukkina nkila mala agirkusǝu ka. 19 Anzǝm mǝnana Musa malǝna banggi aɓwana kat koya nzongcau mala nggurcau ka, pǝlǝa twal nkila mala alo-nda andǝ mala ambulpǝndǝa, andǝ múr, sǝ watsǝkia amur malǝmce mala nggurcau. Watsǝkia gbal amur aɓwana kat, nǝ́ ɗàndíng mǝbangŋe andǝ mbú bondo-hisop. 20 Sǝ na ama, “Mǝnia yì nkila ka, nda tsǝkiyi kurcau mǝnana Ɓakuli tsǝka wun ɓǝ̀ wu kpate ka, aɓa turo.” 21 Anggo gbal sǝ watsǝki nkila arǝ Taragula andǝ koya gir mǝnana à kǝ pangŋa turo nǝi ace peri a ɓālǝi ka. 22 Mǝsǝcau ka, nggurcau earce ama bangula agir kat ka, ɓǝa lea nǝ ɗarǝban nǝ nkila; sǝ ɓǝ̀ ɗarǝban nǝ nkila pà kàm raka, twalban cauɓikea pa kàm ɗang. Kǝrǝsti pà ɓamuri ace twalban cauɓikea 23 Amǝnia yì agir mǝnana à ndaka ayilǝmi agir mǝɓafoe mǝnana a kuli ka, dumǝna ama à nǝ̀ lea nǝ amǝnia yì agir-nkila ka. Sǝ agir mǝɓafoe mǝnana a kuli ka, dumǝna pup ɓǝa lea nǝ gir'nkila mǝnana kuti gir'nkila mala agirkusǝu ka. 24 Pà aɓa ban mǝfele mǝnana bu ɓwapǝndǝa nǝ pè ka sǝ Kǝrǝsti kuti ɗang. Mǝno ka yilǝmi gir mǝɓafoe na. Yì ka, kutio a nggearǝ kuli, ace lǝmndǝ rǝì ado a ɓadǝm Ɓakuli a kúnì sǝm. 25 Kutio male a kuli ka, pà ace mǝnana nǝ̀ nggǝ ɓǝsǝlǝki pà ɓoro mala ɓamuri, kǝla mǝnana Pǝris Mǝgule a kani a ɓanza kǝ kutio aɓa Ban Nggea Mǝfele koya pǝlǝa, nǝ nkila mǝnana nkile na raka ɗang. 26 Ɓǝ̀ nda anggo ka, ɓǝ́ Kǝrǝsti camǝna arǝ nu tanni tutu, twal a tita ɓanza yi bwal adyan. Sǝa ma ado ka, yi pusǝrǝi kusǝ mwashat ɓǝrɓǝr a masǝlǝata anza, ace mǝnana ɓǝ̀ twalban cauɓikea, nǝ́ pa mǝnana pà ɓamuri duk gir'nkila ka. 27 Sǝ kǝla mǝnana à tsǝngŋǝna ama ɓwa nǝ wu kusǝ mwashat, sǝ anzǝm man ngga nǝ̀ came a ɓadǝm ɓashi ka, 28 anggo gbal, Kǝrǝsti wu kusǝ mwashat ɓǝrɓǝr ace mǝnana ɓǝ̀ twalban cauɓikea mala ɓwapǝndǝa pas ka. Nǝ̀ ngga yiu ɗǝm, sǝ pà ace twalban cauɓikea ɗang, nda ace mǝnana nǝ̀ yia amsǝ aɓwana mǝnana à kǝ kundǝi nǝ rǝɓǝla ka. |
© Wycliffe Bible Translators, Inc. and © The Nigeria Bible Translation Trust 2016
Nigeria Bible Translation Trust