Amǝ Ibǝru 8 - Maləmce Məfele mala Ɓakuli: Kurcau MəbəshePǝris Mǝgule mala bǝsa kurcau 1 Mugula cau mǝnana sǝm nakiyi ka, nda mǝnana ama, sǝm ndanǝ mǝno yì Pǝris Mǝgule mǝnana nda aban do a bu mǝli mala bunomurǝm mala Ɓakuli mǝnana karban kat ka, a kuli. 2 Akano sǝ kǝ pak turo male mala Pǝris Mǝgule, aɓa Ban Nggea Mǝfele, yì Taragula mǝɓafoe mǝnana Mǝtalabangŋo nǝ̀ ɓè, ɓwapǝndǝa na raka. 3 Sǝ acemǝnana koya Pǝris Mǝgule ka, à twali ace mǝnana ɓǝ̀ kǝ pà aɓoro andǝ agir-nkila aban Ɓakuli ka, anggo gbal sǝ mǝnia yì Pǝris Mǝgule ma'sǝm ngga, dumǝna ama she nǝ̀ pang nǝ ɓe gir a bui, mana nǝ̀ pà ka. 4 Ɓǝa bangŋa ama nda kani a ɓanza ka, ɓǝ́ pà nǝ̀ duk pǝris ɗang, acemǝnana apǝris na kam mǝnana à kǝ pāki aɓoro mana Nggurcau kani ka. 5 Ban mǝnana apǝris kǝ pak turo-pǝris kam ngga, kanikigir na arǝ mǝɓafoe sǝ yilǝmi mǝɓafoe na mǝnana akano a kuli ka. Nda gir mǝnana tsǝa sǝ lang Musa nǝ̀ loasǝ Taragula ka, Ɓakuli nunkiri ama: “Sǝlǝ ama koya gir ka a pangŋǝni kǝla mǝnana ǝn lǝmndǝo amur nkono ka.” 6 Sǝ turo-pǝris mǝnana à pè Yesu ka, karmur turo-pǝris mǝ'e nǝ ɓoaro. Kǝla mǝno gbal ka, bǝsa kurcau mǝnana Yesu yinǝi nǝban Ɓakuli aban aɓwana male ka, kuti mǝ'e. Nda acemǝnana yì bǝsa kurcau ka, à kwakite amur apacau ace agir mǝnana à ɓoari mala kurcau mǝ'e ka. 7 Ɓǝa bangŋa ama kurcau mǝdǝmbe ka, kǝ mǝɓane pà kàm a rǝì raka, ɓǝ́ à pà nǝ̀ na ce nggaɗe nǝ́ ɓaria ɗang. 8 Sǝ Mǝtalabangŋo Ɓakuli ka, kum amǝ Isǝrayila nǝ́ mǝɓane mala ɗwanyi kpata nggurcau mǝdǝmbe, sǝ na ama: “Ən bangŋǝna, apwari na à kǝ yiu ka, mǝnana mǝ nǝ kurcau mǝbǝshe nǝ amǝ Isǝrayila, sǝ nǝ ɓala mala Yahuda. 9 Pà nǝ̀ pǎ kǝla kurcau mǝnana ǝn pe sǝnǝ akea ka ɗang. Mǝno yì kurcau ka ǝn pê a pwari mǝnana ǝn bwalia a garabuia, sǝ ǝn pusǝia aɓa nzali Masar ka. Sǝa ma à cam nǝ mǝsǝcau amur kurcau mǝnana ǝn pangŋǝnia ka ɗang, nda sǝ ǝn pǝlǝia wia nzǝmam ngga.” Mǝtalabangŋo nǝ̀ nakiyi mǝnia yì cau ka. 10 “Adyan ngga, mǝnia nda kurcau mǝnana mǝ nǝ pang nǝ ɓala mala Isǝrayila, aɓalǝ apwari mǝno ka. Mǝtalabangŋo nǝ nakiyi mǝnia yì cau ka. Mǝ nǝ tsǝk angguracau mem aɓa ɗenyicau malea, sǝ mǝ nǝ gilǝia a ɓabumia. Mǝ nǝ duk Ɓakuli malea, sǝ yia ka, à nǝ̀ duk aɓwana mem. 11 Kǝ ɓwa pà nǝ̀ kanî ɓi mǝ'murkala, ko mǝ'eambǝi ama, ‘Surǝ Mǝtalabangŋo’ ɗang, acemǝnana ko yana atea ka nǝ surǝam, twalo aban ɓwamǝkyauwe kya bwal ban ɓwamǝgule. 12 Sǝ mǝ nǝ twalia wia ban aɓealɓikea malea, ɓalǝam pà nǝ̀ kasǝ ɗǝm arǝ acauɓikea malea ɗang.” 13 Tunǝo mǝnana Ɓakuli tunǝ mǝnia yì kurcau ama “Mǝbǝshe” ka, lǝmndǝ ama mǝdǝmbe ka, Ɓakuli tsǝngŋǝni pǝlǝna mǝ'e. Sǝ gir mǝnana nda rǝ e sǝ turo male pà kàm ɗǝm raka, te mala nǝ̀ ndǝrmi. |
© Wycliffe Bible Translators, Inc. and © The Nigeria Bible Translation Trust 2016
Nigeria Bible Translation Trust